2015年9月26日 星期六

浪人日本料理@灣仔

旅行blog寫晒,又係時候搵返食探出來撐場攝下時間!不過今次喱餐其實又同旅行有少少關係,因為係基爾同D旅行鐵腳去聚餐。



山長水流去到灣仔食喱間浪人,最主要係貪佢不設時限。今時今日食日式放題多數係限兩粒鐘甚至個半鐘,實在太趕唔符乎基爾hea傾hea食原則,所以雖然遠係遠D都訂喱間啦!



基爾對灣仔駱克道一帶完全無甚概念,好彩兜了幾個圈之後都搵到。6點上到去發現班旅行腳未到,基爾先入座霸佔有利的卡位,貪佢有半截日本垂簾有點私隱,也唔會好似坐出面大廳咁人聲嘈雜,事實果然無揀錯,因為7點後出面坐滿人真係嘈到似街市,完全無可能悠閒傾密偈。



十數分鐘後人腳陸續到齊拿拿林剔紙開餐。先談談價錢,話明係放題兼唔限時任坐,收費自然較限時限刻趕人走果隻貴少少。基爾假期去人均HKD$330,閒日平$30左右,如果同一般酒店dinner buffet比較要平呢!上圖係先來的小食和沙律類:日本枝豆、甜薯和中華沙律。



至於點菜方面都係同一般日式放題一樣剔紙仔,這間浪人提供的菜式紙仔選擇頗多共7款,要讚的是令人煩厭的漏單情況不多,侍應追單執台斟茶的服務態度也良好。上圖是另一款沙律:青瓜螺肉蟹籽沙律。



其實剔紙仔時,大家都係見到咩想食就照剔了,沒有什麼先後次序可言,當然上桌時也是琳瑯滿目大雜薈乜都有(食唔切咁滯)!當然寫blog時就要先分門別類以妨blog友睇到眼花繚亂啦!上圖喱款和風沙律賣相頗靚,同樣是屬於A紙的小食及沙律類……



B紙係刺身、卷物和手卷類,上圖是海膽手卷和蟹羔手卷。由於沒有剩海膽刺身(可能驚蝕本),想食海膽就要叫手卷先有得食。不過始終飯類比較飽肚唔食得多,連C紙的手握壽司類也完全無剔過。



旅行腳主攻的始終係刺身,有咁海老(甜蝦)、帆立貝(帶子,基爾的至愛),少不了仲有三文魚、魷魚、八爪魚……之類,不過頭輪來時都只係細細一碟,好似唔係幾夠喉喎!



不過食到去9點幾十點臨打烊前夕就完全唔同晒!成大大碗刺身上桌真係好「宏偉」,好似big sale益街坊咁款,三文魚、甜蝦全部大大件,仲有油甘魚、北寄貝、馬刀貝、象拔蚌、榮螺和黃色那種希靈魚,堆到成座山咁壯觀!飽過食buffet……



旅行腳當中除了有「刺身精」之外,仲有「天婦羅精」和「燒物揚物精」。上圖是燒雞中翼和燒車厘茄,都係屬於D和E兩張紙上剔的。



天婦羅和揚物類以上圖左的吉列廣島蠔最正,好新鮮唔會腥,而且外脆內軟超正,基爾都食了好幾個,勁熱氣!另外仲有天婦羅甜薯也頗有趣;右圖的天婦羅南瓜和沙維魚第一次食。



再睇埋其他燒物和F紙的一品料理類,上圖右是辣汁煮花螺和燒鯖魚;圖左則有鐵板牛柳粒和青絲海蜇。基爾雖然唔太食牛但都覺得牛柳粒幾正(比另一款燒牛舌好味得多,因為牛舌有點韌),尤其係灑上面的脆卜卜炸蒜真係超正,老實說比牛柳粒還要正……



上圖的炸蓮耦片也脆口,是不錯的選擇。由於食得太多燒物炸物,心理上點都要叫返個炒雜菜平衡一下。另一樣不能不提的是G紙的飲品及甜品,基爾覺得喱杯巨峰乳酸梳打實在是拍案叫絕,有提子清香但不會太甜,而且都好大杯。餐裏其實包了一個drink和一款甜品,如果鍾意可以encore多一杯,都係加多HKD$18而已。



由於實在太飽,基爾對於上圖這些燒蝦燒牛舌燒粟米和燒帆立貝基本上係抱住欣賞態度去影下就算,幸好旅行腳團友都係刷得之人,最終都能順利清場,而基爾只能參與食埋個綠茶雪糕就鳴金收兵。



甜品類其實仲有芝麻雪糕、柚子雪葩和明月卷,好少日式放題會提拱咁多選擇,多數只係求其送個雪米滋就算數,所以總括而言喱間浪人真係唔錯,絕對可以encore再來試埋其餘幾款緣慳一面的菜式!

浪人日本料理 Ronin Japanese Cuisine
灣仔駱克道181號京城大廈商場2樓

2015年9月19日 星期六

2014古都瀟瀟@函館壽司

黃昏前,在別具特色的護王神社逛了一圈後,時間真的不早了,初冬季節京都的天色特別快開始入黑,都係快步走幾個街口,去返堀川通那邊搭巴士回到京都驛。



搵巴士站途中也有意外收穫,就係無意間走過唔少京都的舊街小巷,基爾如果有多一天假期,大可慢慢閒蕩感受當地民居小區裏的古樸風貌。上圖是路經的St. Agnes' Episcopal Church(聖亞革尼斯座堂),這幢聳立在一處十字路口旁的教堂原來也有逾百年歷史(建於1898年),是聖公會京都教區的主教座堂。



沿途穿過的小街兩旁都是兩三層高的小屋平房(外貌就似叮噹大雄所住的那類型平房),傍晚還有附近居民悠閒地遛狗,完全感覺不到大城市的喧鬧。現在香港樓價高,唔少人都心郁郁來日本買樓,京都這類平房若與香港的八百幾九百呎「豪宅」比較唔知邊個貴呢?!



坐巴士返京都驛總站後,記得之前見旁邊有間郵局,一於過去睇睇有冇心頭好。本來睇中上圖右喱套「京都‧嵐山花燈路」,係新式的貼紙郵票,價錢也不貴,但最後都無買,因為counter排隊條人龍勁長,影了相當買了!心裏雖有點依依不捨,但因為想趕在放工rush hour前搭火車返大阪所以點都要撇了。去到月台時接近5:00pm,開始見人潮(再慢吞吞可能真的會勁逼),坐新快速返到大阪驛唔算太晏,但天色已入黑了。



返到酒店房才發現竟然係空無一人,團友一定係忘情血拼到天昏地暗咩時間都唔記得……Anyway,咁基爾唯有一個人靜靜執下篋準備聽日返歸先啦!結果等了大半個鐘才集齊人再次出發去搵食。由於已經成7點唔想再出去四圍搵(個肚打晒鼓),近近地就在酒店下面Grand Front Osaka個商場食算了。GFO喱個商場其實都好大,分為南北兩翼,睇水牌見北翼樓上有幾層食肆,一於上去視察下。



唔睇由自可,上到去才發現原來好多間都排晒長龍,仲旺過旺角D商場樓上食肆舖頭。最後見上面喱間函太郎條人龍唔太長,而且條龍似乎去得幾快,反正好似咁耐都未試過在日本食迴轉壽司,見佢價錢又真係幾抵食喎(平過香港元字頭坂字頭果D連鎖店好多呢),結果基爾打住鼓咁又堅持等了大半個鐘……



等咁耐證明都值得,翻查資料才發現原來喱間函太郎係函館人氣迴轉壽司店,聞說佢的老店就在函館朝市,年前基爾有去過但無留意喎,走了寶!函館由於近海,朝市的食店都以新鮮魚生食材作招徠。大阪喱間函太郎分店都唔失禮,menu上大大隻字寫住食材係每日由北海道和青森直送保證新鮮云云。價錢方面係按碟計算,唔同花紋係唔同價錢,記憶中最平只售¥150(係咪傻了,平成咁)!



佢有兩款食法,除了可以在迴轉軌道上自己拎之外,仲可以剔紙落order,由於玉子燒喱類要熱辣辣先好味(見佢條迴轉軌道幾乎兜勻全場乜都攤凍晒),所以一定係剔紙叫啦!結果基爾食了成幢碟,埋單計都只係¥2540,畀錢時基乎以為自己食得飽得滯聽錯,HKD$170左右咋喎?!若是在香港元字頭果D食,唔放低四五百蚊都唔駛旨意出到門口!



食到飽一飽返出去Grand Front Osaka外面逛逛散步。之前基爾來回火車站和酒店之間經常路過喱度幾次,但都係來去匆匆無乜仔細行過,商場外面這個廣場係有個Christmas market(當時係19號,距離聖誕只剩幾日),旁邊仲有個真雪蹓冰場,唔少情侶相相對對拖住手咁蹓冰,襯埋個Christmas market背景感覺真係幾浪漫。



至於Christmas market那邊規模唔算太大,賣的都是常見的聖誕卡聖誕飾物精品和食品之類,基爾只係齋睇無幫襯,同聖誕老人公仔影下相算啦!不過行了一陣後已經感覺到大阪D冰冷西北風真係幾勁,越來越掛住酒店的高床暖枕,都係時間結束這個大阪最後的浪漫一夜,反去沖涼睡覺準備明早出發往關西機場。



臨返上酒店房前路經Grand Front Osaka入面大堂棵聖誕樹又影張相,香港D商場一旦少了一點點自由行就嗌晒救命,人地日本商場人流也不多但都做得住,而且行得好輕鬆舒適添(行新城市果D直情會令人精神緊張精緒不安)。最後返到房點算一下手頭餘下的日円,就剩下這些了,留待下次用吧!翌朝要5點幾6點起身,因為7點要出機場搭9點幾機返港,好彩預早D因為途中發生了點甩轆趕車事件……幸好有驚無險見到左上圖就知已安抵機場巴士返家途中,那時才不過下午1點幾,真係唔係好慣咁早返屋企,下次都係唔搭ANA了。

2015年9月9日 星期三

2014古都瀟瀟@護王神社

從京都御苑出來之後,一直沿烏丸通往前走,本來想找找有什麼巴士可搭返去京都驛,不過行行下又見對面街有座神社,反正還有點時間,就入去八一八。



說京都是三步一古寺五步一神社也沒有跨張,這座護王神社與京都御苑就只隔一條馬路。由於找不到巴士站正納悶,一於過馬路去對面看看。



上圖是護王神社外的古畫,也許是講述神社的歷史故事吧!由於是日文,基爾也沒詳細看了。翻查資料這神社的主祀神是和氣清麻呂,他是八世紀平安時代初年的大臣,因擁護天皇有功而獲賜封為貴族。



穿過表門入去,見到門上掛了恍似足浴腳板圖案的布幡,原來這座神社專門祈求足腰健康,咁更加要入去參觀一下啦!上圖左見到門前有一座黑色像石鼓的經輪,名為「足萎難儀回復御守護石」,轉一圈等如念經一遍,據聞有助腳患痊癒。



入到神社內才發現地方原來頗大,分別有擇殿、聖鳳殿和上圖的祈願殿等,殿前有3條神社常見的祈願索,上面都掛了銅鈴。不過由於已近黃昏,來參拜祈願的善信不多,也不見有其他遊客在神社內參觀。



上圖是中央的擇殿,不難發現神社裏擺設了不少山豬的瑞獸裝飾、祈願樹和御守飾物,到底山豬與足腰御守有什麼關係呢?原來山豬與之前提過的和氣清麻呂有一段民間傳奇式的故事:話說當年清麻呂被政敵伏擊逃難到山中,突然一群300多隻山豬衝出來保護清麻呂並嚇退刺客……



事後,清麻呂參拜靈豬酬謝神恩,竟然連逃避時被斬傷的腳腱也不藥而癒,自此靈豬就被奉拜為守護足腰疾患的瑞獸。上圖是表門旁邊的「靈豬手水舍」,如果有網球肘、滑鼠手、五十肩之類的痛症患者就要去洗洗手,據稱立即可以水到病除。

2015年9月3日 星期四

2014古都瀟瀟@京都御苑

在二条城行到三點幾夠晒皮,睇地圖見京都御苑只係行多兩三個街口,咁唔好浪費時間行埋過去睇下啦!



買飛入二条城時特登問一問售票處職員可唔可以買埋京都御苑的門票(因為前年去名古屋時,發現買動物園和水族館的連票有特價;去東京的上野動物園出示passport也有discount),職員解釋一大輪,基爾只隱約聽到參觀御苑係要提早網上預約門票,無即場飛賣。



不過既然一場來到,而且只係行多兩三個街口,咁基爾一於照去摸下門釘啦(心存僥倖睇下有冇得博大霧入去)。去到睇睇門口個案內圖才知京都御苑係超大的,外圍係公眾開放的御苑,只有裏面的舊皇宮京都御所(天皇宮殿)、大宮御所(皇太后寢宮)、仙洞御所(太上皇寢宮)要預約。上圖左係御苑裏的拾翠亭和閑院宮邸蹟。



即使唔入皇宮,只在御花園行一陣,其實都有幾處清幽的大宅別苑可逛。由丸大町通這邊入去御苑,就有幾處古蹟睇,例如上圖這處閑院宮邸蹟就是昔日居於皇宮附近的親王故居大宅;至於上面提過的拾翠亭,就是九条家之遺構其中一部份。



昔日京都御苑附近有不少王公親貴富商的大宅,這是因為自桓武天皇於794年遷都平安京(現今京都)後,歷代天皇幾乎都住在這裏,現存的京都御所可追溯至1331年的光嚴天皇。上圖是閑院宮邸蹟裏的庭園和屋內的陳設,裏面的家具很有點60-70年代日劇的家居佈置feel。



1869年明治天皇正式遷都江戶城(即現時東京皇居)後,京都的皇室貴冑亦一同東遷,原本御苑範圍裏的皇室富戶大宅其後經歲月洗禮而日漸荒廢破落,大正和昭和年間陸續被清拆,只留下數座保存較佳的大宅苑,上圖的閑院宮邸蹟是其中之一,外貌看來有點似古雅的溫泉旅館。



睇完百年豪宅之後,再返出去御花園閒蕩,雖然係閒日下午時份,但原來都有唔少附近的市民來跑步和踩單車,事實上御花園真係又大又空曠,如果有單車租一定會方便得多,可以慳少少腳骨力和時間。上圖這類超大的百年老樹,在園內隨處可見。



上圖左是西園寺邸蹟;右圖是清水谷家之椋,就種在皇宮西南角,樹幹圓周達4米,據聞已經有逾300年歷史……



這棵老樹現時也好像老人家一樣,龐大的樹冠橫枝都需要巨型支架作「拐杖」,幸好它生長在京都,如果在香港就一定會畀人話危害路人要被鋸走。上圖左是皇宮圍牆,一直走就見到入口的清所門;左下則是宜秋門,現時不作開放。



京都御所正門就是這座清所門,門口有守衛檢查訪客的預約文件,基爾無上網預約所以就無得入去參觀了,網上睇過有台灣遊客入去參觀的網誌,裏面也有不少御殿亭台池塘花園的建築(與二条城裏大同小異),一年中也有部份日子開放參觀,如果嫌上網預約麻煩,也可選擇這些日子去(註:今年秋季賞紅葉開放日10月30-11月3日)。



冬天來京都比較快日落,下午4點幾5點已近黃昏,差不多時間要搭火車返大阪會合友人。京都御苑外圍也有不少上圖這類古老的御門,穿過這座「時光門」又可重回現代世界汽車來往如鯽的大馬路……