2015年1月28日 星期三

2014古都瀟瀟@姬路大街

由京都去姬路其實也不遠,坐JR約1個鐘左右就到了。之前聽blog友講話姬路城正進行50年一次的大維修,心中也有點忐忑,到底去還是不去好呢?



有人上網check過確定姬路城的大天守閣已經拆了包圍外牆的維修棚架,咁一於去啦,反正期待去看好耐了!基爾相信好多人都有去過姬路城,一定會認得姬路驛對出的這條大手前通,沿住喱條行人專區大馬路一直向前走就是姬路城了,簡單到google map都唔駛搵!



大街上仲有幾棵僅餘的金黃銀杏樹,如果11月來相信成條街都會好似一片金光咁靚呢!在大街上hea走,除了影樹仲可以影下靚坑渠蓋,話晒姬路係世遺古城,連坑渠蓋都特別靚D,鑄有代表姬路的白鷺圖案。



行行下仲見到街邊停泊了這輛好型好大架的電單車(唔知係咪Harley-Davidson),想坐上去扮下野不過又怕車主就在附近,為免被人鬧都係影張相算!



以往去日本其實都好少見當地人在街上一邊行一邊食煙(反而食肆裏就頗多),感覺上似係佢地的禮儀傳統(日本人一般食煙都食得好有品德盡量不影響他人)。這條大手前通大街也全條劃為「路上喫煙禁止區域」,基爾覺得香港D油尖旺銅旅遊區人煙更稠密,其實都好應該多多學習。



沿途都有幾多紀念品店又或者for旅客的info centre,櫃窗都擺了好多介紹姬路城的poster和城堡模型吉祥物之類,比較特別係成日見到「官兵衛」,八卦翻查資料才知係NHK於2014年播出的重頭劇,原來就是在姬路取景拍攝的(劇照中只識女主角是中谷美紀)。



此外,大手前通側邊仲有幾條小街,入面有唔少shopping店舖和食肆,但當然無心齋橋咁大型,只係好窄窄的一條巷仔。由於想先去逛城堡未諗食野住,為慳時間所以無入去D巷仔八卦下。行行下又見路邊有個姬路城大地圖,原來城堡範圍真的很大,護城河也保存得好完整;裏面除了有花園廣場神社外,仲有一座市立動物園和一個姬山原生林,基爾心裏暗忖好彩選擇早少少來,否則一定無時間行得晒,到時就晒料了……

2015年1月22日 星期四

2014古都瀟瀟@中途轉姬

由於今次最初plan行程時只諗住hea遊不會去太多地方,JR就索性慳慳地只買了一日pass;至於奈良後來也因天氣欠佳放棄了,就留待下次有機會才再去吧!



可能睡不慣生保床,外遊通常都比較早起,今趟基爾在京都也同樣順利迎接了行程中第一個東瀛日出。上圖窗外望向樓下就是京都驛,好彩咁近都無乜聽到火車經過時的噪音,證明隔音窗做得非常好!



酒店不包早餐,其實也沒所謂,反正樓下個火車站mall都勁多食肆選擇,前一夜搵地方宵夜時已經探過路,快速巡一圈後就決定食喱間illy吧!大鄉里基爾在港時也沒幫襯過佢,但聽聞佢地D咖啡都幾唔錯;比較有趣係第一次見熱檸茶係檸檬還檸檬茶還茶咁上!



雖然morning set選擇不多只有ABCD餐,但上圖喱味煙肉芝士沙律都幾好味喎!而且都幾大碗份量足,好想encore多個。最初都有懷疑點解唔揀去食日式早餐,不過喱個意式breakfast其實都唔錯無令人失望。



記憶中好似仲order了腿蛋治、煙三文魚治和厚多士配雜菜沙律之類,擺滿台埋單都係齊頭¥3000,港紙兩舊水有找食飽幾個人唔貴啦!



之前本來有人諗住第一day行程先去伏見稻荷,之後再轉往奈良和姬路,不過諗諗下似乎太趕,不太合乎hea遊原則,又驚住太晏去到姬路城變得走馬看花沒意思,臨時決定skip了伏見稻荷和奈良,直接先坐JR去逛姬路城吧,無謂浪費了悠遊這座世遺名城的良辰美景!

2015年1月17日 星期六

2014古都瀟瀟@夜宵京都

班機有少少delay,成8點幾先至landing,過埋關都接近9點,基爾心急到幾乎唔記得拎寄艙行李就衝了出去,係咪傻傻地!



過完關拎埋篋就飛撲過去JR個counter買pass,順手買埋張關西八達通ICOCA,因為要趕火車必須15分鐘內搞掂晒,好彩遇上位熟手醒目售票員叔叔,21:24安然登上了Haruka遙號關空特急直奔首站目的地京都。由於預了會好夜先到,為免拖篋西圍搵酒店咁煩就book了京都驛上蓋的Hotel Granvia Kyoto(@¥8700),去到京都已經10點幾仲落住毛毛冷雨,幸好酒店夠就腳……



酒店check-in後未夠11點,試下出去搵地方宵夜,車站mall好多食肆都打晒烊,幸而隔籬有喱幢「食通天」商場(就在Kyoto Tower對面),見不少食店都會開到凌晨,唔諗咁多就去喱間山內農場吧!上圖是「關西名物」雞翼。



叫得做「地雞專門店」就點都要叫味雞翼食下,舊年去名古屋都係興食「手羽」,唔知係咪關西人的名菜呢?其實又唔覺得太特別咋喎!上圖係牛油果拌魚生。



由於之前只食了個飛機餐,大家個肚都有點兒打鼓,一定要叫多幾味先可以大滿足地返去訓覺吧!上圖係鰹之魚師飯¥680和Creme Brulee¥420做甜品,perfect!



舊年去立山路經松本住了一晚,出去食野時都有叫過喱咪燒魚骹,今次來到京都又encore了兩碟。



店裏其實都坐得幾舒服(可惜後面有台客食煙),唔似香港食肆咁逼,又唔會坐個零鐘就要叫你埋單走人,完全可以在這裏hea下嘆陣茶睇下窗外夜景都無問題。



食咁多野埋單計都係¥7502(HKD$500有找),人均才百幾蚊港紙真抵!依家日圓平,真係洗都洗得特別開心。



唔夠喉再順腳行過去便利店買甜品,喱個牌子的乳酪幾好味唔太甜又低脂……順帶一提喱張八達通Kitty card真係幾好用,搭地鐵、火車和買便利店野都嘟得,唯獨搭巴士唔嘟得,希望將來快D通用埋,就唔駛再煩摷散紙。

2015年1月11日 星期日

2014古都瀟瀟@閃飛KIX

由北京趕返來香港,隔個夜之後又要趕返出機場,真係從未enjoy過出機場多過出旺角的興奮感覺!



去北京那次天矇光就要出門口,去日本喱次就可以hea一點下晝先上機。在機場巴士上也沒瞌眼訓,過青馬大橋時還記得補影返張出發相;仲有就係上次唔記得影機場大堂喱棵鵝仔牌巨型聖誕樹,反正今次有大把時間即刻去補影返。



由於有人話唔想坐HK Express要坐ANA(HKD$3,273連稅),咁飛大阪關西機場就只有三點幾喱班機,飛到去其實都驚會有點晏……anyway,例牌菜要影入閘口,不過今次有點不同,入閘告示牌上貼了聖誕裝飾,又幾cute幾靚喎!



可能晏晝機關係所以班機唔算太full,平時基爾多愛坐aisle seat,喱次都特登竄去窗口位睇起飛,真係好耐無睇過香港鳥瞰景了,唔駛「航拍」親身飛上天睇好爽好正,尤其認得下面係咩地方就更正。上圖右是東九龍紅磡灣九龍城一帶,上方仲睇到一山之隔的沙田城門河呢!



唔駛講ANA比國航好得多,至少有架私家電視先啦!而且D戲選擇都多,最新是《The Expendables 3》,不過睇了20分鐘開始無乜耐性睇班老人家,轉台睇了後生好多的《The Maze Runner》,不過其實個故仔同樣唔太吸引(反而回程時睇了《If I Stay》算叫做好睇D無咁悶),咁唯有集中精神食野啦!有人話ANA個餐好味,不過基爾覺得都係好一般而已無乜驚喜,只有個冷麵係比較ok。不過由於關西落機後要直飆去買pass搭JR極速趕去京都,中間不設dinner時段,所以點都要在機上先質飽個肚為妙……

2015年1月7日 星期三

冰極閃行:下@北京

在京城開工期間無乜時間出去四圍行,加上天氣實在太乾太凍又經常天陰陰霧霾非常勁,有時還颳起八號風球般強勁的陣風,簡直像利刀割面感覺就如整個人都爆策,每次洗手、掂任何金屬物品和人都有觸電痛楚,如無必要都不太想外出了!



幸而大風過後吹散了霧霾終於見到藍天,可惜凍成咁都無落雪,可能因為濕度太低。工作過後,雖然只剩大半天餘暇時間才搭機返港,但見咁好天都一於坐同事車出去行一陣啦!



沿長安大街一直走,突然又諗返廿幾年前同一大班同學仔來交流團時都有來過,記憶中好似就係由天安門這裏入故宮了,今次時間不多就沒有入去遊逛,只在天安門外簡單經過就算。



遊完車河之後同事又車來喱度食午飯,聽講喱間福滿園係食好地道的家常北京菜,由於來到時正好是lunch時段全店滿座要等位呢!



基爾唔飲得,食飯一般都唔飲酒(包括啤酒),多數以茶代酒就算,這次來京城還識多一樣就係喱樽酸梅湯,比廣東人慣常煲的稍甜,基爾還是較愛有濃濃酸梅味的酸梅湯。不過在京城無乜其他選擇下,這種樽裝酸梅湯也是不錯之選。



菜式果然係好地道的小菜模樣,賣相雖然平凡但完全係意料之外的好味道,上圖右聽同事說是該店名菜煎牙帶魚,食落有點似少少甜味的豆豉鯪魚,質感又有D似零食那種紅色魚柳乾,不過魚骨頗多基爾唔太識吐骨,同事則食得津津有味。



叫到成台不同菜式好彩每碟份量不算多,正好小食多滋味吧,是食得開心的一餐。上圖最遠圓形餅狀的唔記得係咪番薯玉米餅之類,用來點汁食一流。



食胞返office坐多陣與同事寒喧幾句就差不多時間say goodbye了,幸好這次晏晝四點幾出機場又唔太塞車喎!



首都機場離境大堂都有一棵水晶聖誕樹,但感覺好似無香港機場果棵奧國鵝仔牌聖誕樹咁大咁靚。



唔知係咪因為仲未到大陸假期,成班機都幾吉下,基爾坐economy後排可以打橫霸晒4個位,如果飛歐洲就正啦!

2015年1月3日 星期六

冰極閃行:上@北京

12月初老細失驚無問基爾要回鄉證,真係完全無心理準備也當然沒隨身帶回鄉證習慣,乜事咁急呢?



原來係要奉召臨急臨忙趕上京幫手……由於上機前幾日才買機票,飛北京喱張機票要成六千幾蚊勁貴,夠基爾飛一趟歐洲,如果自己畀錢一定唔捨得。印象中好似第一次坐國航,好耐未試過在香港機場要搭接駁巴士上機,飛機餐好一般所以無影,機上仲要睇公家細電視,播的是薛凱琪吳建豪《閨蜜》,由於畫面細又要愕高頭,無乜心機睇半套就瞌陣算。



大約3個幾鐘就飛到,上次來京城已經係上個世紀差不多廿幾年前的事 ,無獨有偶都係12月凍到結晒冰的季節來。北京首都國際機場近年擴建過,感覺真係幾大幾新,落機後要坐無人駕駛列車返去入境大堂過關,列車比香港機場的靚,沿途仲有風景睇!



出機場就見識到京城超級塞車苦況,禮節性拜會後就到城西office先熟習一下環境,因為主要工作都會在這裏進行。城西office比香港office靚得多,聽同事講這裏以前係韓國大使館云云,依家附近仲有幾間小國大使館,所以這一帶保安都甚嚴密,基爾因為係外來人又無職員證幾乎被拒諸門外。第一晚由於未有太多野做,同事宴請去食羊羯子火鍋,天寒地凍食似乎都幾正(京城日落後夜晚只有攝氏零下4-5度),羊肉滾好耐都唔會韌也一點不羶,因為有好多花椒八角之類的配料!



幸好公司book的酒店就在城西使館區附近,來往office步程只約十多分鐘,唔駛再煩塞車問題。酒店房很大,早餐唔駛揀也是在酒店食breakfast buffet。由於前一晚食太多肉,早餐要食返多D沙律菜balance返。



食飽就係時候要去開工!在繁忙的工作中,其實基爾最難忘就係認識了這位office巡警小黃,你睇佢實係咪靚仔到無朋友,成隻老虎仔咁威猛有型。最搞笑係每當基爾忙到廁所都唔得閒去時,佢總會無聲無息悠然自得地在台底輕鬆catwalk過來,有意無意間地用毛茸茸又柔軟的尾巴輕輕掃過你的小腿,之後又再若無其事地catwalk離開,有幾次基爾忙到無手但都實在忍唔住要肉緊地摸摸佢個可愛貓頭以示回敬!