2010年4月30日 星期五

新越越式料理@大坑

舊同事S與A再encore開餐,不過之前因為基爾較忙,為免成日畀人鬧「飛機仔」就一直拖住先!S與A最近提議話去大坑搵下食,基爾大鄉里未去過,於是又冒放飛機危險答應跟隊,結果都係因OT遲左收工,搞到好遲先食,好彩S與A之前已自行安排左節目唔使硬等,咁都無咁內疚!



其實早前跟過S與A去重慶大廈食新德里,好大鄉里咁第一次入到去,感覺都唔係咁「森林」!雖然係南亞人多D,不過比想像中企理。搭lift上到去,見店內客人不多,可能因為過了lunch hour吧!唔埋咁多就坐低叫野,由於當日無拎相機作記錄,只憑印象回憶當日叫左瑪沙拉燴雞、炒印度黃飯、薄餅、羊肉咖喱角同綠咖喱燴蝦等,埋單每人近兩舊水,算少少貴但味道OK,傾偈聚舊為主都無乜所謂!



講返喱次去大坑搵食,基爾會合大隊之後火速在大坑一帶巡視一轉,就決定食越南菜吧!先去火車頭,人氣好似勁D,不過要等位,仲要係等3張台,於是行返出少少去新越算數,仲立即有位,聽S話新越個chef都係由火車頭過檔來的,咁都一樣啦,無謂再等!睇OR話新越在九龍城都有一間店,大坑喱間就比較新。不過見九龍城店D食評好似唔多掂,畀人鬧到反肚咁滯,但大坑喱間又唔係咁差喎!先吃了酸酸辣辣的越式白雲鳳爪,幾開胃。再食咖喱牛腩,唔太辣,叫埋法飽去點汁食,正!



越式拼盤當然都要試一試,OR好多人都話唔掂,果然真係唔多掂!春卷、雞肉串燒、粉卷同扎肉似乎樣樣都唔好食,串燒唔熱又無乜味,春卷又唔脆,成碟野好似擺左好耐先拎出黎咁!!!唔太飽肚再叫了一碟豬扒飯,好彩夠熱。最後要食返少少菜,上圖右喱碟蝦醬炒通菜係全晚的亮點,炒得好夠香又夠爽,估唔到食越南菜都食到咁正的蝦醬炒通菜!埋單合計三舊幾水,平過上次重慶大廈新德里果餐好多,抵唔抵就見人見智喇!
新越越式料理 Pho Le
大坑銅鑼灣道130號

2010年4月27日 星期二

神奇櫻花實驗下篇

之前講過一輪的神奇櫻花樹,過左兩個禮拜依家又變左咩樣呢?在今次的「下篇」再畀大家望望佢既近況先。



— after 2 weeks —

其實過左一個禮拜之後,碟裏面盛載的magic water已經被棵櫻花樹吸乾吸剩,成棵櫻花樹亦開到盡,每條樹枝基本上都堆滿了一綑綑櫻花毛毛,好似個毛冷球咁。之後保持左幾日,見粉紅色的櫻花毛毛開始變白,逐少跌落在碟子同桌面上,樹幹也開始逐漸轉為白色,整個花開花落的過程大約兩星期左右~~~~咦!明明個說明書又話可以持續一個月的?!可能香港天氣較潮濕吧!Anyway,今次都好enjoy整個「神奇櫻花樹」的觀察實驗過程,希望下次再有機會搞D特別野畀大家睇睇。

2010年4月24日 星期六

與佛洛伊德解夢

記得基爾在U讀Yr1時,學人懶勁咁走去take左Psychology,每次上堂雖然都係聽到一舊雲咁,不過有時間讀到D理論又係幾得意的,即使未必完全明白晒。那時仲「快揭」過幾本巨著,但裏面究竟講過D咩detail野,過左咁多年當然早就畀返晒professor了!依稀仲記得揭過奧地利大師級學者Sigmund Freud代表作《Die Traumdeutung》(夢的解釋)……的頭果幾頁,這本書是佛洛伊德窮畢生精力研究「夢與潛意識」的心血力作,首章中他曾經講過﹕「我將會證明有一項心理學技術,使解釋夢成為可能,由於這項技術的應用,每個夢都顯示一種心理結構,充滿了意義,並且與清醒狀態時精神活動的特定部位有所聯繫。然後,我將盡力闡明夢所隱藏的奇異與曖昧,並由此推斷這些衝突或吻合的精神力量,正是形成我們的夢的原因。」 Believe it or not?!



基爾其實由細到大都幾多夢發的,不論白日定黑夜、噩定係好!有些醒來就忘掉了,有些卻會很深刻……夢裏面遇到的人和事,好多時都會係玩大兜亂,有時會同D同事一齊返到中學去上堂,有時又會同舊同學在office返工;有些地方從來沒有去過,但竟然又似曾在夢裏到過,總之就係妙不可言!

尋晚剛剛新鮮滾熱辣又發左個角色大兜亂的怪夢,夢中竟然見到好耐無見的舊同事M(平時基本上係唔會諗起佢,唔知點解發夢會見到佢?)不過場景就換成依家的公司,M仲變身成為一個麻煩client,將D新聞稿改完喱度又話要改果度,好似沒完沒了咁!身邊老細又不停咁勁追問基爾,個版夠究竟搞掂未,要遲版喇!D人真係辦事不力~~~~~~滿頭大汗的基爾最後忍唔住勁鬧M﹕「妖!到底你要改到幾時先至肯收手呀!!!」(現實生活中的基爾係從來唔會咁鬧人的,只有啞忍的份兒)。最後基爾激到成個扎醒左,仲滿頭大汗添!再望下床頭個鬧鐘,原來只係4:30am,好想繼續訓返,但可能因為心中猶有餘悸,結果都係眼光光到天矇光!

2010年4月22日 星期四

園林意趣拙政園@蘇州

上次在「旅遊舊相簿」系列中翻看過到杭州古剎靈隱寺的老照片,今次再回憶一下當年同到以江南園林聞名的蘇州之行。



一路翻看這本陳年相簿,到了後半部分出現了一系列以小橋流水、綠樹林蔭掩映亭台樓閣等迷人景致作背景的老照片……對了,那時當年在蘇州時留影的。蘇杭向來是內地以園林建築稱著的熱門旅遊城市,當中以蘇州的園林造景更是融匯了江南園林設計的精髓。當年走在蘇州城內,幾乎可謂三步一樓閣、十步一庭園,整個城市彷彿就是一個大花園。由於時間不多,只選了最著名的拙政園、獅子林及留園參觀,再加上到城外的虎丘山輕輕鬆鬆走一圈。

若說到獅子林是看奇詭石景,到拙政園和留園就是看園林意趣。由於這些都是昔日的3R老照片,upload上blog手續比較煩,只選來了拙政園的部分來「亮一亮相」。貴為中國四大名園之一(其餘3個分別是北京的頤和園、河北承德避暑山莊及同來自蘇州的留園),拙政園在中國園林建築之中,一直佔有崇高的地位,1997年獲列入世界文化遺產。

拙政園的歷史可上溯至8世紀,至今已有1200年,據說它原是中唐詩人「甫里先生」陸龜蒙的故居。到了明武宗正德四年(1509年),御史王獻臣因執法無私得罪了東廠的權宦,最後被誣陷,復遭廷杖繫獄,失意官場的他遂辭官還鄉歸隱蘇州老家,並購入了這座園林加以悉心營建,還請來當年著名的江南才子兼畫家文徵明擔任「園林總設計師」,結果花了長達20年、於明世宗嘉靖九年(1530年)打造出「廣袲二百餘畝,茂樹曲池,勝甲吳下」的心血結晶——拙政園。

至於拙政園的名字由來也有段古,乃出自西晉時因「擲果盈車」而出名的詩人潘岳,其《閑居賦》謂﹕「築室種樹,逍遙自得……此亦拙者之為政也」,王獻臣取其有樸實之人在自家花園為政的巧意。文徵明在《王氏拙政園記》中記述了其設計理念,他希望將詩畫中「爽借清風明借月,動觀流水靜觀山」的意境融入園中,相傳園內不少觀賞植物如紫藤、荷花等,都是由文徵明親手栽種的。

拙政園的主人後來幾經易手,並不斷擴建,後來又分成東、中、西三園。現存的拙政園建築規模主要是由晚清太平天國時期忠王李秀成所建,佔地達62畝(逾5萬平方米),當中以18.5畝的中園是明清園林的精髓所在,亦成為日後中式庭園的圭臬,拙政園大部分著名景點都在這區,包括以「荷香喻人品」的遠香堂、「在水中央」的雪香雲蔚亭及荷風四面亭,還有待霜亭、倚玉軒、香洲等等,池廣樹茂,迴廊水榭錯落有致,令人驚歎中國人對園林造景的精巧講究與布局心思,同時你也會發現,原來遊花園也非只是老人家的玩意。

2010年4月21日 星期三

牛陣@太子

好耐無約同學仔re-u擦餐勁,早前周末基爾做一次發起人,難得L和V sir都有空,唔駛帶隊或補課,再夾埋M姐同Q組成5人飯局。M姐率先提議去食「牛陣」,反正之前見有blog友幫趁過,睇落亦幾好味同幾抵,訂位重任就交給她。本來佢想book尖嘴isquare新店,不過full晒,於是book左旺角始創店。


埋單計約$130 each

除左之前提過薑蔥蒜、芫茜、韭菜、茜芹之類東西唔食之外,基爾其實仲有好多野都係唔食得的,例如蟹、奶類製品包括鮮奶、紅荳冰、薑汁撞奶,而牛亦屬於少食之列,因為會敏感,不過既然大家咁興致勃勃去ShabuShabu,基爾當然都樂於奉陪,反正除左牛之外,應該仲有其他野食卦?!況且食少少應該冇事的!

不過唔知喱間牛陣係咪因為生意實在太好,所以係有嚴格的時間限制,有別於一般稻香、小肥羊之類可以側側膊坐多陣,牛陣就只能食個半鐘。當晚的5人飯局約於7:00pm齊人入場,果然8:15pm侍應就來埋單,8:30pm準時交台,原來佢地唔只係日式ShabuShabu店,仲係同日本人一樣咁有時間觀念。不過就有好有唔好喇!好處係大家都有心理準備,咩時候開始食牛、咩時候開始去拎其他魚、菜、金菇、豆腐、蘿蔔,到咩時候又要出去拎甜品之類的,大家都可以心裏有數;唔好的就梗係得個半鐘頭實在太趕,畢竟飯局都梗係想食下傾下咁,無理由個個埋頭埋腦只掛住食吧?!而且基爾亦習慣hea食,食得太急反而會食唔落。

講返主角牛肉,餐牌上面係有3大類可以揀,包括「普通牛」 $100 each、「上級牛」 $140 each、「頂級牛」 $240 each,身為普通人當然就只揀普通牛算數,反正5唔5A對基爾黎講都係唔太識分辨,另外揀了清清地的甜鼓油湯底。此外,由於怕打邊爐太燥,就加左$15任飲。

由於時間不多,好彩侍應都無dump時間,好快趣就上晒湯底同牛肉,食左幾塊牛肉之後,果然係食唔出有乜特別,於是就食其他野,例如魚、金菇、蘿蔔、蕃茄同埋各種菜和丸等等,感覺上同其他打邊爐無乜分別。食到尾聲就去拎雪糕,雖然無Haagen-Dazs雪糕(尖嘴店有),不過芝麻雪糕都ok好味!

後記﹕當晚食完之後本來唔覺有乜事,仲行左一陣金魚街先走,不過第2朝就黎料,唔知點解一起身就心口悶悶的,嘔完一餐先舒服D,唔知係因為食得太急定係對牛肉敏感?!應該唔關人地D牛肉事卦?!
 
牛陣 GyuJin
太子彌敦道750號始創中心地庫

2010年4月16日 星期五

神奇櫻花實驗中篇

大家係咪好想睇下基爾果棵神奇櫻花樹依家又點呢?其實之前都擔心左一陣,唔知佢係咪真的會開花,因為說明書明明話會在24小時內開花的,但係等左成兩日都仲係得D樹枝,完全唔覺有咩花生出黎!其間仲問返Den,確實到底有無野搞錯左steps呢?結果係完全正確,咁唯一可以做的就只有繼續耐心地等落去吧!



— after 48 hours —

前幾日一覺醒來,又去睇下棵樹先~~~咦!有幾條個樹枝頭竟然無聲無息咁生左D粉紅色毛毛出黎喎!係咪就係出「櫻花」呢?!好野!終於搞出D成果,又真係幾過癮喎!好有成功感呢!雖然D「櫻花」唔係太多太密,不過都算ok啦!



— after 4 days —

再之後一日放工返到屋企一睇~~~~嘩!乜棵樹D櫻花多左咁多!成棵樹每條樹枝都生到粉紅一片、密密麻麻咁喎!真係靚左好多。Close-up影佢D花,好似D毛毛咁幾得意!睇返個說明書講,棵櫻花樹會開足一個月,遲D再影下佢畀大家睇睇!

2010年4月14日 星期三

神奇櫻花實驗上篇

無錢又無時間但又恨飛去日本睇櫻花,點算好呢?!基爾之前聽聞同學仔Den話去京都奈良賞櫻,當堂勁妒忌……唔得!一定要屈佢買手信先,不過基爾當然唔會諸多要求,唯一想要同櫻花有關的東西。經過個幾禮拜後,Den終於逍遙快活回來,仲果然有買手信畀基爾,真係勁感動!對底係咩黎呢?



登登登凳!就係喱樣手信喇!可能好多blog友都已經見過架喇係咪?!雖然基爾無份去日本睇櫻花,不過有得玩喱棵「神奇櫻花樹」都唔錯!早幾日約左Den拎到手,佢仲千叮萬囑要睇下櫻花盛放的奇景,no problem la當然,就在網上直播喱個櫻花盛放實驗出來,拿拿拿~~~~唔好眨眼呀下!基爾連整錄影機、楝蛋蛋同埋剪台中車站立體紙雕塑都識,喱棵小小的櫻花樹當然係難唔到基爾啦!事實上,砌樹一D都唔難,包裝上有詳細說明(雖然只有英文同日文),只要將紫紅色的吸水紙樹幹楝起在膠碟上,然後淋水就可以了。樹幹其實早已剪好成樹枝狀,只需耐心地逐一將樹丫搣開,令它更立體更似一棵樹的形態,就已經OK。



上圖由左至右﹕(1)先將吸水樹幹楝在膠碟子上,碟上有個突出的夾子可以固定樹幹;(2)小心搣開樹的丫枝,令它更立體更有美感;(3)然後最關鍵係要將一袋貌似鹽水袋的透明液體剪開,再將裏面的magic water慢慢地兜頭淋在樹幹上,碟子可盛載著magic water,紙樹幹會不斷將水吸到各條樹枝上,好得意!不過~~~~點解唔見櫻花開呢仲?!睇返個說明書先,哦~~~原來上面有寫話係要等3至4個鐘先會開花架喎!24小時之後就會開晒云云,仲話會開足一個月添!wow~~~~咁咪仲勁過真櫻花!至少花期長咁多,真係好抵睇呀!不過先決條件當然係喱個小實驗能夠成功,才可一睹神奇櫻花盛開的景象。



由於要等櫻花開,為免大家悶,不如就同場加映D魚仔畀大家睇睇先!之前去左旺角金魚街,買左上圖左的「熊貓鼠」。佢個樣真係幾得意架喎又,眼上、魚尾同背鰭上都有黑間花紋,好似熊貓咁,所以有喱個名!返屋企後先將佢放在細缸裏隔籬一個禮拜,見佢無咩大礙就放入大缸中暢泳!鍾意尋根究底的基爾,當然要起一起喱種態貓鼠個底先,在網上搵左一陣終於搵到喇!原來佢地係來自遙遠的南美洲,祖籍秘魯,勁喎!除左「馬休比休」同「印加遺蹟」之外,基爾對秘魯就一無所知,好高興認識喱位來自秘魯新朋友。不過話時話佢地身價都幾高,比一般常見的白鼠魚同花鼠魚貴一陪,希望佢地移民來基爾屋企會住得開心,同鄰居和睦共處呀下!其餘橙紅色喱幾條係基爾姐畀的,唔知叫乜名,不過都係善男信女黎,所以應該無大礙,暫時見佢地的「和諧指數」都幾高!

p.s.再次多謝Den的櫻花手信,果然深知道基爾係鍾意搞搞震做下實驗的人,喱份手信好正!btw,早D好返呀!至於到底棵櫻花樹可唔可以開花結果?咁就要耐心D等下喇~~

2010年4月12日 星期一

新鳳凰麵包店@北角

公司由於位處半新不舊的老區,附近大部份食肆都係D老舊茶餐廳又或者車仔麵檔之類,再唔係就要揀大家樂或麥記,所以基爾很多時都唔會出街食晏(事實上帶飯都可以慳唔少錢),唯獨係隔籬街的一間老牌餅店,基爾就不時會有幫趁。


出爐蛋撻 $2.5 each

到底係乜餅店咁巴閉能獲得基爾垂青呢?!就上面喱間「新鳳凰」。其實剛剛過檔來喱間公司做的時候,有時返工放工都會行過喱間餅舖,外表十足十歲月神偷式的老字號,焗蛋糕麵包的鐵盤全部都黑鼆鼆的,好似用左幾十年咁,賣的都係十年如一日的傳統老式蛋糕麵包如雞尾包、菠蘿包、紙包蛋糕之類,不過成日行過索到D香噴噴的麵包味,又確實係幾令人流口水,所以有時都會忍唔住手買,即使係帶左飯。最近行過仲見店門牆邊貼左張「阿蘇報紙」出黎添,原來佢地個火腿蛋包係好出名的,不過可能撞唔正出爐時間,而且好似係「限量發售」賣完就冇果隻,所以聽聞係好新鮮滾熱辣的。不過基爾始終比較鍾情佢地D出爐蛋撻,只能講一個字﹕「正!」每日大概3點幾4點就熱騰騰咁拎出黎,真係唔食晏晝飯留肚都要食佢。喱日基爾就買左半打請埋同事食,食到個個嘴舔舔!
 
新鳳凰麵包店 New Phoenix Cake Shop
北角七姊妹道217號地下

2010年4月5日 星期一

小辣椒@北角

基爾細個時都叫做食得下辣,不過唔知點解大大下就越黎越怕食辣,記得有次冒險去食麻辣火窩仲食到個嘴腫左!雖然係咁,但早幾日難得有時間,食lunch時都去左下面喱間「小辣椒」食川菜!


圖上右﹕火腿津白 $35

其實喱間小辣椒距離公司也有一段路,平時一般都不會行咁遠去食晏,不過喱日難得有多點時間,加上本來想去旁邊果間「阿鴻小吃」,可能有blog友都聽過喱間食潮州打冷的食店早前拎左米芝蓮一星,所以又係勁多人,而且仲無得訂位,不過姑且去望望啦!因為唔熟路都搵左一陣先搵到。嘩!果然係好多人排隊~~~~算把啦!食晏又邊得咁多時間排隊,於是就鼠左去隔籬街的小辣椒食算了。


口水雞、蔥爆牛肉、燴炒土豆絲 $35 each

其實見到「小辣椒」喱個名堂,已有心理準備要破戒食下辣的了,不過打開餐牌發現其實都唔係樣樣菜式都辣的,不過同事話既然係黎食川菜,就要食下辣野!哎~~~求其啦,就硬住頭皮頂一次咁多!先來看看上面的口水雞、蔥爆牛肉同埋燴炒土豆絲,比較特別的係炒土豆絲,「土豆」即係薯仔,粵菜比較少用薯仔刨絲來煮,好多時都係咖喱雞翼燜薯仔吧!喱種刨絲「薯條」撈埋類似花椒八角的物體,食完之後條利已經有少少麻麻痺痺的感覺!


魚香茄子、炒豬雜 $35 each;蔥油餅 10

跟住仲食左上面的魚香茄子、蔥油餅同炒豬雜。喱幾樣基本上都唔辣,不過比較油膩,單看碟魚香茄子油光晶亮的賣相已知一二,基爾喱排腸胃唔好就盡量食少D。再者除左食街邊的魚蛋豬皮豬紅車仔麵之外,基爾基本上不食大腸豬肚之類的豬雜,所以喱碟炒豬雜幾乎「棄權」,只食左D青紅椒。至於蔥油餅都係唔好食,太硬太實,又無乜味,只得「肥淋淋」3個字,所以要飲檸茶消下滯!


回鍋肉炒年糕 $35 ;煎窩貼 $10/4隻;紅油抄手 $15

雖然已經飽左七八成,但未走得住,仲有上面幾樣未食!回鍋肉炒年糕唔辣,算幾好食;窩貼正,煎得夠香,基爾還是比較愛食滬菜,窩貼+小籠包+荳沙窩餅係每次去食上海菜的「必食三寶」。雖然喱間無小籠包,但紅油抄手都唔錯,屬中辣程度,只要唔食果D紅油就無事,有同事彈佢唔太正宗,不過基爾就幾鍾意。至於右上圖果碗有豬紅豆腐之類的物體,已經唔記得係乜野,也是比較少夾的一碟。總括而言,陰差陽錯下食左一餐唔算勁辣的川菜,但都算過得去,可以畀個B佢!

小辣椒 Little Chilli
北角北角道33號