2010年5月21日 星期五

希望光榮奇幻旅程@Artis Tree

位於太古坊的Artis Tree過往曾舉辦過不少精彩的大型展覽,例如Vivienne Westwood的「A Life in Fashion」時裝設計展,同埋早前基爾都有去睇及在blog上寫過的「黑澤明百年誕辰紀念世界巡禮展覽」等。最近睇blog友Amour的介紹,原來Artis Tree又有新野睇,今次是由香港藝術家Simon Birch創作的「HOPE & GLORY」多媒體藝術展,帶領觀眾進入一個引人入勝、充滿比喻概念的馬戲團,引導觀眾探索自己與過去、現在、未來的關係。



太古坊對基爾來說算是就腳的地方,所以早前特登抽空再去逛逛。這裏的Artis Tree算是近年新興的藝術展覽熱點,感覺上比傳統的博物館、藝術館還要舒適,更重要的是很多時都係免費參觀,咁筍的益街坊展覽實在無理由唔黎捧下場。雖然對今次展覽的藝術家Simon Birch唔太熟悉,不過見Amour影出來的照片好特別,所以專程走過來八卦一下,才發現果然是一個幾「潮」的藝術展!



這個「HOPE & GLORY」展覽主要是透過一系列互相關連的多媒體裝置,將2萬多呎的Artis Tree空間改造成黑迷宮。在一個全封閉的藝術空間內,以不同的媒體,如電影、雕塑、音樂、影像和現場表演,複述和探討有關原形的主題:例如人類生存於世的相對性與矛盾、痛苦與救贖的關係、從黑暗到光明的旅程,以及跨越逆境到平安。當基爾一踏進展覽場地,即成為整個探索旅程的一份子。


【GALACTUS】
一個大型的立體星形雕塑,這個雕塑是以鋼及燈光打造的 它於其設計、皇冠、十字架、骷髏頭骨等中展了是次展覽的元素


Simon Birch創作的「HOPE & GLORY」挑戰一貫的藝術模式,帶領觀眾進入一個引人入勝,充滿比喻概念的「馬戲團」。穿過入口的黑色布幕帳幔後,眼前就是這顆耀眼的「超級巨星」,說它是巨星一點沒有誇張,直徑足有4米闊,高達5米多,由近百盞電燈泡和光管組成。


【TWILIGHT SHADOWS OF THE BRIGHT FACE】
20個奇異的人形塑像重新打造馬戲團的「奇趣表演」,圖右為其中的黑色皮草BEM


正如真正的馬戲團集結全球各地的精英,創造一個充滿多重觀感刺激,令人目不暇給的另類冒險,在HOPE & GLORY裏,Birch把來自香港和世界各地藝術家、設計師、音樂家、導演、攝影師、演員、遊戲王和建築師集合一起,攜手創作一個空前企劃。每人詮譯一個他們對這奇妙又充滿好奇的「HOPE & GLORY」概念世界的獨有見解。被邀合作的設計者包括﹕香港藝術家黃炳培、攝影師夏永康、英國搖滾樂隊UNKLE、導演胡興宇、設計師楊志超、建築師Paul Kember、演員吳彥祖和北京藝術家蒼鑫等。


【HEAVY IS THE HEAD THAT WEARS THE CROWN】
一組巨型鋼製英文字母,串出古代亞美尼亞國王TIGRANES的名字


Birch創作的「HOPE & GLORY」挑戰一貫的藝術模式,帶領觀眾進入一個引人入勝,充滿比喻概念的馬戲團。他透過自己及其他藝術家的作品反映出多個主題,這些主題包括﹕對於藝術演化成舞台的概念;對於馬戲團和遊樂場,科幻小說和神話的著迷;還有對於手工藝創作傳統的專注。


【HEAVY IS THE HEAD THAT WEARS THE CROWN】
有些字母閃閃發亮,有些則半嵌入地板中,有些則十分破舊且生了鏽


HOPE & GLORY源自英國維多利亞時期的一首愛國歌《希望和榮耀之地》(LAND OF HOPE & GLORY),一首渴望擁有強大帝國的聖詩。這個展題既借取其意又帶諷刺意味,一方面借喻自己心中不同的希望和榮耀,同時也是影射為圓帝國夢而不能避免的包袱。事實上,今次的展品不少都透視著那種在歷史和不同文化裏經常出現的「英雄傳奇」式的表現手法。從古希臘史詩《奧德賽》到科幻電影如《Star Wars》和《Blade Runner》中都可看到英雄的原形設定。


【TWILIGHT SHADOWS OF THE BRIGHT FACE】
藍色汽球人GODFREE、鋼絲絨人SALADIN、黃色水管人TWEAKER

【BROADSWORD】 圖右一群細小的白色太空船從天花板懸掛下來,橫越整個展廳,直飛向一堆撞毀了的汽車 整組裝置呈現繩結的形狀

Birch構思這龐大的設施,其中一個主旨是創造一個仿照馬戲團的全封閉藝術空間,重塑其傳統文化上的角色,在這急促狂亂的都市環境中提供一個短暫的異國世界,讓觀眾暫且拋開煩惱,感受一次奇妙旅程。


【CRAWLING FROM THE WRECKAGE】
一個小得像籠子的客廳內,有一組背靠背的電視機,分別播放兩齣星級電影


在漆黑一片的展館內,基爾覺得擺放這個CRWALING FROM THE WRECKAGE的角落最特別。 由鐵枝屈成的梳化、桌椅全部髹上螢光綠漆油,在黑暗環境下發出耀眼而神秘的色彩,別具一種cyber感覺,咁特別當然要影張相畀大家睇睇。至於電視播的兩齣短片,其一是幾名演員於一個電影訪問會中談及喪友之痛;另一齣是有Natalie Portman參演的仿《American Idol》比賽騷。


【TANNHAUSER】
5個不同的白色箱可供內進,像《星空奇遇》的駕駛艙,播放不同電影閉幕的錄像片段

【THE ARRIVAL VENGEANCE】
一齣以慢鏡拍攝一個女孩從天台躍下的電影投影在牆上


這set太空科幻電影味道十足的模擬駕駛艙也非常特別,也有點機竇味道。裏面電視播放的短片不少也是大師級的作品,非常值得一睇。如果係對電影或影像藝術有興趣的人,一定會黐住喱一part唔肯走。「駕駛艙」外還有一個大銀幕,以超慢鏡拍攝一個女人由大廈天台跳樓的影像,睇到令人心肝卜卜跳!


【SPINAL MOUNT STARCRACKER】
一個4米的「破球」被獎盃淹沒


在香港,將如此規模的視覺藝術變為現實的展覽,其中的挑戰和複雜程度是空前的,但在面對挑戰的過程中,一種搭建私人與公眾機構交流橋樑的新模式也逐漸形成。藝術不單止是一件感觀的物件,也是一個個人或集體的想像空間。


【GOLIATH】
一間位於黑迷宮出口的秘密房間,裏面擺放了展覽的幕後製作藍圖、草圖和相片


「英雄從日常世界冒險走進超自然奇幻的境域……」,這是學者Joseph Campbell筆下的「英雄之旅」的第一階段,一個他認為是原形的神話,自有史以來,便在不同的文化出現。Simon Birch今次這個「HOPE & GLORY」展覽中,將錯綜複雜的裝置藝術以多重的層面呈現,跨越時空。藝術不僅是看得見的東西,也是一股實在的力量。正如場刊中的一段簡介說﹕「一個精彩奇異的現實,就如一艘太空船或一個馬戲團,空降在香港的超現實空間。」到底,喱個奇幻的超現實空間,又吸唔吸引到你去探索呢?!

2010年5月17日 星期一

麥記法蘭西杯出土

唔知由幾時開始,麥記、OK、7仔、KFC之類的快餐連銷店、便利店就經常有叮噹、吉蒂貓、麥叔叔公仔、pooh、姆明……真係換過不停,如果再加埋百記、惠記超市,諗返真係全年身邊都不停有同事朋友問拎乜乜印花,似乎已經成為一種熱門的營商手法。至於換果D野,其實都唔係樣樣都咁值得去換,不過當中也不乏經典的精品,例如以下喱樣!



日前基爾媽執拾廚房時,無意間在灶底發掘出一批「文物」!就係喱幾隻麥記玻璃杯,拎出黎問基爾仲要唔要,唔要就掉去垃圾房啦咁鬼阻訂!基爾打開個盒拎出黎睇睇,無裂無爛又無發霉,仲保存得唔錯添。記憶中喱套玻璃杯應該係基爾哥當年換的吧?!最近其實麥記又回歸基本步玩下復古,推出久遺了的麥當勞叔叔、巨無霸警長、小飛飛、滑嘟嘟、漢堡神偷及芝士漢堡市長公仔,不過基爾見過佢D手工好似麻麻地,所以無乜意慾去換。話時話,基爾都幾乎唔記得漢堡神偷同巨無霸警長咯?!滑嘟嘟係伐表奶昔,咁小飛飛又係咩?係咪薯條呢?



講返喱套麥記玻璃杯,每隻都有成6、7吋高,杯口可以塞落個拳頭添,都幾大隻架(所以幾阻訂)!杯上的卡通人物分別係好經典的麥叔叔、漢堡神偷、小飛飛同滑嘟嘟(唔知當年仲有冇其他人物款式),值得一讚的係圖案設計得好靚,印刷亦相當精美細緻,唔似係一般粗製濫造的貨式。卡通公仔的造型以聖誕節為主題,應該係聖誕前後推出的吧?!可能係用黎做聖誕禮物之類的,公仔旁邊仲印有麥記copyright同埋「2001」字樣~~~~再望下杯底,竟然每隻都貼有一張小小的銀色圓形貼紙,上面印住「Made in France」,嘩!!!乜原來係法國貨黎架喎!除在LV同屋企果部Brandt洗衣機之外,基爾已經唔太記得近年有咩係「Made in France」(記得以前仲有威斯汀雪櫃)!分分鐘果架洗衣機都係大陸或東南亞裝嵌的,話晒家陣祖國係世界工廠丫嘛!記得當年即使坐十幾粒鐘去到巴黎,想買下手信、紀念品之類的東西,隨手拎起一件望望都係「Made in China」的,購買意慾即時急跌九成!

至於最後喱set法國貨麥叔叔玻璃杯有無拎去垃圾房?當然係無啦~~~基爾媽一聽到基爾嘩嘩聲咁話「係法國貨黎架」之後,即時拎塊毛巾出黎抹下D杯,然後好小心咁擺返落D盒度,再好小心咁收返入去灶底深處……如果下次基爾媽又摷到基爾 D咩珍藏野出黎話阻訂要拎去垃圾房,用返喱條計仔都唔錯!

2010年5月14日 星期五

鼎泰豐@銅鑼灣

記得基爾大約6、7年前第一次去台北時,聽人講話一定要去食下鼎泰豐,當年仲好似只有信義路果間老店,要勁排長龍,即使係七月大熱天時一於照排,排排下見無聊仲走埋去隔籬果間舖買鴨舌食,一路食一路等,成為一個幾過癮的回憶!


鹵水牛展

其後幾次再去台北都仲有返尋味,去過忠孝路、復興路的鼎泰豐分店,貪唔駛排得咁辛苦之餘,味道水準都keep得ok,唔會大跌watt!再後來聽聞澳門都有,有次過到去就慕名一試,點知完全唔掂,小籠包似公仔點心貨式。幾年前紅磡黃埔蔡瀾果邊又話開鼎泰豐,不過聽聞都只係一般,所以一直都無意欲去食。最近聽同學仔K話銅鑼灣富豪酒店樓下商場開左鼎泰豐新店想去試試,還召集了Q及畢業後一直無再見的C,於是基爾唯有又「冒險」提早蛇出去赴會。

鼠到出銅鑼灣才八點幾,見K及Q已經拎左飛等緊位,店門前仲有成大堆人,心知不妙!嘩~~~乜要等十幾張台咁誇張!唯有一齊罰企,一路傾下偈一路欣賞下櫥窗入面D師傅包小籠包及餃子的手勢啦!


上圖左起﹕辣味小黃瓜、特色小籠包、台式麻醬撈麵、鹵水牛展

好彩D台尚算去得快,會合C後大約九點鬆D就有台,K仲好醒目地要求換左張卡位台添!由於大家個肚已經打緊鼓,於是坐低就拿拿林叫野,幾乎唔駛睇menu就先叫左小籠包,仲有台式麻醬撈麵貪佢飽肚,以及小黃瓜、食上海菜好多時都食的鹵水牛展等。果然上菜速度也好快,先講小籠包,雖然算係皮薄,但唔算勁好食,始終比唔上台北老店的水準(可能旅行的心情興奮D),而且一籠只有寥寥6隻,記憶中台北店一籠有12隻,心理上好似唔抵食;好彩小黃瓜仲好fresh好清爽;鹵水牛展雖然少少鞋,但同麻醬撈麵都屬合格水平。


上圖左起﹕蒜茸通菜、菜肉紅油抄手、油炸排骨湯麵、素菜蒸餃、迷你芝麻包

4個人食咁少當然唔夠喉!再叫了另一心水之選菜肉紅油抄手,同埋蒜茸通菜、油炸排骨湯麵及甜點迷你芝麻包。紅油抄手感覺上唔夠上次食「小辣椒」咁好食,可能係D紅油唔夠香辣(雖然基爾其實唔太食得辣);蒜茸通菜有少少油膩但ok;至於油炸排骨湯麵基爾只食了一小塊豬扒,唔太特別,可以不試!

值得一讚係侍應姐姐都幾細心,見基爾幾個食得七七八八才來問是否可以上甜點迷你芝麻包,可以好新鮮熱辣咁歎個包,而且個包其實一D都唔算迷你,有一般酒漊的叉燒包咁大個,唯一要挑剔的係D麻蓉餡料似乎唔夠多,可能基爾太貪心吧!最後大家都仲未見飽,再encore左個素菜蒸餃,與小籠包一樣都係蒸籠大大餃子少少咁~~~~結果埋單計$100左右each,整體上覺得少貴同埋唔算太好食,不過志在有個位坐低傾下食下又唔會催人走,算係ok的一餐!
 
鼎泰豐 Din Tai Fung
銅鑼灣怡和街68號地下

2010年5月10日 星期一

風從寶島來@涵碧

是驟生也是夭亡的典禮
剎那的驚嘆,轉瞬的繁華
風吹的一株水晶樹
浪放的一千蓬煙花
為何偏偏向頑石上長呢?
為何偏偏向絕壁上開?



上房搞掂晒D行李後,看看窗外,雨好像收細了一點,天色也好像好了一點,立即就起程去遊湖了。這次同行友人選的民宿「桂月村」,主要是貪佢就在水社碼頭旁,而且來往台中的巴士總站也在步程10分鐘的範圍內,交通算是非常方便。民宿雖只是一座小小的三層樓房,但飯廳房間也算寬敞企理,還有一個小小的後園,都幾愜意!反正兩日一夜每人折合計也不過270港元左右,但已經包晚餐、翌日早餐及遊湖船票,都真係幾鬼抵!



由水社開出的環湖遊艇班次非常密,好似觀光巴士一樣,沿湖設有玄光寺、伊達邵及水社3個碼頭,遊人可隨時登岸遊逛,再返回碼頭等下一班船去下一站。巡迴遊艇由早上9點至下午6點,基本上沒時間限制,每站也可停留個多小時hea逛也無問題!不過由於當天正好是周日,遊人超多,而且勁多大陸同胞團,所以每次登岸都成村人咁,幾煞風景!上圖為第1站的玄光寺碼頭,由水社坐小遊艇來到玄光寺碼頭約只需20分鐘,途中會經過湖中央分隔日潭及月潭的拉魯島(即上圖中央的小島),由於該島安奉了邵族祖先的靈位,是邵族的靈島,所以平時不會讓遊人登島參觀,只有在特定節日時才開放。至於上圖右的僧人石雕為玄光寺前的玄奘法師像,只見成村大陸同胞連成人龍排在石像旁輪候與玄奘法師合照,所以完全不用考慮就放棄與唐三奘影張到此一遊的合照了。

玄光寺與大部分中國內地的佛寺建築分別不大,山門內也有鐘樓鼓樓以及大雄寶殿之類,但矜貴在寺內供奉了唐玄奘法師的佛骨。該佛寺其實歷史不太久遠,建於民國47年(1958年),寺內的玄奘佛骨原置於南京,但二次大戰時日本人將它盜返國,供奉到琦玉縣的慈恩寺內,直至1955年國民政府才向日本請回佛骨,並在日月潭畔建寺供奉。寺內現時還有一具玄奘大師的金身像,上懸「民族宗師」扁額,以彰顯他遠赴天竺取西經的功德。



由於遊人實在太多,在玄光寺只短逛了大約30分鐘即撇,回到碼頭等船再往下一站伊達邵!由玄光寺往伊達邵碼頭不需15分鐘,由於這裏環境較開闊,遊人可分散遊逛,壓逼感頓時減輕不少,終於可以一嘗hea逛的閒情。伊達邵碼頭非常大,主要採用上圖這種浮橋式設計,全個碼頭有十多個泊位,所以即使人多也絕不擁擠,在碼頭旁的觀景亭附近還巧遇圖右這隻可愛的牧羊犬。

伊達邵岸邊的平地較寬廣,是昔日邵族主要的聚居地。傳說台灣原住民之一的邵族原本居於阿里山一帶,某次族中的獵人因追獵一頭大白鹿,誤打誤撞來到水草豐美的日月潭畔,並開始在此定居,以農耕捕漁為生計。現時岸上的民居大多已變成民宿,或出售各式邵族工藝品的小商店。



離開伊達邵,又再登船返回水社碼頭完成兩個多小時的遊湖旅程!由於時間尚早,大約只是5時左右,晚飯也不會這樣早吃,所以索性去逛逛水社碼頭旁的涵碧步道,繼續沿湖欣賞煙雨濛濛的靚景。

涵碧步道算是沿湖最短亦最易走的步道,全場只有1.5公里,環繞涵碧半島走一圈,來回也不過個多小時,如果一路行一路影相的話,兩粒鐘乜都行完。在半島的山上有一座涵碧樓,是昔日蔣公與宋夫人的私人避暑山莊,現時則改建為五星級酒店。從涵碧樓內可270度盡覽全湖靚景,也能將對岸青龍山脈及拉魯島形成的「青龍搶珠」風水格局盡收眼底,所以據說每年夏天蔣公與夫人都愛來到涵碧樓渡假,而且附近也留下了不少「蔣公勝蹟」供人憑吊,例如蔣公亭、蔣公碼頭、憲兵守衛亭及蔣公舢舨等,恍如一間戶外的蔣公紀念館!



由水社碼頭出發,就可見到一條修築得非常整齊雅致的木棧道,它就是涵碧步道。日月潭的環湖步道其實全部都修得好企理,所以絕無難度,可謂老少咸宜。雖然當天片霧片雨,但即使是烈日放晴的盛夏季節也不用擔心要受曝曬之苦,因為沿步道兩旁綠樹林蔭處處,形成一道天然是清涼長廊。上圖右為蔣公亭,圖下方則是蔣公碼頭伸延出來的長長浮橋。



當來到上圖紅色的育樂亭時,已走了涵碧步道的三分一。雖然無錢入住涵碧樓感受青龍王氣,但從育樂亭遠眺湖面,亦可看到由對岸山上的慈恩塔、玄奘寺、玄光寺及拉魯島組成的「幸福連線」,台灣人相信在這裏許願的話,就能心想事成!至於上圖左為日月潭上常見的浮草田,是昔日邵族人在湖上養蝦蟹的,也可讓湖中的魚有地方產卵及水鳥棲息,可謂多功能的浮草田。



在育樂亭往背後的小山丘往上望,就可看到巍峨矗立在山上的涵碧樓大飯店(上圖右),酒店下就是蔣公當年曾扒過的小舟,旁邊就是憲兵守衛亭。據聞昔日蔣公每逢來渡假時,憲兵會在亭內24小時輪值守衛。



離開育樂亭後,繼續往前走,沿途不是木棧道就是石階路,難得遊人不多,四周環境煞是清幽,可能大陸同胞團未必會安排佢地hea逛這些步道吧!只有自遊行才能真正享受到這份難得的閒適。

涵碧步道沿湖的盡頭就是杏壇劇場,那是一個小小的圓形木建築,就如香港某些市鎮公園常見的那種戶外小劇場。杏壇有一條小石階登上涵碧山丘,沿山徑可以途經有蔣公題扁的耶穌堂、梅荷園等景點,山上也能以高角度再欣賞全湖靚景,梅荷園則有一條古老石階返回水社碼頭一帶的大馬路,回到民宿時才不過6時多,洗個面就剛剛好可以去開餐!

2010年5月9日 星期日

椰汁紅豆糕

因為日日返工太忙碌(又可以話係懶的藉口),所以都有一排無煮野食。諗諗今次「久休復出」煮D咩畀大家睇下好呢?!好啦,就整下面喱樣好耐都無整過既野啦。



久疏廚房戰陣的基爾,其實今次都有少少緊張,但又無理由就咁煎隻荷包蛋畀大家睇咁欺場吧!諗起都好耐無整上面喱味野,不如就試下睇睇仲記唔記得點整先……無錯!嚴格上黎講今次唔係玩煮飯仔,而係整甜品——登登登凳!椰汁紅豆糕是也!

好喇,講完一輪無聊的開場白之後,點都要郁手架喇!整法其實都唔太複雜,首先當然係要去買定材料先,包括半斤紅豆、大裝椰漿一罐、大裝花奶一罐、栗粉一大盒,就係咁多野,有幾難唧(肥媽上身)!

Step 1﹕先用清水將紅豆烚熟,約10分鐘見佢開始林身即可,注意千其唔好煮太耐變成煲紅豆沙。烚熟後隔走水份,用大碗裝好攤凍備用,而烚紅豆的水也可另外用碗盛載備用。
Step 2﹕將椰漿及花奶全部倒在另一大碗內,再攪勻。
Step 3﹕將粟粉逐少逐少咁倒落去椰漿花奶裏,份量大約用半包,有心機的話就用個篩仔一路篩住D粟粉落,再用筷子一路攪勻佢,避免佢凝固成一舊舊粉團。




耐心咁攪勻喱碗椰漿花奶粟粉水,見佢呈白膠漿狀之後就OK。然後就要分身去煲定一煲糖水。

Step 4﹕糖水的份量大約係7碗飯碗的清水,加一碗白砂糖,驚肥的可以酌量減少少(淡奶也可選用植脂果隻),水微滾後再倒糖入水內,攪勻。
Step 5﹕糖溶化後,再將之前攪好的「白膠漿」椰漿花奶栗粉水倒入糖水內,倒的時候可以再用個篩仔篩多一次,以防還有未攪勻的粉團在內。
Step 6﹕見「白膠漿」微滾,然後才落已烚林的紅豆,落完紅豆後要再慢慢攪一攪成煲野,以防紅豆黐底會燒焦。全程毋須蓋上煲蓋。
Step 7﹕好喇,為免底糕太白雪雪令賣相唔係咁靚仔,最後再酌量落返少少先前烚紅豆的水,令「白膠漿」呈現微紅色。




經過上面7個steps之後,基本上已經完成,然後就要快手快腳「上碟」。基本上可以用返上次做蘿蔔糕時用的大盤子,將微微杰杰地的紅豆糕漿倒入去。由於在室溫之下,紅豆糕漿會迅速凝固成糕狀,所以手腳要盡量快。將紅豆糕攤涼之後可以用保鮮紙包好,再放入雪櫃普通格內雪凍即可。食的時間可以先將盤狀的紅豆糕切成一個個立方體,咁就very good喇!

基爾媽賽後評語﹕全個過程中,攪栗粉的步驟最重要,基爾又要攪又要掛住影相雞手鴨腳咁,所以攪得唔算太勻均,不過好彩有個篩隔一隔D粉漿補救返;另外最後倒紅豆水的份量唔多足夠,所以糕身白雪雪左D,唔太靚仔,下次可以再倒多少少紅豆水令佢呈現紅一點顏色。

p.s.煮野其實同做其他野一樣,都唔可以懶,真係工多先至可以藝熟,又上了寶貴的一課!

2010年5月6日 星期四

捧Miss21場睇畫@中央圖書館

早前睇blog友寫話會再有得意作品展出,其實佢之前已在石硤尾展過,不過果陣時就抽唔到時間去睇,喱次基爾答應會去捧下佢場!



周一特登早一個鐘出門口,就係諗住返工之前去中央圖書館展覽廳睇喱個展覽,算係夠神心卦!喱朝早黎到展場,可能因為已展了3日,加上唔係假期,所以都唔算多人。基爾都算係大鄉里,第1次黎喱度睇畫展,所以都搵左一陣先搵到佢個「地庫」入口。中央圖書館的地庫展廳原來都幾大,同時可容納3個展覽。



Blog友母校搞的喱個展覽佔據了中間最大的一個展廳,比想像中的規模要大,除了有大量該校學生的傑作之外,仲有不少舊生校友的作品展出。展品的種品包羅萬有,除了有水彩畫、國畫、書法、油畫之外,仲有各式雕塑、陶瓷、剪紙、圖章、座台月曆設計等等,琳瑯滿目,快掃一圈都要大半小時。



由於之後要返工,一定要抓緊時間,首要當然係搵下blog友的佳作先得啦!拿拿拿,在其中一個角落終於搵到上面喱幅代表作,之前在佢blog中已見過幾次,今次終於見到真蹟,果然比網上睇更有質感,始終油畫係要睇實物精彩好多。



除了杯子之外,搵左好耐之後再在近門口處發現上面喱兩幅,係咪有點Edvard Munch《The Scream》的神彩?融化的熊人就令我想起Coca Cola果隻北極態。Blog友應該係幾鍾意紅、橙色的,是用暖色調的能手吧!



再睇睇幾件基爾有駐足欣賞的作品。上圖喱一set高身玻璃杯幾特別,每隻玻璃杯都刻上不同的圖案,原理唔太清楚,但確實係幾靚的。始終比較喜歡一些清雅的design,除左玻璃杯外,仲有幾幅水彩畫都好有水準,例如上圖中的古鎮巷陌,淡黃的色調與古巷情懷非常配合。至於下圖左的淺灘,水天一色的景致也令人神往,近景的水波紋則令寧靜的畫面平添不少動感!



臨走前拿了這次展覽的場刊,裏面都有刊載blog友的油畫。順帶一提,原來佢「系出名門」,喱間在該區都係名校黎,唔怪得佢咁有藝術修養啦!另一個意外收穫當然係知道左佢個真名~~~~不過為顧全blog友的私隱,基爾當然唔會在這裏披露,但以後除左會叫佢做7e之外,仲會叫佢個新朵「Miss 21」!哈哈哈~~~~~!btw,下次再展時希望會見到Miss 21的盧山真面目。

2010年5月4日 星期二

康甜餅店@鯽魚涌

之前提過公司附近有唔少「老餅舖」,最適合基爾喱D老餅去幫趁!上次食過蛋撻,今次再試下曲奇餅。


袋裝曲奇 $15

某日同事E返工,見佢拎住袋曲奇餅返黎,細問下原來係在公司附近的喱間西餅舖買的。平時買蛋撻多數去幫趁新鳳凰,喱間就比較少光顧,只聽聞佢D豆沙菠蘿包係幾得的,至於曲奇餅就從來未試過。基爾同E新舊公司夾埋咁多年同事,當然老實不客氣地搶黎食下。咦~~~正喎!食曲奇餅好多人都係鍾意食脆的,好似藍罐果隻咁,有糖粒或者提子之類,不過喱隻竟然係軟林林的soft cookies(但又不是疏了氣的過期餅乾那種感覺),鬆散得彷彿入口即溶一樣,而且牛油香味十足,面頭仲有一篤朱古力,令整塊曲奇生色不少。值得一提仲有佢個懷舊logo,托住麵包果個廚師令基爾想起blog友獅兄!由於喱包名不經傳的曲奇好味程度係屬於食一啖就唔停得口的級數,最終成袋餅幾乎畀基爾食晒,都有少少唔好意思! p.s. 順手講埋藍罐,唔知裏面咁多款曲奇,大家最鍾意係食邊樣呢?基爾的「飛佛」係純味圓形像大餅果隻,其次依次為純味中間有個圈、有糖蝴蝶形、再到有糖長方形,通常到最後最後先至食好難食果隻有提子的。
 
康甜餅店
北角七姊妹道 199 號地下

2010年5月2日 星期日

從軍行初體驗@石崗軍營

香港唔似台灣、南韓咁推行服兵役制度,所以一般人都無乜機會去當兵。每年只有在五一勞動節或十一國慶時,石崗、昂船洲等幾個解放軍軍營搞開放日,才有機會近距離感受一下軍旅生活。



之前與同學仔M唔知傾開乜,佢話記得讀書時聽基爾講過話想去當兵,基爾心諗實在太不可思議,完全忘記自己有咁講過,不過M好肯定佢無記錯,咁可能係基爾老人痴呆吧!Anyway~~~早前乘工作之便,有機會於石崗軍營開放日入營參觀,確實令人一開眼界,唔怪得每次派飛都咁多人晨咁早去排長龍輪候啦!

石崗軍營平時不對外開放,只在五一或十一讓市民參觀。莫講話入軍營,基爾印象中連石崗咁山卡罅的地方也從來無去過,當然也不會咁神心通宵排隊去輪開放日入場券,這次有機會自然要去睇睇。由家坐火車去大埔墟站,以為坐64K可以直達石崗軍營,不過原來係要在羅屋附近轉54或251M,否則就要行好遠。轉來轉去花了近兩個鐘終於來到石崗軍營大門,已經差不多中午12點了,上午升旗之類的表演睇唔到,不過無所謂啦!拿拿林入去睇下仲有咩睇先。

由正門入去,即見到一個大告示板,上面除了有軍營地圖外,仲有不同表演節目的run down,突然大聲公傳來話大草坪有「反恐演習」,基爾就與大堆人潮一齊湧向草坪睇野。點知行行下已經有幾架直升軍機在頭頂轟轟聲飛過,然後定在一座大樓的上空,跟住有條繩由直升機吊下來,幾名軍人就火速游繩到大樓天台著陸。另一邊草坪上,又唔知係邊度突然有幾架迷彩軍車掟彎駕出來,幾個軍人荷槍衝出,有些伏在草地上嚴陣以待,有些就衝進大樓內,配合大樓頂從直升機吊下來的軍人夾擊恐怖份子,仲聽到佢地用國語嗌咪喝令恐怖份子棄械投降。然後就聽到一輪震耳的呯呯開槍聲音,歷時幾分鐘,打完一輪待煙霧散去之後,就見軍人們用孖葉搭住恐怖份子上車,一溜煙的開車走了。感動上整個反恐演練幾似深圳主題公園的戰爭特技表演,商業味道十足。



睇完勁度十足的反恐表演後,再四圍睇下有乜特別展覽,見到球場喱邊擺左幾支AK47之類的槍械,好多小朋友來排隊試試舉槍的感覺。機關槍當然不會上子彈,而且旁邊還有兵大哥從旁指導。基爾幾廿歲人當然不會去同小朋友爭玩槍,只在旁睇下就算(雖然個心都幾想玩)。

睇完槍再去路邊睇軍車,解放軍車之前在電視見過,實物就第一次見,原來同一般運菜車差不多,只是車頂蓋了迷彩的帳篷吧了!同場加演了解放軍即席示範窄路調頭同埋換車胎。窄路調頭絕對唔係一般駛前駛後轉位咁麻煩,原來佢地係有一個類似「千斤頂」的工具,放在車底可以將整架車托起,然後幾個軍人分別在車頭及車尾合力將軍車180度旋轉調頭就可以了,就好似酒樓食飯的轉盤咁,非常有趣。至於換車胎,二人合力基本上15秒就可以換一個,效率驚人。



睇完換車胎之後,再登堂入室走去軍人宿舍睇下。宿舍大樓只是兩三層高的樓房,每層間開成幾個大房,感覺上似浸會宣道園或嘉道理、北潭涌之類的宿營營舍。每間大房擺放了6-8張床,每張床邊有一個床頭櫃及衣櫃。衣櫃裏掛了幾件軍褸及畢挺的恤衫、各式軍帽及皮帶,還有擦得靚立立的皮鞋。床上則有一張摺到起晒角的被褥,少不了當然仲有兵大哥即席示範如何摺出這張起角的被褥!



睇完營舍後再走出偌大的操場,有單槓雙槓等簡單健身器材,應該係軍人平時操練之用。再走遠一點還可見到迷彩裝甲車展出,可惜不能上軍參觀,繞車睇一圈就繼續往前走。臨走前在大門旁的小花園,見到放置了幾個著名軍人的銅像,每個神態都栩栩如生,例如有正在看書的雷鋒,他在60-70年代文革時期一直被塑造成共產黨員革命象徵及模範。旁邊手持長槍大聲疾呼的是董存瑞,1948年國共內戰時期,他在河北關鍵的隆化之戰中捨身炸碉堡英勇犧牲。每個銅像背後,似乎都有個中國人的血淚故事。



p.s.講開軍人,屋企其實仲有個一個美國大兵figure,係基爾爸送的,見佢手工都相當精巧,軍服、頭盔、手榴彈、軍刀、長靴、望遠鏡、長槍一應俱全,而且仲有美軍的號碼鐵牌呢!咪以為佢只係4、5cm高的細公仔,其實佢都幾高大,有十幾吋高,而且都幾型仔,所以咁多年來都無掉到,一直保存至今。