2018年12月30日 星期日

舊金山居閑話@Monterey

話咁快又過了聖誕節,咁Boxing Day這天又有乜好去處呢?唔理咁多食了早餐再從長計議……



由於之前有諗過駕車南下去LA,但考慮到大節流流多人放長假highway一定好塞車最後也作罷。不過遠的不去,近近地都去海邊來個day trip啦!



有冇人仲記得之前基爾都有去過太平洋海岸的衝浪勝地Santa Cruz,今次再去遠少少來到海灣南邊的Monterey,唔知有冇發掘到新野睇下呢?



加州天氣確係好正,冬日不太冷之餘,藍天也藍得很迷人……泊好車就沿海岸線的小徑一直往海邊走過去,遊人不太多感覺甚chill甚愜意!



順帶一提這裏還設有單車徑,如果有帶單車來可以沿住海邊踩一陣扮下文青;不過其實齋walk也不太遠路程,好快就可以出到海濱睇浪去。



風和日麗的加州冬日,雖然係有點晒,但一點也不覺得熱喎!可能因為近海邊關係,凜冽的海風不斷從遠處的太平洋吹送過來,感覺就是爽!



若嫌海風太大吹到頭暈,也可選擇到公園裏漫步一陣。公園大草坪上豎立了大鯨魚雕塑,可能這裏也是鯨魚南往北返的主要路線吧!



除了鯨魚之外其實仲有好多其他雕塑藝術品,這個Pacific Grove Marine Gardens Park就是勝在地方夠大,草地上也不會有「不准踐踏」告示牌。



可能臨海長年吹大風,令樹的生長形態也很獨特;一路行到盡頭,就見到「天崖海角」,不過這裏當然不會有巨大石碑畀人打卡……



Monterey與之前去過的Santa Cruz兩個沿海小城似乎也不太多外地遊客,不過上網翻查這裏的17-Mile Drive也很出名,被譽為北加州最美海岸線。



確實在這一望無際的太平洋海岸即使呆坐一整天來看海看浪看日落,也著實不會感到沉悶(當然先決條件要頂得順強勁海風)。



唔怕被海風吹落海可以再行出少少石崖邊睇睇會發現有不少驚喜。除了大大小小的各類海烏來覓食之外,仔細留意石縫間仲有來晒太陽的小松鼠。



看到上圖會否有少少覺得似去了東坪洲一樣,但其實是飛了十萬八千里才來到的太平洋另一邊海岸,這裏崖邊的六角柱石同東坪洲竟如出一轍。



車……早知唔駛坐成十幾個鐘飛機咁辛苦啦係咪!Anyway……至少東坪洲無喱度咁多巨海鷗和松鼠睇吧!



香港的小松鼠一般都好怕人,離遠望見都即時九秒九閃走;但Monterey這裏就完全唔怕人,經常仲會企定定畀人隨意影張性感海灘寫真。



鏡頭裏的海鷗看來不太大隻,但其實牠們大部份雙翼展開都有差不多基爾雙臂展開的闊度;上圖右是一位因在海岸救人不幸離世的英雄紀念碑。



走到海灘上看看,冬天不見有人來游水,像基爾這樣來觀浪的遊人居多。在這些淺礁石灘上,聽聞間中也會見到有海獅海豹來睡午覺。



上網找找,才知這裏沿住17-Mile Drive向南走,還有Bird Rock和Seal Rock兩處景點,基爾沒有仔細研究上圖這裏是否Bird Rock,因為這一帶海邊其實有好多rock都企滿了bird。



喜歡影浪花的攝影大師來到這裏一定不會失望,即使技術不高如基爾,也可輕易捕捉到大浪擊濺上礁石的一剎那(影兩三次就影到)。



看看藍天、看看浪花、看看淺灘看看松鼠海鷗,完全不用趕車、趕船、趕看景點又或者趕住去shopping,如此這般又悠悠閒hea過了大半天光陰,旅居在外享受一下慢活也不過份奢侈吧!



順帶一提這條迷人濱海大道旁邊仲有唔少golf球場,可以咁近距離睇到人地打golf基爾也是第一次,突然覺得自己好似也升呢做了上等人一樣!



好耐以前去過一趟西貢滘西洲的高球場(重看可click去:遊滘西洲),Pacific Grove Golf Links這裏感覺就更空曠大草坪更一望無際,而且重點係即使如基爾這般的閒人也不會被趕走……而且還可借用個方便!

2018年12月25日 星期二

舊金山居閑話@Hidden Villa

光陰似箭日月如梭!真係話咁快舊金山居閑話網誌眨下眼已經寫了一周年……話說來到聖誕日這天,同樣係無乜特別地方好去,咁不如近近地去個隱世農莊閒蕩一下吧!



究竟有幾「隱世」,睇睇上面張相可能會感受到一丁點,農莊入口就長這樣,其實有少少似香港D郊野公園遊客中心之類。



這個隱世農莊位於Los Altos Hills的山區裏,來到入口停車場泊好車就自己行入去吧!說這裏似來到郊野公園,因入口這裏就有必備的行山地圖。



這天來到似乎天陰陰有點想下雨(加州的冬天是雨季),而且時間好像有點不太充裕(懶就懶啦諸多藉口),咁就留返下次來才去走走行山徑吧!先去山下的農莊逛一逛……



莊園望落感覺其實有點似緣田園那類的新界假日農莊,專門出租細細塊的農地比城市人來過一過當農夫癮,也可享受家庭樂,上圖是其中一塊南瓜田,十一十二月應是收成季節吧!



初頭離遠望都唔知上面喱塊田係種咩,還以為只係長滿了雜草的休耕田,行近D先見佢幢了塊小小的紫色牌,上面寫住係Lavender喎!不過可能未到花期所以不太覺聞到香味。



又來耕田學英文,上圖這兩塊細細的田只長出了小幼苗,到底係乜野來呢?開估:右面果種叫做Chard,查字典中文叫莙薘菜,以前廣東農家多數用來餵豬,所以又叫豬乸菜喎!左邊比較青綠叫Arugula,查字典原來是芝麻菜(也叫火箭菜)……咦!有聽過喎係咪打邊爐果隻油麥菜?但個樣又好似唔多似,係咪美洲同亞洲品種唔同呢?(好明顯條友好少去街市,乜菜打乜菜都唔識!)



研究完一輪種咩生果蔬菜之後再行入少少,話明係villa咁一定有住人的地方吧!唔通就係喱度?門口寫住係Hostel喎!基爾喱類閒人又唔係住客,都係免進了,只在門口莊莊下就算。唔知入去開房住一晚貴唔貴呢又?形住在這類深山過夜一定會好靜,可以拍套電鋸驚慄恐怖片……



生人唔生膽,咁驚就咪住啦!都係行過去農莊另一邊探探這群純情可愛的小綿羊比較似係基爾杯茶。唔知係咪喱日聖誕日都無乜人客來,小綿羊離遠見到基爾行過去似乎已相當雀躍,以為係終於有人來餵佢地吧!



咁橋羊欄隔籬又有堆草喎,就等基爾拎札草過去餵下佢地啦!個個即時湧過來好鬼過癮,但好明顯咁細札草唔夠分,食完個個仲好眼超超咁……睇完羊欄再去隔籬睇雞舍,喱度真係乜雞都有喎!但唔好問基爾白毛黑毛係咩品種,一定唔會識。



再行過少少,原來雞舍隔籬仲有間山羊屋,山羊仔好似比之前見到的綿羊仔幸福好多了,至少唔駛成日困係圍欄裏面等人餵咁悶,可以在屋外四圍走動一下,不知幾逍遙快活兼自在。



另一樣不愁衣不愁食無憂無慮過日子的仲有喱一對豬小姐(定還是豬先生),睇佢睡到日上三竿黃朝百晏依然肥斯大隻咁攤在牠的私人稻草大床上,最識嘆世界咪喱D囉!



咁就咪嘈住豬小姐搵周公,繼續行入少少睇下仲有咩有趣野睇!咦,喱一堆薰衣草好似有少少睇頭喎!同剛才田上那堆小幼苗有很大分別,開滿花之餘也聞到陣陣薰衣草香味,一定夠晒新鮮。



行去另一邊仲發現到有些看來似係亂世佳人年代的古老農具,似乎這個隱世農莊都很有一點歷史(人地張leaflet地圖咪有寫係上世紀二十年代買地開荒囉!又懶去睇)。由於只是求其在戶外擺放,大部份都早已生鏽看來似廢鐵場多過展品。



好了Animal Farm故事就講到喱度,因為差不多時間要返入城食個靚lunch。由於聖誕日基本上大部份食肆都唔開門營業,只有少量華人韓人食店有開,選擇也不多。



姑且來碰碰運氣,果然這間食中菜的陳媽媽廚房有開門,之前冬至果日來反而好似休息沒營業呢!之前講過「中式節日食西餐,西洋節日食中餐」這個定律,原來在外國都work喎!



好,廢話少說(竟然自知說太多廢話)!泊好車入去望望有乜好野食先……咦咪住!原來竟然同茶樓一樣要先拎籌等位,無計聖誕日仍做生意的食肆極少(見到麥記都休),就排住隊先啦!



幸好點幾鐘大部份食客都已差不多食飽準備埋單,所以大約等10分鐘左右已有位。安坐後快速望望個menu,見佢主要用繁體字而且有不少台式小吃供應(有紅糟肉、彰化肉圓、鹽酥雞、蚵仔煎和豬血糕),看來這位是來自寶島的廚后陳媽媽。



慣常的炒粉麵飯一應俱備,記憶中還好似叫了碗排骨湯麵,飯麵來到只掛住吃都忘了影相,當然也不太記得吃了什麼,但記憶中味道都好地道正宗(而且價錢也不貴)。



吃飽飽之後,最佳的散步消化餘興節目肯定是去逛超市,不過同樣好多西超都因為聖誕日不開門關係,結果去了行下這間都幾大的韓人超市。



雖則話係韓超,但其實都有幾多西洋野出售,同埋竟然仲有衫和電器賣,有少少似家樂福果類吧!話晒聖誕當然仲要擺返棵聖誕樹應一應節……



比較有趣係店內仲有這個售賣各式泡菜專櫃,一眼望埋去真係乜野醃菜都有,自己想要乜就自己夾(好似係按磅計)完全自助式,而且都幾多貌似韓人來買,感覺幾新鮮。



行完韓人超市就返歸,突然醒起來住咁耐好似都未試過去踩單車,黃昏時份趁住仲未日落西山之際,就出去兜下風先。平常在沙田踩經常都男女老幼車來車往非常墟陷熱鬧,來到這裏成條馬路霸晒都完全無問題啦!

2018年12月12日 星期三

雪梨盛夏光年@序章

揭揭個日曆唔經唔覺一年容易又來到年尾,基爾記得舊年又係喱個時候去了西半球的舊金山短住兼過聖誕新年,結果這個大長篇網誌寫足成年到依家都未寫完(已經好努力寫了)!雖然如此,今年仍會繼續向世界出發,這次則選擇了向南半球飛。



其實咁都有個好處,如果金山同雪梨一齊夾住夾住咁寫,係咪感覺上會無咁悶?Anyway,既然落實了旅居地點,咁又係時候間中上網巡一巡看看有冇快閃價筍野出現,眼見十月時的off-season只係HKD$3800起,真係睇到都流口水……



可惜十二月底人地話明係聖誕暑假旺季,當然發夢都不可能有咁大隻蛤乸跳出來送上門畀基爾輕鬆捕獲啦!平時幫襯開綠色喱間航空公司望極都似乎無乜快閃奇蹟出現,咁唯有再去望望紅色果間,喱間果然係平少少五千幾有交易,最後為免夜長夢多就爽快地落搭了!



上次跨越東西太平洋要呆坐成十幾粒鐘機真係幾難頂,今次飛越南太平洋希望算叫做近少少,也期望紅色航空啲餐會好食些少吧!順帶一提,如果有人仲記得大典之前連載過的「廢話小說」系列的話,應該會知基爾不是第一次去Sydney了(上次是坐袋鼠航空),希望這次重遊舊地會發掘到多些新奇有趣事物,令這趟盛夏光年旅程更充實。

2018年12月7日 星期五

舊金山居閑話@Rose Garden

平安夜這天很多地方都已經沒開門,所以也沒有什麼特別地方好去,在家閒hea無聊大半天後,下午不如出去行一陣公園啦!



雖則話基爾向來都有鋪行公園癮,不過今次這個Rose Garden又確係幾值得逛逛,尤其係鍾意影下花花草草的就更應抽點時間到此一遊。上圖是公園入口的大噴泉,池不知為何藍得這樣迷人呢?



經過門口時,仲留意到路邊幢了個膠板告示牌,除了話唔准放狗之外(少有喎!仲以為外國公園多數畀汪星人入去玩),原來仲有宣傳下月會有個集體種花的活動。



咁又幾好喎原來佢搞這個義工活動係歡迎這社區一帶的居民參與,到時只要自備種花工具來公園就可以一齊種玫瑰,聽落好似都幾好玩。



不過睇返佢個日子原來基爾已經上了機返歸了……Anyway繼續行下個玫瑰園先吧!唔知有冇人去過行九龍公園果個?如果有去過文物探知館的話,通常都會路經過。



當然外國勝在地方夠晒大,彷彿有無窮無盡的休閒空間(完全唔需要考慮填唔填海起人工島),與香港的迷你版本也不能相提並論,連平時較少有賞花惜花閒情的基爾也按捺不住要替嬌艷欲滴的玫瑰小姐來張美人寫真。



平時基爾因為懶,一般連部封塵已久的靚仔DC都已經甚少畀佢拋頭露面帶佢出街玩(要影就求其用手機算啦咪煩人),但話晒外遊姑且就帶埋佢上機,太耐唔用分分鐘驚佢會隨時罷工!



初頭都驚冇用架相機咁耐,會唔識用那些function key,幸好DC操作不會太複雜,影花就即管試下佢個微距mode,出來的景深效果都算唔錯啦,可以收貨吧!(想知靚仔DC乜樣可click:Pentax



做了好幾次實驗之後,先叫做摸返熟少少部相機,雖然這天一直都是天陰陰,沒有什麼燦爛陽光,但即使用懶鬼auto影出來都相當精準,不太覺眼有離譜的偏色!



冬天這裏似乎都很早就日落西山,即使只係晏晝三點幾鐘已開始有暮色漸濃的跡象。外國的天空是否特別美?基爾不太肯定,但絕對是更廣闊了吧(因為不會有太多高樓大廈的壓逼感)!



寫到喱度……都開始有少少佩服自己無聊閒逛個玫瑰園都可以寫得出咁長篇大論(或許只因還有你在看)!既然有你咁賞面陪住基爾寫下去,不如襯住仲未日落就再同場加遊多個Japanese Friendship Garden,駕車去只需10分鐘左右,不用另收你導遊費。



先留意一下門口這個公園開放時間的告示牌,唔來唔知乜原來冬天係Closed at 4:00pm(咁早?!),咁要抓緊時間火速入去蕩返個圈先。



趕時間都要睇睇個公園地圖吧!哦,原來這個日本友誼公園係為了紀念San Jose與Okayama結為姊妹城市,即時醒起有冇人去過岡山果個後樂園?同埋見佢個Summer Hours原來係開到晚上8:00的。



仲講!沒時間了,仲唔快點入去看看!這公園入面有個大湖區,靚景就長這樣。不過……驟眼睇好似……又唔係真係咁有Japanese style感覺咋喎!究竟佢係咪有參考岡山後樂園起的呢?



咦,咪字先!由喱個angle影出去總算有點對辦了,咩原因呢?就係因為湖邊那座紅橋囉!唔知點解在任何風景之下,只要加座日式紅橋就即刻加添了日本味。



離遠望都見有些遊人行上去紅橋參觀影靚相,咁個view應該都唔錯,基爾唔走雞都拿拿林行過去八一八先。



行到橋邊仲見到湖裏面有好多錦鯉在游來游去,唔知係咪有人在餵麵包?另外仲見有石雕燈籠裝飾,都是日式庭園必備的裝飾擺設。



另外湖面仲有一雙鴛鴦游過,唔知係咪公園臨近關門遊人也不多,所以兩隻野都出來玩陣嬉下水先。



成個公園其實都幾大,有些內園區都來不及行落去影下相,只係離遠望下就算,費事一陣行得太入,公園管理員一個唔覺意閂了大閘,咁今晚平安夜就要在公園裏露宿一宵了。



沿路再行返出公園大門口,喱座木建的仿古大門建築都造得似模似樣喎!有冇少少似去了京都奈良那些古寺神社的感覺呢?



公園管理員伯伯可能想準時收工,不斷四圍兜圈催促遊人要走了,差不多4:00pm要閂門啦!聖誕平安夜大時大節基爾當然唔會咁唔通氣阻人收工,影埋前園這群飛來覓食的大雁就收機走人了,Merry Christmas!

Japanese Friendship Garden
The Garden was built as a symbol of everlasting friendship between the City of San Jose and its Sister City of Okayama, Japan in 1965 and is patterned after the world famous Korakuen Garden in Okayama. In every direction the eye is delighted, complete with picturesque Japanese bridges, waterfalls and golden Koi fish.