2017年10月25日 星期三

珍郵庫@旗袍

眾所周知依家果位本市首長係愛穿旗袍出名,唔知係咪咁所以郵署今年都要賀一賀佢坐正,出返一套以旗袍為主題的首日封!



話咁快又來到2017年尾,餘下新發行的首日封除了上面這套旗袍之外,就只剩11月中出的竹刻,其實喱兩套都幾靚好值得一訂。另外,2018年度的首日封也開始接受預訂了,有興趣的就趕快去郵局拎返張簡介和預訂表格,基爾覺得明年底的粵劇和金庸人物兩套也是超靚,屬必訂之選!



講返今次喱套旗袍郵票,設計本身都頗具東方韻美。上圖可見首日封左邊的傳統織花紐扣字樣和裁剪紙樣圖案的特別郵戳都很有特色,$10小型張上的旗袍形郵票也是香港首創。唔知有冇人細個時玩過剪紙果種換衫時裝紙公仔,這款小型張的設計就很有那種懷舊玩具的味道了!



Close-up再睇真D郵票!唔睇封背個簡介都唔知,原來旗袍設計的歷史已有近一世紀,主要承襲了清朝旗人長袍的特式。先看上面3款:$1.7是1920年代的旗袍,看清末民初劇集經常會見很多女角色會穿這款長衫,裙襬和衣袖都比較寬闊平直保守;中間$2.2金黃色的是1930年代款式,開始凸顯窄身修長線條,裙身兩側開叉較高方便走路,30年代不少上海明星歌星老照片都會穿這款;$2.9深藍色是1940年代流行款式,裙身明顯縮短,也可能因二戰關係,衣料也較平實,裝飾較少……



再看餘下3款:$3.1綠色的是1950年代流行款式,袍身纖窄裙襬收窄衣領加高,是當年白領麗人最端莊得體的上班服裝;$3.7紫色的是1960年代款式,同樣是短身、修腰、貼身剪裁,營造葫蘆身形效果,是當年女性體態美的標準,難怪不少粵語長片中的女星都穿這樣;最後$5紅色的是1970年代款式,由於西式衣裙興起令旗袍漸受冷落,但在一些宴會或選美場合仍會被視為禮服穿著,時至今日還有部份歷史悠久的女校仍會保留民初時代承傳下來的長衫校服設計。

旗袍
發行日期:2017年10月17日

2017年10月10日 星期二

歲月兒歌@流行經典50年

好多人就話廣東歌已沒落,基爾都覺得今時今日已經無乜人會再睇勁歌或季選之類的音樂節目了吧!不過近期一個周末的懷舊老餅歌節目卻製造了不少令人眼前一亮的奇蹟,至少基爾都有睇!



美少女戰士    王馨平/湯寶如
真係唔講唔知喎!喱個流行經典歌節目在周末已成為皇牌,長期有成20幾點收視,比現今大台唔少無謂老土劇集都要勁,難怪長做長有。早前播出的兒歌特集就非常吸晴,其中Linda和湯記唱的美少女戰士可謂將基爾的青蔥歲月回憶完整重現了(無謂呃人啦基爾想當年都已經唔係小學雞了)!王馨平夠高大很有天后級的壓台感,唱歌水準依然keep得好,基爾覺得是當年寶記小花中keep得最好的一個;湯記就好似多年來歌藝都無乜特別精進,但她扮水野亞美可說是絕配的經典!




美少女戰士S    陳琪
美少女系列卡通片的主題曲確實係堅好聽,翻查資料原來大台首播已經係1994年(一轉眼成23年了問你驚未!)之後續播的美少女戰士S延續了經典,仲有冇人記得陳琪係乜水?(畀少少貼士:胡諾言老婆係咪會有少少印象?)S喱首主題曲好有80's日本流行曲風味,當年也是卡通經典hit歌之一。Btw,陳琪好似有份演《宮心計2》,遲下播出時不妨留意下。




寵物小精靈    陳浩民
近排因為手機遊戲關係令Pokemon翻生,至於來自「遠古」的這首卡通片主題曲基爾翻查返原來是1999年作品,東瀛味濃的曲式初頭以為係日版原曲改編,原來竟是不折不扣的本地作品,當年除了陳奕迅的超人迪加之外,這首也是基爾的心頭愛(依家不論兒歌或流行曲好像都不覺有這類高水準之作),特別喜歡最後唱出的那個「Get」簡直是神來之筆!至於陳生近年多在大陸搵食絕少在港曝光了,對他的印象只停留在段譽和馬騮精,甚至幾乎忘了他有出唱片!老實講,基爾真係覺得佢唱歌進步左好多喎(要畀讚),可能在大陸登台搵真銀練歌練得多吧!




我係小忌廉    戴蘊慧
同陳琪一樣,可能好多人已經唔知戴蘊慧係邊個?(知都要扮唔知......咔咔咔咔咔)咁等基爾話你知佢係第3屆新秀亞軍(冠軍張衛健果屆),至於小忌廉可說是80's當中最多好歌的一部卡通片,因為故事女主角本身也是歌星關係吧!日版原裝的主題曲已經非常好聽,戴蘊慧翻唱的廣東版當年也爆紅,成為她的一首金曲代表作。當年曾經有人話佢似中森明菜,Akina那種「型格鵝公喉」風格向來唔算係基爾杯茶,除了《禁區》(張國榮翻唱《第一次》)之外,比較喜歡的就是《Close Your Eyes》(蔡立皃翻唱《Close Your Eyes》)。最後要讚一讚戴蘊慧的live水準,實在比當年出道時升了幾個grade,再次證明唱歌都係要講歷煉!




夢中天使    唐韋琪
講親兒歌的話,真係無可能唔提Vicky姐姐!事關佢果首長腿叔叔主題曲堪稱為百大卡通片主題曲之首,幾乎每次出場都唱(一時想唔起佢仲有冇其他代表作)。其實喱首兒歌金曲真名叫夢中天使,至於長腿叔叔都係基爾當年很喜歡的一套卡通片,話時話點解依家D卡通片變晒質,似乎都唔再興這類名著改編的經典了,實在可惜!




仙樂處處飄    袁鳳瑛
基爾堅鍾意日本富士電視台製作的這類「世界名作劇場」系列卡通片,繼1991年的長腿叔叔之後,92年再推出仙樂飄飄處處聞,話晒係Sound of Music喎!卡通版的主題曲一定唔可以失禮,當年就找來羅大佑作曲林夕填詞,卡士真係超級強勁!至於唔見好耐的袁鳳瑛依然唱得,live是一貫的發燒碟級水平(連基爾媽都話:咦,喱個唱得唔錯喎),可惜在這個兒歌懷舊節目上她只唱了阿花,我寧願佢唱返仙樂處處飄啦!




相聚一刻    陳松齡
提起兒歌除了Vicky姐姐之外,另一位唔講會畀人打的就梗係松松姐姐啦!除了烏卒卒之外,松松姐姐在節目上仲唱過相聚一刻(1989年的歌……時光飛逝到得人驚)!這齣改編自日本漫畫壇天后高橋留美子名作的卡通片,主要是講響子小姐和裕作在一刻館發生的一段愛情故事,印象中故事節奏係超級慢(有很多定鏡分鏡位),相信唔係畀小朋友睇而係畀大人睇,當年這類情情塔塔的卡通也不太是基爾杯茶,同期唔記得係咪轉了去睇亞記的橙路或者筋肉人之類?




天界小神仙    郭小霖
最後想講埋上面喱首「大冷門」,估計大台應該都好難再邀請到這位媲美關正傑的「超級隱世歌星」重現舞台了吧(如果佢再開騷,唔係講笑真係要仆去撲飛)!其實天界小神仙本身也是由日本富士電視台製作的一套神級卡通片,大台於80年代中首播時也非大熱之作,不過後來每當與同年代人談起陳年卡通,相信有90%都話有睇過,奇哉!這齣卡通主要係以希臘羅馬神話作為藍本,故事主人翁寶倫是太陽神阿波羅的女兒,佢仲有個成日咸咸濕濕到處留情畀老婆扭耳仔的爺爺宙斯,這種「三級邊緣」的卡通在當年來說算是非常前衛。故事講小仙女寶倫為了成為真正的希臘女神必須要四出行善,每次做完好事之後會得到一枚「淑女勳章」,貯夠勳章就可以成為真正的神仙云云
(係咪有D似超市貯印花咁),然而每次出動都搞出唔少笑話,又成日要個friend丘比特出手相助(好多時係越幫越忙)。不過話說回來,基爾第一次認識希臘神話就是靠睇這套卡通,當中印象最深是Orpheus和Eurydice的經典悲劇,故事講寶倫陪同Orpheus彈住七弦琴千辛萬苦去到冥界拯救太太Eurydice還陽,可惜最後按耐不住回頭一瞥功虧一簣(完完全全跟晒原著),寶倫最後喊晒咁返去搵爺爺宙斯,後者為了安慰孫女都照頒個勳章畀佢以示鼓勵……(基爾係咪記憶力驚人)!

2017年10月3日 星期二

珍郵庫@香港主題購物街

十月頭長假期係咪去晒逍遙外遊嘆世界?好期待看blog友們的旅行見聞,快D寫快D寫快D寫畀基爾睇……至於基爾有乜回禮先,當然係寫之不盡的郵票,而且同本地遊都少少關係!



上月除了補返發行饒宗頤首日封之外,仲有出了上面喱套「香港主題購物街」。香港其實話細唔細,話大當然也不大,不過都有好多地方基爾未去過呢!順帶一讚,小全張頂上面果條手繪街景畫得超靚……



自從商場興起之後,似乎這類主題街道已日漸沒落了,唔知除了遊客外仲會唔會有人間中去行行摩囉街波鞋街玩具街喜帖街,甚至花園街女人街廟街海味街呢又?



講返套郵票,基爾今次都只係買一套小全張咁大把,貪佢有齊6張郵票買齊6條街(玩大富翁的感覺)!先講最左邊兩張先:$1.7金魚街,之前基爾仲有養魚果陣都經常有去行下,不過依家無養就極少去了,費事又挑起條癮;$3.1廚具街,位於油麻地上海街,基爾基本上未認真去行過,好多時都係去BC時路過而已。



中間兩張是$2.2 藥材街和 $3.7花墟,對前者沒什麼印象,據首日封的簡介是位於上環德輔道西高陞街附近,係咪即係賣海味果邊,海味街果邊就有去過;至於花墟,算是6條街當中基爾仲會時不時逛逛的老地方,當然好多時只志在賞花,真正幫襯的不多!



最右面兩張分別是$2.9玉器市場和$5油麻地果欄,咦!無獨有偶曾幾何時基爾經常去BC睇戲果段歲月裏,都時不時會路經這兩處地方。玉器市場其實好像沒有真正入去逛過,因為沒太大興趣,印象中多數是遊客或長者的蒲點;至於果欄也絕少光顧,因為屋企距離這裏實在太遠了,不可能抽大袋生果長途跋涉回家咁大陣仗吧!

香港主題購物街
發行日期:2017年9月19日