2017年2月22日 星期三

珍郵庫@開平碉樓

過完年之後好似又無乜特別野好寫,係時候又拎郵票出來了。



感覺上,近年郵政署出新郵票的頻率好似密好多(應該是增加營運收入的不二法門吧),之前新年前才剛出過生肖郵票,緊接幾個禮拜又出喱款開平碉樓的小型張。



之前這個中國世遺系列已出了5款,分別是大運河紅河哈尼梯田長城麗江古城丹霞山,今次喱個開平碉樓在地理上算係最近香港的,唔少人都去參觀過吧!



基爾其實都幾鍾意喱個世遺系列首日封,因為通常設計都幾靚(包括個信封),仲有個郵戳都好精緻好有特式。看封底簡介才知開平碉樓群於2007年才獲UNESCO列入世遺名錄,現存約1800多座,今次$10郵票上的是樓高5層的自力村雲幻樓。

中國世界遺產系列第六號︰開平碉樓與村落
發行日期:2017年2月16日

2017年2月11日 星期六

Le Grand Pokka@旺角

新年話咁快又來到元宵佳節和情人節,除了非常勤力密密手寫blog之外仲有同學仔飯聚,諗返上次見原來已是舊年的開年飯局(正如人地話齋:friend唔一定成日見),真係光陰似箭咁快又一年……



其實唔單止飯聚少,基爾近年都好少去旺角,至於去雅蘭就更加似隔了成個世紀咁耐,以前記憶中好似都幾多小商店,依家就好多食肆,同學提議去2樓的Pokka Cafe唔會限時限刻坐個半鐘畀人趕走,當然沒有異議。



基爾收工後去到雅蘭,發現人流唔算太墟陷,如果以紅字假期來看甚至有點兒冷清(難得無乜拖篋客,實在太正了!)在商場1樓還發現原來仲有久遺了的Cotton On(以為實體店早已全線結業撤出香港了),火速行一圈無乜收穫,立即上去會合同學。



咪住咪住電梯轉角位仲有個幾得意的清仔展覽,反正仲有時間快快手snap多幾張,除了上面這副清仔麻雀之外(東南西北中發白變了出前一丁圖樣),仲有好多清仔嘜頭食具例如碗筷、多士爐和煮麵機之類,另外還有幾精緻的迷你夾公仔機、老虎機和印有清仔廣告的巴士電車模型等等。



為免同學久等,都係拿拿林上去cafe,一陣食飽先再落黎睇。喱間叫得做Grand Pokka又真係幾大,菜式選擇又好似幾多,除了慣常的飯和意粉外,仲有烏冬和韓食供應,可謂西日韓齊備……



初頭諗住叫個Set Dinner再散叫其他share,不過同學仔想各自獨立order都無所謂,反正見個CNY期間限定的Dinner Set望落亦唔錯有魚豬牛選擇,如果有選擇障礙懶諗食乜也一試無妨吧(而且價錢望落係低食D)!



Pokka好似之前聖誕都有喱類Special,估計情人節前後也有期間限定供應吧!基爾最後揀上面喱個香芒三文魚焗飯,menu括住話製作需時20分鐘,幸而客人實在不多又唔覺咁耐!飯來之前仲有個Appetizer或Soup,基爾揀了羅宋湯和牛角包,不過見同學的溫泉蛋配Parma Ham Salad也不錯試了一啖(掛住食忘了影)!至於個三文魚飯如果係「芝士控」一定好開心,因為芝士份量真係超多,若能再多些芒果就更perfect了!



同學叫的喱個香煎美國上級牛柳(配黑椒汁)是七成熟,基爾本身唔太食牛,所以對牛扒也沒有太多研究,雖然望落係有點偏熟,不過見同學食落話ok應也是不錯之選。餐牌上其實仲有個唔知係乜的Australian Orange Roughy(有冇人食過?)中文名叫做「金獅魚」,本來都想試,不過最後都驚好多骨就放棄了!



另一同學就order了上面喱個Premium Set,有齊沙律、湯及包之餘,main course個美國西冷仲大件好多,但價錢其實比上面個牛柳只貴幾十蚊而已,感覺上好似抵食D(而且個賣相都精緻D)。如果好似搭飛機咁可以免費upgrade去premium也不錯……哇卡卡卡!(發夢中!)



席間當然少不了談近況和旅行大計,教書的同學仔諗住復活節長假去立山黑部睇雪牆(教書真好!)單單聽佢講個schedule都已經興奮。隨傾隨食上面喱個芒果布甸都幾正,可惜只有雞精樽仔咁少唔夠喉。另外餐飲方面除了檸茶外,也有Sidama和Yirgacheffe咖啡選擇,初頭聽侍應姐姐講希達姆和耶加雪菲,基爾孤陋寡聞完全唔知係乜,後來八卦上網check下才知係近年比較hit的貴價埃塞俄比亞咖啡,食飯學英文又長知識了!



食完飽飽地再落去行多陣Cotton On,其實個Big Sale又唔係太多野揀,大部份短袖tee又無乜逼切性要買,最後都係無收穫……咁反正時間尚早而且食甜品又有D意猶未盡,這時見到隔籬有間HD,咁又去encore個雪糕先走啦!不過雅蘭喱間實在不好坐,座位好逼幾乎人貼人,最後求其食了個綠茶cone就走人,再行過去睇清仔展覽。



臨走前,同學仔眼利發現展覽攤位原來有野送(在商場內消費滿一定金額就可換禮物云云!)剛才在Pokka食了700幾蚊咁就順手拎張單去換,結果換到兩個清仔即食麵A4 file,分別係泡菜味和豬骨湯味,印刷又幾精美喎!基爾好似都有食過豬骨湯味那款,快佬背面仲有清仔媽和清仔妹,農曆新年特別版有舞獅又有金蛋幾可愛又應節!



基爾份工大時大節都年中無休,相比起教書同學仔假期一定無咁多,anyway農曆年假返工都有個好處,就係等大老細們的「巡幸大隊」逗返封大利市,今年一步都唔敢行開,行雷急尿都一於黐實張凳終於無走雞(舊年走雞行開左激到紮紮跳)都算係幾豐富的新年禮物!

Le Grand Pokka
旺角彌敦道639號雅蘭中心2樓206號舖

2017年2月8日 星期三

珍郵庫@歲次丁酉雞年

農曆新年的電視節目總離不開蘇師傅李師傅玲玲師傅等車輪式講十二生肖運程,突然醒起過年前買了這套雞年生肖郵票,趁仍是「新正頭」就拎返出來show下。



今年的雞年郵票,原來已是歷來第4輯的第6套(眨下眼自2012年至今,已經先後發行了龍蛇馬羊猴雞共6個生肖)。唔講真係醒唔起,原來雞在中國十二生肖之中是唯一的禽鳥類,今次沿用以雞形工藝品作題材,設計都幾色彩繽紛,幾有節日氣氛。



先睇喱張$10的郵票小型張,粉紅色的牡丹花盛放背景很有中式傳統刺繡的質感,據首日封背面的簡介話:高貴典雅的絲綢配以色彩亮麗手工精巧的公雞刺繡,令金雞倍添尊貴氣派……



再睇返一套4張郵票又係乜野工藝品。先說$1.7的布藝公雞,很有點拼貼百家布的鮮艷色彩,傳統得來又幾in,背景的綠色有水仙花圖案,也是香港最常見的賀年花卉。$2.9則是鐵皮玩具雞,鐵皮玩具在60-70年代風靡一時,基爾小時候也玩過上鏈會跳的麻雀和青蛙仔,郵票桃紅色背景有年畫常見的牡丹圖案,寓意繁榮昌盛。



再講埋$3.7是貝殼砌的公雞,造型生動光潔亮麗。金黃色的背景有桃花圖案,象徵美滿良緣和平安長壽。最後$5是以雞作造型的鍍金銀器飾物,同樣是閃閃生輝手工精細的藝術品,郵票的紫色背景有芍藥花圖案,中國傳統上也有富貴吉祥的意頭。此外,訂這套生肖郵票按慣例都有生肖利市封送,4款之中最鍾意又係邊款呢?

歲次丁酉雞年
發行日期:2017年1月7日

2017年2月2日 星期四

金雞迎春之開年飯

話咁快又過了農曆新年,今年基爾無去行花市和夜市掃街(係咪年紀大了就怕同人逼湊熱鬧),到年初二就食了餐豐富的開年飯。



食年依然幫襯這酒樓的新春盆菜,舊年幫襯了一次覺得唔錯所以今年再買,也讓基爾媽不用煮太多賀年菜太勞累。不過今年這盆菜好似加大碼了份量十足(感覺上有成十幾kg),基爾長途托回家發現手瓜也有少少起展。反正吃不晒,明年可考慮買4人份量的就夠了。



雖說叫基爾媽不用大清早起來煮開年飯,但她仍堅持煲了螺頭花膠湯仲有必要的齋菜,又去斬了燒肉,豬利是基爾飛佛,但因為實在太多而且主力要消耗個大盆菜,燒肉和豬利幾乎也沒有吃(實在飽到上頸)。



仲要整多碟冬菇海參燜蠔士,能不投降了吧!幾乎只供觀賞了……按慣例這些賀年菜都是要不分早午晚餐食幾日才可食得晒,有餘有剩年年有餘正是新年的好意頭!尚沒有影的還包括芋頭糕、年糕和棗蓉糕(過年前做的蘿蔔糕已率先食晒),食到初七人日應是沒問題了。



吃撐了肚子變肥仔,少不了要多點去運動跑幾圈,此外看看圖書館借來的小說也是不錯的消遣!基爾年前看過《沒有色彩的多崎作和他的巡禮之年》之後已沒再看村上春樹作品,這次借到這本《沒有女人的男人們》短篇小說集原來已是2014年的舊作,全書是由7個獨男為主題的故事,貫徹了孤單灰藍的宅男式格調。似乎1Q84之後村上也沒有太大突破或令人眼前一亮的作品了,發條鳥三部曲已是宅男小說的頂峰之作,但人造衛星倩人中的迷人愛琴海和卡夫卡的夢幻式圖書館,還有1Q84的月夜,相信依然是村上迷的心頭愛。



話就話吃撐了,但過年前某次去巡數字屋,發現有這包泡菜餃子八折後只賣十幾蚊,咁就買來試下啦!基爾怕熱氣,一般食鍋貼煎餃之類也多是放湯或煮麵食,極少真真正正去煎,這包泡菜味只屬微辣,即使當水餃食也無不可,或許下次真的試試煎來看看,會不會有不同食法。



另外惠記超市過年前有獎抽,抽獎券揭中上面喱包水餃,不過要過年後才可以去領取,咁就留返年初二才去拎吧!不過由於實在太多賀年菜未食,暫時都未試喱包水餃,睇返佢正常價係賣成廿幾蚊,偏貴而且份量少只有十數隻,相信如果無特價就多數不會買了。