2018年2月26日 星期一

舊金山居閑話@Golden Gate:上

有blog友投訴話成日只係逛超市和outlet好似都無乜風景睇下,其實異鄉喱邊D景點來來去去都係果幾處地標,應該好多人都去過晒,不過基爾點都會去到此一遊打下卡!



來到金山如果唔到一到金門橋,會唔會畀人鬧?基爾喱朝早吃過早餐見天氣勁靚(入冬後這裏其實是雨季),一於出發去影下靚相!來到大橋旁停車場喱邊已接近中午,上圖紅色果間係遊客中心,同紅色金門橋襯返色。



悶D都要講返少少歷史背景,金門橋建於二戰前的1937年,工程歷時4年,橋塔高達227.4米、總長度2737.4米,連接三藩市與北邊的Marin Headlands(馬林岬角),跨越三藩市灣和太平洋之間的金門海峽,當時是全球跨距最大的懸索橋。上圖是位於觀景台的Joseph Strauss銅像。



這位史特勞斯先生就是大橋的總設計工程師。上圖有成班小朋友玩緊果條鐵鍊,其實是展示建造金門橋的原理,解釋為何經歷了1989年的三藩市大地震後,大橋仍可屹立不倒。



再在橋上看風景!在金門大橋上可遠眺三藩市灣無敵靚靚海景,遠處比較多高樓大廈的地方就是三藩市市區。可能位處海峽中間,在橋上行走時其實都幾大風。如果有足夠腳骨力可以行晒全條橋(2km左右而已),也有不少人來跑步或踩單車過橋。如果駕車就要畀過橋費,採單向電子收費USD$7.5(約HKD$58)。



以前細個時可能奇怪為何金門橋唔係金色的,看照片才發現原來是紅色的,這種紅漆原來還有個名堂,叫做「國際標準橘」,據說是為了即使遇到大霧天氣仍要清晰看到橋身之故,後來這種紅漆就成了金門橋的標誌,深紅橋身與峽灣的藍天碧海完美構圖就成了80多年來三藩市的地標。

2018年2月22日 星期四

舊金山居閑話@食早餐

年初七「人日」食了生日蛋糕未?如果未就先來同基爾食個醒神早餐先。吓!食早餐有乜野好講?連食早餐都可以寫一篇blog咁勁?唔信……咁等基爾示範畀你睇!



平時返工返學的blog友,唔知一般會係在家食早餐?還是去7仔M記買返公司食呢?又或者在茶餐廳快餐店食飽先再返工返學?基爾由細到大個人向來都係比較me-more,為免遲到都會比較早起身,由以前讀書到依家返工都慣了先在家食了早餐才出門……



咁去到異鄉唔駛返工,就更之然多數在家慢慢hea嘆早餐了吧!而且因為時間充裕所以仲要升埋呢添,可以玩埋自製麵包。老實說基爾在老家沒有買麵包機,因為落街買磅方包排包之類實在太輕易了,但在異鄉要早餐食新鮮出爐麵包又唔係咁容易周街有便利店麵包店可買到。



簡單而言只要隔晚將麵粉、酵母、鮮奶、牛油、鹽糖(視乎個人口味可以加提子乾或合桃之類)放入機裏,set定時間掣第二朝就有得食。上面第二果張榮幸邀得基爾媽特別客串示範用切包架,不過角度問題睇唔清,網上再搵張清楚少少,唔會切到成舊麵包扁晒,幾好用。另外上面這種ham都幾好食,唔清楚老家D超市有冇得賣?



另外,異鄉地方大,廚房和煮食爐頭自然都係XXL,一大清早如果同時要快快手煲水、煮麥皮、煎蛋又煮麵再淥埋個水餃都無問題,不過先決條件當然係要一位能幹的top chef才行。好似基爾喱類掛P牌的攀車邊小廚,都係頂籠顧兩個爐就算啦!



早餐除了食粥食麥皮食麵包夾煎蛋火腿之外(仲有煎餃子、淥水餃和焗muffin),當然不可少仲有搽花生醬或者上面這種基爾在老家時沒有食過的杏仁醬,食落其實同花生醬分別不大,但聽聞話係健康少少喎!所以都買了上面這種個別包裝的拎返老家食。



順帶又講下Trader Joe's果間超市,感覺有少少似美版的價真棧之類(當然也是XXL版),裏面都好多款朱古力、餅乾、果仁、各式花生醬果醬之類賣,而且價錢又幾平喎。上面喱排朱古力話係cold brew coffee兼caramel夾心,只係幾蚊一大排咁就買來試下。冰滴咖啡基爾本身都未飲過,食落隻朱古力都幾濃咖啡味,至於個焦糖咖啡夾心幾特別,唔似拖肥咁杰又冇酒心咁稀,係中間的黏稠度,幾有趣未食過!

2018年2月18日 星期日

舊金山居閑話@Sprouts

年初三赤口如果唔駛去拜年,清閒在家又三缺一唔夠腳打牌咁點算呢?與其你眼望我眼發呆,不如繼續跟基爾去行下超市睇睇有乜靚菜買啦!



唔知有冇人聽過喱間Sprouts Farmers Market,如果經常會買有機食品可能會聽過佢個朵。返查資料先知原來這間大型連鎖超市的headquarter是在Arizona的鳳凰城,唔知係咪果度有好多有機直送農場呢?



行入喱間超市最顯眼和最唔同之處,就係幾乎度度都掛滿大大隻organic字樣,賣菜和賣豬牛雞凍櫃固然有好多注明organic items,連賣酒和賣muffins都有(原材料是有機)。基爾唔太識分有機muffins同冇機有乜分別,但就真係堅多口味揀,買盒紅莓藍莓味返去做早餐都好喎!



除了瑪芬之外,偌大的超市入面最令基爾既興奮又流連忘返的地方,就係上面喱一欄長長的朱古力糖果架,單單朱古力就有咁多種唔同味道,係咪好吸引!每次來到如果由龍頭試食到龍尾,唔知會唔會畀人鬧呢?



另一樣經常會來買的就係上面喱種pie,除了最常見的蘋果批之外仲有Blueberry、Peach、Cherry餡,唔駛估都知鬼鬼口味肯定樣樣都激甜(唔係講笑住一個月分分鐘肥10磅),如果唔想食咁甜可以揀Pumpkin,這件南瓜批算係比較接近正常人甜度了吧!食咁多邪惡野點都要買多包有機麥皮返去,才可減輕少少罪惡感。另外順帶一提超市附近仲有間類似千色店之類的百貨公貨可逛逛,不過基爾只係齋睇無幫襯,行下咪當運動算囉!



p.s.提起運動,他鄉電視間中都有播波,NBA和NFL經常有得睇,仲有睇打交多過睇打波的冰曲,令人有點驚喜是英超都有轉播喎!在老家睇波多數要深夜凌晨捱眼訓,在他鄉就唔同晒時段。上網check返先知原來HK-UK-SF剛好各相距8粒鐘時差,地理上係咪正好是三分地球了?

2018年2月12日 星期一

珍郵庫@歲次戊戌狗年

一元復始萬象更新,話咁快又即將迎接狗年,唔知係你第幾隻狗仔?Anyway,迎接農曆新年除了忙於洗邋遢、買藍色罐曲奇餅辦年貨和去維園行花市之外,仲有咩可以感受一下新年氣氛呢?



唔駛講,答案當然係睇下基爾D生肖郵票啦!今次喱套狗年郵票已經係第4輯的第7套(2012年龍年果套有冇買?)……好記性的blog友可能記得基爾年前都有post過馬羊猴雞年郵票,今年發行狗年生肖首日封都貫徹以往幾年的中國傳統手工藝風格!



簡單講下這4款狗仔郵票係乜東東!$2瓷器狗仔,背景襯托了牡丹浮雕;$3.7玉器狗仔,背景是海棠;$4.9陶器狗仔,背景是長春花;$5貝殼狗仔,背景是山茶花……連郵戳設計也加入了狗狗造型,唔知一眾愛狗人士會唔會買返套收藏下呢?



再睇埋$10小型張,主題是靈犬彩釉瓷塑,背景是杏花。彩釉在中國古代由於屬技巧複雜的工藝,很多時只用來製作名貴的瓷塑擺設。每年這款生肖小型張都設計得很棒,今年的狗仔也不例外吧!



歲次戊戌狗年
發行日期:2018年1月27日

2018年2月8日 星期四

舊金山居閑話@Westgate

在他鄉生活重點節目除了去逛超市買魚買橙買菜之外,行outlet都算係不錯的消閒好去處!



Westgate Center這個outlet因為近所以都常來逛逛,超市有間幾大的Walmart Neighborhood Market,百貨公司有Target,其餘好多都係衫褲鞋襪名店為主;食肆方面,Starbucks和Subway那些當然是少不了。



基爾主要去行GAP和Nike Factory,不過其實都無乜目標物要買,純粹係去行下當消磨時間吧!第一次去行美國的outlet,可以見識下人地店面有幾大,同埋折扣到抵筍唔筍。



店面陳設望落其實同HK的Nike Shop或者outlet都有點似,不過這裏當然係大好多好多倍吧!至於「電視框」方面又唔算真係平到出晒汁果隻,霎眼望落大部份都係五至七折不等!



可能由於係洗美金關係,加上要畀9%銷售稅(買野差不多等如加一),所以消費意欲本來就不太高漲,快速巡一圈後都無乜「必買」又或者「唔買走寶」的心頭好,心中都諗住即使空手而回也不算遺憾之際……



基爾媽竟然罕有地力推基爾買黑色紅邊果對,話著上腳型喎畀錢時都要讚佢很有潛質來做sell士!反正屋企舊果對跑鞋都殘殘地甩甩地底咯(舊鞋專登留來行山最適合)。連稅USD$43.67(約HKD$340)咁計落見都唔係貴;至於基爾媽本身都有收穫喎!買完安安樂樂返歸,不過遇上了放工rush hour(3:30pm已開始塞塞地),順便體驗埋人地塞車係點樣,原來係無Lala Land果隻落車跳舞場面睇架喎!



p.s.用美金計匯率兌返港紙一般計7.8吧!不過有時懶用手機篤,就求其心算乘8再減少少就算數(反正一般都無乜大額交易過);當然有時連心算都費事,基爾只記住大約USD$13就是HKD$100,如此類推USD$26就是HKD$200,USD$39就是HKD$300了;反過來USD$7.5就當佢HKD$50,這方法真不錯,買野可以有個大約售價概念方便好多呢!

2018年2月2日 星期五

舊金山居閑話@永和超市

繼續慢活閒遊,這天又係hea蕩去行中超shopping(唔好嗌悶)。



屋企附近步行距離沒有任何購物點,出去就近買斤菜買個麵包又或者飯盒也要以車代步,來這間中超也是要坐車(沒有車牌基本上無法在這裏生活了吧)。今次喱間已經算叫做比較近,經常會來這裏買菜買生果買豬肉排骨之類,而且仲有海鮮活魚賣。



試過在這裏買的苦瓜、豆角、娃娃菜、白菜也很好食……基爾媽就大讚過這裏買的加州鱸魚肉質很鮮美,雖然圍起要成百幾蚊港紙但比香港買到的好味好多呢(唔知點解香港買的雖然幾十蚊有一條,不過食落總有點霉霉地,所以好少買來清蒸)!



至於買橙這裏就肯定係冇得輸,價錢一般都比香港便宜,而且最重要係橙味十足夠新鮮,好少會買到淡而無味又或者在雪房凍倉雪足幾個月才付運那種雪乾晒的難食橙。另外最大不同係香港超市或街市生果檔多數係3-4個一手咁買,美國喱邊就計秤,兩蚊一磅通常都有成4-5個,算抵買啦!