2010年2月25日 星期四

《情婦的情夫》愛慾糾纏

艾慕杜華的戲,向來都充滿奇情,亂倫、孌童、變性人妖、sm……這些「另類」題材來到這位西班牙鬼才導演手上,彷彿都成了家常便飯,毋須標籤什麼,一旦揭開了三島由紀夫筆下的「假面」,所有人還不是一樣的情與慾。



自從10年前看過《論盡我阿媽》之後,艾慕杜華每次有新戲上,基爾都例必去捧場。《論盡我阿媽》描寫的偉大母愛以及延伸的倫理瓜葛固然深刻奇詭,後來的《對她有話兒》還請來Pina Bausch演戲上戲,還加演一場矚目的黑白默劇,確實要給艾導寫個服字。再後後的《聖‧教‧慾》與《浮花》,說的雖然是孌童與亂倫的故事,但離經叛道的「神來之筆」少了,更貼近細膩的人情刻劃。

聽過很多艾慕杜華擁躉說,喜歡他80年代的舊戲多過近年的新片,基爾於是左借右買下有機會看了幾套艾慕杜華的舊戲,如《慾望之規條》、《情迷高跟鞋》、《蕩女Kika》及《活色生香》(都係當年基爾尚未夠秤所以冇得入戲院睇)。首先,單單戲名而言,這些舊片已經譯得精彩,戲中的畸怪情慾描寫手法絕核到肉之處,確實令人拍案叫絕兼笑到碌地。之前已經寫過一篇談到《情迷高跟鞋》,有機會再寫下其他幾套,同樣精彩絕鄰。

說回剛剛看過的艾慕杜華新作《情婦的情夫》,電影的中文譯名比昔日的似乎低了一個檔次,說的故事還點兒「粵語殘片式」的陳套,Penelope Cruz演的女秘書為了籌錢替父親醫病,不惜賣身給富豪老闆,當上情婦。後來她搭上了多情導演擦出愛火花,本來打算雙雙私奔避世,卻最後落得悲劇收場。Penelope Cruz幾乎由頭擔戲到尾,一人分飾四重身份——平凡女秘書、富商情婦、電影女主角、與導演私奔的女演員,彷彿就是她的個人show,「戲上戲」中的仿Audrey Hepburn造型也令人眼前一亮,相信是艾慕杜華特別為這位愛將度身訂造的。上次演《浮花》時,又唱又跳的Penelope Cruz其實已經很搶鏡,今次則更進一步,甚至不惜露點演出(雖然不是第一次),算是以身報答艾導的知遇之恩吧!

藉得一提的是戲中的一對母子配角,他們妙趣橫生的對答令半沉悶的戲軌生色不少。事實上,全套戲的劇情也是由兒子不斷追問母親和盲眼導演一段段不想回憶的往事而帶起。另一「亮點」是80年代經常在艾慕杜華電影出現的「馬面女星」突然回歸,昔日艾導最喜歡用這類「騎呢」又「驚嚇」的演員,但近年已大為減少。今次「馬面女星」雖只亮相了一個shot,卻已令觀眾不期然懷緬起昔日艾慕杜華鏡頭下的癲喪與瘋狂。



最後還要談一談艾慕杜華向來最鍾意玩的「戲上戲」,《情婦的情夫》又點會少得。結局講到盲眼導演巧合地追回昔日那部心血電影作品的拷貝,還重新剪輯了director cut版本,算是圓了多年的心願,將遺憾糾正過來,也是給舊情人的一份紀念品。試問在現實中,又有誰不希望可以重新剪輯自己的人生,親手修補所有遺憾!

 p.s.非常感激里奧送贈的《情婦的情夫》memo pad,果然很精緻,還有彭妮露古絲的電影海報作cover!

2010年2月17日 星期三

蒸蘿蔔糕

新年期間都幾忙,所以到依家先寫好喱篇跟基爾媽學整蘿蔔糕,希望唔會太遲啦!基爾向來都唔鍾意食荼樓的蘿蔔糕,因為總覺得好難食,成舊粉咁,失敗!蘿蔔絲又少,仲失敗!件糕一夾就散,簡直係失敗之中的失敗!所以,都係私房製作的好味D,依家就黎講畀大家知究竟點整!



首先,準備的材料其實不太多,不過蘿蔔同粘米粉的份量要有一定比例,這次在街市買了3大條白蘿蔔,大約共6斤左右。返到屋企先用個這個刨仔刨乾淨晒D蘿蔔皮,非常方便又容易刨,以前要用刀仔去慢慢批,就慢D同埋辛苦D。批走蘿蔔皮之後,就用喱個有好多窿窿、好似一塊鐵片的刨去將大大條的蘿蔔刨成絲狀,刨時秘訣係要由上到下咁磨,刨出的蘿蔔絲越長就越好食。刨好蘿蔔絲之後,就放在一個大煲內,煮大約10至15分鐘,先煮熟少少D蘿蔔絲,令它變軟。



煮蘿蔔絲時唔係就咁橋埋雙手等,而係去準好糕裏面的涵料。最主要的涵料係蝦米同臘腸,記得細個時基爾媽仲會加埋臘肉的,不過基爾唔鍾意食太肥膩的肥豬肉,所以唔加,改為加少少瑤柱,但要記得先浸林佢。另外,雖然基爾唔食蔥,但為左底糕蒸出黎可以靚少少,都要加少少蔥花。切幼所以涵料後落鑊係咁倚加少少油炒煮佢就得!好喇,等到蘿蔔絲蒸熟,先倒出從蘿蔔蒸出來的蘿蔔水,用湯碗裝好備用,再在蘿蔔絲上加上大約4-5茶匙鹽,仲有4-5茶匙雞粉調下味,再要加多一點胡椒粉,然後同蘿蔔絲攪勻。之後再倒入粘米粉,6斤蘿蔔大約撈600克粘米粉,通常係一袋裝,超級市場有售。



倒粉時注意要續少續少加,攪勻再倒,不能心急,以免粘米粉會結埋一舊,此外也要不停補充之前倒出來的蘿蔔汁,攪起來也更容易及勻循。如果時間充足的話,也可以用個篩慢慢去篩住咁落粉。落粘米份的途中,同時要加上少少粟粉,蒸出來就更加滑溜好味。最後再加上涵料,緊記要留返少少,一會兒放在糕面上裝飾之用。將蘿蔔粘米粉同涵料等全部攪勻晒之後,準備好一個大盤子,加少少油搽一搽盤底及盤邊,再將攪好的蘿蔔粉漿團倒進盤內,用匙羹好似批蕩咁將粉漿團鋪平,之後再將剩下的涵料均勻沈在糕面,當堂係咪靚好多呢!最後將整個糕放落鑊,中火隔水蒸大約75分鐘就搞掂,完全無難度!



又到基爾媽試味及評分時間。本來個蘿蔔糕蒸好之後,基本上就可以即刻食,不過基爾鍾意切片再煎香,外脆內軟咁會更加好食!基爾媽表示大致上都算係合格架啦,不過可以再鹹少少!我心諗﹕唔好食咁鹹啦基爾媽,無益呀!依家咁樣清清地咪幾好囉!好食又健康,係咪?!

2010年2月11日 星期四

一個人的情濃七日

一個人,原來都可以很浪漫!好多人可能會覺得,對於無情人的人來說,情人節總是全年最難過的日子。每當見到D煙韌情侶情不自禁咁當街當巷攬攬錫錫,確實係唔知要將對眼放係邊度好!又或者索性當自己有The Sixth Sense咁拿拿林行過,心中默默念住「乜都睇唔到!乜都睇唔到!」咁就算……不過時間耐左,似乎已經漸漸有了「免疫力」,好多時都習以為常見怪不怪,連自已都唔知係咪已經不知不覺達到了心如止水看破紅塵的化境!



一個人,原來都可以很浪漫!每年去到喱個時候,電視台都會推出「情濃七日」系列電影應節。這幾天回到家後睇左幾齣老戲,率先登場的是格力哥利柏同柯德莉夏萍主演的《金枝玉葉》(Roman Holiday),雖然已經不是第1次睇(相信好多人亦都睇過),不過依然看得賞心悅目,是典型的靚人靚景愛情片,結局雖然沒交代這段霧水情緣最後是否無疾而終,導演選擇用優雅的道別形式,將美好時光留作永恆的記憶,長埋在兩人心底,算是留給觀眾一點想象空間吧!

值得一提的是,此片也可以說是「羅馬旅遊特輯」,格力哥利柏駕著綿羊仔載住柯德莉夏萍四周圍遊玩,走遍了1953年時的鬥獸場(Colosseo)、許願泉(Fontana di Trevi)、聖天使城堡(Castle Sant'Angelo),在鏡頭下這些著名的景點和所有大街小巷,都散發著一種老古的浪漫氣氛,比較印象深刻的是格力哥利柏和柯德莉夏萍在西班牙廣場(Piazza di Spagna)的長階梯上食雪糕的一幕,因為幾年前基爾都有去過果度……過左一個難忘的羅馬假期!



一個人,原來都可以很浪漫!七日深情來到第2晚,播的是德斯汀荷夫曼的處女作名片《畢業生》(The Graduate)。同樣唔係第1次睇,不過依然係覺得幾好睇(至少好睇過大陸劇或韓劇),尤其係開頭果段Mrs.Robinson色誘Ben仔的戲簡直係一絕,羅賓遜太太又叫Ben仔倒酒又叫佢拎銀包手袋,總之唔畀佢鬆人!雖然套戲已有超過40年歷史,難得依然仲笑得出,一點也不覺得的老土。當然最後果幕搶新娘趕去坐巴士一走了之,都係好經典的一幕!不能不提的還有Simon and Garfunkel唱的《The Sound Of Silence》,確實係永恒的經典!

一個人,原來都可以很浪漫!其實早前國際台已率先播映幾齣愛情片應節,睇左當中的《無痛失戀》(Eternal Sunshine of the Spotless Mind)。之前已聽聞喱套戲係幾好睇,不過2004年上映果陣,好似係閃電落左畫,趕唔切睇,畢竟唔係Jim Carrey以往大路誇張搞笑戲;其後又一直無去買碟,所以今次重播都係第1次睇,才驚覺喱套戲唔單止好睇,而且係極之好睇!心諗﹕真係好彩無走到雞!

套戲的cast其實幾勁,除了Jim Carrey外,仲有肥溫Kate Winslet、魔戒哈比仔Elijah Wood,即使淪為配角的蜘蛛女Kirsten Dunst同埋Mark Ruffalo都有戲做,絕對唔係行行企企!故事以半倒敘形式推進,Jim Carrey與Kate Winslet演一對分手情侶,先後去幫趁洗腦公司,希望delete晒昔日所有拍拖相戀的回憶,有點奇幻feel,戲中記憶fade out的特技畫面同埋時空轉換的情景,確實令人著迷,拍案叫絕!Kate Winslet演的punk女與Jim Carrey的痴情男都令人眼前一亮,奇怪Jim Carrey唔演多D喱類戲?!比佢那些誇張的面部表情來得精彩細膩。至於Kirsten Dunst無意間發現自己原來也失落了一段不想記起的回憶,該段戲亦是意外地精彩,雖然佔戲不多,但就搶走肥溫唔少鏡。最後當然要提一提《Eternal Sunshine of the Spotless Mind》,簡直正到無鄰!為全套戲畫上最完美的一筆!

一個人,原來都可以很浪漫!即使在家裏看電視,只要你曾用心去感受……

2010年2月10日 星期三

大巴黎餐廳@太子

這次要講講蛻變中的「巴黎」!說的當然不是浪漫花都,這個迷你巴黎是以往在香港各區大街小巷中都找到的巴黎咖啡館Paris Cafe,相信好多人都會去幫趁過。不過唔知大家有無留意,最近這間樓上咖啡店好似無聲無息地全線結業,部份就由這間大巴黎餐廳接手經營。



以前巴黎咖啡館我諗應該有4、5年歷史,太子近始創、旺角西洋菜街及登打士街等3間都有幫趁過,西灣河那間則有經過樓下但沒上過去,其實幾間店的門面都裝修得唔錯,很喜歡店內牆上掛滿一幅幅大大小小的手繪巴黎風景素描,每次來到都會抬頭欣賞下(後來有機會去到巴黎,亦有買了幾幅類似的風景畫作紀念品)。雖然基爾不太識飲咖啡,但記憶中佢地D咖啡同小食都OK的,有時上到去也是志不在食野,主要係行街行累了上去hea一陣,可以傾下偈飲下野,店內還有整幅牆那樣宏偉的雜誌架,順手拿幾本愛看的來揭揭,也就花了個零兩個鐘時間。這次與死擋同學仔Q又行過咖啡店樓下,發現佢竟然變左做餐廳,而且由細變大——「大巴黎」,橫掂又行得有點餓及累了,索性上去舊地重「吃」。

沿長直而昏暗的舊樓梯上去,樓梯和牆上仍張貼滿昔日巴黎咖啡館的紅白藍裝飾海報,相信是新店老闆想慳返裝修費吧!反正都保存得很好,拆掉了也很浪費。上到閣樓發現店內的陳設大部分也保留了下來,沿用昔日一張張迷你的咖啡桌子,不過變身為餐廳後,這張小桌子似乎就不太夠用,基本上放兩個餐已經佔據了整張桌子,幸好典雅的沙發仍是坐得舒服的。唯一比較可惜的是,昔日掛滿牆的巴黎街景素描全部消失了,證明上一手老闆都係識貨之人,全部東西(包括樓頂那盞大型水晶吊燈)都不帶走,就只帶走了風景畫!



在這間少了一點巴黎味道、多了一點港式味道的樓上餐廳爽快地巡視一圈,本來想揀近落地玻璃窗那邊向街的卡位坐,可惜全部已有客,那就坐裏面的小圓台座位算了。安頓下來後攤開menu,菜式似乎有點新意,雖然未知味道如何,但至少價錢不貴(比較同類的扒王或椰林閣等),而且新張期內還有九折,即係offset左加一!結果分別叫了上面這個青咖喱豬頸肉拼鳳尾蝦(配意粉$45),另外還叫了下面那個葡式砵酒汁燴鴨胸飯($40),價錢已連餐湯茶水,都算OK抵!

食落到抵味道又如何?先說鳳尾蝦,可以畀個B佢,至少外皮夠脆!淋上青咖喱汁的豬頸肉味道都幾特別,又唔係完全畀D汁淋到軟晒,仍保持香口,不過食落都幾熱氣,所以要分咁D畀人!至於交換返黎的鴨胸就一般,有少少韌,但個汁就算OK好味,為碟飯加返少少分數!



雖然昔日巴黎咖啡館店內的悠閒氣氛似乎已蕩然無存,除了因為沒有了那一幅幅掛畫外,牆上還裝了部40寸LCD大電視,變成典型的港式茶餐廳風格,加上店內比較多人客,食完之後似乎都唔係幾好意思,好似以前咁hea坐幾個鐘。或許在等埋單時,抬頭再看看這盞從天花板上吊下來的華麗水晶燈,仍能感受到昔日咖啡館殘留的一點點閒雅情懷。行出去搵食,最近就黎依間,W之前食過話正,就即管去試試。
 
大巴黎餐廳 Cafe de Great Paris Ristorante
太子西洋菜南街246-248號3樓