2018年3月28日 星期三

舊金山居閑話@San Jose

來到異鄉這邊絕少機會出夜街,一來固然因為無車牌,二來住果邊附近都無乜夜蒲宵夜好去處(唔通去超市同7仔蒲咩),唯一係聖誕前某晚去了一趟San Jose,逛逛那個有點似年宵的Christmas in the Park!



基爾第一次來San Jose,看來這是個甚為熱鬧的城市,不說不知原來它位居全美城市排名中的第10位(按人口計),比第13位的三藩市還要高,在加州之中也是僅次於南部的LA和San Diego位列第三大城。唔知係咪因為近十幾年Silicon Valley的高速發展,令San Jose排名飆升?



雖然早已是夜幕低垂(在家食飽晚飯先出動),但來到市中心地區依然是車來車往,突然一輛電車就在面前飛馳而過,幾乎來不及按動手機快門。



找到駐車場泊好車,要先穿過幾條大街才來到上圖喱間位於市中心的Fairmont酒店。翻查資料才知原來這是個有逾百年歷史的老牌酒店(比希爾頓還要老牌),最早可以追溯到19世紀80年代。



酒店大堂除了很有古典味的裝潢外,臨近聖誕關係仲擺放了一大座很想咬一口的朱古力薑餅模型屋,前面還有張寫了「Please Don't Touch」的溫馨提示卡片,好彩唔係寫中文的!



酒店出面仲擺左個carousel,望落好似都幾多人排隊去玩,突然間覺得好有荔園feel(請不要問荔園係乜),唔知係咪特登為個Christmas market而設的期間限定呢?聖誕新年過後多數會搬走吧!



唔好以為只有MK先有桂林夜市,唔係講笑原來喱度一樣有,酒店外的大街就擺滿了小食車仔檔,唔知會唔會有咖喱豬皮豬紅蘿白魚蛋牛雜賣呢?



睇小販的面口應該大部份係墨西哥拉美裔人士吧(聽到D人講gracias)!所以如果要篤魚蛋牛雜就應該無行了,可能賣雞蛋仔waffle夾餅又或者taco果類車仔檔會唔會有多D機?不過上圖的熱狗檔就肯定係最多,天氣咁凍食個熱辣辣熱狗其實都幾暖笠笠,最重要係價錢也不貴。



唔好成日掛住食,快D行埋過去對面公園行陣先啦!嘩……真係成個公園都擺滿晒聖誕樹喎!基爾咁大個仔(or佬)都未見過咁密集的聖誕樹群,開眼界了(仲有少少睇到眼花)。



睇返佢網上official個網頁介紹,原來這個位於聖荷西市中心Plaza de Cesar Chavez Park的聖誕市集已經有成37年歷史云云,每年由Thanksgiving之後一直去到New Years Day,而且係Daily 9:00am-Midnight。(朝早來睇燈飾咁潮?)上圖是公園裏的表演舞台,有band show睇,不過基爾路經時剛好中場表演完D人散左水。



細心睇公園裏D聖誕樹裝飾分左做中學區和小學區,原來好多都有學校名,全部都係附近的中小學學生或社區組織負責設計,有點比賽味道。



除了有聖誕樹不可少之外,每個攤位仲有聖誕老人、鹿車、雪人、馬槽、耶穌聖母等公仔,有好多仲會有機動設計(公仔會識郁)。上圖喱個直情有個旋轉木馬添喎!



上面喱個仲堅,聖誕老人唔係坐鹿車,而係坐住架大龍船來派禮物(直情就係端午節果種龍舟),仲有好多綠色小矮人來幫手派,係咪好有氣勢。左下圖是售賣聖誕帽聖誕襪之類的攤檔。



話明係聖誕市集,仲有幾個聖誕老人出來搞下氣氛同遊人合照selfie一下,幾盞鬼!左下圖果間係聖誕老人屋,入面有個聖誕老人會同小朋友影相和傾偈,收益好似部份會撥捐慈善機構。



好似好耐都未試過咁夜仲係街蒲,臨走時都有D眼訓到眼矇矇,連張相都影到有點似夢迷離感覺!

2018年3月23日 星期五

舊金山居閑話@Pier 39

過了成個禮拜,個捕夢網有冇撈到三幾個好夢?如果無都唔緊要,繼續有基爾陪住去碼頭邊漫步閒遊,係咪仲正過中六合彩先?



好喇……廢話唔多講(好彩仍然知道這是廢話,看來都未傻得晒)!行完幾檔紀念品店,齋睇冇買運完一輪吉當係參觀博物館之後,咁繼續行埋過去Pier 39果邊,睇睇D街頭表演吧!



成個漁人碼頭其實沿海邊行除了多食肆和紀念品店之外,都有幾多唔同類型的博物館,好似之前經過大門口但沒有入去的Musee Mecanique,裏面其實係展出唔少古董桌面式那種遊戲機和彈珠機;另外有些碼頭也活化成為海事博物館或潛艇博物館之類,仲有D蠟像館等等,不過基爾當天去到時間不太夠,也沒有逐一去參觀了,留待下次吧!



至於近Pier 39喱邊除了有個碼頭改建的兩層大商場之外,仲有間Aquarium of the Bay(都係無入去睇);至於上圖喱間起在碼頭邊的屋仔叫做Blue & Gold Fleet,是搞day tour的遊船公司……



就係坐喱種藍白黃船仔出海去遊船河,望落係咪有少少似由馬料水坐船出去吐露港塔門吉澳東平洲果類街渡仔!喱度D遊船通常係遊出去金門橋底峽灣果邊走一轉,又或者出去Alcatraz Island(好似譯做惡魔島)睇舊監獄改建的博物館,也有去Angel Island State Park行下咁!



如果好似基爾咁唔去坐船,齋留在碼頭無聊四圍行下都多野睇不愁悶,唔怕人頭湧湧的可以一直行出去碼頭外邊,仲可以睇到好多超級肥大肉厚的加州海獅攤晒係度曬太陽,全部天然野生不經人工訓練。



如果想睇水族館就由喱度入去啦!喱度同樣係唔少旅行團聚集和街頭藝人賣藝表演的集中地……突然醒起美國大城市喱類人群聚集旅遊區似乎都係不太適宜久留,反正時間也不早就返去取車返屋企了。



駕車離開漁人碼頭時,沿路還會途經穿過三藩市的CBD,來這裏咁耐已經好少再見到喱類玻璃幕牆高樓大廈密集的金融商業區鬧市,真係有點似返去了中環金鐘灣仔區,有種似曾相識的感覺。



p.s.回家後,到了翌日夜晚無意間看新聞時,看到有個電視台記者在Pier 39前訪問D唔知路人定係遊客,基爾最初都無集中精神去聽佢講乜(要好似考listening咁留心先聽得明),後來睇睇佢下面D字幕先知話碼頭果邊收到恐襲警報,問D人驚唔驚擔唔擔心之類,好彩之前已經出去行了一轉,如果依家先話去基爾媽就一定反對了。

2018年3月18日 星期日

舊金山居閑話@Fisherman's Wharf:下

基爾似乎又感應到blog友們的小宇宙:喱個人成日剩係掛住食,其實個漁人碼頭仲有咩值得一睇呢?



知喇知喇……咁去四圍行多陣睇下有冇D特別景點影下囉!行到近海岸邊有個幾靚的碼頭喎,咦!咪住先,睇真佢門口有個招牌寫住Musee Mecanique,法文來個磨?



再行過少少睇下海邊D船睇下車睇下遊人同海鷗……碼頭喱邊原來都有間Applebee's餐廳,好似佢都幾多分店喎!基爾住果頭附近都有一間,不過屋企人話麻麻地好食,所以一直都無幫襯過。



情迷電車男又再出現!再影多張喱款係咪都好有粵語長片果種懷舊feel,翻查資料才知原來這種電車已有80幾年歷史,大部份是二戰前後建造……



不過若追溯舊金山最早的電車系統,則在1860年代已建成通車了,比香港還要早40幾年(網上資料話港島電車系統最早於1904年開始營運)。不過這種古老交通工具於80年代曾一度於舊金山停駛,直至1995年才復活。



睇飽睇夠電車之後,基爾見街邊有幾間看來是專做遊客生意的紀念品店,雖然一睇個門面就知唔會有野想買,不過一場來到都要入去八一八啦!上圖喱間賣衫店舖係咪有點花園街feel?門口白色果幢tee賣USD$12.99有3件。記唔記得之前講過基爾的匯兌速算口訣:USD$13就約莫係HKD$100,咁一舊水有3件tee又幾抵喎!花園街都買唔到啦!



再睇埋隔籬喱間,好似同一般的souvenir shop有少少唔同,門口除了有The Rock的紙板公仔之外,仲有好多可樂精品賣喎!如果係可樂控的話也好值得花少少時間入去貢一貢,看看會否找到一些特別版的心頭好。



可樂推出的宣傳精品繁多應該好多人都知,不過喱間的存貨量也算多得驚人,很有點小博物館的規模,而且很多都係有價目(當然售價也一點不便宜),可樂控人士可能要大破慳囊了。



真係唔知個老闆本身係咪都係可樂精品的收藏家,入面好多貨架上的特別版可樂相信早已停產,也有些是專為某幾屆奧運或體育盛事重要比賽而推出的宣傳品,可想而知都是一些限量版的珍貴收藏。



除了可樂精品之外,店裏仲有唔少有特色又有地道風味的紀念品出售,例如上圖喱個小網下面掛滿唔同顏色的羽毛掃子,應該好多人會知係乜!無錯,就係印第安人的捕夢網。如果成日想中六合彩的人要買多幾個掛在睡房中先得喇!

2018年3月12日 星期一

舊金山居閑話@Fisherman's Wharf:上

基爾記得數年前去Sydney短住時都有特登出去佢個漁人碼頭行一圈兼食了隻大大隻又新鮮又多肉又抵的大龍蝦,咁今次來到阿美利堅要去多次fisherman's wharf睇睇舊金山喱個係咪仲堅D先得!



去睇金門橋通常都順腳逛埋過去Hyde Street睇古董上山電車,仲有就係去Lombard Street睇九曲花街影張靚相打個卡,之不過為食基爾當然不能走漏了要去埋就近的漁人碼頭逛逛先肯走啦!



三藩市區尤其係遊客區搵位泊車比較麻煩,而且大部份都要入錶,好多時要泊遠少少,行幾條街先可以落返去近漁人碼頭市集果邊,這情況同老家都有D似喎(泊車無位要去到無雷公咁遠)!漁人碼頭喱邊遊人雖然多,但好在建築物都不是太高,望上天空不會太有壓迫感,基爾特別喜歡上圖綠色那種古老單層電車,係咪好有五六十年代的老電影場景風味!唔知當年占士史釗活拍《迷魂記》時又有冇來過喱度取景呢?



話明係去逛fisherman's wharf,花少少時間巡一巡D小食檔是常識吧!基爾見上圖喱種賣clam chowder海鮮湯的幾乎個個攤檔都有得賣,唔知係咪喱度漁人碼頭的名菜呢?突然醒起紅罐C字牌果隻老牌罐頭湯都有喱款周打海鮮湯,基爾間中會加麥皮煮當早餐(每次煮半罐,可分兩餐食)。



行行下見上面喱間餐廳都幾唔錯喎!Lunch specials until 4pm實在太好了,之前去其他地方的食肆好多時下午兩點幾已經落晒場。喱度如果行到下午茶3-4點都不愁無野食醫醫個肚仔!有冇人又想來同無聊基爾玩下「食飯學英文」?Fish & Chips唔駛解釋啦!不過USD$14.75係咪都幾貴?唔知份量係咪好大?咪住!睇真佢個lunch specials係包埋shrimp salad或clam chowder,咁都算抵食喎!



睇埋其他幾樣先,都係USD$15.50-18.25不等(當然也是未連稅及service charge)。最頂果樣叫Rex Sole Almondine有冇睇錯?係咪類似港式茶餐廳乜乜香煎龍利柳果類?Almondine唔識喎係乜野來呢?佢地興加杏仁碎片定係汁?No.2果樣Mussels Bordelaise好深呀!類似紅酒燴牛利果種汁?不過喱個係燴青口果類係咪?



No.3則是Calamari Steak,醒起香港有時街市會有D熟食檔有種燒魷魚餅賣?係咪類似喱種?如果係煎墨魚扒會唔會驚好韌?最後果樣Fried Filet of Sole沒搞錯就是炸魚柳吧!喱度除了有加州鱸魚之外,原來都仲幾興食多寶魚果類扁魚喎,唔知係咪貪佢無乜細骨啖啖肉又易起肉呢?



好喇上完英文堂當係請大家食飽晒,咁又繼續行多陣四圍八下!上面喱間Crab Station顧名思意係咪食蟹出名?不過見佢無避風塘炒蟹果D喎!Crab Cake就食過(USD$5),是用蟹肉打成蓉撈少少洋蔥薯蓉和面包糠炸整到成個圓形餅仔咁,基爾覺得幾好食。不過喱檔最特別係佢個英文menu上面大大隻字寫明「我們通曉國粵語」!



拿!大大隻蟹擺埋出來畀你過目係咪新鮮料,應該可以拆出好多蟹肉用來整crab cake了吧!另外,喱間一樣有clam chowder,有得揀cup / bread / pint / quart,應該係份量size不同,大D就賣貴D,不過bread就最得意,基爾醒起以前食過那種農夫包,裏面有菜有瓜有豬肉有雞肉雜錦乜都有,喱個就用個麵包切開頂蓋來裝周打海鮮湯,如果天氣凍食落當堂暖笠笠之餘,仲要係夠晒環保唔駛洗碗!

2018年3月7日 星期三

舊金山居閑話@煲仔王

在三藩市除了有好多不同日韓越式餐廳菜館之外,要吃唐餐當然也不愁沒選擇,今次去喱間煲仔王就在上次去買燒味那條街附近,唔知係咪昔日台山的金山阿伯開的呢?



老實說,基爾對煲仔飯沒有太大偏好,在老家時也不常會吃,好多時都係親朋飯局點到就食少少應酬下就算,最主要原因係基爾本身不太愛食飯焦(所以也很怕食韓式的石頭鍋飯),臘味肥油沾滿的飯更是怕上加怕……



講返喱間台山煲仔飯店,唔講唔知原來煲仔飯是台山名菜,真係失覺晒!喱間除了有好多款唔同煲仔飯供應外,門口掛出來的大menu仲有唔少「鄉鎮小炒」,有豬腸炒豆芽、炒豬肚,仲有椒鹽田雞、豬尾煲之類,係咪好多祖籍台山人都未食過?



睇返D價目又唔係好貴喎!不過基爾其實都唔係太清楚依家去油尖旺區食個煲仔飯要幾銀?喱間一個普通北菇滑雞、咸魚雞粒、梅菜或咸魚肉餅之類就只售$10.99(HKD$86);貴少少有黃鱔臘味、田雞、排骨臘味或牛腩都只係USD$13-15不等(約HKD$100-120)。至於小炒類大部份也是USD$11-15不等(未連稅及service charge),比較貴的是五味雞和鮑魚海參煲都係廿零至三十幾蚊美金左右。



至於份量就不需要擔心,基本上以基爾食量來說絕對可以是「二人前」夠晒飽,即使沒有食午餐都應該一個人無法食晒全煲飯(當然如果是食量較大的地道老美可能另計)。Anyway,聽聞唔少老港移民weekend出三藩市華埠閒逛時,都愛來這間幫襯,叫做回味一下港式煲仔飯風味云云,不過基爾覺得只係普普通通之選(純屬個人口味),不吃也沒大損失吧!



最後不如來玩下「食飯學英文」!基爾識得打邊爐叫做hot-pot,依家先知原來煲仔飯係叫做clay-pot;田雞當然不是叫field chicken,椒鹽田雞就咁叫做salt & pepper frog;鰻魚應該好多人知係eel,黃鱔就叫yellow eel。仲有仲有,瑤柱蒸肉餅食得多,咁英文又叫乜?原來係dried scallops with pork meat patty,係咪好複雜呢!

2018年3月2日 星期五

舊金山居閑話@Golden Gate:下

眨下眼過完新年又來到元宵佳節,相信好多blog友都忙住去花前月下有影皆雙……你冇乜節目?梗係唔信啦!無理由架喎,你幾好丫,點會無人……不過唔緊要啦!不如就跟基爾繼續行橋去。



上次行完橋面,今次繼續行埋橋底。橋底究竟有咩好行呢?梗係有啦!如果去到一定要記得去行下喎!睇上圖就知風景係靚得令人心動的級數。



唔知有冇人好似老餅基爾咁睇過希治閣的《迷魂記》(Vertigo, 1958),如果有就肯定對金門大橋底的尖兵堡(Fort Point)好有印象,因為當年女主角金露華(Kim Novak)就是由這裏海邊一躍跳入海中,男主角占士史釗活(James Stewart)無懼風高浪急即時飛身落海英雄救美,這幕希治閣經典場面令金門橋底的尖兵堡即時成了人氣景點,至今已逾半世紀。



至於Fort Point的歷史比這齣希治閣經典懸疑驚慄片還要早100年,最遠可追溯至19世紀美國的南北戰爭時代。這座由紅磚修築而成的古老城堡建於1862年,當時是防守三藩市峽灣區一帶的重要軍事堡壘。現時已改建為Fort Point National Historic Site博物館。



行完金門橋的Presidio要塞區之後,見天氣唔錯就繼續駕車過埋大橋,去到對岸的馬林岬角(Marin Headlands),從山上以另一角度觀賞這條深紅大橋。原來唔少識途旅人都會駕車來山上喱邊賞風景,就好似上太平山要去盧吉道走走一樣。這處觀景台停車場其實地方唔算太大,幸好沒有太多旅遊巴來這裏,否則條山路仔一定大塞車。



除了睇大橋和海灣風景之外,基爾發現仲可以睇埋山坡的岩石層。如果中學有讀過Geography的請舉手,記唔記得金門峽灣喱邊係位於乜野板塊?上圖山坡見到的沉積岩紋埋顯示千萬年前這裏原是位於太平洋海底的沉積岩,後來經過地殼變動才升出海面成為高山。



從這裏遠眺山坡下面,原來仲可以見到一處遠古的印第安遺址,聽說以前是印第安人的浴場云云,地點就位於一望無際兼浪濤洶湧的太平洋海岸邊。基爾突然醒起之前去秋田青森果度都有唔少海邊溫泉,望落同喱度真係有少少似曾相識之感!(有興趣可翻看:2Q12瀛遊東北@椿山