2011年1月28日 星期五

曼谷泰國菜館@北角

今年與同事食「團年飯」食咩好呢?!近排咁凍一於揀間暖笠笠的泰國菜館,公司附近選擇不多,喱間曼谷泰國菜館之前同事食過話OK,反正基爾未試過,就去試下。


喱間泰菜館第一次幫襯,環境裝修唔錯,menu上的菜式種類都算多

今年喱餐同事團年飯仲有個「特別嘉賓」出席,就係走左成年幾的舊同事A都專程黎聚下舊。同A同事前前後後新舊公司夾夾埋埋都做左成四、五年同事(死喇,唔知有冇記錯,老人痴呆發作),見佢由昔日的傻更更小妹妹到依家亭亭玉立兼可以獨當一面,基爾都老懷安慰替佢開心!


菠蘿炒飯的飯頂有一堆肉鬆 / 青咖喱雞 / 椰汁西米糕

陣容咁強盛,連平時帶開飯的基爾都唔帶喇!下午茶時段黎到喱間泰菜館其實已經唔太多人,非常容易搵位,而且下午茶餐(2時後)抵食D,食得更開心!喱間泰菜館的下午茶餐其實同正價時段午餐提供的菜式大同少異,但每樣就平左成十蚊八蚊,當然份量估計係會少D,但基爾一向細食所以絕對無問題。


千層糕淋上椰汁更軟滑滋味 / 沈滿砂糖的芝麻糯米?煙韌又香口

拿拿林點菜先!基爾點了青咖喱雞,味道OK,咖喱稍辣但好味,尤其係泰式茄子。同桌同事點了菠蘿炒飯、泰式炒公仔麵等,平均只是三十幾蚊,連凍飲(不用加錢)都幾抵!不過其實基爾醉翁之意不在酒,飯後甜品才是焦點所在,因為跟餐加$10送埋3款甜品,包括﹕椰汁西米糕、泰式千層糕同埋芝麻糯米?,之前基爾曾托同事買外賣食過,發覺幾唔錯,今次當然要翻尋味。西米糕是凍食,口感一流;千層糕同糯米?是熱食的,嘩!原來即場食熱辣辣仲好味道,Excellent!


同場加碼比利時朱古力

舊同事A仲臨場加送,就係喱盒朱古力,睇下盒底仲寫住Made in Belgium架喎,好似好矜貴咁!基爾當然唔客氣拆開黎食,裏面只有6粒架咋,仲係唔同餡的,有白和黑朱古力等花款,正過佢先前送的萬聖節朱古力多多聲!讚X100!
 
曼谷泰國菜館 Bangkok Thai Restaurant
北角英皇道433-437號珠璣大廈地下B舖

2011年1月25日 星期二

十年型格遊:下@伙炭

畫廊的人在細賞風景,看風景的人在門外看你
抽象的藝術裝飾了你的工作室,你裝飾了別人的blog



今時今日才驚覺
原來街市常見用來照雞蛋的紅燈罩,是這般的婀娜多姿




為了慶祝這個大發現
快來吃個特別為你而設的中式afternoon tea




蒸籠是真的傳統竹製蒸籠
蝦餃卻是用了精緻的繡布織成,在微距鏡頭下可看得清?




看不清也不打緊,外面的世界,看來更精彩
兜兜轉轉又來到了剛才的起點,或許,這就是人生……




想得太多,還是找張凳仔來抖抖
小息後再去上英文堂,牆上貼滿了生字卡,浮起了對綠頂A-Z擦紙膠的思念




繼續在腦海中盪漾之際,瞥見浮沉深海的破碎白瓷
像一朵海中盛放的睡蓮,Monet!也來畫一幀新作吧




古老十八代飲食茶具故事館裏,火紅太陽再升
文革十年兩茫茫,不思量,自難忘……縱使相逢應不識,塵滿面,鬢如霜




廣州西關老字號茶樓風情,彷彿一盞淡香依舊
觥籌交錯之間,似聽見在二胡弦線中低吟的南音




如夢乍醒,只見日落梢頭,換來半羞明月掛天邊
郎歸已晚,沿河尋陌路,罡風倍淒清……




西山紅艷東山寒,既熟悉又陌生的粼粼波光
遺留下多少單車的軌跡……




疏影橫斜,流水碧空盡
岸上舊時相思,多情應笑我,心中早生華髮!

2011年1月21日 星期五

十年型格遊:中@伙炭

在殘破而宏偉的工廈內幽遊,像沒歸宿的靈魂
雖有地圖但不會設置特定目標路線,有緣自然會遇上……



首先遇上了型仔電單車,令人想起《天若有情》……
但拿破崙戰馬也不讓鐵馬專美,巨幅postcard拼貼海報中
看真點……騎在馬背上的原來不是拿破崙,而是關公




《關公大戰外星人》的cult味,不是人人也接受到
還是看看《的士司機》或者《Transformer》吧!




咦,竟然還有港版《清明上河圖》?毋須老遠去機場博覽館
噢,看真點原來是《名稱上可圖》,藝術的複製演繹




充滿隱藏信息的漫畫postcard,宮崎駿fans一定對愛不惜手
從《天空之城》到《哈爾移動城堡》,先決條件是要很熟悉宮崎駿動畫才認得出




遊走於破落工廈裏,少不免要經過又長又陰森的樓梯,彷彿隨手就拍到靈照
由A座9樓走到B座7樓……咦,為何沒有了8樓?!難度是魑魅魍魎作崇?




閃靈,殊途不相往來!還是回到現實的畫室,呼吸多一點人氣
巨幅人像畫,輕托香腮的凝視,正好用來驅走心寒




全日最喜歡的一幅素描,是關帝廟還是天后宮?已忘掉了……
卻最難忘樹影婆娑中的空間缺失、留白的藝術美感




大部份工作室,都是一臉不修邊幅的藝術家模樣
穿上華麗晚裝的King's Gallery算是例外……壯碩的士兵銅像雕琢細緻




可惜來自俄羅斯的抽象油畫實在太怕羞,嚴禁拍攝出鏡,還是蟬過別枝
瞥見那花鳥蟲魚國畫風姿,無端傳來那錦瑟悠揚樂章……




My Goodness!這不就是藝術家典型的「亂中有序」嗎?!
下次實行要同基爾媽講﹕不用執房了,artist都愛這樣子的

2011年1月20日 星期四

十年型格遊:上@伙炭

從喧鬧的新城市走到頹落的工廠區
只為了一期一會的藝術工作室開放日



老舊的工廠區大廈
有些變了特賣場,也有變了骨灰庵……




這裏就零星散落了數十間小畫廊小藝舍
但首先來迎客的,竟是一部帶少少姣味的粉紅色拖閘式升降機




門前高掛的是中國味十足的漢雅軒匾額
內裏展出的卻是新派水墨油畫風格的「當代蒙古」




其中一幀……是在做Yoga嗎?
還是在表演軟骨功




即使你有3把口定還是有3隻眼,也看不清那一撻墨汁是什麼
那原來是蒙古大漠草原上正在吃草的駿馬




喜歡低調的夠低調
當然愛浮誇的也很容易找到心水之選




夠浮誇未?一頂潔白如雪……
還鑲嵌了幾顆寶石的小皇冠,黑鬱的背景襯出雍容




牆上掛滿手手腳腳的素描,配上modern簡約味道十足的畫框
反而卡通公仔就鑲在巴洛克琉金畫框裏,是玩味錯配crossover?!




80後歡樂摺紙系列?!
Elmo、SpongeBob、叮噹、小新……橫跨X、Y和Z世代




兒時玩的摺紙花喱碌一大堆的貼滿牆
卻不及簡約的木製家俬模型令人眼前一亮


更多的天馬行空,未完的故事……

2011年1月17日 星期一

泉章居@旺角

臨近過時過節通常都係開餐高峰期,近排又去邊度做食探?今鋪不如就一炮過摷返晒D相出來講晒佢,寫返個精華版「為食一條街」!


泉章居二至八人餐單 / 左起﹕京蔥牛仔骨、海鮮豆腐羹、蟹肉扒豆苗、霸王雞

先講泉章居,旺角店由於近火車站,所以都去過幾次,這次則第一次來銅鑼灣廣場店,感覺好似無旺角店咁靚,可幸係唔駛排太耐隊!晚市有二人、四人及八人餐供應,這次叫了二人餐($158),一湯兩菜都ok抵,而且有幾十樣菜式揀,就好似剔點心紙咁方便。唔夠飽再叫了京蔥牛仔骨,卻反而麻麻,少韌!


旺角八哥拉麵 / 意大利葡醋雞扒拉麵 $42

始創隔籬喱條街有好多野食,早前路過又見喱間新舖,即管入去試下。入到去坐低睇menu,見價錢平過味千少少,但選擇不算太多,就點了意大利葡醋雞扒拉麵+蕃茄湯底。據桌面的雜誌剪報介紹,該店是用日本機日本麵粉製麵,但食落麵質同湯底都只屬一般,幸好有塊香軟的葡醋雞扒拉返高少少分數。


介紹日本機日本麵粉製麵的剪報 / 八哥炒飯 $48 / 泰好味炸魷魚鬚 $28

記憶中以前喱度好似都係拉麵店,喱一帶的食肆競爭其實都好激烈,經常執完又開開完又執。見老闆娘不斷在門口招客,似幾有熱誠,希望佢做得住。同場仲叫了八哥炒飯(帳單上打的是日式橫綱炒飯,可能是原名),同埋炸魷魚鬚,後者基本上可以不試,也不知「泰式」在哪裏?!


Theme Cake朱古力蛋糕,中間兩層黃色的是橙吉士

平時睇Theme Cake傑作就睇得多,每次都精雕細琢巧奪天工,令人嘆為觀止,如果說這是藝術品也絕不誇!喱次終於有機會試試其內涵,梗係拿拿林襯新鮮切黎食,果然同外貌係成正比的,同事食之前忍唔住先同佢影張靚仔相。其實基爾對整蛋糕可謂一竅不通,感覺上比一般煮飯炒菜還得要多花心思,簡直要封餅王F做偶像,唔怪得接單接到手軟。Anyway,加油+生意蒸蒸日上快D開舖!


沙田大圍客香村 / 羊腩煲 / 蝦子柚皮

放工後一枝箭標去大圍,就係為左食喱餐「夜茶」。其實之前睇電視都有介紹過,剛巧友人提議去,基爾就樂於做和議人。由火車站出去穿過幾條街就到,不過由於時間尚早,暫未供應夜茶點心,反正天寒地凍就先來個羊腩煲邊爐吧!


清炒豆苗 / 羊腩煲邊爐用的腐竹和肥牛

喱間店果然係越夜越旺,初來時還只有4、5台客,10點後就爆滿,連門口都擺埋台,連埋附近幾間店一齊,場面都幾熱鬧。單叫羊腩煲當然不夠食,於是再加碼叫了腐竹和肥牛,為健康起見還有生菜和豆苗,現正當造的豆苗幾正!


乾蒸燒賣 / 馬拉糕

話明黎飲夜茶,最後點都要叫少少點心試下。由於點心要10點後才上市,食完羊腩煲邊爐後其實已飽了七成有多,為免太飽訓覺不太健康,所以只點了燒賣同馬拉糕做「甜品」,最終都係捧住個肚走!p.s.席間知道友人剛遞了信,但願佢快D搵到一份唔駛臨時冇大假放的高就……
 
泉章居 Chuen Cheung Kui
旺角奶路臣街33號依利大廈2樓及地下E號舖

八哥拉麵
旺角西洋菜南街234號地鋪

客香村
沙田大圍積存街34-36號

2011年1月14日 星期五

香港故事@歷史博物館

上回睇完「香江有情」展覽,順便又行埋歷史博物館另一邊的常設展館「香港故事」吧!雖然基爾之前已行過好幾次,不過影相post上blog還是首次,所以即管再巡一圈測試一下新相機!


走入拱門就看到4億年前香港誕生時的地質面貌 / 原始人造獨木舟 / 摩崖石刻

「香港故事」由地庫和1樓展廳組成,共8個展區佔地達7,000平方米,是歷史博物館規模最大的展覽。展廳內收藏了逾4,000件展品,由4億年前泥盆紀時代經火山爆發誕生的香港地質歷史,一直介紹到1997香港回歸。


1955年港府興建李鄭屋村時意外發現了東漢時期的李鄭屋古墓 / 灰窯遺址

這一大批珍貴的香港文物展品是博物館多年來努力蒐集、保存及研究工作的總展示,配以聲光等特殊效果介紹香港的自然生態、民間風俗及歷史發展。當中基爾覺得比較特別的是李鄭屋古墓,十字形漢墓廳內擺了不少當年出土的陶器和古錢,同場還展出東涌、馬灣等地出土的唐宋古窯模型。


香港開埠初期的漁港風貌 / 天后廟銅鐘和宮燈 / 稻田水車 / 水上艇戶帆船

走出古墓後,就見到一艘幾搶眼的中式大帆船。清代中葉香港還是個小漁村,不少艇戶漁民一家大小就住在漁船上,船內還展出了水上人的生活用品。離不開水上人的還有天后廟,漁民出海捕漁前都會先祈求天后娘娘保佑魚穫豐收平安歸來。這間仿製的天后廟也甚具規模,廟內還掛了不少大型宮燈。


19世紀中葉香港成為英國殖民地後,維港逐漸成為繁忙的商運轉口港

睇完漁村後再乘電梯往1樓的近代香港史展廳,此part主要睇鴉片戰爭前後至九七回歸的殖民地歷史,展廳內搭建了一幢維多利亞式大樓,面向古老維港全景照,很有懷舊味,碼頭還泊了一艘西式舊貨輪和放置了幾個木箱。碼頭旁有間匯豐銀行,門前掛了沿用百年的舊logo,直至80年代後期才改用現時的菱形圖案。


70年代的電車 / 電車操控桿 / 律勞卑紀念碑 / 律勞卑畫像 / 林則徐像

碼頭旁還有不少與鴉片戰爭有關的文物,包括一條大理石柱「律勞卑紀念碑」,原置於澳門,後來在香港墳場被發現。讀過鴉片戰爭歷史的應記得律勞卑這名字,1834年他成為首任英國駐華商務總監,由於貿易不平衡和鴉片問題令中英外交關係惡化,是引發1840年鴉片戰爭的關鍵人物之一。


19世紀維多利亞女王時期的幾款郵筒、郵票售賣機 / 古董留聲機和打字機

古老銀行隔籬仲有古老郵局,裏面擺設了幾款古老郵筒。以前街邊的郵筒並非綠色而是紅色的,與英國一模一樣,上面有VR字樣。VR其實是維多利亞女王的拉丁拼法Victoria Regina的簡寫,她於1837-1901年在位,是英國迄今在位最久的君主,在位64年間被譽為英國最強盛的「日不落帝國」年代。

比較特別的還有打字機,其實基爾中學時也曾學過用打字機,記得那時用手指尾篤shift掣時重到幾乎拗傷;打錯字又要用「改錯紙」或甚至重新打過,非常痛苦;字粒敲打在滾軸的紙上時會發出非常清脆的聲音;打到滾軸盡頭時還會有「叮」一聲……不過到寄出的第一封求職信時,已不知不覺間進入電腦時代了!

2011年1月11日 星期二

咖喱薯仔燜雞翼

咖喱係基爾其中一味不時會煮下的菜式,主要原因係味道比較容易控制,唔容易會煮得太難食。比較常用的食材係燜薯仔、紅蘿蔔和雞翼,唔講咁多快快手手開工,咪又畀人話長氣!



落鑊煮之前,當然要先搞掂D材料先。薯仔批走D皮之後砌成一塊塊,如果加埋紅蘿蔔一齊燜的話,也同樣先批皮再砌塊。由於加入紅蘿蔔煮咖喱的味道較濃,與薯仔同雞翼一齊煮會幾夾幾好味,不過今次唔記得左買。Anyway,都照煮啦!煮之前當然仲要先用少少鹽、糖、豉油(或鮮露)、胡椒粉等稍稍醃一醃D雞翼先。

Step 1﹕先落少少油再將醃好的雞翼落鑊稍為煎香表面,毋須完全煮透就可先撈起用碟裝好備用。
Step 2﹕將砌好的薯仔倒進鑊中,再加入咖喱糕慢火煮溶,再加入雞翼返兜,讓雞翼沾上咖喱汁再撈起。




Step 3﹕將一湯碗水倒入鑊中,蓋上鑊蓋繼續燜薯仔。
Step 4﹕約15分鐘後稍見收水,再將雞翼回鑊,與薯仔一燜至熟透。
Step 5﹕再過10多分鐘後見咖喱汁已漸趨濃縮收乾少少,就可以熄火上碟了。




為免燜薯仔雞翼時會黐鑊有燒焦味,所以燜的途中最好留在廚房「罰企」睇火,不時要揭開鑊蓋炒兩下以防黐底,咁就very good喇!值得一提的是,近年基爾比較鍾意用喱種日式咖喱糕,一來味道唔太辛辣,而且咖喱味較一般的咖喱粉濃一點,色素也比較少,食得更加安心健康!