阿鴻小吃@北角

繼續又黎講飲講食！不過今次講喱間係堅少少的「阿鴻小吃」，佢主要「堅」在兩方面﹕其一係佢去年拎左米芝蓮一星；其二又係在門前經常圍左成村人在排隊等位！

米芝蓮一星的阿鴻小吃，店內店外都係逼爆感十足

其實早在幾個月前已經諗住去試試阿鴻小吃，點知黎到一見佢門口果條「巨龍」，立即就要打退堂鼓，上次在「添好運」等位等左4粒鐘仲未知驚咩真係！況且如果係食lunch的話又點可以排成粒鐘咁耐，排得黎都夠鐘返工啦！


芥末雞腳跟 / 鹵水蛋

好喇！喱次再的起心肝去幫趁，完全都係多得友人拍心口答應去做排隊先鋒，好彩多得佢咁低得諗，基爾先有機會食得成喱間米芝蓮一星食店，然後先有機會直擊畀大家睇下到底佢有咩咁巴閉。聽友人話其實阿鴻小吃已經開左幾年，依然係其門如市。不過在它開業前，和富道喱一帶係烏蠅唔多隻的，食店開一間執一間，到阿鴻小吃開檔後先至帶旺晒成條街云云，喱次去到仲見到D名人暗星添！


鹵水鴨舌 / 鹵水豬耳

到底阿鴻小吃係食咩菜架呢？無錯，就係潮州鹵味打冷。基爾唔係潮州人，對潮州鹵味亦無乜特別偏好，以往總感到潮州菜味味都係鹵水，好似只有一種味道咁，部分食店的鹵水甚至調校得不是太鹹就是太淡，而且菜式好多時都偏肥膩，所以很多時出街都未必會光顧潮州菜館。不過既然今次黎到阿鴻，點都要試試佢幾味撚手經典菜式。


鹵水鵝片 / 牛展撈麵

結果叫了上面喱幾味，先講鹵水蛋，其實係無乜特別的，叫做OK入味咁啦！比較令人醒神的是芥末雞腳跟，初頭基爾都唔知係乜，以為係類似白雲鳳爪之類的菜式，當拎到上台時發現成$45蚊竟然只有一個小遮喱杯咁丁dur，果然係好矜貴，食落就爽爽地，一口一小塊，無骨，仲有少少黃芥辣的酸辣味道，幾正！一隻雞只有兩隻腳跟，而且製作上應該幾繁複，所以賣到咁貴都唔出奇。至於鴨舌就無揀全隻果種，怕食得麻煩，只點了前半截果隻，但都OK好食。鹵水豬耳則夠爽脆，但稍嫌似乎花生多過豬耳。另一味鹵水鵝片雖然比較肥膩，但都食左幾舊，唔太韌，夠入味。由於驚唔夠飽，所以再叫了招牌撈麵同牛展撈麵，之前都聽聞黎喱度一定要食撈麵，果然係名不虛傳，麵質爽口彈牙得來，鹵水和麻油味也夾得恰到好處。埋單計每人也只是$130，以米芝蓮一星食店來說算是抵食之選，而且菜式水準在眾多潮州鹵味店之中，都算係首屈一指的。

 

阿鴻小吃 Hung's Delicacies
北角和富道84-94號銀輝大廈地下4號舖