馬灣輝記飯店@珀麗灣

基爾間唔中會入去喱個小離島，一來黐下友人個豪華會所玩，二來周圍hea行下食下野，也是不錯的一日遊理想地！

寧靜的珀麗灣馬路 / 荃灣碼頭乘來往珀麗灣的渡輪$8

每次來到荃灣碼頭乘渡輪入珀麗灣，都畀喱度豁然開朗的怡人景色吸引，等船時也不用怕浪費時間，四圍影下相也是一件樂事！由碼頭望出去就是藍巴勒海峽，對岸可看到青衣東北角的豪宅和青衣北橋，近岸喱邊則是荃灣的海濱花園，當然還有高聳的如心廣場和荃新天地，後者是個不錯的商場，有時也會在這裏覓食。


這天沒有去會所玩，只在友人家中hea坐下傾下偈，6時左右就出發往輝記

記得最初由荃灣乘渡輪入珀麗灣只須$3，後來加到$5，這次去竟然加到$8，真係完全體會到咩叫做百物騰貴的厲害，如果人工可以這樣三級跳就好了。Anyway，這天下午入到去其實時間也不早了，所以沒有去會所那邊，只在友人家中hea下。友人搬左入去其實都有幾年，樓價當然亦係三級跳，聽聞若到三字頭佢就會放盤，到時又大賺一筆，羨慕ing的基爾真係唔知打幾耐工先賺到喱筆巨款呢！


輝記海鮮酒家 / 白灼蝦 / 椒絲花烚 / 椒鹽鮮魷

唉！都係唔好發夢……講講下原來已經5點幾，因為訂左6點幾的台，都係時候hea行過去。輝記其實係近馬灣舊村那邊，但這一列兩三層高的丁屋則是新建的，村民大部份係由即將清拆的舊村搬過來，舊村那邊清拆後又會繼續起豪宅。以前都有幾次過去舊村那邊走走，像荒廢了的大澳或南丫島之類的離島小漁村，感覺特別。聽聞舊村碼頭昔日有街渡過去深井對岸那邊，依家當然早已消失了。


粉絲蒸扇貝 / 豉椒炒蟶子 / 椒鹽鮮魷

記得第一次來輝記食飯時，簡直係驚為天人！因為每樣海鮮菜式都煮得好好味好新鮮，雖然價錢唔特別平，但仍算合理。事實上，這店又確實係其門如市，食客必須訂位，walk-in散客恕不招待云云，鼻哥都幾大！然而食左幾次之後，唔知係咪因為嘴尖左，基爾與友人一樣感覺它水準似有下滑跡象，下次也不一定再幫襯了，近沙灘那邊也有不少泰國菜、意大利菜餐廳想試試呢！


白切雞 / 炸蠔 / 飯後hea行會所

雖然水準下滑，但整體評分也是合格的，埋單計每人也是百元鬆D，OK啦！飯後其實也不算太夜，於是又四圍hea行下當散散步。行行下又行到芳園書室那邊比較僻靜和黑暗的角落……芳園書室是馬灣舊村的一部份，建於1920年，早前聽聞港府計劃活化這項古蹟。就在這四野無人漆黑一片的角落裏，友人突然發出「嘩！嘩！」聲，抬頭一看才發現頭頂原來驚現燦爛的滿天繁星。真的很久沒有在完全漆黑的夜空看星了，記得上次在雲南麗江看過一次，滿天星的感覺確實很震撼，同時也感慨香港的光污染也實在太嚴重了，即使郊區也難見到頭頂的幾點星光。


沙灘邊的火炬 / 餐廳外的雕花柱飾 / 瑰麗璀璨的青馬大橋夜色

睇完繁星後再走返入人世間！沙灘那邊其實都幾熱鬧，與芳園書室那邊恍如兩個世界。在車站旁邊的大露台上，可以看到宏偉璀璨的青馬大橋夜色，夏天這裏會比較熱和有蚊，秋天來到就比較清涼，夜晚也有唔少住客來乘涼或放狗。沙灘邊的幾間開放式餐廳也有幾份南歐情調，唔怪得都有唔少老外在這裏飲酒傾計啦！


百看不厭的青馬橋夜色

再睇下個價值百萬的青馬橋景先！好多人住珀麗灣都真係因為鍾意左佢咋！事實上，喱度四圍的環境確實又係好有度假feel，中左六合彩頭獎的話都諗得過……哈哈，都係唔好發夢喇，沿住海邊慢慢又迤行返上樓。上左樓之後原來仲有「好戲」在後頭，就友人私房秘製的tiramisu做甜品，正到暈，不論外型同味道都一樣正！基爾當然豪不客氣地又食又拎——拎埋個recipe返屋企，希望有時間自己可以試整下！


私房秘製tiramisu，無論外型和味道都係ichi-ban

 

馬灣輝記飯店
馬灣大街村中211及214號地下