misocool@鯽魚涌

寫完外遊同行山，再次回歸食野篇。喱次食乜好呢？無錯，又係去食拉麵，不過上次去味千畀blog友鬧實在太求其啦~~~~真係唔敢怠慢，搵間似樣少少的去試，就下面喱間啦！

其實都唔係特登去喱間misocool食拉麵，不過剛好喱日約左友人W去太古坊睇展覽（至於去睇乜展覽，先賣個關子留待下篇再講，都係一雞幾味好D，如果唔係邊得黎咁多野寫……），睇完就順道行出去搵食，最近就黎依間，W之前食過話正，就即管去試試。

不得不佩服W「自家編製」的搵食秘笈！其實不嬲都知佢閒來就會四出覓食，不過依家先知原來佢隨身會帶備一本小notebook，上面貼滿報紙雜誌介紹的食店。跟住佢去搵食一定無死。喱間misocool其實W之前已經同另一友人K率先試過，覺得掂就的埋我黎再食多次。翻查OR，misocool原來在中環同埋尖東都有分店，可能好多blog友都已經食過，睇佢個招牌上面寫住ramen（拉麵）同埋bento（便當），應該係佢地招牌菜！唔好講咁多，入去望望先！



入到去坐低後周圍望下環境，同一般日式餐館有D唔同，感覺上似西餐廳多少少，環境都幾闊偌，D台唔會太密。由於剛剛過左lunch hour，所以唔駛等，不過聽W講食晏時段係要等位的。打開menu，上面寫住「潮日新聞」，玩食字都算幾有諗頭！但唔知係咪真係會日日更新D菜式，我諗多數只係綽頭吧！

由於唔太肚餓，兩人都無叫便當，只食拉麵。W揀了豬骨湯底的帶子拉麵（$50），基爾就揀海鮮拉麵（$58），仲要特登揀蕃茄湯底，睇下D功夫得唔得！另外加$12轉set，就加左碟煎餃子，仲有6隻咁多。大家睇到個價錢，都知道其實唔係貴味千D行野好多咋！但味道就好好多，個蕃茄湯底幾濃，絕對唔係水聊聊果隻，賣相亦唔錯，而且都幾大碗，食力一向麻麻的基爾就覺得幾鬼飽，結果幾乎兩個人都食唔晒D餃子。Anyway，可以畀個B+佢，值得推介一下。有機會再去的話，就再試埋佢地個便當先！

 

misocool
鯽魚涌華蘭路2-10號地下