2010年8月24日 星期二

紅館賞女排激戰@紅磡

今年又有機會入場睇一年一度的世界女排大獎賽,其實以前都試過去睇,今年則是坐上山頂,感覺也幾好,可以成個場睇晒,雖然遠係遠D,但仍感受到彭彭聲的震撼力!



周日在都會海逸個food court求求其其食左晏仔之後,中午一點左右就拿拿林入場。雖然頭場只係泰國對德國,戲碼不算太強,卻出奇地精彩,看著矮人一大截的泰妹完全毋懼一眾德國高妹的強攻重扣,個個都奮力地撲救,真係要對她們肅然起敬。打波,其實最重要咪係喱樣野囉!無錯就係「鬥心」,即使明知身高輸人幾班,上到場也要盡全力一拼,果然就有回報,在先失一局下竟然奇蹟地反勝3﹕1,贏得漂亮。



經過約半小時休戰後,上演第二場冠軍戰重頭戲中國對美國,雙方經過約兩小時惡戰,中國以1﹕3受挫,也似乎是意料中事。始終比較喜歡2004年贏得雅典奧運金牌那隊中國女排,鍾意喱隊陣容並非因為佢地拎到金牌咁鬼勢利,而係因為當年陣中有好多實而不華的球員,例如劉亞男、周蘇紅等都是在危急關頭扭轉劣勢的副攻手。要知道中國女排自郎平、姜英之後就一直不是靠重炮食糊的,副攻手的快攻、前掩後二、雙快掩二點五、背飛等多變的戰術,每每能牽制俄羅斯、巴西、古巴等勁敵的防守,也能有效掩護攻力不足的大槌手,替她們製造更多進攻空間。可惜今次來港的中國女排主力球員飽受傷患困擾,副攻手高妹薛明、徐雲麗都是負傷勉強上陣,改任接應二傳的李娟似乎又未能牽制對手,變成重炮王一梅很多時在毫無掩護下勉強重扣,成功率自然打折扣!幸好兩名新兵張磊及陳麗怡表現尚算合格,臨危受命下都打出幾球靚波,不過仍希望惠若琪能趕及在大獎賽總決賽傷癒服出,增加多個進攻籌碼,這才有機會與俄巴古美等勁旅抗衡。

沒有留言:

張貼留言