2010年12月17日 星期五

人棄我取遊世博:15

基爾喱次在上海世博遊園,大部份行的都係被人視為「垃圾館」的小國奀館,臨到接近尾聲當然要去返D「大館」見識下,以免被blog友恥笑太過「渣流攤」!好啦反正要花時間排隊,就揀過最「堅」的「美利堅合眾國館」啦!


美國館的人龍其實比日、韓等人氣國家館也不遑多讓 / 排隊前先同Kobe Bryant合照

之前睇blog友的世博攻略,話美國館的人龍雖然係長,但人流控制極佳,可以疏導得很快,姑且就去睇下。來到美國館前的小廣場,其實早有心理準備又係上演龍的傳人故事了,不過見條龍移動得頗快,於是即管去跟隊。不過排之前先同館前的Kobe Bryant合照先,基爾同喱個1:1的湖人球星紙版人像比身高時,發現原來只係矮佢個零頭位咋喎!


果然排左半粒鐘左右就入到美國館,太喜出望外了 / 操流利國語的「知客」姐姐

排下排下、閘左幾次人龍之後,終於來到美國館入口,睇睇錶只係用左30分鐘左右咋喎,好抵呀!當基爾正式踏上美國館大門口的紅地氈時,真係有點想大聲歡呼喝彩一聲,因為終於入到一間大館喇,都唔算好失威吧!展館門口有一位操流利國語的American beauty姐姐站在膠椅上招呼入館的遊人。據她自我介紹,原來佢係北京大學的留學生,唔怪得國語咁勁,最勁仲係要懂得用京片子口音,令基爾都真係拜服得五體投地。


第2部份的電影廳放映美國首都華盛頓的風景片段,當中插入希拉莉和奧巴馬的致辭

美國館大致分為4個小展廳,前3個分別是看電影的小型劇院,最後1個是紀念品店。入到第1個前廳後,主要聽知客姐姐對美國館的簡介,還有看一段在紐約Central Park拍攝的雜錦片段,內容主要是訪問公園裏美國人對上海世博的睇法,仲有叫佢地用唔鹹唔淡的國語講句「美國館歡迎你」之類的門面歡迎辭!而第2個展廳主要是放映奧巴馬和希拉莉致辭的小影院。


第4部份的紀念品店 / 第3部份的迷你影院

美國果然係電影王國,因為全館基本上都係由迷你劇院組成,在館內成村人咁睇完一場戲,之後又移師去另一院再睇戲,感覺上好似在IFC或APM的2、3、4院穿梭往來一樣。若要鬧佢地完全係「渣流灘」無料到的話,似乎又唔可以,因為部分影片確係拍得幾有心思,當然少不免要搵希拉莉同奧巴馬現身sell下大美國主義和價值觀。但總括而言以美國作為世界超級大國、有強大財力物力(雖則話經過金融風暴)支持,就咁樣齋睇幾齣戲就算數的話,似乎又真係有點hea!不過值得一讚的是第3齣戲講述小女孩同鄰居同心協力修建花園的一幕,感覺上拍得幾warm幾touching,加上又有4D影院特技效果(有大風吹和落微微雨粉的感覺),算係叫做見識過「大館」的presentation吧!


美國館外的小舞台有奀星rap歌 / 第4間展廳有個可以扮主持紐約開市扑槌仔的小露台

睇完3齣「小電影」之後,去到美國館最後一個展覽廳,那裏除了是一間迷你Wal-Mart之外,仲畀基爾發現到一個紐約聯交所主持開市儀式的小露台布景。可能大部份同胞都唔知喱個露台仔有咩來歷,所以竟然無人問津,大部份人走晒去shopping。基爾當然如獲至寶咁一個箭步衝上露台,拎住槌仔扮主持開市影返張相先啦!基爾影完後唔少同胞才知喱個露台仔係好野,先識爭住上黎影相,好彩嘖!


美國館對面是同樣人氣十足的巴西館 / 很有印第安風情的秘魯館

睇完美國館之後,再去對面巴西館望望,噢!太多人了,只好放棄。隔籬見到可以自出自入的秘魯館,諗都唔駛諗立即就轉移目標走過去。秘魯館主要用竹竿和泥土建成,核心設計則是一個用金屬材料製成、佔地25平方米的古代印加平頂金字塔,還有不少介紹印加古文明和現今秘魯人城市生活的圖片展出。


印加古城遺址模型 / 西班牙統治時期的歐式瓷器 / 館內的小食店 / 紀念華裔移民160年的展板

與中美洲的伯利茲、危地馬拉等小國館以瑪雅古文明作生招牌一樣,秘魯也有其撒手?「印加帝國古文明」,館內除了搬來迷你版的印加金字塔之外,還有古城遺址以及其他珍貴出土文物展出,非常值得一看。此外,原來不少華人早在19世紀清代中葉已飄洋過海遠赴秘魯搵食,牆上展出的老照片又是一幕幕「華工血淚史」。


阿根廷館頂部恍如極光般璀璨奪目的天幕以及介紹該國風土人情的LED展板

行行下見阿根廷館無乜人,又貢入去睇睇!入到去發現竟有點去了美術館的感覺,展板和展品都不太多,地方非常空曠開闊,可能是要專登營造這種空間感,也是阿根廷人期望的城市生活要素吧!比較特別是中央的一撻大空地,頂上面是一個瑰麗的仿極光天幕,很有動感!


館內還展出不少銀器飾物,莫非阿根廷是以出產銀器稱著的?

除左天幕之外,阿根廷館仲展出唔少手工精巧的銀器飾物,唔知係咪佢地的「國母」貝隆夫人有戴過的呢?單睇手工設計就很有懷舊首飾的味道。另外,館內還有不少LED展板,介紹阿根廷近200年來在多元文化融合和城市建設的成就。



走出阿根廷館後,正式為世博「美洲之旅」畫上句號。拿拿林再走到隔籬的非洲區掃館,想知道萬眾期待的世博遊「最終章」到底仲咩精彩野睇?就不要錯過下回的「終極非洲之旅」了!

沒有留言:

張貼留言