2012年6月12日 星期二

俄羅斯謎旅程廿五

莫斯科原來有座「地下皇宮」?


上回講到基爾行完救世主大教堂之後,由於時間尚早就繼續四圍閒逛一陣,發現莫斯科的大街其實仲保留了不少架空電纜,遠望就如一個大蜘蛛網,主要是為古老的有軌電車和無軌電動巴士提供電力。上圖左過馬路時,又發現了一座「蘇聯遺物」,行埋去睇下先!



初初基爾仲以為這個一臉鬍鬚的大銅像係馬克斯,雕像基座其實有他的名字,但因為係俄文所以看不懂,到事隔5年後今時今日寫網誌之際,上網翻查「фридрих энгельс」到底係乜水時,才發現佢原來係另一位共產主義鼻祖﹕恩格斯(Friedrich Engels)。



逛完大街之後又行入小巷行陣,路邊除左有個電話亭畀超人變身之外,仲有個唔知係咪兌換店的廣告牌。除左接受美金、歐元和英鎊外,遲下唔知會唔會加埋人民幣上去呢?行行下又留意到街邊貼左張George Michael的海報,斷估都係來莫斯科開演唱會吧!



行咁耐其實唔係因為無聊,而係想搵個地鐵站入口!無錯,今篇「主菜」講的所謂「地下皇宮」,就係聞名已久的莫斯科地鐵站。正如倫敦、巴黎、北京等首都一樣,莫斯科地鐵最初挖掘建造也是基於軍事考慮。蘇聯於1935年開通的首條地鐵線只有13個站,時至今日莫斯科已有9條地鐵線,多達150個站。基爾當然無時間去晒全部咁多啦!只選了幾個較出名的去參觀,包括上面喱個Кропоткинская(克魯普特金站 Kropotkinskaya)。



站裏面其實都幾似普通的行人隧道,仲有「Emergency Call」同「Information」的按扭(仲有英文架),不過答話的人識唔識英文就不得而知了!基爾平時咁乖,當然唔會去亂按D掣來試啦!



行行下仲見到ATM機,又係全俄文,都係唔好去搞佢了。跟住人潮方向繼續行、左穿右插下終於落到去月台,一支支巨柱組成的拱廊在燈光效果下又幾似教堂喎,感覺幾古雅!



光潔的大理石柱和四周的大理石磚牆令整個月台更見光猛,而且通風良好,不覺有污糟野或塗鴉,比較其他歐美國家的地鐵站來說算是非常企理了,仲有長木凳畀候車乘客坐,這種長木凳令這個月台驟眼睇更覺似教堂。



無幾耐有架地鐵駛入月台,車廂其實都幾古董feel,似大埔火車博物館見過果種,綠色的車廂外殼非常「軍look」。莫斯科地鐵站雖然出名靚,但同大部份歐洲城市一樣,地鐵列車都係無冷氣的,幸而車廂裏尚算闊偌,仲可以開窗,不過比較嘈!



火速去到另一站轉車,格局同樣好有60年代感覺,而且乘客也甚多。不說不知,原來莫斯科地鐵的載客量位居全球第二(第一唔知係邊個城市),每日運載量達700萬人次,差不多等如全香港的人口。



其中一條非常長的自動扶手電梯,感覺上比太古站那條還至少長一倍,都幾好玩,好似去拍《地心探險記》咁!



跟住去到Парк Культуры(文化公園站 Park Kul'tury),喱個站都是以大理石雕柱廊和浮雕壁畫著名。寫blog時翻查資料,才知2010年莫斯科發生連串地鐵炸彈恐襲事件,這個文化公園站也是受襲的地鐵站之一。



再去下一站Киевская(基輔站 Kievskaya),這個站比之前見到的更富麗堂皇,鑲滿巴洛克金黃色雕花的圓拱廊加上大型吊燈裝飾,真係好有phantom feel。



地鐵月台邊也有很多鑲嵌畫和浮雕,霎下眼真係會以為是去了參觀歌劇院或皇宮,直至地鐵駛入月台的聲音響起才醒覺正是置身地鐵站中。



除了有宮廷氣派之外,站裏還留下了不少蘇聯時期的文物,包括這幅蘇維埃風味十足的馬賽克列寧畫像。



由於這個基輔站實在太華麗了,所以除了有當地平常的乘客穿梭來往之外,唔少旅行團都會拉隊來參觀,直情當了是逛皇宮、博物院一樣的熱門景點,令站裏經常逼滿中外遊客。



再close up睇下拱壁上的油畫,部份都好有共產色彩,即使現時到中國大陸旅行,也不常見這些共產味濃的掛畫,或許北韓、越南、古巴還會有吧!

沒有留言:

張貼留言