2012年9月15日 星期六

俄羅斯謎旅程廿八

行行下公園都可以有機會同俄仔踢返場友誼波?


由大花圃再往前走就見到一個直長形的大水池,這個大水池其實就是整個國民經濟成就展覽館園區的中心,與花圃、黃金噴泉、主展館及正門的「凱旋門」形成縱軸線,設計很有宮廷氣派,更難得係喱個大噴泉終於有開啦!



連天線低低B都來參觀?相信都係同遊客影相賺錢的吧!事實上喱個公園都幾多當地市民一家大細來遊逛,並非只是純粹的「遊客區」。



影相影到悶,不如同D俄仔踢下波。今時今日俄羅斯的足球水平在歐洲諸強中不算很高,還是昔日的蘇聯夠威,太遠的不講,依稀有點記憶的1988年歐洲國家盃(西德主辦),蘇聯大軍的機動部隊踢法加上穩健鋼門戴沙夫令他們一路殺入決賽,最後僅不敵有「三劍俠」古烈治、雲巴士頓和列卡特壓陣的荷蘭兵團屈居亞軍……



蘇聯威水史除左足球之外,當然仲有航天科技,園內展出了多架50-70年代建造的老爺民航機,雖然係老爺了一點,但都仲睇得下的,至少基爾就未試過可以行到飛機翼底咁近距離參觀!



除左老爺飛機之外,仲有老爺火箭。50-60年代蘇聯的太空科技發展與美國叮噹馬頭領導全球,這種火箭就經常運載人造衛星或宇航員上太空。



火箭的底部原來有好幾個推進引擎裝置,抬頭往上望時,真的會覺得自己變得很渺小。



火箭四周圍仲有幾座展覽館,不過由於之前行過主展館都無甚睇頭,所以都係慳返D時間唔入去睇了,還是在外面影下相為佳。



公園四周其實還有一些小攤檔,有售賣雪糕飲品的,也有玩掟公仔的遊戲,喱個俄國靚仔見無乜生意,索性蹺埋腳睇下書好過!



基爾行行下仲間唔中會見到有保安人員和警察巡邏,幸好這裏地方大,不算太擠逼,即使扒手都無咁易落手吧!



行到咁上下,基本上已行晒花園區了,再慢慢沿路行返出去主展館。正當準備離開之際,赫然見到有對情侶攬埋一舊上演一幕「情不自禁」喎!基爾終於知道點解以前會叫情侶做「油炸鬼」了,兩人扭埋一齊時遠睇都真係幾似的……



再睇下路邊燈杆上的掛鐘,嘩乜竟然已經過左中午12點了,本來諗住行過去睇摩天輪,最終都打消了念頭,因為睇落就好似好近,實際上一來一回可能要成半個鐘的呢!



臨走時再穿過「凱旋門」,就要同喱個褪色的「蘇聯遺物」展覽園講bye bye。行左成個上晝個肚都打晒鼓,拿拿林去醫肚先得!

沒有留言:

張貼留言