2014年4月16日 星期三

2Q13秋見信州@猿飛峽

「林中風景同上次來時一樣,草的清香,鳥的叫聲,小溪的低吟,樹木間吹來的風,一晃一晃搖曳的葉影。頭頂流移的雲看上去十分之近……」



來到櫸平站時其實已過了3:00pm,而由櫸平返回宇奈月的尾班小火車就大約5:30pm左右開出,在短短兩個鐘內要遊遍櫸平幾處景點確是一大考驗。上圖是車站外的地圖,仔細study過立即就要起行。



車站裏都有幾間賣紀念品和小食的店舖,不過由於起程前在宇奈月時已經食飽飯,無謂再花時間食野了。由於車站建在山腰上,一出站外就見到壯麗的黑部峽谷和黑部川。



一場來到當然要先在峽谷上影張到此一遊吧!聽說櫸平這一帶山區有很多馬騮棲息,不過喱日來到就唔多見有馬騮出沒,至少無城門水塘咁周山都係,唯有影下欄杆上的馬騮木雕當係見過啦!



比較可惜係櫸平的景點比較分散,時間有限的情況下只有無奈取捨先去「主菜」猿飛峽,若還有剩餘時間才再走走另一邊的奧鐘橋和人食岩。



其實由車站往猿飛峽也不遠,才不過800米左右,加上沿途的峽谷風景實在太靚,周不時要停下來駐足影相,一來一回足足行了成個幾鐘頭。



沿陡峭山坡開鑿出來的迂迴棧道往北走,一路行一路都聽到淙淙流水聲,因為山下就是湍急的黑部川。這條河流的上游水源,就是來自之前去過的黑部水庫和立山連峰。



黑部川全長86公里,雖然不是日本最長河流,不過流經的黑部峽谷則是全日本最Deep V的溪谷。至於猿飛峽則是黑部川上最狹窄的流域,也是櫸平最著名的自然景點。



上圖右可以回望剛才走過在山坡開鑿出來的隱閉棧道,感覺上有點似之前去台灣太魯閣時走過的燕子口棧道,不過太魯閣的棧道一般都比較大,部份甚至可以行車;而櫸平黑部川這一段就非常狹窄,基本上僅夠一人通過,如果遇上「對頭人」就一定要側側身才過到。



沿河而走可見到山谷中被河水長年沖刷而形成的奇岩怪石,與太魯閣相比真的有六七分相似。如果要比較這兩處名勝,基爾覺得太魯閣的峽谷更壯麗更有氣勢,每條步道幾乎都要走個多小時以上;至於黑部峽谷就較「精緻」,短短800米路程已見到琳瑯滿目的大自然峽谷景觀。



穿過棧道走了大半個鐘,終於來到呈U形迴轉的猿飛峽。傳說在這個黑部川最窄的峽彎,不少馬騮從一邊的崖坡上抓住樹籐,借力一盪就可以飛過去對岸,這也是猿飛峽名稱的由來。



基爾無馬騮仔咁好身手當然唔敢立亂試,不過目測兩邊呈近90度的峭崖至少有逾10米距離,要扮「空中飛人」的話真係要先經專人訓練才行。



深秋時份日落得特別快,在猿飛狹稍稍停留後立即就要動身回程了。黃昏時份由於櫸平深山裏的照明不多,為免摸黑前行所以不宜久留,事實上大部份人都早已返回車站準備搭尾班車離開,如果來不及就要被迫留落櫸平過夜,在這情況下為安全計唯有放棄行另一邊的奧鐘橋了。



幸好回程的小火車是選了有車窗的廂座,雖然票價稍貴但都值得,因為一來入夜後峽谷裏真的伸手不見五指,基本上什麼風景也看不到;二來夜晚的山風更勁更冷,如果坐開放式車卡一定凍到變雪條!由於回程沒有停留景點拍照,小火車很快又回到了宇奈月,拿拿林返去下榻的延對寺莊(¥14810)嘆個溫泉浴驅下寒先!



旅館的職員打點得非常周到,在信濃大町火車站寄來的大篋一早已進駐了這幾偌大的榻榻米大房內。雖然這裏要成萬幾円一晚(包早晚餐),但這間房又真係幾豪,除了睡覺的六疊榻榻米外,出面還有個擺了桌椅的露台,拉開窗簾外面就是荒山峽谷,下面有黑部川流過,私隱度極高,即使明星來到也不怕被狗仔隊偷影。



房間另一邊沒有影的還有個「一開三」的御手洗,洗臉間、淋浴間和馬桶都分在三處獨立房間裏,完全唔駛驚朝早起來爭廁所用。不過由於有溫泉浸,當然無必要用淋浴間了。說時遲那時快,穿好和服袍立即趁晚飯前的空檔時間先去浸溫泉吧!溫泉池也相當大,約三分二屬室內池,穿過落地大玻璃敞門就可以走出去外面的露天溫泉。由於這邊同樣是面向無敵峽谷景,即使一絲不掛都唔驚春光乍泄!



雖然個溫泉幾靚不過都唔浸得太耐以免頭暈,浸完後返房擺低野就去開大餐了。晚餐共有12道菜,由於見沒有飯,初頭驚唔夠飽就要了碗飯。



每碟雖然都只係細細碟,不過食落原來都幾飽!上圖是其中一味「地魚四種盛」。



另外例牌還有幾種炸物、窩物之類,由於宇奈月位處的富山縣近日本海,也有幾種海鮮刺身。上圖是烤牛肉吧!



食飽之後本來想出外面的小街走走,不過竟然下起雨來,唯有返房抖下。在房裏其實都無咩好做,除了睇電視就只有重溫返日頭影的相片,delete咁D無謂相,之後再睇下旅館提供的觀光地圖,為明早的宇奈月半日遊計劃好路線。

57 則留言:

  1. 唔多見有馬騮出沒: 我見有隻著藍衫,戴黑超喎.

    回覆刪除
    回覆
    1. 王子:我都覺日本啲藍馬騮特別ok! XXXXXD

      刪除
    2. 王子:咁Wien果啲馬騮又興唔興?!XXXXD

      刪除
    3. 藍馬騮好鍾意雙手插袋,有咩野o係袋裡面呢?kaka..

      刪除
    4. JJ:雪條都袋得落袋?!!!

      刪除
  2. 有車窗的小火車,都唔覺得細啦!好似大過上一篇個駕小火車咁!

    回覆刪除
    回覆
    1. JJ:咁佢始終係觀光火車,車窗一定唔會太細嘅~~~~

      刪除
    2. 講架火車呀!唔係隻窗大細呀!

      刪除
    3. JJ:唔係喎~~~喱架細好多呢

      刪除
    4. 日頭架火車每行坐兩個人咋喎!

      刪除
    5. JJ:錯覺啫,我見啲日本人可以坐5個人一行呢,好親密^^

      刪除
    6. JJ:邊度呢,角度問題XXD

      刪除
  3. 這個行程好似好自在,很relax,夏天可能會多D人。

    回覆刪除
    回覆
    1. Samwei:對,夏天好多時都book唔到小火車飛的,要預早好多book!

      刪除
  4. delete咁D無謂相……
    反而呢啲相最好睇, 最多蝦碌嘢…哈哈
    影張到此一遊的相, 台灣人興叫「打卡」相…我諗Gael兄一去旅行都會影幾多相, 而家有數碼相機真係方便好多, 以前菲林相機去完旅行返來晒先睇到…

    回覆刪除
    回覆
    1. 森:咁呀~~~~咁我下次試下摷下仲有冇啲delete剩的無謂相,到時你咪鬧我無聊kakakakaka~~~
      但我好多時忘了打卡,掛住用眼睇,或者幫人影自己無影!
      以前用菲林機時代最多都係三四卷,依家數碼大約都只是around一千張左右,太多其實都無乜心機睇返,靚相兩三張已夠啦係咪^^

      刪除
  5. 日本啲馬騮識得浸温泉架!!

    回覆刪除
    回覆
    1. Wan:識!不過喱度唔見有,可能畀啲遊人嚇走晒 XXXD

      刪除
  6. 這裡環境感覺很舒服!

    回覆刪除
    回覆
    1. 奇:我覺得唔錯,很值得一來,如果預全日時間更佳,可以行多幾處峽谷

      刪除
  7. 「明星來到也不怕被狗仔隊偷影」––––咁就啱嗮基兄你呢啲巨星啦!

    溫泉我實在不太好,上次在阿根廷Patagonia浸 spa 都搞到頭痛!

    回覆刪除
    回覆
    1. Desa:所以要帶定黑超kakakakakakaka~~~XXXD
      會,因為通常會令血液循環加快,所以如果見暈或心跳就要快啲上水

      刪除
  8. 回覆
    1. Bugs:日本一年四季都啱去嘅^^

      刪除
    2. Bugs:你點會係因為錢的問題XXXD
      不過因為你有太多其他更想去的外國地方吧
      日本在你的list中肯定不會擺得太前^^

      刪除
  9. 舊地重遊,零舍懷念呢~
    兩小時要盡玩,咁啱我係關島都遇到⋯ 難得去到唔想等第二日又再去過呀!

    回覆刪除
    回覆
    1. Silver:都係架,因為有啲地方真係未必會再去,可能錯過咗就無機會了^^

      刪除
  10. 日本住溫泉酒店真係好正!!!

    回覆刪除
    回覆
    1. King:如果好似你咁自駕仲正,可以去到好多「秘湯」

      刪除
  11. 嘩...得兩個鐘時間點夠,隨意行下影下相兩個鐘一下就過><
    馬騮真係可遇不可求,峨眉山又話有好多馬騮但我一隻都見唔到!
    酒店晚餐好精緻,雖然我唔食海鮮,但見到都覺得吸引:D

    回覆刪除
    回覆
    1. Matthew:絕對係呀,實在唔太夠時間,所以我成日都好佩服你架,可以去到好多地方呢^^
      有時可能真係因為太多遊人,令馬騮都唔敢出來,可能真係要等遊人散去,到傍晚時份或者清晨先會見到馬騮出現!
      話時話,可能外國人來到城門水塘金山郊野公園,會覺得好壯觀呢,周時都可以見到馬騮列隊歡迎遊人XXXD
      係咪因為驚敏感所以唔敢食海鮮?
      喱度富山縣可能由於都近日本海,所以比較多海產

      刪除
  12. 晚餐有12道菜...都幾豐富喎!^^

    回覆刪除
    回覆
    1. Ka:其實每樣都好細細碟細細碟咁,都OK嘅:P

      刪除
  13. 猿飛峽~河流風景特別靚,水清見底.
    如果可以游水就一流啦!

    回覆刪除
    回覆
    1. Andy:果度游水我諗未必得,一來水流幾急有危險,二來係雪山水我諗會幾凍,要穿潛水衣保暖!
      btw,我諗露營反而幾啱你地^^

      刪除
  14. Gael,猿飛峽自然風景相當美,真的很豪華的酒店.

    回覆刪除
    回覆
    1. Andrew:喱間個門面其實唔算好豪架咋,而且有點舊^^

      刪除
  15. 真係美景!!!咁你叫左碗飯食唔食得晒呀?

    回覆刪除
    回覆
    1. Lucamom:我自己果碗就好夾硬咁食晒,因為唔想浪費了食物,而且日本米本身都幾好食嘅!
      對呀,其實日本的溫泉旅館都幾啱一家大小去玩下,帶住大小豆都唔怕太奔波勞累,而且又多野買!以前住庫頁島時你地一定成日過去玩啦^^

      刪除
  16. 謝謝分享! 好一個日本通啊!

    回覆刪除
    回覆
    1. Candy:才去過兩三次,不算「通」啦! :P

      刪除
  17. 旅館很清雅好舒服仲有私家溫泉 , 食物賣相都好靚 , 你真係好識歎喎 .

    回覆刪除
    回覆
    1. AK:就係唔識歎先啱~~~XXD
      一年去得果一次半次,有時仲無得去添㗎

      刪除
  18. 溫泉加美食........好嘆呀!

    回覆刪除
  19. 日本郊區, 就是予人好乾淨好悠閒的感覺.

    回覆刪除
    回覆
    1. 魚:通常啲郊遊徑都修築得幾靚,有時我仲覺得整得太靚hahahaha
      反而我比較愛行花蓮的太魯閣,比較接近自然^^

      刪除