2014年5月6日 星期二

2Q13秋見信州@東山動植物園

「第二天也一如往常,緩慢地、沒有接縫地過去了。一天與另一天之間的區別幾乎只表現在天氣上,假如天氣相差無幾,對日期的感覺勢必很快消失,昨天與今天、今天與明天將無從分辨,時間將如失錨的船舶彷徨在無邊無際的大海……」



話咁快就來到旅程的最後一站名古屋,無論如何都要好好利用這1.5天的千金一刻吧!在名古屋住的是近榮區的Best Western Hotel(CX Package HKD$4120已包的兩晚酒店),距離名古屋中央車站也不過兩個地鐵站而已,交通算是方便,最緊要係喱區百貨公司林立,友人最就腳出動掃貨。



至於酒店本身沒太大特別,普通的商務式酒店,對基爾而言附近勝在多食店,這朝大清早起來出去吃早餐也不愁選擇,隔籬街不遠就有喱間Cafe de Crie,相比起那些蚊型逼死人食肆,這間算是超寬敞優閒咖啡店了!



最重要係這間咖啡店價錢一點不貴,基爾order的早餐包含了厚多士蕃茄腸仔、一小杯沙律和咖啡(¥390)份量雖不算大,但比起星巴或太平洋之類的咖啡店算是相宜之選(甚至比日本的麥記還要平),唔怪得見唔少這區返工的OL也來買早餐,結果基爾在名古屋兩朝的早餐也來這裏搞掂!



話明係一刻值千金,食飽後立即要起程出發。若與東京比較,名古屋的地鐵線就簡單得多,基爾基本上只搭了東山線和名城線,既唔會蕩失路又方便直接,車廂和月台也乾淨兼指示清晰,唔曉日文齋睇漢字都ok!



如果唯一要鬧的可能就係車費較貴,以基爾為例,這朝早由榮站搭東山線去到東山公園,只係短短7個車站而已,中途不用轉車轉線,但票價已經要成¥260,真係人都癲(港鐵搭7個站也不用廿幾蚊吧)!依家諗返都係索性買1 day pass抵D,搭三四程已回本。



Anyway,做遊客都唔計較得咁多,開開心心玩完先至返來努力搵錢吧!10:00am左右來到東山公園站後按指示經3番出口,再由街頭行到街尾已見到今日行程第一站的東山動植物園。



由於還是上午時段,入場人數不太多,買了飛之後(¥640包動物園+植物園及天空塔門票)就摩打腳入場了!門票上是東山公園的吉祥物,成個梨咁幾搞笑。



買入場門票當然還有附送公園地圖,單看地圖如果連動物園和植物園兩邊一齊計的話,似乎就比前年去的東京上野動物園大;但若單論動物園而言,應是上野的規模大一點,動物的種類也多些。



唔講咁多先去睇犀牛,唔講唔知原來犀牛真係大隻得驚人,喱隻身上好似披了型仔盔甲的亞洲品種犀牛足足有成架mini cooper咁大,基爾如果騎上去唔知會有咩感覺呢?



犀牛圍欄外還有幾個年輕人正聚精會神對住大犀牛做泥塑,應是當地美術學院的學生吧!基爾行埋去八卦下果然造得好精細好用心,像真度極高,連頭上的一對小耳朵也雕得彷彿有動起來的感覺,很有專業水準絕非玩玩下之作。



來公園的除了學寫生和泥塑的年輕人外,還有個個戴上了可愛小黃帽的幼稚園小朋友(立即令基爾想起了蠟筆小新),在吉永老師的指揮下,紛紛在大象雕塑前一字排開影班相,活脫就是卡通片的真人版,多搞笑!



除了大笨象之外還有小笨象,聽說這隻小笨象年前誕生時已成為東山動物園的超級明星,很多人專程來看牠;象園旁邊則有袋鼠園,全部都hea臥在朝早和暖的陽光下曬日光浴,幾識歎世界!



上圖右是來自澳洲的巨鳥鴯鶓,原來牠是鴕鳥之外地球現存最大型的鳥類,站起來比基爾還要高;除了睇動物外還有幾間賣動物園紀念品的小店,不少免當然要去看看長頸鹿公仔啦!



這日真的可謂天公造美,藍天白雲天色非常靚,就先上去公園裏的天空塔參觀,反正門票已包了入場券。天空塔就建在一個高80米的小山丘上,上山前在山腳下又見到另一種非洲犀牛,牠沒有厚厚的盔甲,頭上還長了兩隻角,但圓潤的身軀依然健碩。



同樣在塔下附近棲息的還有非洲巨龜,咁早已經開餐吃大堆青草午餐了?!

62 則留言:

  1. 盔甲犀牛(印度犀牛)好似係05年同一隻?真係似老咗好多。

    回覆刪除
    回覆
    1. Koosan:我諗應該係,一般犀牛係咪都有幾十年命?人工飼養應該更長壽吧

      刪除
  2. 袋鼠我成日都見,曾幾何時office外面經常有一家大小響草地曬太陽。Emu 反而好少見。

    回覆刪除
    回覆
    1. Desa:咁咪幾正~~!同大自然渾然為一^^
      Emu我諗係幾怕醜的動物, 似我kakakakaka

      刪除
  3. 回覆
    1. King:上面有blog友話佢比幾年前瘦咗,可能正在keep fit
      XXXD

      刪除
  4. 所以其實香港搭車真係好抵,D人仲成日鬧,佢地應多點見多D呢個世界!

    回覆刪除
    回覆
    1. Silver:日本其實搭公共交通工具和自駕其實都差唔多價錢

      刪除
  5. 我去旅行通常買 day pass, 慢慢搭,又搭錯都唔怕。其實廿幾蚊都唔貴,倫敦搭一個站都要啦。

    回覆刪除
    回覆
    1. Samwei:你講得啱呀,買daypass出錯站都唔驚^^
      不過以香港的生活水平來說都幾貴,所以我要貯定多啲錢先敢來倫敦XXXD

      刪除
  6. 結果兩朝早餐也來這裏搞掂>> 似乎係OL o既魔力

    回覆刪除
    回覆
    1. 王子:你係咪不自覺間講出咗自己心底話XXXXXXD

      刪除
    2. 佢邊有你咁揀飲擇食呀!你就剩係齋睇斯文OL送早餐架喇!

      刪除
    3. JJ:咁睇來你都幾了解佢喎XXXXXXXXXD

      刪除
    4. 咁你仲了解佢喇!我係咕咕下啫,你就笑得咁肯定!

      刪除
    5. JJ:完全唔覺你係估估下,反而更似心有靈犀XXXD

      刪除
    6. 你唔駛撐開隻船喇!明明講緊你食早餐要視覺享受o架!你唔認仲要拉老友落水,做埋作故佬添!蝦~

      刪除
    7. JJ:個餐其實好普通,無乜視覺享受咋喎XXXD

      刪除
    8. 睇完OL喇仲話人普通,無視覺享受添!你吖!

      刪除
    9. JJ:我講緊個餐有乜野食咋喎,你以為咩?!!@@

      刪除
  7. 你食早餐呢間cafe好過我揀嗰間好多!

    回覆刪除
    回覆
    1. Momomom:你果間其實幾有懷舊味,很有點70-80年代日劇feel^^

      刪除
  8. 你講的動物園,有少少似香港海浪公園,除左睇動物仲有很多毛公仔賣…

    回覆刪除
    回覆
    1. 森:其實我都有好多年無去海浪公園XXXXD唔係好知依家係點!!!

      刪除
  9. < 披了型仔盔甲的亞洲品種犀牛 > 好特別又好得意呀 ! 睇相我仲以為係假的 .

    回覆刪除
    回覆
    1. ak:係真㗎^^而且比我想像中的犀牛大隻好多,我成日形住係同新界的黃牛差不多XXXD

      刪除
  10. 名古屋.... 好想去嘅地方,個動物園都好多動物看噢

    回覆刪除
    回覆
    1. MD:聽說星洲的動物園也很值得一遊,將來希望有機會去睇下^^

      刪除
  11. 我們反而沒有去動物園,只係去左豐田館和Luca媽指定要去出血的Noritake

    回覆刪除
    回覆
    1. Lucamom:看來你都係鍾情於餐具廚具多啲喎^^
      咁拜疆國又有冇動物園可以帶大小豆去行下架呢?

      刪除
  12. 買隻長頸鹿公仔送俾伯友呀?

    回覆刪除
    回覆
    1. JJ:吓~~~乜依家興送公仔畀阿媽架咩?!!

      刪除
    2. 你鄉下興嘛!呵呵!

      刪除
    3. JJ:真係聞所未聞見所未見喎~~~~

      刪除
  13. 連續兩日都响同一地方食早餐,好難相信同OL無關!
    巨龜有幾大?係咪郁得好慢?

    回覆刪除
    回覆
    1. BIM:XXXXD完全係錯唔引導!!!!!XXXD
      我諗大約有一架BB學行車咁大,咁佢又唔係好郁咋喎,因為正在食草

      刪除
    2. 咪咁大反應Gael仔,我係話難得你跟OL一樣精打細算,你諗多咗啦XXXD

      刪除
    3. BIM:icic~~~~好彩你補充返!XXXXD

      刪除
  14. 回覆
    1. Wan:連埋植物園那邊都幾大架,可惜唔夠時間行埋過去

      刪除
  15. 我係BKK就騎過大象,感覺幾過引~好玩.

    回覆刪除
    回覆
    1. Andy:咁隻象其實臭唔臭XXD
      我剩係試過騎駱駝:p

      刪除
  16. 都餵過長頸鹿食嘢!佢地食嘢個樣幾可愛!:)

    回覆刪除
    回覆
    1. Ka:佢條脷好鬼長,會捲住啲樹葉食,過癮^^

      刪除
  17. 回覆
    1. Insky:我都想行埋植物園果邊架,奈何時間唔夠><

      刪除
  18. 回覆
    1. Mandu:Really~~~~咁最鍾意睇咩動物?

      刪除
  19. Gael,隻犀牛真係好似披了型仔盔甲.

    回覆刪除
  20. 第一句已經好有feel,去旅行好多時都會忘記日期時間,唔知幾多號﹑唔知星期幾,迷失係時間之中,只係知幾時要返屋企 >.<
    望住長頸鹿公仔,第一個感覺係好似香蕉蛋糕@@

    回覆刪除
    回覆
    1. Matthew:係呀去旅行真係好多時都快樂不知時日過,但最重要係記住回程機票時間XXD
      日本真係有喱類甜品㗎喎

      刪除
    2. 回程機票一定會記得,會數住仲有幾多日玩 >.<
      我食過一個香蕉蛋糕無論顏色﹑花紋﹑形狀都同長頸鹿公仔好似,而且仲好好食 :D

      刪除
    3. Matthew:如果玩到連回程機都忘記搭就大鑊了!!!!!
      係呀之前睇其他blog友的網誌,印象中都有見喎呢

      刪除
  21. 我 d 朋友去名古屋日日都去 shopping,基爾居然仲有時間去行動物園?

    回覆刪除
    回覆
    1. Joice:我就係無錢去shopping嘛,如果我有錢一樣會去shop架XXXD

      刪除
  22. 嘩 ! 動物真係大遷徒左 ~~~ XP

    回覆刪除
    回覆
    1. 魚:你飛過去東非睇真正的「野性大自然」肯定精彩萬倍^0^

      刪除