2014年11月7日 星期五

山系迆遊:上@南丫島

翻查「大典」才知原來基爾上一次去南丫島已經是5年前的事,就以這小島作為今個行山季度開季的目的地吧!



由於驚旺角塞人塞車,還是搭火車出發穩妥一點,來到尖東舊Sogo地底商場依然圍滿圍板,咁多舖位唔出租真係幾浪費喎!唔知係咪等新世界重建完先再開返呢?



之後行返出碼頭搭天星過海,可能真係好耐無出尖沙嘴,望過對面海發現Big Wheel已經砌好晒,唔知幾時正式開張呢?



在中環碼頭上岸後,反正仲未夠鐘索性行過去睇摩天輪,近睇真係幾巨型幾靚,不過聽聞坐一次要成百蚊都幾貴……另外旁邊仲有新開的海事博物館,不過基爾咁耐都無入過去,反而之前在赤柱美利樓的舊館就行過一次。



今日無時間入博物館,唯有另擇吉日再來吧!無耐集齊人馬後,便搭天虹專船入南丫島。不過原來這專船會再停靠尖沙嘴碼頭才開往南丫島,早知唔駛搭天星去中環咁蠢啦!上圖是途中遇到有十幾層樓咁高的處女星號,基爾大鄉里也未去搭過呢!



搭這種細船去南丫島原來都要成45分鐘才到,上岸後行去隔籬這檔海鮮酒家,由於時間尚早無乜其他顧客,可以任揀位坐。友人自動波發辦點菜,上圖是其中兩味:白灼蝦和咕嚕肉。



此外還有豉椒炒蜆和上面喱味很正的蒜蓉粉絲蒸扇貝,炒蜆睇落見殼唔見肉,扇貝最正係上面鋪滿香噴噴蒜蓉加上有粉絲索汁非常野味,是整餐飯的亮點!



至於這味鹽焗蟹似乎遠遜上次的屯門三聖村興記,蟹糕蟹肉不多且得個咸字無乜鮮味可言。最後埋單計人均要成300蚊,雖則話包埋船費但未免太貴唔抵食了,始終是賺遊客生意吧!



食完個貴氣海鮮餐後,友人仲話要去隔籬間cafe shop歎陣啡咖賞下漁村海濱靚景先願出發,真有點懷疑今次來南丫島究竟是行山定係hea飲hea食架呢?

56 則留言:

  1. 搭天虹專船係咪一定要去天虹食架?

    回覆刪除
    回覆
    1. 王子:都唔一定,可以側側膊走咗去都得嘅我諗XXD

      刪除
  2. 蟹糕蟹肉不多且得個咸字無乜鮮味可言...........
    通常啲蝦蟹唔新鮮先會狂落鹽醃佢, 避免腥味走出來~~~

    回覆刪除
    回覆
    1. 森:所以應該唔會再去食啦~~~~遊客價對我來說太貴了一點XXD

      刪除
  3. 回覆
    1. wan:條行山徑短短地都幾好行嘅,有空咪入去走一轉囉^^

      刪除
  4. 扇貝蒜蓉加上有粉絲索汁非常野味,真係吸引!
    現在的情況更要往郊外遊了!

    回覆刪除
    回覆
    1. stella:係呀蒜蓉好香,粉絲吸晒香味好正呢!!
      秋冬天天氣涼好適合郊遊^^

      刪除
  5. 南丫島, 我最鐘意都係食豆腐花

    回覆刪除
    回覆
    1. ahmo:不過周末周日去就超多人,最好都係閒日先去食囉:P

      刪除
  6. 也有兩年多沒有到過南丫島

    回覆刪除
  7. 都少少貴.....不過讚好味就值得
    屯門三聖村未試過

    回覆刪除
    回覆
    1. yan:可以試下其他果啲,都唔一定食喱間(雖然有免費船搭:P)
      三聖村雖然遠但也不錯的

      刪除
  8. 除了愉景灣,我都未去過香港的離島,不過都已經是廿幾年前的事了。

    回覆刪除
    回覆
    1. samwei:咁下次同老dad回來不妨抽空去逛逛長洲坪洲果啲,有野食又有地方行下,唔錯的

      刪除
  9. 那最後究竟有無行山呢?

    回覆刪除
  10. 咁基爾有冇一路行一路發蘆鬚呢?XXXD

    回覆刪除
  11. 食飽個肚就行山都有力D。如果夏天時就通會去啤一啤先。

    回覆刪除
  12. 順德基太郎,食神上身。

    回覆刪除
  13. 我都很久未去過南丫島了!

    回覆刪除
  14. 民以食為天嘛 , 行山第日再去行過喇 , 哈哈 !

    回覆刪除
    回覆
    1. ak:咁又唔得~~~!!!唔可以齋食唔行嘅XXD

      刪除
  15. 南丫道我都好耐冇去啦!

    回覆刪除
    回覆
    1. aiinsky:可以行下山又無長洲都多人咁逼,唔錯架^^

      刪除
  16. 我好耐好耐無去過南丫島,
    行下山都唔錯,食海鮮免喇,
    好貴:-(
    尖沙咀Sogo已重新開番,喺喜來登酒店下面,喺舊日70年代伊勢丹原址,
    我諗新世界酒店個位起好豪宅後,再開番商場!

    回覆刪除
    回覆
    1. 路霸:條行山線短,秋冬天去hea下唔錯的
      對,我都覺貴了一點,始終係遊客生意吧
      係呀之前搭巴士行過見到佢有個大招牌,第時出去行下睇下有咩唔同
      咁似唔似伊勢丹XXD
      一定啦,果個位好貴同埋可以連埋好多地下商場一齊搞旺佢

      刪除
  17. I like Lamma especially walking from soko bay to yung shu wan.

    回覆刪除
    回覆
    1. ray:係呀,條山路完全唔辛苦,同埋個view都幾靚架,仲有冰鎮菠蘿賣^^

      刪除
  18. 我都又數年沒去過南丫島,不知變得如何。

    回覆刪除
  19. 以前我鐘意南丫島,依家鐘意長洲多啲

    回覆刪除
    回覆
    1. LiJ:南丫地方大啲,長洲就熱鬧啲,旺過旺角XXD

      刪除
  20. 南丫島我自己好懶去,次次入去都係為咗帶毛毛去行吓^^

    回覆刪除
    回覆
    1. momomom:果度都幾多狗狗朋友,佢去到一定好開心^^

      刪除
  21. 最唔like炒蜆得d殼。
    尖沙咀Sogo在喜來登酒店附近開咗喇。

    回覆刪除
    回覆
    1. rity:係呀無乜肉食有點搵笨>.<
      之前行過見佢楝咗個大招牌了!!

      刪除
  22. 去南丫島食海鮮,正喎!
    食飽飽唔去行下南丫島,風景唔錯架.

    回覆刪除
    回覆
    1. andy:同埋依家天氣涼涼地,去行下都幾舒服嘅

      刪除
  23. 好似係見到行山照既~~~~不過算啦~~~我上次都係飲飲食食~~

    回覆刪除
    回覆
    1. tiffany:有行架,不過分開下集先出之嘛XXD

      刪除
    2. 0我~~~~~~誤會了你添~~~~
      咁我等睇下集先~~~~

      刪除
    3. tiffany:hahaha....我喱D懶人通常都係一開二甚至一開三咁寫,習慣咗要短話長說嘛XXD

      刪除
  24. 我間唔中都會入南丫島 hea 下, 但未食過海鮮喎~

    回覆刪除
    回覆
    1. 魚:我都唔提議入去食海鮮,唔係咁抵食,雖然個view係幾靚嘅

      刪除
  25. Big Wheel 會是個熱點;)開張了,你去了,記得開文章分享...

    回覆刪除
    回覆
    1. SSLife:一個人去呀?!!@@
      好礙眼架喎kakakaka

      刪除