2015年8月28日 星期五

2014古都瀟瀟@清流紅葉

京都的二条城咁大,仲有好多地方未行完。上回講到基爾由本丸御殿穿過西橋和內堀(遇到兩個韓妹還幫她們影相),返出去外圍的清流園繼續走走……



清流園比二之丸庭園還要大,除了有和樂庵、香雲亭等幾座小建築外,也種了不少櫻花樹(光禿禿的櫻花樹雖然不及盛放時的絢麗,但也別具冬日的蕭瑟味道)、紅葉樹和其他林木,儼如一個小樹林。



行得累了也可以在清流園外的小食亭稍休。日本人當然不會容許在古城內開設麥記或星巴克,雅緻的休憩小食亭與四周的古城非常融為一體,完全唔會有格格不入的感覺。



抖完後再行一陣清流園,除了賞花觀樹看池塘之外,這個花園還以奇石出名,例如上圖的「加茂七石」就是著名的枯山水造景。據統計清流園裏有奇石千多顆,大多都是由日本各地蒐集回來。



可能由於賞紅葉的旺季已過,園裏的遊人不多,樹上的紅葉黃葉也所剩無幾,如果想來二条城賞紅葉的話,相信11月中至12月初會是最佳時間。



既然冇紅葉影,咁唯有影下清流園旁邊的內堀靚景吧!二条城的內堀其實都好寬闊,古時如果有外敵入侵,軍隊要越過這條內護城河進攻本丸,相信都唔係一件輕易的事,分分鐘可以穩守一頭半個月都未定。



行行下竟然又畀基爾搵到幾棵遲來的紅葉喎,係咪算有運行呢(好心有好報,以後要幫人影多D相),仲唔飛身過去影返夠本!雖然唔算多只有碩果僅存的幾棵小樹,不過都好過無啦,影出來也不失禮吧!



之前提到清流園入面有幾間清幽的「林中小屋」,包括上圖右這間細細的香雲亭,不過唔知點解要預約先可以入去參觀,唔知入面係咪收藏D乜野珍寶咁巴閉呢?



走出清流園後,基爾幾乎已繞了整個二条城一圈,終於又返回二之丸。由於之前skip了二之丸御殿入面未參觀,畀得大拿拿¥600入場當然唔好浪費。在二之丸御殿前還有段小插曲,話說基爾在影著名的唐門時,由於下午這裏正好背光了好難影得靚,正苦惱之際,幸得上圖左那位光頭澳洲哥哥指教,找到另一最佳拍攝位置,才成功影到這座金碧輝煌的唐門。



話明係幕府征夷大將軍的府邸,採唐破風式建築設計的唐門每處都金光閃閃,華麗程度絕不會比之前看過東西本願寺的唐門遜色,而且比起剛才參觀過的「天皇故宮」桂宮明顯贏幾個馬位。



據聞昔日幕府時代,二条城比隔籬街的天皇御苑更似真正的皇宮,二条城的御殿和唐門上都有象徵德川幕府家族的三葉葵徽號,擺放的位置比象徵天皇的菊花徽號還要高;後來明治天皇重掌軍政大權,第一時間就將三葉葵擺返在菊花徽號之下……



有相為證,上圖的二之丸御殿大門係咪比桂宮宏偉得多,總面積逾3300平方呎(800多張榻榻米大)的二之丸御殿是名副其實的超級豪宅。整幢御殿由遠侍廳、式台廳、大廳、蘇鐵廳、黑書院及白書院共6棟木建築連接而成,由東南伸延至西北呈梯次斜形,是日本現存最具代表性的桃山風格武家書院式建築,進入御殿門口要先在貯物櫃寄存波鞋,因為殿內全是以300多年歷史的木地板鋪砌,所有遊客都要赤腳走在冷冰冰的木地板上。可惜殿內嚴禁攝影,想一睹殿裏著名的古代將軍大名狩獵壁畫,就要親身去看看了。

59 則留言:

  1. 我很喜歡光禿禿的樹,枝椏另有一番美態!

    回覆刪除
  2. 背光自己走位啦,乜要人教㗎。都唔知係咪借啲二想同人嗲。

    回覆刪除
    回覆
    1. 王子:咁佢都係見找影得狼狽想提點下我啫~~~~~唔好諗錯隔籬:P

      刪除
    2. Mo:王子我諗平日都好多亞裔非裔同佢搭訕嘅XXD

      刪除
  3. 張張相都靚喎
    人家出名有品味, 當然唔會有兜巴星+麥當當啦

    回覆刪除
    回覆
    1. 多謝你,我用手機求其影咋,都無帶相機,因為懶:P
      對呀,如果有真係奇聞了~~~!!

      刪除
  4. 基太郎發夢都背歷史,影子會瘦d嘅,當減肥成功喇。kaka..

    回覆刪除
    回覆
    1. 咁你下次影多D陰囉XXXD

      刪除
    2. 你影自己相擺床下底,影子相供網友睇。
      我影風土人情而忘我嘅,影相留多d quota o係旅行經歷。

      刪除
    3. 我又唔会咁自戀喎拎自己D相來墊床瞓XXD
      最初有點眼花以為你話鍾意忘我地影土人:P

      刪除
  5. 最後果張御殿相,影得好靚,可以影哂成座建築物。

    回覆刪除
    回覆
    1. 我都有影全景添架,遲D試下擺上招牌啦^^

      刪除
  6. 又韓妹又澳洲哥哥,有好多靘遇BOR :D

    回覆刪除
    回覆
    1. 吓咁都算?!@@你咪仲多.......去旅行間中都有同人搭訕嘅,係常事,不用諗太多啦kakakaka....

      刪除
  7. 回覆
    1. 我都覺得喱度算係幾靚幾宏偉,雖然個天守閣係拆咗,但其他建築物都好有歷史價值好值得畀600円入去參觀!!!!

      刪除
  8. 大陸有D古蹟內真係有麥當勞及星巴克

    回覆刪除
    回覆
    1. 之前聽過故宮話有,我好多年前去果陣就無.....

      刪除
  9. "行行下竟然又畀基爾搵到幾棵遲來的紅葉喎,係咪算有運行呢"“
    ....呢啲對Gael來說....算唔算是"小確幸”呢?:P
    二之丸御殿大門真喺幾宏偉喎!

    回覆刪除
    回覆
    1. 都唔小架啦,對我來說係大了XXD
      比皇帝住果間更大呢

      刪除
  10. 每處都金光閃閃,很貴氣!
    所有遊客都要赤腳走在冷冰冰的木地板上,無所謂,保護文化要緊。

    回覆刪除
    回覆
    1. 真係好金碧輝煌有錢人豪宅feel!!!
      不過隻腳会凍到痺痺地,如果著厚襪去会好D^^

      刪除
  11. 幫兩個韓妹影完相有無傾返兩句呀基爾,哈哈~
    有時旅途上無意中遇上(如紅葉),比計劃好遇上更有驚喜呢!

    回覆刪除
    回覆
    1. 睇怕就係無傾返兩句後悔囉!記低件事喇。放張影子相就係宅左喇。kaka...

      刪除
    2. 都有嘅,禮貌上的應對而已~~~~~
      Exactly!!Just like the mapleXXXD

      刪除
  12. Gael兄真係魅力非凡, 去去吓日本都可以遇到韓妹...她們有否要求你擺V字手勢一同合照呢?!!
    咁當地這些大宅, 現在用途只是供遊人參觀?!!!

    回覆刪除
    回覆
    1. 咁又無喎,V字咁老土XXXD
      依家部分改做展覽館,又或者做咗D公園職員的辦事處之類

      刪除
    2. 就係越老土先要旅行做, 在香港唔敢做...XXXXXD
      話時話,今次京都之行,好似冇乜Gael兄真身的型格pose相喎?!!

      刪除
    3. 乜原來森兄有好多嘢係外地先敢做㗎咩?!!!!舉多幾個例子來聽下先啦wakakakakaka.....
      有呀之前咪有出過囉,睇到厭:P
      反而我期待見森兄食月餅的新icon公仔,真身型格pose更佳XXXXD

      刪除
    4. 老土嘢都不外乎,講價,乜都影一餐,踎街邊食嘢扮有風味,V字手勢影相…XXXD旅遊就統統做齊,香港就唔會做嘞!
      出過仲睇到厭?!!...真係唔覺有咁多喎~~老人家真係走晒寶!!XXXXD
      依家仲邊有閒情畫新icon!間歇性出到blog已經萬幸…

      刪除
    5. 咁食街邊嘢同乜都影一餐間中都會嘅wakakaka....
      直情走寶啦XXD
      咁你一得閒就畫定多D自畫像同自拍囉^^

      刪除
  13. 在古城內唔開麥記和星巴克,要100個讚!

    回覆刪除
  14. 呢度好靚呀!!!!!
    而且d紅葉超美呢~~~~~~~

    回覆刪除
    回覆
    1. 但其實只係落剩幾棵樹仔架咋:P

      刪除
    2. 但係d紅葉你真係影得好靚~影到好似有多咁~

      刪除
    3. 好close-up咁影咪似係好多咁囉^^

      刪除
  15. < 金碧輝煌的唐門 > 建築物配上藍色為主很沉實美麗 .

    回覆刪除
    回覆
    1. 係呀好多日本的王親貴族富戶又或者大型的寺院都有唐門的建築設計...

      刪除
  16. 回覆
    1. Good afternoon~~~~放假無出去行下咩?

      刪除
  17. 看日本這些古蹟庭園,真的很悠閒!

    回覆刪除
  18. 京都都有好多好有特色o既Starbucks,而且融入周圍環境(例如鴨川邊個間會起返個納涼床),不過絕對唔會畀佢搞D古蹟囉~

    回覆刪除
    回覆
    1. 咁我又冇留意SB啲咖啡店喎,可能我唔係「中產」好少幫襯SB...:P
      不過如果正如你所講在鴨川旁擺設「納涼床」又好似幾正,下次去要去睇下先得^^

      刪除
    2. 我都未去過 :p 不過聞說夏天去鴨川又想搵間有納涼床o既店坐下,SB係比較平o既選擇~

      刪除
    3. 剛剛上網search過啲相,鴨川邊啲納涼床又真係幾正架喎^^

      刪除
  19. Gael,二之丸御殿大門真係好宏偉.

    回覆刪除
    回覆
    1. 當時日本的幕府將軍係實際的「皇帝」,屋企自然係有咁豪得咁豪啦^^

      刪除