2016年1月22日 星期五

冬日絮語:買物遊誌

聖誕新年檔期除了宅住睇書聽CD之外,間中也有出去巡一巡又順道買少少減價野……



應該唔少人都有買過喱隻日版的丁丁麵,感覺上好似比普通港版好食D,以往通常只見新城市比較大型的CS或者西田日超有售,價錢也比港版貴得多;喜訊是某次行數字屋竟也有售,仲要係六折日去買(圍起只貴港版幾蚊咋),關鍵係要認住包裝上喱個靚仔版!



好多人都覺得今年唔見左個冬天(1月都竟然有黃雨),天氣濕立基本上毋須再搽咩lotion上面,間中返北風就靠上面喱支搞掂。再次證明平野未必無好,之前試過較貴的品牌,感覺都偏立黐不太適合香港氣候;至於喱隻moist lotion初頭都驚太水稀稀,搽落又唔算喎,滋潤度適中!難得搵到隻終於適合自己皮膚質地,搽完會繼續幫襯佢,等數字屋六折再入貨。



除了數字屋外,其實吉之島個超市間中都有筍野執,例如上面喱盒Swiss Miss的dark chocolate熱飲就相當抵買,折後只售$19.9,盒內共有8包,若似基爾口味唔想飲太甜的話,一包其實足夠分兩杯沖,作為早餐配蛋糕麵包腸蛋以至加入麥皮煮都是不錯的配搭。順帶一提最初被誤導了以為係瑞士出品,睇真包裝才知是美國貨。



之前睇blog友話綠茶粉加煉奶搽麵包好食,基爾都想試下,咁行過吉超又見有喱隻喎!價錢不貴只售$30幾就試下啦……結果試過就咁灑在搽了煉奶的麵包上,食味偏淡;反而用熱水沖開會較有綠茶味,下次再做實驗試下先用熱水沖開再加煉奶搽,效果唔知會唔會好一點?!



基爾向來患有交換禮物焦慮症(可能係小學時的童年陰影),有時見到瓷杯又或者相架之類的「聖誕精品」會有點兒頭痛,所以盡量避免參與這類活動。話雖如此但大時大節又總會收到一些心意和祝福,今年喱個有點搞笑,令基爾想起細個時套在Game Boy上的那個放大鏡,原理如出一轍。



看blog友的網誌不時會發現一些好去處,例如新城市平台花園喱個Glassy Avenue璃光大道基爾都有去睇,覺得喱個鬱金香花海都整得幾靚……



除了睇花海之外,其他幻彩玻璃裝飾都幾唔錯,即使日間穿過這條玻璃長廊花園都覺得好色彩繽紛充滿大自然氣息。另外現場還有玻璃工藝師即席表演製作藝術品,可惜當日基爾去到正值lunch hour所以無表演睇。



提議如果選擇傍晚時份去參觀,就可以一次過睇晒玻璃花的日夜靚景,夜晚會配合埋燈光效果,相信會增添不少浪漫感覺吧!

68 則留言:

  1. 現在嘅丁丁面真係冇以前咁好食囉。

    回覆刪除
    回覆
    1. 可能依家出多咗好多唔同味,分散咗啲注意力啦:P

      刪除
  2. 水貨丁丁麵,早前已有個親戚去數字屋數貨了

    回覆刪除
    回覆
    1. 唔錯喎,數字屋平好多,可知其他果啲日貨超市食水幾深XXD

      刪除
  3. 璃光大道完左喇基仔,衣家冇得睇先至出blog..吓。

    回覆刪除
    回覆
    1. 費事同你撞期丫嘛,特登遲啲㗎我XXXXXD

      刪除
    2. 由12月8日至1月22日成個幾月呀,你話會撞期?

      刪除
    3. 會㗎,之前好多人去影,見幾個blog友都post

      刪除
    4. 咁不如約埋一齊去啦~

      刪除
  4. 玻璃長廊花園好靚,好別緻

    回覆刪除
    回覆
    1. 都幾特別,夜晚亮燈之後仲靚呢.....

      刪除
  5. 之前返港原本都想去埋璃光大道,可惜時間唔够用~ 唯有睇過當去佐...

    回覆刪除
    回覆
    1. 你梗係啦咁忙咁多飯局kakakakaka......下次留耐啲丫嘛

      刪除
    2. 留耐d係唔係請我食飯先?LOL

      刪除
  6. 我經常有幫趁吉之島個超市,有時九折和特價抵買之餘,我覺得佢哋收錢送貨的服務員都有禮貌。

    回覆刪除
    回覆
    1. 係呀如果有減價貨都抵買嘅
      原來仲有送貨,咁都幾好喎

      刪除
  7. 日版丁丁麵我覺得係好食啲㗎。

    回覆刪除
    回覆
    1. 我覺得麵質同調味好似都好少少,唔知係咪心理作用.....:P

      刪除
  8. 回覆
    1. 係呀,好多都熟口熟面,綠茶kitkat以前無依家都有啦

      刪除
  9. 最記得日版清仔出左隻聰明麵, 話食左聽明d, 我覺得最聰明係清仔囉, 咁都諗到 XD

    回覆刪除
    回覆
    1. 係咩?!@@
      我又唔知有聰明麵咁盞鬼咁有商業頭腦喎XXXXD

      刪除
  10. 日版的丁丁麵在數字屋出售只貴港版幾蚊,正~~~~~
    綠茶粉加煉奶搽麵包,要試下!

    回覆刪除
    回覆
    1. 不過佢好快賣晒而且無貨了.....
      我覺得我喱隻係似for真正沖茶多啲,我試過用來沖茶和煲麥皮,綠茶味會香濃啲,用來搽面包可能無熱水沖過,茶味無咁突出嘅

      刪除
    2. 沖綠茶都 ok,不過我家附近的數字屋沒有。

      刪除
    3. 第時如果路經啲日式超市不妨留意下囉^^

      刪除
    4. 都會架!要試下嗎!哈哈哈

      刪除
  11. 玻璃花海見網友的相之中, 你算影最靚喎!

    Swiss Miss 數字屋, 今日見 16.6! 真眼突 ...

    回覆刪除
    回覆
    1. 多謝你,其實我都只係用傻瓜電話影,當日連相機都無帶去:P
      係呀後來我都見數字屋有得賣,不過無dark chocolate這款,只有棉花糖那款,不過$16.6仲有七折真係平到你唔信XXXD

      刪除
  12. 丁丁面絕對係集體回憶,細個幾乎日日食!

    回覆刪除
    回覆
    1. 嘩~~~~日日食丁丁麵好富貴好離地喎XXXXD

      刪除
  13. 我都試過日版的丁丁麵,麵係好食啲,但湯底唔夠濃味!

    回覆刪除
    回覆
    1. 咁我又唔知喎,可能平時食港版我都未必落晒成包味料吧!

      刪除
  14. 一丁日男貌似某港星––––名字諗極都記唔起,總之同胡杏兒行過個位。

    回覆刪除
    回覆
    1. 黃宗澤?
      你講開又有少少似喎......

      刪除
  15. 個靚仔版係咪一丁仔的大個版呢?!!
    現在少搽呢類lotion...多數搽天然油類~~

    回覆刪除
    回覆
    1. 有可能係kakakakakaka.......
      搽椰子油?

      刪除
    2. 唔單止是椰子油,仲有其他天然油可以用架!!
      佢地主要賣點,在於完全零化學添加~~

      刪除
    3. 至少可以吸收少啲防腐劑XXD

      刪除
  16. 我覺得哥隻一丁齋望樣就覺得比平時既一丁好味....唔知點解~
    其實數字屋賣d野又幾多元化喎~~~~

    回覆刪除
    回覆
    1. 因為有個靚仔做生招牌吸引到你?kakakaka...
      非常多元化,仲賣埋玩具和麵

      刪除
    2. 都唔算係既~~~佢係咪smap哥個香取?
      你有無睇過草彅剛扮杯緣子個短片?!?!?!?
      笑到我個屋都震哂~~~
      下..咁數字屋要好大間先得喎~~~

      刪除
    3. 咁又唔知喎,似咩?
      有,好搞笑XXXD,其實都扮得幾似....
      下次你去日本如果見到不妨買個
      依家佢開好多唔同類型㗎,好分散未必集中在一間

      刪除
  17. 數字屋真係好好買,綠茶粉加煉奶都好想試,應該會好味
    玻璃花影得好靚,不過太凍未想去

    回覆刪除
    回覆
    1. 不妨一試呀^^
      上面有blog友話完咗lu,唔知係咪準備轉新年裝飾呢?

      刪除
  18. 見到個一丁都流晒口水,不過太貴食唔起>.<
    (都係清仔靚仔啲)

    回覆刪除
    回覆
    1. 咪玩啦matthew哥,你成日周遊列國又闖蕩神州,一包丁丁麵又點會食唔起kakakakakaka......
      印象中喱隻日版22-23蚊左右有5包,圍起不過4個幾而已,普通港版都要3蚊至3個幾啦

      刪除
    2. 我會等特價27蚊10包先買架~
      有錢都留返去旅行啦,嘻嘻~

      刪除
    3. 果然係好知慳識儉喎你^^
      都啱㗎,最緊要係應洗得洗囉

      刪除
  19. 一丁一丁一丁 <3 , 午餐肉同蛋,哈哈哈!

    回覆刪除
  20. 甚少吃即食麪,要吃一定選丁丁。
    數字屋,貨品價錢好吸引。

    回覆刪除
    回覆
    1. 阿摩飲食習慣一定好健康,其實即食面都易肥嘅
      六折果陣又真係好抵,通常見到條人龍就知XXXD

      刪除
  21. 呢隻丁丁麵我未食過 , 等數字屋大減價我都買嚟試試 , 謝謝好介紹 .
    花海原來已結束 , 怪不得我昨晚搵唔到喇 .

    回覆刪除
    回覆
    1. 喱排好似唔見佢有入貨,你知數字屋果啲貨源好唔穩定嘅XXD
      聽上面blog友講話完咗啦,可能準備擺農曆新年裝飾啦

      刪除
  22. 本來你的話題我搭唔到咀, 但講起以前丁丁麵價, 我89 年開始儲錢來澳洲讀書真係食咗好多丁丁面,好似7 毫子至一元二角.

    回覆刪除
    回覆
    1. 記得下次搭唔到咀都post個\(^0^)/等我知你來過丫嘛XXD
      89年即係廿幾三十年前@@~~~貨價原來加咗3-4倍呢!!!!
      果陣食咁多丁丁面,咁最後有冇增磅呢?

      刪除
  23. 荷葉和TULIP好靚, 我上次回港, 去到時無開呀.

    回覆刪除
    回覆
    1. 依家好似都完咗啦,應該是換了新年裝飾吧....

      刪除
  24. 始終都係鍾意茶包多過茶粉……(^_-)

    回覆刪除
  25. 回覆
    1. 係呀,聖誕果個月丫嘛,好多人去影喎,你有冇去?

      刪除