2018年8月2日 星期四

跟住雷神過大海@何東圖書館

仲夏8月伊始,這個過大海網誌系列迆下迆下又終於寫到來「最終回」了!每次寫旅程的終章總有一份莫名的興奮感(就好似完成了一項龐大工程一樣),唔知有冇人會有同感呢?



上一回講到償了心願吃了豆腐花之後,飽飽的基爾繼續沿住果欄街四圍行多陣,路邊又見到這間梳打埠懷舊店,「梳打埠」這個店名本身已很有古典味,裏面又有好多陳年舊物睇,有些鐵皮玩具還似曾相識……



無聊間又閒蕩返去大馬路近議事亭果邊,本來都係諗住食埋dinner先搭夜船走,不過之前又食粥又食麵又食豆腐花都還未落晒格,5點幾鐘又半能亢咁好多食肆仲未正式有晚市,本來想食埋營地大街果間鳳城珠記水餃都因為尚飽而作罷了,就留返下次來才食吧!



咁飽又仲有咁多時間咁無聊,又有乜野好做呢?一於又行上去崗頂兜個圈先算!以前上到去崗頂總會見到劇院、教堂和上圖這幢古式古香的何東圖書館,但很多時都遇不到開門時間,只能在門外看看影張相打下卡就走,今次見佢竟然有開喎,咁一定要入去行下啦!



原來這幢建於1894年的豪華大宅仲保留了一個充滿南歐風情的小亭園,以圖書館來說算是很特別的設施,至少香港的圖書館應不會設有優雅的後花園畀人睇書吧!入面其實仲有分成新翼及舊翼大樓,沿玻璃樓梯走往新翼果陣頗有點穿越古今的奇幻感覺……



行完一輪圖書館吸收了唔少書卷氣息之後(其實係想去嘆陣冷氣),咁又沿斜巷行返落去營地大街果邊的食肆,見開始有少少餓意,唔駛揀就行入去食北京水餃!上圖店內一副「客似雲來」的招牌字畫下面好似有一行藍色字仔,係寫乜野呢?



行近D睇真,原來係記錄了舊年颱風天鴿吹襲澳門時的水浸水位高度,真係好勁喎!之後快快趣去叫野食先,叫了3樣包括有狗不理包子、韭菜水餃和白菜水餃,夾埋豬骨老火例湯埋單計都係一舊水有找,算唔算貴唔知,但因為太耐無食過北方餃子包點,感覺都算幾好食。



三爬兩撥食飽,又飛快趕返出去大馬路搭巴士出碼頭了,因乜事突然間又咁趕急呢?其實原本係買了9點幾的船飛可以慢慢hea返港,不過見7點半仲有班船返尖沙嘴,即管早點出碼頭博一博看看有冇位,可能閒日關係果然仲有位,咁就索性坐早一班船返歸啦!回程船上可能仲有少少雷神強勁的風尾威勢,隻船堅大浪堅拋,幸好基爾向來不太怕(只係最怕聽到人地嘔吐聲和搽藥油味),仲覺得好好玩好似玩海盜船那種離心力,堅爽!



北京水餃
澳門新馬路新填巷5號A

49 則留言:

  1. 回覆
    1. 大夫快啲煲返啲驅寒湯水啦

      刪除
  2. 你地用心寫,介紹咁詳細當然要花點時間啦。 我係讀者,會睇得好開心架。

    回覆刪除
    回覆
    1. 多謝你先,難得你唔嫌棄口水多過茶XXXD

      刪除
  3. 7點半差唔多啦,唔駛搞到咁夜.

    回覆刪除
    回覆
    1. 留返啲下次再去探索下囉^^

      刪除
  4. 去澳門好多次,都唔知有間何東圖書館,否則一定入去睇下!

    回覆刪除
    回覆
    1. 在崗頂,由議事亭一路行上山仔就見到,應不太難找^^

      刪除
  5. 「每次寫旅程的終章總有一份莫名的興奮感(就好似完成了一項龐大工程一樣),唔知有冇人會有同感呢? 」
    有呀!我擔心博友唔明我寫乜!?
    所所初寫網誌,個網名都叫「自言自語」!
    我唔知道有何東圖書館,但澳門郵政博物館就值得一遊,我當年還自製造個人肖像郵票。

    回覆刪除
    回覆
    1. wakakakaka....都唔會嘅,又唔係寫文言文,寫廣東話一睇就明晒^^
      覺得有些旅程值得寫下來,就寫在blog裏吧,都幾方便自己可以睇返...
      原來有得自製郵票咁有趣,係咪議事亭隔籬果間郵政總局入面?

      刪除
    2. OIC~~~~~即刻上網check過原來是在近水塘那邊!!!
      自製郵票原來是這樣,又幾過癮^^

      刪除
  6. 好似完成一項大工程…當然有呢種感覺,有時去了一處景點,影了一炸相,又要分類,又要分先後,跟住又要分幾篇博寫…好似一份工作咁…哈哈

    回覆刪除
    回覆
    1. gael兄本身都飽,仲食到餃子肉包等…真係好有食力喎!不過青年人消化力係強啲……^^

      刪除
    2. 都係㗎.....其實都幾多嘢做幾麻煩的,不過當作係給自己的旅行紀念品其實也不錯吧!以前無寫blog可能會寫在明信片寄給自己,又或者寫在照片背面囉^^
      咪講笑啦森兄,仲青咩年人丫,兜個圈話我為食吧XXXXD

      刪除
  7. 我有啲失落嘅感覺囉,好像告別澳門咁

    回覆刪除
  8. 我覺得寫唔難,整理相片好嘥時間,你行程寫得好詳細,多謝分享!

    回覆刪除
    回覆
    1. 係呀其實寫同整理相都好嘥時間㗎...:P
      花時間寫詳細少少,咪將來有多一點點回憶囉^^

      刪除
  9. 你都去左好多地方呀, 多謝你介紹, 等肥人有時間都去行下先~

    回覆刪除
    回覆
    1. 我相信你會發掘到更多好去處和美食呢^^

      刪除
  10. 老火湯好似係南方野, 餃子係北方, 原來可以溝得埋

    回覆刪除
    回覆
    1. 喱啲係咪叫做南北fusion cuisine....XXD

      刪除
  11. 拜拜~下次再黎過澳門玩~~~
    連北京水餃你都食埋~真係好勁..
    我以前細成日食~~~~我係食炸的~

    回覆刪除
    回覆
    1. wakakaka....希望唔駛又等十幾年啦:P
      係呀,以前都有來這間老店,唔知個老細有冇轉到?
      炸果隻都有印象喎,不過今次冇食呢

      刪除
    2. 你對上一次有咁耐咩?!?!?
      應該無卦~不過大個左好耐無食過~
      以前佢係鏡湖醫院哥頭~

      刪除
    3. 我諗至少應有十年了!!
      Oic.....原來之前仲有間舊舖!

      刪除
  12. 寫遊記,確實是大工程。我有些開了頭,懶懶的,就鋪塵了。
    佩服你的用心,謝謝每次誠意的分享。

    回覆刪除
    回覆
    1. 以前都習慣會用記事簿寫少少記錄,有時自己睇返都幾有趣,依家改了形式才公諸同好吧!
      其實平時返工返學都忙,難得休息日又想抖下hea下所以寫blog的人也不多,旅行也多玩過就算了,但回憶永在心中^^
      阿摩咁熟咪客氣XXD

      刪除
  13. 旅行時,行程中包括去圖書館,你給了我一個意想不到的驚喜^_^

    回覆刪除
    回覆
    1. 係呀去外地都想去逛逛博物館圖書館之類,歐洲有唔少同書館都好靚好有歷史好值得去逛逛,似霍格華茲果隻咁^^

      刪除
    2. 圖書館外觀古式古式,內裏就好現代化的感覺!
      係唔係由代建築改造而成呢?同何東有關係的建築?

      刪除
    3. 舊大樓果邊都係幾古典,值得入去參觀一下^^
      係呀同何東有關,何東爵士於1918年購入用作別墅,其後人將別墅捐贈與澳門政府,並捐贈25,000港元購置中文圖書,建立一所收藏中文書籍的公共圖書館......

      刪除
  14. 何東圖書館條樓梯好有型
    準備下個工程未?哈哈....繼續寫

    回覆刪除
    回覆
    1. 果邊係新翼,覺得好hi-tech科幻啲,同舊翼果邊有好大差別,像時光交錯接疊咁^^
      準備晒啦!!!又畀你估中,不過唔係新工程,你記唔記得我仲有兩處大工程都未竣工,有待完成呢XXXD

      刪除
  15. 寫遊記,就係要寫出重點和加些個人感受就已經好好,咁先至可以吸引人嘛!
    其實最後一章可能會有兩種感覺,一就是終於寫完了,像如釋重負。另一就是好似還有很多要寫,依依不捨!

    回覆刪除
    回覆
    1. 同意啊!!我會選擇寫埋啲有趣小節,因為驚日後時間耐了會唔記得,自己睇返可能會心微笑都未定,這也是樂趣所在吧!
      係會有少少完成手頭大project的滿足感!!!至於依依不捨就很少,因為跟住仲陸續有來,仲有其他行程要排住隊慢慢寫返,所以無乜時間依依不捨囉wakakakaka...

      刪除
  16. 基哥寫遊記真係生動有趣!當寫到最終回,正如恕少所說:“像如釋重負。” 有些像完成一單大工程似的。 花時間整理照片,花時間寫文字,足夠使人消耗不少的時日。
    幸而我的遊記不多,必須要記下的都不能一氣呵成。前兩年去澳門作一日遊,小型掃碼相機竟然冇電,可謂烏龍百出。都是做讀者容易。

    回覆刪除
    回覆
    1. 多謝你,盡量寫得輕鬆有趣啲,因為行程本身未必人人覺得有趣XXD
      對,都要花一點時間,但寫遊記都值得,因為可作日後自己重溫吧!
      其實近年去旅行我都減少了影相,用心去看去體會更珍貴,有時只掛住影相會錯失了其他更重要的東西^^

      刪除
  17. 作者已經移除這則留言。

    回覆刪除
    回覆
    1. 寫完如釋重負(我次次都有種無佐半條人命)嘅感覺,我深有體會,懂你!

      刪除
    2. wakakaka.....應該唔會喎,你經歷過環台之後應該會更有毅力去克服任何困難,寫blog喱啲嘢只係濕濕碎easy job啫!!!^0^

      刪除
    3. 環島九日,卻拖佐成年來完成就知有幾攞命 LOL

      刪除
    4. 行程精彩!值得花点時間去記下美好回憶^^

      刪除
  18. 好久沒有到訪貴 Blog 了 ^^

    回覆刪除
    回覆
    1. WOW.....Long time no see^^
      你好忙!仲有冇去秘撈?一定賺唔少XXD

      刪除