雨中為港足吶喊@小西灣

繼上周末貪得意殺入西九海濱長廊睇東亞運的「開幕大典」後，日前又突然有同事話有東亞運足球賽事飛，基爾當然立即累飯應啦！拎左飛放工就立即以9秒9高速閃去小西灣球場睇波。

其實基爾非特別鍾意睇足球，這次來小西灣睇香港Vs中國，也非抱住睇乜野大戰的心態，老實說也不過是「海軍鬥水兵」吧了！醉翁之意不在酒的基爾只想感受一下東亞運的比賽氣氛，也總算見識過香港辦國際大型運動會的場面，反正不用花錢買飛，所以即使落雨也要來，當然仲要現場直擊畀各位blog友仔睇睇啦！

來到球場時好彩雨稍停了，在南灣半島的小巴總站落車，穿過商場就來到球場。這裏對基爾來說也蠻熟悉的，因為舊公司就在附近，以前也留低唔少腳毛在這裏。拎住飛入場時原來也頗多人啊！真感到有點意外，唔係話東亞運的賽事場面好冷冷清清架咩？！相對於一般本地波周時都係演「神功戲」咁，今次喱場波都算係人氣勁！至於入場前還要排隊搜袋，算是聊勝於無的所謂「安檢」吧！



昔日由於工作關係，基爾有時都有機會「拉衫尾」到大球場、紅館、新伊館或維園網球場睇波，不過來小西灣球場還是首次，感覺上個球場都幾靚幾大。不過由於有跑道，觀眾席距離草地就稍嫌遠左少少，不過都算OK！唉~~~反正唔駛錢，都係唔應該再彈三彈四喇！

雖然見張飛係有劃分乜乜區，不過入到場基本上無乜人會理，都係自由坐，基爾就霸左個「底線位」，因為方便睇入波丫嘛！坐低無幾耐香港及中國隊就齊齊進場，然後仲有升旗唱國歌添，氣氛都唔錯架！同睇電視係唔同D~~



開波之後，雨勢由最初的毛毛雨到後來的綿密細雨，某程度上都影響了球員的發揮，大部分時間雙方都是在中場附近混戰，絕少埋門鏡頭。如果在家睇直播的話，老早就按捺不住轉了台，現場當然又唔會咁衰提早離場啦！反正山長水遠來到，咪當感受下現場氣氛，聽下D球迷嗌下打打氣又爆下粗、一齊開下汽水，又或者影下相拍拍片，不經不覺又過左半場。而上半場唯一有留心睇波的，咪就係24分鐘中國隊前鋒高迪接應角球在混戰中射入果球。

下半場雨勢愈落愈大，兩軍又係繼續中場混戰，那隊水皮中國國奧隊的攻勢也不見得有幾銳利，所以也沒甚看頭，基爾大部分時間都係與同行的friend吹水聚聚舊而已！有球迷嗌時就又嗌兩聲，都幾過癮架！



不過到了賽事末段，港隊突然一輪發力反擊，壓住中國隊係咁砌，正好就在基爾坐位前的禁區一帶，不斷又角球又罰球咁攻門，算係幾肉緊，可惜最後都無功而還，幸而因為喱一連串攻勢，又畀基爾影多幾張相同埋拍多段video畀大家睇下！

最後長雞一鳴90分鐘完場，香港雖然是以0﹕1飲恨，卻仍歷史性取得小組首名出線。雖則話係「讓賽式」的東亞運，但亦總算威返一次，對在場邊吶喊助威的球迷來說算係有交代。希望港隊延續神蹟，在四強贏埋北韓，就有機會在大球場爭金，創造香港足球又一個傳奇！



p.s.12月10日晚港隊於大球場舉行的四強戰，與北韓加時戰足120分鐘仍以1﹕1賽和， 結果互射12碼港隊勝4﹕2（總計勝5﹕3），周六決賽將與日本爭金



p.s.12月12日晚奇蹟真係發生左，香港竟然在決賽贏左日本，仲贏埋個東亞運男足金牌，仲贏埋三萬幾球迷……有無犀利得咁緊要呀！！！1985年5月19日，港隊在世界盃外圍賽戰勝中國取得小組出線權，當年基爾仲未識睇波，不過今次終於可以見港隊另一個歷史的一刻！

感受東亞運開幕氣氛@西九

尋日係香港東亞運舉行開幕禮的日子，本來早已打算去尖沙嘴海傍湊湊熱鬧，畢竟在維港上搞大型開幕禮，又話會有花船又放煙花，似乎也甚具睇頭。不過突然醒起早前舊同事送的兩張電影《心魔》的換票證，此戲因惠英紅贏了金馬獎而重映，但全港只有Elements的The Grand Cinema有得上，所以最後陣地由尖沙嘴移師至西九。

我諗唔會有好多blog友睇過《心魔》喱套戲，因為早前上映時也是只有BC等兩三間戲院做，映期也只有一星期左右，就閃電落畫，這次重映自然不能再錯過睇免費戲的良機。故事其實主要圍繞惠英紅同徐天佑的母子情，說是什麼「奇片」又不算，但結尾就有少少tricky，有興趣的不妨第二時租碟睇，等大家估下徐天佑個女友到底係邊個殺的？基爾就估兇手應該係惠英紅！



睇完戲之後還未到4點，順便走落去溜冰場旁果間HMV逛逛，因為一直好想買Sting的新碟《If on a winter's night ...... 》因為Soul Cake實在太正，可惜見佢開價$99，似乎幾貴，姑且忍一忍手唔買住。4點幾見Elements已經無乜吸引的店舖要行，就索性早一點走出去外面的西九龍海濱長廊探路。



基爾是如假包換的「鄉下仔」，平時除了返工外都很少出市區，而西九海濱長廊也是第一次踏足，不過在Elements行來行去，找了好久才搵到正確的出口，但由商場行去海濱長廊，原來也要走一段很長的路，唔怪得這裏有單車徑，可能踩單車去會輕鬆少少。好不容易來到長廊的入口，眼前竟又是一條沒有盡頭的單車徑~~~嘩！真係好鬼遠喎！幸好路旁已經有不少東亞運吉祥物的擺設，可以影下相，還有不少警察巡來巡去，莫非驚恐怖襲擊！



行了十來分鐘，終於見到「海濱」，原來整個海濱區域都劃了為觀看東亞運開幕禮的專區，兩隻吉祥物東仔同阿妹則忙於與小朋友影相。此外，場內還豎立了幾個大電視，以及一排小食店、救傷站、廁所之類的。不過最吸引基爾的，是由這裏回望ICC、凱旋門那邊的view，都真係幾宏偉！



可能由於距離舉行開幕禮還有大段時間，所以遊人也不太多，就連楝起腳架霸位的拍友也不太多，相信比尖東那邊清靜。難得賽會請了雜技人在場搞搞氣氛，於是替這位特登為基爾擺晒鋪士的「踩高橋魔盜王」影影相先！



由於西九海濱長廊這裏四野無遮無擋，連樹也不太多，大部分地坊都係荒草一片，而且風勢甚大，企企下也有點凍，為免冷親還是先撤退回Elements，不過臨走前還是先拍下迷人的黃昏日落照，原來在這裏影「鹹蛋黃」也不錯呢！



回到Elements後，個肚竟然開始有少少打鼓，但環顧商場內沒什麼特別野想食，而且也素知這裏的食店偏貴，所以還是走遠一點，返回佐敦、油麻地一帶覓食。唯一遺憾的，就是要放棄回去海濱長廊那邊影花船同煙花了！算啦，還是食緊要一點。由於好耐無食過拉麵，結果走了去食味千拉麵，叫了上圖的相撲拉麵，份量大但不算特別好食。此外，還叫了特價$20一客的炸雞，只能給予四字評語﹕「太乾，難食！」比較特別的是圖左的sparkling juice，$20左右兩支，初頭都有點驚會好果汁汽水，不過飲落反而有少少驚喜，原來也不太甜，基爾飲的那支red grape juice果然係幾有真提子汁feel的，算是為這餐爭回不少分數。



順帶一提，以往基爾極少會去Elements，因為家中無巴士直達，最近也要在彌敦道落車，然後行晒成條佐敦道咁moon walk入去。今次也是港鐵環九龍線開通後，首次坐火車去柯士甸站，發現這個站就好似死城一樣，人流少之餘，大部分店鋪也是空置的，而且距離九龍站也非常近，不明白港府為何要花錢另建柯士甸站？算了吧，政府不嬲都會做好多令人費解的東西！

回到家後，再拎返上圖這個東亞運首日封出來欣賞下，因為今朝難得早起，就趕快落街去郵局買，由於係鄉下地方，幾乎沒有人排隊，實在太好了！諗返早前去排隊買國慶六十周年果個首日封，簡直想死！這次當然諗都唔駛諗，用左$1買個封及$13.6買張小存張貼上去，chop埋個東亞運動會的印就搞掂晒！封日首影出來可能不太特別，只是各種比賽項目的運動員剪影而已，但其實郵票表面係熨了金、銀、銅三色的，在燈光下甚有金屬質感，也算是一個賣點吧！

穿山甲喪行@烏蛟騰

一年之中最喜歡就是秋冬季節，既唔熱唔凍，又唔晒唔落雨，似乎做什麼東西都好愜意似的，連身邊的朋友也「活躍」起來，放假總是忙於去街、飲茶，當然少不了去行山這個「重點節目」。

大埔向來是基爾的首選的「後花園」，之前也曾寫過一篇由九龍坑山、沙螺洞一路走到粉嶺鶴藪水塘的網誌，一來因為喜歡大埔的行山徑比較清幽，較諸到西貢或港島區行山時的「人頭湧湧」盛況，在大埔郊區更能感受多一點大自然氣息；而且大埔的行山徑一般都較長，很多時都要花上大半天才能完成，定可盡興而歸。雖然明知如此，但這次因為貪睡而遲了起步，乘小巴來到起點烏蛟騰時已經是下午1時多。

與其他老手的「穿山甲行軍式」行山節奏不同，基爾向來行山與寫blog一樣都愛慢條斯理，行下又會停下來睇下風景影下相，以hea為第一位，絕對不是要考驗體態。然而，凡事總有例外！這次雖然是遲了起步，也明知要改一改老習慣，必須加快步伐才可趕及日落前抵達終點鹿頸，然而沿途經過九擔租，穿越一個又一個密林，在上、下苗田走過一條又一條清溪，試問又怎能忍手不停下來拍幾張「仙境照」！



好了，一行人花了3個多小時終於來到豁然開朗的三椏涌，眼前極目遠望就是有「香港小桂林」美譽的印洲塘。之前沿途都已經要大影特影一餐，來到這個「小桂林」就更忍唔到手……再看看手表時，赫然發現已是4時多，經荔枝窩到鹿頸的原定路線肯定要腰斬了。在三椏村吃點豆腐花喝點汽水後，經仔細相量，就決定沿較快的上路，繞道吊燈籠的山路，希望趕及日落前（因為沒有帶任何照明工具，也不想摸黑行山咁刺激）返回烏蛟騰，再乘小巴離開。

吊燈籠一帶的山路其實甚陡峭，加上5點過後暮色漸濃，沿途也不見人影，只有一片荒草淒淒的景象，即使有點累也不敢再hea，沿山路一直以極少用的「穿山甲」行軍式步伐快速前行，也無暇停下來眺望山下印洲塘的靚景。最後到了6點幾，在「伸手勉強可見五指」的情況下順利返抵烏蛟騰小巴站，總算體驗了一次先甜後苦的難忘行山旅程。