2008年5月2日 星期五

迎奧運聖火@城門河

今天北京奧運聖火運到屋企附近的城門河,真係好開心,預早在12:00pm左右已走落去河邊霸位。嘩!原來真係好多人喎!個個仲著曬紅色衫,又打鑼又打鼓又舞龍咁,好鬼熱鬧,終於感受到奧運來臨的氣氛,梗係要「閃電」寫一篇網誌!



拍攝地點是石門龍舟會的對岸,也是龍舟運送聖火的起點。上圖站在龍舟前端、手持奧運聖火火炬「祥雲」的,就是香港「女飛魚」施幸余。由於條城門河其實都好鬼闊,加上我都無大機,又無長鏡,所以影得比較遠,請見諒!不過心情也是很興奮的呢!四周圍的人都在猛叫「中國加油」,仲有人舞龍同打鼓添!相片背景為濱景花園的岸邊,有成村人在揮舞國旗港旗吶喊,站在對岸也清楚聽到。



在河邊等左大約45分鐘,由初時有點毛毛雨,到後來雨停了,天色開始明朗起來,好不容易終於見到火炬手施幸余走到石門龍舟會的碼頭,她手持火炬登上第一艘龍舟後,一整隊龍舟即浩浩蕩蕩的往沙田方向扒去,好壯觀呢!雖然距離比較遠,看不真火炬手的樣子,但係不論城門河上或河的兩岸,都人聲鼎沸非常熱鬧,更有人手持國旗在岸邊一面跑一面高呼「中國加油」呢!



運送聖火的龍船其實也扒得好鬼快,一下子已去左畫舫果邊,岸上的拍友也不停舉機拍下這難忘的歷史一刻,即使間中仍有點微微雨,也無阻佢地影相的興致。其他人大多也響應呼籲穿上紅衫,還帶了大大小小的國旗區旗來打氣,所以城門河兩岸也泛起了一片鮮紅色,非常壯觀搶眼啊!



龍船過後,人們都有秩序地疏散離開,但也有不少人留在路上,與同行朋友揮動京奧旗、國旗及區旗影「團體相」,真係好似嘉年華會咁!由老人家到小朋友都盡興而歸。回到家後,立即又走到窗前,拍了上右圖這幀沙田馬場的「一片紅海」照片,因為那裏正進行聖火繞圈及迎接聖火的表演活動,係咪好靚呢個景,也為這次追蹤聖火之行,畫上非常圓滿的句號。

沒有留言:

張貼留言