煊記火鍋小菜館@油麻地

繼上次的深水涉、太子之後今次再繼續南下移師油麻地，訂位的煊記以食火鍋出名，不過這次捨棄邊爐決定臨時「變陣」，改叫了小菜，好彩水準也尚算不俗。

店舖碗筷企理 / 菜單分小菜和邊爐食材兩邊選擇 / 位於門口的廚房也掛了菜牌

自從BC裝修後已經很少踏足油麻地，好彩這次去的火宣記無BC咁隔涉，地鐵站出來轉入文明里就見到。


看看菜牌有乜食

雖然已經有之前兩次經驗，但基爾看完一大輪菜牌也沒有什麼心水選擇，全權交由友人話事，自己只負責食！


陳年茶壺 / 清湯崩沙腩 $128

上圖這種舊式茶壺以前去大排檔式食肆會經常見，依家就少見D。Anyway，茶過三巡後終於有菜上。先來個清湯崩沙腩做下熱身，即使無得打邊爐仍可以烚下烚下，過癮！崩沙腩係乜？聽聞即係牛的橫隔膜，食得真刁鑽！


大魚兩味，分別是中式魚生（右下圖）和椒鹽炸魚骨（左圖）$150 / 薑蔥桶蠔 $118

比較值得一講的仲有喱味中式魚生，係用一種叫鱆紅魚製成。日式的三文魚或吞拿魚生食得多，不過這種鱆紅魚對鄉下仔基爾來說還是第一次聽。由於魚生撈了粟米片、花生、芽菜等多種配料，所以即使基爾唔太敢食魚生也可食下配菜，唯一係「可怕的」芫茜不敢掂。至於起出來的鱆紅魚骨也不浪費，可以選擇椒鹽炸或清蒸，一魚兩食。


蜆介鯪魚球 $90（大）/ 砵仔焗魚腸 $68

再看另外不俗的兩味﹕蜆介鯪魚球外脆內軟幾好味，配上鹹鹹地的蜆介醬最perfect。叫了大碟的有16粒，夠晒食！另一味魚腸又係基爾原本不太敢食的懷舊菜，因為怕腥！不過喱味用砵仔盛載、混合了雞蛋一齊蒸的又幾好味，口感軟綿綿的有少少似食豬潤，而且完全唔腥，味道真係幾唔錯。最後還叫了好幾味菜，包括有白灼豆苗、勝瓜炒鮮魷等，掛住食也忘記同佢地影沙龍了！

p.s. 這次同樣用了友人的Ricoh GXR定焦鏡拍攝，經佢指導「秘技」後，果然效果大有改善，只可惜好多時卦住傾計同食，食到半路才醒起影相，所以今次影出來的美食大部份只剩一半或已經摷亂晒！

 

煊記火鍋小菜館
油麻地砵蘭街14號地下