2014年2月13日 星期四

2Q13秋見信州@立山黑部湖

「路面完全暗了,人家越來越少,來往的車也越來越少。路面窄得很難相向開車,公路左側變成懸崖峭壁,下面似有山溪流淌。彎拐得越來越急,路面開始不平穩,在山中朝更深的地方前進。後來路總算離開了懸崖,駛入森林。高大的樹木在周圍像魔鬼一樣聳立著,車燈像舌頭般逐一掃過樹幹……」



由於要搭晨早7:16am火車出發,為免太花時間四圍搵餐廳,索性在下榻的Richmond Hotel地下的餐廳食個幾豐富的breakfast就算(¥800),火速食完相都冇影即上房拎篋行出去松本站!



一出到火車站已見雨雲密布,這天肯定會落雨了,但基爾奇就奇在日本人帶傘上車竟滴水不漏,完全不會弄濕車廂,非常有公德,真的要好好學習!由於早已買了立山的Mountain Travel Pass(¥23130),幾乎全程都不用再麻煩買車票。火車準時於8時多來到立山山腳的信濃大町站,先去站旁的手店將大篋托運往下山後入住的宇奈月旅館,僅拎大背囊就去搭巴士上山。



其實上立山的交通工具都幾複雜,幾乎所有巴士纜車吊車無軌電車統統都要搭齊,非常好玩!首先由信濃大町(8:30am)坐巴士約1小時來到半山的扇澤站(9:30am),雖然只到了半山但已經感受到這處日本阿爾卑斯山區的寒意有幾犀利,四周大霧到幾乎伸手不見五指。



在扇澤站下車後乘關電隧道無軌電車(10:00am)往黑部水庫站,途中要背住大背囊非常索氣地走上一段近百級樓梯的登山行人隨道(約10分鐘),對基爾這種「年輕長者」而言確是個大考驗。頂硬上終於來到隧道出口,原來已經是煙雨濛濛的黑部水庫觀景台,望落山真係乜紅葉都睇唔到,就像置身在一舊雲中,幸好觀景台旁的山坡都仲可以睇到少少紅葉。



唔知係咪基爾登山的誠意感動了立山的山神,等了一會竟然開始雲霧消散現出對面山谷,正呀影到黑部峽谷中的紅葉了!有少少畏高的基爾本來在觀景台和水庫架空棧道上都有少少驚和腳軟,不過山谷中的紅葉實在太美,影影下相幾乎都忘了畏高。上圖請留意右邊,隱約可以見水庫架空棧道有幾險要!



上圖右是近看的水庫架空棧道,雖然上面是萬丈山嶺,下面是萬丈深谷,不過以鋼架搭建的棧道看來修葺得幾穩陣,至少比基爾年少無知時在大陸行過的鐵索棧道感覺上安全一千幾百萬倍。



沿棧道行返落黑部水庫大壩,沿途雨霧夾雜大風颳面吹來其實都幾有寒意(估計around 8-10度),不過都無損興奮心情,一路狂影相一路欣賞這遍霧遍雨的水壩靚景。



行了十多分鐘終於落到水壩旁的觀光案內所,因為吹左咁耐西北風實在凍到變雪條,還是先入室內嘆陣暖氣取暖一下。案內所裏除了有小食和熱飲外,仲有唔少紀念品賣,例如上圖的紀念tee都幾唔錯,基爾最愛左下的紅色貍貓tee,可惜只有童裝!



休息了一陣後基爾又按耐不住,再出去冒住食西北風之險四圍影下相先!上圖是黑部湖和水壩外的山谷,感覺上水庫工程真係幾宏大。黑部大壩修築在海拔1448米的黑部峽谷中。



黑部水壩高達186米,壩長近500米,是全日本最大的拱形水壩,黑部湖貯水量達2億立方米,同樣是「日本一」。雖然驚有高山反應,不過點都要在一望無際的大壩上影張飛躍相!上圖右是黑部湖旁邊的行車隧道出口。



在大壩上遙望黑部湖,湖水源自本州北阿爾卑斯山脈融雪而來,由於湖的四周環繞大片原始林,所以水質極佳。從這角度看湖面其實都幾闊,實質上這個人工水庫呈尖長形。黑部水壩於1957年開始動工建造,至1963年才竣工啟用,工程歷時7年,成為本州中部黑部川上游的第4座發電所。



走在廣闊的黑部湖水壩上,真係似在一條大馬路上漫步一樣,不過就無大潭水塘那大壩咁有古樸味道。其實單以看水塘而言,香港的絕對屬世界級,一來歷史悠久,二來風景也絕佳,三來亦非常近市區,至少勝在來往交通夠晒方便!



其實10月來到黑部水壩上,可盡覽湖邊山坡壯麗的七彩紅葉靚景,不過喱日天色麻麻雲霧較多,若遇上藍天晴空影相出來應會更美。沿大水壩一直走到盡頭有個山洞,入面就是「依洞而建」的黑部湖站,由這裏可乘搭地下登山纜車往黑部平站,車程僅約5分鐘。



黑部平其實是立山黑部阿爾卑斯山脈路線Tateyama Kurobe Alpine Route另一大站,規模儼如迷你shopping mall,G/F除了有纜車站外,還有間甚大的手信店(有雪糕和串燒之類小食賣),店外仲有個「空中花園」。不過最吸引基爾的是海拔1828米、位於車站天台的觀景台,見天色唔錯第一時間先上去睇下。



登上天台觀景台的鐵梯其實都幾無遮無掩,加埋山上颳來的陣陣寒風(氣溫估計around 5度),與行棧道一樣驚險,真係會令人有點腳仔軟的感覺,幸好是沒有下雨,否則要擔遮就更狼狽。



雖然要食西北寒風,不過觀景台又確實值得一來,這裏可360度盡覽雄偉的立山連峰和黑部峽谷靚景,還隱約見到山下的黑部湖一角。不過由於寒風凍到不停流鼻水,影飽靚相之後還是快快返落站內取暖,以免冷親!

70 則留言:

  1. 不一樣的山景及紅葉,正!

    回覆刪除
  2. 香港真的很少見一個山, 有紅葉, 黃葉, 綠葉…很特別!!
    仲有, 右下件tee??!!是否左下呢?? 裡面又唔似賣衫喎…

    回覆刪除
    回覆
    1. 森:現場睇真係好有震撼感,唔怪得咁多人鍾意來日本睇紅葉啦!
      係呀我又左右不分:P 多謝提醒, 右下係個男人~~~~~
      其實喱間係觀光案內所旁紀念品店,所以有好多野賣,包括tee恤,牆上掛晒D款出來畀人睇,另一邊就放滿好多摺好的

      刪除
  3. 「年輕長者」, no way.... 啲風景真係好靚,相又靚,睇左我心情都靚, thank you !

    回覆刪除
    回覆
    1. MD:多謝你,我會努力寫埋落去^^

      刪除
    2. MD:祝你與家人也有個緣滿情人節^^

      刪除
  4. 立山黑部真係好靚,希望好快有機會去^^

    回覆刪除
    回覆
    1. Mo:同毛爸去玩下^^我諗如果自駕去又會睇到好多唔同嘢呢!

      刪除
  5. 童裝要咗佢啦,唔使買muscle tee嘛.

    回覆刪除
  6. 將來有機會一定去一次!

    回覆刪除
  7. 周圍山景好正,真係不枉你此行,見你地都開心到跳起,nice!

    回覆刪除
    回覆
    1. BIM:為咗影果張相跳咗成十幾次氣都咳埋XXD

      刪除
    2. 跳完應該成身熱哂啦,我諗係好回味嘅旅行,事關我都好回味日本旅行。情人節快樂!

      刪除
    3. happy valentine's day~~~^^
      幾時會再去重遊舊地?!!

      刪除
    4. 上次去完之後一個月福島就出事,心大心細⋯

      刪除
    5. BIM:喱排都落大雪亂晒龍不去為妙!!!

      刪除
  8. 遍霧遍雨水壩個張相....有D仙境feel !

    回覆刪除
    回覆
    1. 卡:其實係食正西北風流晒鼻水抵住冷先影到嘅:D

      刪除
    2. 哈哈...想影靚相喺要付出代價架喇!:))

      刪除
  9. 回覆
    1. Samwei:山腳其實有十幾度但山頂就零下,有雪!

      刪除
  10. The red and yelllow colours of the leaves over the hill are quite beautiful

    回覆刪除
    回覆
    1. Ray:我影得差,其實現場睇仲靚呢~~~~

      刪除
  11. 7:16am 火車,巧早吖。。。。zzzz....

    回覆刪除
    回覆
    1. Bugs:唔驚~~~~可以在車上再訓過XXD

      刪除
  12. kaka.....基仔引人笑呀!呵呵.......

    回覆刪除
  13. 未落雨咪冇水滴囉, 乜你唔知d架人日日都帶遮出街既咩.

    回覆刪除
    回覆
    1. 毛:就係有落雨,可能佢地fing到好乾先入車,或者用布抺kakakaka

      刪除
  14. 平時見立山黑部都係sell雪景,最有印象就係馬路兩旁都係好高既積雪,原來秋天都係一樣咁靚架!元宵節快樂~

    回覆刪除
    回覆
    1. Matthew:雪牆只4-6月先睇到㗎,如果想去睇就差不多要計劃下啦^^
      秋天紅葉靚,黑部峽谷都係睇紅葉的熱點!

      刪除
  15. 風景一流但行程都很吃力喎 , 睇見嗰條架空棧道很腳軟 .

    回覆刪除
    回覆
    1. ak:都幾大風,好凍,不過個景靚,好快唔記得咗腳軟kakakaka

      刪除
  16. 回覆
    1. Teddy:可惜天氣麻麻,如果唔係就更perfect^^

      刪除
  17. 立山黑部, 係我名單上的, 我成日都想去睇那道雪牆, 但年年都冇去到 !

    回覆刪除
    回覆
    1. 魚:睇雪牆要4一6月喎!依家都差唔多要plan定啦^^

      刪除
  18. 煙霧迷迷...搭吊車會好刺激~~~

    回覆刪除
  19. 回覆
    1. Andrew:係呀如果天氣好我諗影出來會更美呢

      刪除
  20. 其實去哩度幾好,有靚景,
    又有人跳起攞post幾型
    又話哩度有十幾廿呎雪牆??

    回覆刪除
    回覆
    1. 霸:西班牙有冇試下跳起影:D
      有呀,如果4-6月來就係睇雪牆的

      刪除
  21. 可以見到咁靚嘅風景,就算凍d都冇問題喇。

    回覆刪除
    回覆
    1. Manman:一路凍到順鼻水一路影XXXD

      刪除
  22. 如果沒有雲霧 應該會靚爆鏡~ 哈哈:)

    回覆刪除
    回覆
    1. 米:同埋要靚D嘅相機和好的攝影師先得呢^^

      刪除
  23. 咁鍾意,可以買條紅色貍貓tee返來,改做斜揹袋,然後日日用。 ^_^

    回覆刪除
    回覆
    1. 樂:kakakakakaka~~~~咁複雜我邊識整丫:P

      刪除
  24. 這裡的紅葉很漂亮呢!

    回覆刪除
  25. 我都有整個google map ,但點show埋咁多個地點出黎?

    回覆刪除
    回覆
    1. Silver:要在photoshop後期加工架喎:D

      刪除
  26. 雖然天陰, 但秋色依然很美!!

    回覆刪除
  27. 日本的手作書有教做雨傘用的乾布帶,可以吸水,日本人有時真係幾細心和有公德心,你話佢地真情或扮嘢都好,起碼不會煩到其他人!
    紅葉真係好靚呀,我們都有在十月份去白川鄉,附近山頭的顏色變化真係靚到暈!

    回覆刪除
    回覆
    1. Lucamom:原來如此,原來有啲咁先進的發明,喱種發明仲好過商場用果種膠袋遮套,至少環保D!
      我都同意,日本人一般都有公德心,至少門面工夫做足XXXD,唯一接受唔到佢地在食店裏食煙!
      我那年是6月初夏去白川鄉,風景真係超靚,如果漫山紅葉相信更靚,難怪一年四季都咁多遊客啦!

      刪除
  28. 「單以看水塘而言,香港的絕對屬世界級」,有理,但卻沒有這裡四季分明的感覺!

    回覆刪除
    回覆
    1. 說:都係嘅始終香港秋冬天也不太冷吧~~~~不過香港也勝在夠細,去好多郊外地方都比較方便

      刪除