2014年2月2日 星期日

周末自由蕩:下@北角+西灣河

平時閒來比較少踏足港島區,不過都有幾處地方一直想去睇下,喱日趁有空終於有機會去巡一巡!



之前去過電氣道市政大廈食印度菜感覺唔錯,喱日lunch時段再去幫襯這間烤爐印度餐廳,本來諗住試下個set,不過老闆話周末係無套餐供應,其實散叫也不貴,於是叫了上面這個Chicken Tikka Masala,雞肉比一般烤雞細嫩,在濃濃的香料中也吃得出番茄味,而且一點不辣,感覺幾正幾特別!



羊肉炒飯其實也不錯,不過基爾個人覺得稍辣,如果愛吃辣的應該會幾滿意。最後當然要叫多個熱辣辣香噴噴的Cheese Nan,與Poppadoms一樣都係食極唔厭!



之前一直都好想去逛逛「Oi!油街實現」,到最近才才發現原來就在電氣道市政大廈隔籬,順道也要去「到此一遊」吧!



「油街實現」屬二級歷史建築,前身為1908年建成的香港皇家遊艇會會所,單看19至20世紀初Arts & Crafts建築風格的紅磚外牆已經很有歷史味道。



這座百年古建築由一幢主樓及兩幢附屬建築物組成,上圖是近入口的一幢單層平房,現時已改建成coffee shop。



復修後的這間咖啡室雖然外表摩登,不過睇真先知原來是間「涼茶舖」,店門前有塊黑板menu寫住:「用你的不完美部份來換取一杯涼茶!」另一邊的小偏廳則展示少量的藝術作品。



可能場內正在轉展覽,其餘幾個展廳似乎也正關閉修裝,唯有自己四圍逛逛欣賞下這幢古建築吧!上圖是活化後的洗手間,雖然細但都好企理。



主樓外的樓梯看來是後期加建的,對比鮮明的紅磚和粗灰泥外牆以及黑色的雨水管都是它的建築特色。



由主樓二樓的露台外望,景觀比較開揚,地盤是已拆卸的前政府物料供應處大樓,將來應會再起其他高樓大廈,到時這片矜貴的維港靚景就會被遮擋了。



二樓露台鋪了很有懷舊味道的黑白地磚,可能由於就快過年關係,還擺了盆桔在欄杆前。



這樣大的露台以今時今日寸金尺土計,真係可以間多幾間房呢!上圖那些白牆和白門窗經修葺後即重現百年前的英式大宅氣派,仔細睇部份圓形銅門鎖還是原裝古董呢!



二樓其中一個偏廳現已成為Meeting Room,素淨簡潔的桌椅與古建築異常匹配。



臨離開前再由樓梯回望露台景;上圖右是主樓的後巷,再一次近攝紅磚牆……



香港如果少D高樓大廈多D空間感就好了,可惜現實終歸現實!



由百年古老大宅回歸現實後,搭叮叮向東繼續走,不久就來到西河灣的香港電影資料館。



基爾也有幾年無來電影資料館了,今次來主要係捧下朋友場,聽佢講最近這個《舊日戲院昔日情》展覽他有份參與製作,喱個周末反正有空,一於去睇下!



展廳正門裝修成昔日傳統戲院大堂模樣,設計幾有心思,牆上仲掛滿了好多幅「復刻」手繪電影宣傳板,不過由於場地所限,這些都只屬「迷你版」,與昔日掛在戲院外達幾十尺大的手繪畫有點差別。



傳統戲院大堂又怎少得上圖這座大型磅重機。基爾自少已有個疑問;其實去睇戲又不是要去打拳,為何非要先磅體重不可?!



廳內還展出不少昔日的手畫戲票,今時今日大部份連鎖式經營的戲院早就改用電腦出飛,人手畫票幾乎已絕無僅有!基爾看著這些五顏六色的古董戲飛也有點唏噓,因為大部份戲院早已關門大吉,只留在老照片的回憶中。



以前大型戲院有分堂座後座超等,依家當然再無這樣細分;比較特別是左上圖的老夫子和黃飛鴻電影「復刻版戲橋」,如果背後印製成年曆卡,基爾可能都會拎一張留念呢!



值得一提是展廳內還有個「小影院」,播出由粵語長片中剪輯出來的昔日戲院實景拍攝片段,非常有心思。另外上圖這幅全盛時期的「戲院地圖」也很震撼,原來80年代以至90年代初全港仍有逾百間戲院,時至今日只餘下40多間,以人口比例計,比日本南韓台灣以至新加坡馬來西亞都要低。不說不知,原來以前遠至大澳和坪洲都有戲院呢!



《舊日戲院昔日情》
日期: 2013年12月6日至2014年3月2日
地點: 香港電影資料館地下展覽廳




p.s.由於上次食set lunch不遂,喱日再專登揀了weekday去食,果然真係抵食好多,而且閒日去真係多人好多,基爾叫的是咖喱魚餐配烤餅,另附送餐湯及凍飲,埋單$48計算是超值。



最初還以為烤餅不夠飽,點知原來有4大片,以基爾食量計算是75%full;若不想食烤餅也可配白飯,見鄰桌叫的白飯是地盤人工份量,絕對唔怕食唔飽!聽友人說他叫的咖喱羊餐也不錯,下次可以再去試下。

32 則留言:

  1. 幾廿年前的磅都好大座,還未有家庭式的細磅,除了去醫院就好難有機會磅體重啦,所以戲院大堂的大型磅重機有須要存在,睇到舊物就知道時代進步的模式。

    回覆刪除
    回覆
    1. JJ:果然是歷史活字典XXXD

      刪除
    2. 我老呀嘛!成頭白哂喇!

      刪除
    3. JJ:我仲以為你十八廿二咋喎XXD

      刪除
    4. 我就知你十八加廿二喇!kakaka...

      刪除
  2. 去睇戲先磅重我話係因為超等位係潛建,過重會冧. 哈哈哈.

    回覆刪除
    回覆
    1. 王子:有無咁誇張呀kakakakakakakaka~~~~~

      刪除
    2. 佢有感而發呵!呵呵!

      刪除
    3. JJ:派你過去奧國驗證下kakakakakaka~~~~~~

      刪除
    4. 係咪你出機票先?你話派喎!

      刪除
    5. JJ:梗係叫王子請埋你啦~~~~~你咁有誠意去覲見佢喎kakakakaka

      刪除
  3. 香港發展真的太快,很多很值得回味懷念的,都給遺忘了!多謝基爾介紹!有次看香港新聞,在深水埗,太子那邊有很多古蹟大廈都來不及保育。。。。

    回覆刪除
    回覆
    1. lucamom:近年都算好,比較注重保育,比著廿幾年前已經拆咗好耐了~~~~

      刪除
  4. 油街都幾多野睇!
    電影資料館,要搵日去行下!

    回覆刪除
    回覆
    1. 摩:油街果日去就唔係太多展覽睇,如果遇著咁啱有表演仲正呀^^不過齋睇座建築物其實都OK嘅!
      電影資料館其實比較隔泄,我都有幾年無去!

      刪除
  5. 我也是一直想去油街實現
    但還未有時間呢
    謝謝你讓我先睹爲快!哈

    回覆刪除
    回覆
    1. 米:去啦其實交通都方便,炮台山地鐵站一出向前走就見到!

      刪除
  6. 英式大宅氣派 balcony in Oil Street is beautiful.

    回覆刪除
    回覆
    1. Ray:係呀最鍾意睇喱種古老大宅,半山堅道的孫中山博物館也有大騎樓睇XXXD

      刪除
  7. Gael,油街實現和電影博物館,我間中都會去参觀.

    回覆刪除
    回覆
    1. Andrew:係呀我就係見你影過所以去睇下囉^^

      刪除
  8. 有時四圍行下, 又自有一番生活的閒情...欣賞!!!

    回覆刪除
    回覆
    1. 森:Sam兄有冇啲好去處介紹我去行下^^

      刪除
    2. 假期你可以行下青衣海濱公園, 望下少少海景幾寫意, 行到攰攰地又可到附近的青衣城食下野, 好啱你同你啲拖友去~~

      刪除
    3. 森:一個人去唔得架咩XXXD

      刪除
  9. 我間中都會經過「油街實現」,唔知原來可以入去參觀嫁?
    祝馬年順景,財源廣進!

    回覆刪除
    回覆
    1. Rose:入得㗎!好似係開十至八點!
      新年快樂^^

      刪除
  10. 呢個行程幾好喎, mark 低佢先, 我想食好味的印度咖喱好耐, 即係好香 herbs 味道個 d 呢 !!?? 要試下你介紹呢間.

    回覆刪除
    回覆
    1. 魚:如果去開港島區行山(大欖水塘大風坳之類),都不妨順腳行埋喱兩道地方啦^^

      刪除