2014年3月6日 星期四

2Q13秋見信州@立山彌陀原

「走上簷廊,頭頂無數星辰在閃爍,較之鑲嵌在天幕,更接近於隨手揮灑在空中。天象儀上面也沒有這麼多星星。有幾顆星大得出奇,看上去活生生的,彷彿伸手可觸,委實漂亮得叫人屏息斂氣……」



在美女平行完森林後搭高原巴士回程,返到山上的彌陀原,這程巴士最值一提是車上的這部電視仔,會播放介紹沿途風光的影片,雖然是全日語放送聽不明白,但勁就勁在電視播出的片段竟與車窗外的景色幾乎同步一致。由於影片是在夏季最藍天白雲的日子拍攝,對照窗外深秋時份的景象感覺又幾有趣。上圖是路經瀧見台時巴士會稍為停一陣,見車裏個個拎起相機係咁影,到底影乜咁興奮呢?!



原來係影對面山的喱條小瀑布!據說古時淨土宗鼻祖法然上人登山參拜時路經瀑布,因為流水聲音聽起來像稱名念佛的聲音,因而叫做稱名瀧。每年5-7月融雪季節是觀瀑的最佳時間,瀑布呈分叉形共分4段,落差逾350米,與和歌山的那智瀑布齊名為「日本一」。



其實由瀧見台這裏也有行山步道一直通往稱名瀧,看影片介紹路程不過30分鐘,不過由於落大雨就無謂再去做落湯雞了,就在車上遙遙一瞥就算喇!



返到上去海拔2000米的彌陀原,一落車又重新投進這片白茫茫的雪國境界,看到酒店外這些披滿雪的聖誕樹(立山杉),真的有點夢幻感,就像看舞台劇換佈景一樣快,很難相信半小時前才剛置身漫山紅葉的秋山,難道無意間學懂了「瞬間轉移」?



返到酒店才剛4點幾,發現門口聚集了十多人的一團遊客,細問下才知原來酒店安排了一個彌陀原步道的免費導賞團,由酒店職員帶領,雖然以全日文介紹而且外面天氣幾凍,不過基爾一於跟住去睇下!



彌陀原本身是10萬年前由火山爆發熔岩堆積而成、面積達8平方公里的高原濕地,酒店附近有不少原木步道不斷伸延出整個高原,供遊客仔細觀賞這片濕地的壯麗美景。



聞說40多年前彌陀原這一帶仍有多達3000幾個大大小小湖泊,春夏時節來到這片濕原是賞花的旺季,秋冬則搖身變成賞雪聖地。不過近年由於溫室效應全球暖化,令高原上的雨量雪量俱減,目前僅存千幾個小湖泊,而依附水源生長的高山植物也大幅減少。



聞說天朗氣清時,遊人站在彌陀原高地上還可遠眺北面的日本海和富山平原。基爾這天來到遇上遍霧遍雪的天氣,當然無可能見到,但單看落日餘暉下這迷人的雲海,即使凍到快要變雪條都值得呢!



酒店職員間中會停下來向遊客介紹高原四周環繞的雪山風景,或許當中也夾雜了神話傳說故事吧!基爾不懂日文當然無從得知,只見隨團的日本遊客連聲「梳!梳!梳!……」咁回應導賞,看來個個都聽得幾津津有味。



彌陀原濕地步道大置可分為內環和外環兩條,較短的內環只需約1小時,較長的外環步道則需2小時行程,沿外環步道上山還可以一直走到觀景台,不過基爾隨身沒有任何登雪山的裝備,加上已近黃昏日落時份,當然不會再冒險摸黑上山咁大膽!



可能位於高原關係,走在步道上時望向天空,真係有點舉手即可摸到天上晚霞和雲彩的感覺。唔知將來基爾會唔會有機會去青藏高原又或者拉薩呢?相信到時這種「摸天」的感覺會更強烈。



這次完全親身體驗到高原變幻莫測的氣候變化,喱頭還見到大大個夕陽斜照,轉眼間四周不知從何而來的厚雲已迅速集結,將原本金黃色的落日餘暉瞬間斂去,遠處的風雪似乎又要快將襲來,連氣溫也即時跌了幾度!



雪花紛飛下,基爾都係雞咁腳三步夾埋兩步行返酒店嘆下溫泉好過了。萬籟俱寂的整片高原濕地上,除了留下基爾的足印外,就只有這些積滿霜雪的高原耐寒植物,之前從未見過上圖右這種結在葉面上的小冰柱,甚覺有趣所以就拍下來了。



漫遊完高原雪地之後,最正的莫過於去浸個靚溫泉吧!浸完溫泉後,最正的就莫過於開大餐吧!這晚包埋的晚餐共有10道菜,睇落幾有盛宴feel,包括有洋風前菜、造里、中皿、溫物、鍋物、酢物、留椀、御飯、香物、果物,都可說是蠻講究的。



菜單雖然只有日文,不過基爾單憑漢字就即管估估下介紹下。所謂的「洋風前菜」說的當然不是什麼煎蛋腸仔三文治,其實那是「縣產豚肉」,不覺得太「洋風」。



至於「造里」就是「地魚二種盛」,以三文魚刺身為主,仲有海帶和菊花伴碟;「中皿」則是「縣產牛之洋風煮」,其實就只有兩粒仔,絕對唔駛慌會食得飽人,以至無胃口食其他美食。



再看「溫物」,是「真鱈親子蒸」,就是這個紅色小盅,大細其實只有一個啫喱杯咁上下,裏面就是鱈魚蒸滑蛋,食落確實又真係幾滑的!



「鍋物」則是有個小火爐熱住的,已忘記了裏面有乜;「酢物」則是蟹鉗加雜菜沙律;「留椀」是類似湯的「蘆峅汁」,是來自立山之麓蘆峅一種山菜汁;「御飯」顧名思義就是白飯一碗,說是產自富山的白米。



「香物」和「果物」就是甜品和生果,三款蛋糕甜品都幾好味,可惜已經有點飽所以食不多,生果有蜜瓜和巨峰提,後者真係甜到似食糖,但無核兼啖啖肉都算ok!食完咁豐盛的一餐後行返出去酒店大堂,原來仲有show睇!間酒店真係搞幾多節目架喎……



來到彌陀原,夜晚除了瞓覺之外,仲有一樣很重要的活動,就是「夜觀星象」。本來食完飯仲想出去行陣睇星消化下,不過外面實在太凍,為免冷親還是返房吧!不過原來在房中望出窗外,已經見到成個天都係星星,感覺真的幾震撼,可能這一帶高原上沒太多光污染。基爾記憶中對上一次見到咁靚的星空,已是十多年前去大理麗江時了……比較可惜係基爾的傻瓜相機無可能將星空影下來,唯有借網上的彌陀原星空照作個「參考圖片」吧!

61 則留言:

  1. 天氣變化莫測……
    一天之內看盡兩季景色,妙哉!

    回覆刪除
    回覆
    1. 摩:可惜香港細冇喱類高山,如果唔係更妙哉^^

      刪除
  2. 火腿唔係洋風係乜呢? 你唔好話我知係日式喎.

    回覆刪除
    回覆
    1. 王子:我已經忘記了火腿係番鬼野XXD

      刪除
  3. 「舉手即可摸到天上晚霞和雲彩的感覺」––––有那麼誇張?我攀上非洲最高峰近海拔6000米也還沒有這種感覺呢。是你那天雲層太低的錯覺吧?

    傻瓜機有些可以拍攝星空,可能你那部都可以,重點是要三腳架。

    回覆刪除
    回覆
    1. Desa:也有這個可能,那天雲層真的很低,很有騰雲駕霧感覺^^
      我都有留意最近C牌出咗兩架新model都有星空mode,唔知係咪真係影到呢?

      刪除
  4. gael兄的網誌畀到大家一種時間停頓的感覺…
    2Q14都過左幾個月…仲講緊2Q13!!!!!

    回覆刪除
    回覆
    1. 森:事先張揚,仲要停頓多大半年喎kakakakaka

      刪除
    2. 聽你咁講, 可能出到2Q15都話唔定......

      刪除
    3. 森:依家寫到一半左右啦^^

      刪除
    4. @@睇番Gael 兄D 記錄...俄羅斯遊記...歷時五年先寫完 ^^
      會唔會...寫到2Q18 呢?XXXXD

      刪除
    5. Ka:你想我無所謂㗎XXXD

      刪除
    6. Gael:咁聽我話?XXXXD
      乜你咁長氣架...

      刪除
  5. 回覆
    1. Ray:不過其實每樣份量都唔多,所以都算OK嘅^^

      刪除
  6. 我上次都睇到好多星星, 不過又係影唔到!!! >:)

    回覆刪除
    回覆
    1. 蜻:我諗要帶大機和腳架先有可能/機會影到呢 ><

      刪除
  7. 能夠一日內目到漫天白雪,夕陽西下,雲海飄渺,無邊星空,人生快事

    回覆刪除
    回覆
    1. BIM:可以拍返套「奇妙大自然」^^

      刪除
    2. BIM:咁到時一定要拍住你先可以拍返套80後環遊世界XXXD

      刪除
    3. 邊台播呀??幾時播呀??......到時一定要買定花生在電視前,坐定定...哈哈

      刪除
    4. 森:真係咁有收視保證咩?!!!XXXD

      刪除
    5. 你地咪玩廣管局啦!你只要有個𡃁模上鏡就有收視保證啦!

      刪除
    6. BIM:咁都啱~~~~斷估收視衰極都會好過零點的亞視吧kakakakaka

      刪除
  8. 基仔又瞬間轉移左去邊呢?

    回覆刪除
    回覆
    1. JJ:唔話你知XXXXD
      都無凳坐~~~~~~~~咁唯有踎下囉

      刪除
    2. 唔講得俾人知唔通唔見得光?
      又或者蝦人囉!:(

      刪除
    3. 原來去左拍拖呀!駛乜怕醜唔講呀!但又去人地度猛講喎!kakaka.

      刪除
    4. JJ:何出此言,一頭霧水呢

      刪除
  9. 你零舍鐘意影d鬼祟野, 例如細過條鼻涕既瀑布, 仲細過粒提子既人影....最大都係隻蟹鉗了.

    回覆刪除
    回覆
    1. 毛:落大雨無行過去影嘛,離遠影下當交功課囉XXD
      蟹鉗吸引過人影好多啦

      刪除
  10. 哩度風景真喺靚,
    日本溫泉食物真喺好正!
    你真喺日本通咁正都俾你搵到!
    你著浴衣個樣都好型仔!

    回覆刪除
    回覆
    1. 路:靚架,所以近年都出名多人去囉
      通常住溫泉旅館都包兩餐,因為好多時都在荒山野嶺XXD
      咁早知影多幾張啦kakakakaka

      刪除
  11. 嘩 !? 是日行程好丰富啫^^
    賞雪, 摸天, 行山, 温泉, 美食 Vs 觀星 = 超正又好玩吖 !!

    回覆刪除
    回覆
    1. Sky:立山係喱次行程的主菜之一嘛,前後山都行勻了!^^

      刪除
  12. 相信參考圖片同現場所見夜空星象一樣美!

    回覆刪除
    回覆
    1. Andy:係呀都差唔多,可能果度夠黑!
      你去離島露營時係咪都可以睇過星呢

      刪除
  13. 彌陀原濕地很美, 你這日的行程, 很吸引呢. 尤其住 & 食那一部份 !

    回覆刪除
    回覆
    1. 魚:我見人地如果夏天去係可以行得好遠,而且沿途的草原風景都真係幾靚的呢!
      日本人有喱度好,畀得咁既價錢通常都有返咁上下水準,比較貨真價實!

      刪除
  14. 可以看到清澈的星空真是難得. 香港就遭受光污染, 一年都見唔到幾粒. 可悲!

    回覆刪除
    回覆
    1. Peter:係呀,香港市區基本上都無乜可能見到星,可能要去萬宜或者分流喱類好偏遠地方先有機會睇到呢!
      月底要響應一下熄燈夜了~~~~~

      刪除
  15. 望到繁星滿夜空,感受到宇宙嘅偉大。

    回覆刪除
  16. 回覆
    1. MD:Bookmark定第時可以去個家庭旅行^^

      刪除
  17. 彌陀原好靚,唔似我哋成日見到日本嘅景色!

    回覆刪除
    回覆
    1. Momomom:果度遠離城市無乜光污染空氣質素亦佳^^

      刪除
  18. 冰天雪地、浸泡完溫泉開大餐,至高無上享受呀!

    回覆刪除
  19. 在高原上,零光污染下,觀看漫天星星...應該幾震撼吓...
    有否覺得人都變得渺小了呢?

    回覆刪除
  20. 回覆
    1. Samwei:而且交通又方便,至少唔駛坐十幾個鐘飛機:P

      刪除
  21. Gael,我上次看星空是在稻城亞丁.

    回覆刪除
    回覆
    1. Andrew:稻城好多年前已經聽聞好靚,好想去一趟呢^^

      刪除