2014年4月28日 星期一

2Q13秋見信州@宇奈月

「沿上次那條小路走了一程,來到那塊平坦的空地。我坐在草地上,背靠樹幹,從伸展的樹枝間仰望圓圓地敞開著的天空。可以望見夏日雲絮白白的一角。這裡是安全地帶……」



大清早起來天色似乎不錯,立即走到露台拉開窗簾看看,外面的黑部川河景果然不錯,昨晚由於太黑所以睇唔到對面的山景。咁神心一早起身當然「指定動作」又係先去浸浸溫泉吧!



浸完溫泉食埋早餐之後都差不多10點幾,又係時候出動在宇奈月市內走走。上圖是溫泉街上的宇奈月公園,圖中的涼亭其實是一個「足湯」,大清早已經有唔少遊客在浸腳。



宇奈月本身只是個溫泉度假小鎮,來這裏的遊客多是為了浸溫泉和乘小火車遊黑部峽谷,小鎮本身其實沒太多特別景點。



沿著呈弧形的黑部川河邊一直走出大街,有不少為遊客而設的手信店,例如上圖左的福多屋果子店,大門口還有個類似藏傳佛教的經輪;再行過少少又見到一間很有歐陸味道的莫扎特cafe。



上圖左喱架綠色一人車是環保電動車,就擺在途經的宇奈月觀光案內所門前,基爾當然不會錯過上去試坐玩一陣,又真係幾爽喎,感覺似細個時玩的碰碰車!如果香港都有喱種迷你車可以在馬路上行走,一定好多人會買來代步。



沿大街一直再往前走就回到昨天來過搭小火車遊峽谷的宇奈月溫泉站,由於來往的火車班次不多,即使走在火車軌上影相都沒太大問題。



宇奈月溫泉站最特別的就是站外這個溫泉噴水池,顧名思義池中噴出來的並非一般的水喉水,而是名副其實的溫泉水,幸好沒遊人誤以為是足湯溫泉。



再從另一角度影下個溫泉噴水池吧!由這個角度可以拍到噴泉冒出熱辣辣的水蒸氣,說是溫泉噴水池一點也沒花假。



上圖右是火車站對面的宇奈月警署,玻璃窗裏擺了個立山警察吉祥物,個頭真係成座山咁幾有趣;上圖左是旁邊的手信店,這種西瓜綠茶雪糕聽說幾出名。



警署門外的告示,向遊客講解登山須注意的事項,包括不可隨意留下火種之類,以防發生山火。



本來之前在酒店reception查詢過火車時間表,有一班特別班次火車往富山站開11:55am,反正來到火車站為求隱陣就再check一次,點知發現原來那班車已取消,只餘下11:10am,本來諗住行埋過去山彥橋的大計也要告吹,即時9秒9跑返溫泉旅館check-out拖埋篋飛跑返火車站搭車,幸好也趕得及……連續兩次也趕頭趕命真是暗捏一把汗!



來到富山站其實只短暫停留轉車,目的是再搭1:00pm開出往高山的列車,中間只有20分鐘左右當然不再出外四圍逛了,費事一陣又要玩「生死時速」!老人家實在沒氣一日趕幾輪車了……大約2:30pm就來到高山,立即先去市內食個late lunch,以免餓壞!



問問火車站外的旅客中心,看看會介紹什麼食店,服務員很快就指了這間丸明和牛烤肉店,即管去看看。



其實基爾2008年也來過一次高山,當年剛巧這間很出名的丸明因以低檔牛肉充當高價貨賣而被控告,現在復業應該不會再呃人了吧!



高山以飛驒牛著名,與神戶牛同屬黑毛和牛品種,很多人都知和牛分5級,據聞飛彈牛就介乎3-5級之間,價錢不算太貴而味道亦ok,連平時不太食牛的基爾也破戒吃了不少。



食完飛驒牛之後再去著名的三町古街行多一陣,不過這時雨越落越大,行到去紅橋竟然維修不開放,好彩幾年前有來過,都無所謂啦!反正落咁大雨都無乜心機繼續行古街,索性慢慢閒步返火車站,準備搭6:45pm開出的列車回到這次旅程的起點也是最終站:名古屋。

51 則留言:

  1. 架環保車外形幾得意,淺綠色都唔錯...

    回覆刪除
    回覆
    1. Ka:試坐過上去,都幾好玩^^

      刪除
    2. 明明係有√ 〝通知我〞但...你呢個回覆收唔到嘅!^_^

      刪除
    3. Ka:咁奇?!!係咪記錯咗第二個地方先?!!

      刪除
    4. Gael 哥嘅blog 點會記錯喎!:D
      可能我用手機√ 〝通知我〞需要D時間才收到啩!
      因我只收到你其他blog 友D留言...是下午9:48 果D才收到呀!^^

      刪除
    5. Ka:咁今次喱個回覆又收唔收到呢?!!^^

      刪除
  2. 回覆
    1. 王子:幾好玩,可以回憶返以前玩碰碰車的感覺

      刪除
  3. 回覆
    1. JJ:都驚架,我熱底,易喉嚨痛,幸好有源源不絕的冰茶供應,有降火作用^^

      刪除
  4. 一追再追都冇遲到,基爾哥哥有氣有力,寶刀未老!

    回覆刪除
    回覆
    1. 摩:追蹤一些生活最基本需要,原來早不缺少~~~XXD

      刪除
    2. 摩:通常危急的時候,人都可以表現得超乎常限:P

      刪除
  5. 邊浸溫泉邊飽攬無敌山景,好享受!

    回覆刪除
    回覆
    1. Joice:喱間個山景view不錯,同之前在室堂和彌陀原又有不同感覺^^

      刪除
  6. 小鎮風情很簡樸,有少少太陽喎,影相會靚D。

    回覆刪除
    回覆
    1. Samwei:絕對係,好天同落雨差好遠,去到高山時真係無乜心機影:P
      宇奈月個鎮仔都係超細,店舖都唔多間,香港一條村都大過佢hahahaha

      刪除
  7. 又唔坐響環保車上, 影張型仔相?!!!!!
    等我地blog友可以一睹gael兄在環保車上的風采……

    回覆刪除
    回覆
    1. 森:有影架,不過唔post啦,一陣又會畀人話睇到悶hahahaha~~~!!!

      刪除
  8. 這類日本小鎮真係好有風味!

    回覆刪除
    回覆
    1. Wan:來的人都係主要浸溫泉和搭峽谷小火車,很有度假feel的小鎮^^

      刪除
  9. 謝謝分享! 你對這地方好熟悉啊!

    回覆刪除
    回覆
    1. Candy:唔熟架,都係第一次去架咋:P

      刪除
  10. 睇黎基爾你好似好鐘意浸溫泉,哈哈 :D
    我覺得係日本小鎮唔洗去特別景點,小鎮本身既建築﹑環境已經好吸引啦>.<

    回覆刪除
    回覆
    1. Matthew:你又鍾唔鍾意?!^^ 其實我最初都唔算太鍾意,不過浸過幾次就有點點上癮!
      很relax的感覺,如果可以留多一天多點時間四圍行下更佳

      刪除
    2. 我都未浸過>.<
      住過一次溫泉酒店,本來想食完飯去浸,但食完飯灘係床上就訓著左......

      刪除
    3. Matthew:kakakakaka~~~又會咁嘅XXXD
      不過聽人講最好係飯前浸喎!!!!

      刪除
  11. 我都好鍾意行三町古街架!! ^^

    回覆刪除
    回覆
    1. 蜻蜓:即使唔買嘢齋行都幾舒服,風景又靚

      刪除
  12. 我們幾年前都有去高山和名古屋,時間關係沒有再北上,原來高山和富山咁近

    回覆刪除
    回覆
    1. Lucamom:係呀都算幾近㗎,睇上面個地圖就知^^

      刪除
  13. 去到一定乜都試下,就算唔係頂級牛,應該ok嗎?
    西瓜綠茶雪榚,好吸引呢!
    ps. 今日買$60 嗰套郵政總局,好正

    回覆刪除
    回覆
    1. BIM:ok呀,其實我要求也不高:P
      喱個配搭唔錯,夠清涼感^^
      嘩!~~~已經買了?!!我還未去拎呢!我見到sample都幾靚嘅

      刪除
  14. 「生死時速」係旅途中出現一次半次好了,太辛苦~

    回覆刪除
    回覆
    1. Silver:尤其係拎住重嘢果陣仲攞命XXXD

      刪除
  15. 日本好吸引,不過幅射又讓我卻步。

    回覆刪除
    回覆
    1. ka:我諗如果只係去几日就唔駛太擔心嘅^^

      刪除
  16. 日本真是一個不能抗佢的好地方,去過一次就會上引............

    回覆刪除
    回覆
    1. Choa:雪山湖泊峽谷小鎮都有唔同風貌,嘢食又比較啱口味,最重要係唔駛坐太耐飛機^^

      刪除
  17. 綠色車仔好得意,不過怕唔襟撞。要揸的話要車牌嗎?可以揸出馬路?

    回覆刪除
    回覆
    1. Desa:咁我又唔知駛唔駛車牌,不過在喱類小鎮可以揸,因為啲小街本身都幾窄無乜大車行

      刪除
  18. 迷你車好可愛,如果香港有真係想要一架!

    回覆刪除
    回覆
    1. Momomom:不過香港我諗未必可以行馬路,交通法例未必許可吧!

      刪除
  19. 應該出張lam雪糕嘅自拍照呃like嘛! :P

    回覆刪除
    回覆
    1. Bugs:會唔會驚嚇咗少少呢?!!XXD
      驚會畀人炸blog喎XXXXD

      刪除