2014年5月28日 星期三

2Q13秋見信州@名古屋港水族館

「有生以來一次也沒去過水族館,因為一直居住的那個地方沒有水族館……反正海底有很多東西。水裡面差不多所有的東西都從水裡吸氧來呼吸,有好看的,有好吃的,也有危險的傢伙、氣色不好的傢伙。對沒實際見過的人,很難解釋海底是怎樣一個玩意兒……」



睇完動物園之後就兵分幾路,部份友人集中火力去「血拚」;基爾則選擇往水族館進發。



由東山公園站出發,要轉兩次地鐵才來到臨近名古屋市海濱港口地區的名古屋港水族館外,車費要¥320。



來到名古屋港站一出地鐵感覺同市區已經好唔同,四周建築物似乎都係低密度住宅區,樓房低矮沒太多商業大廈之餘,也彷彿聞到海洋的味道。上圖左是名古屋港水族館外的甜品店。



港口上除了有很多遊艇停泊外,還有上圖喱艘橙色的南極觀測船富士號,它就停泊在名古屋港水族館外的海傍公園旁邊。富士號於1965年建造,由60年代至80年代初是日本主要的南極觀測船,直至1983年才由新建造的白瀨號取代。



富士號退役後回航日本,於1985年開始停泊在名古屋港成為南極博物館的一部份。上圖為港口公園的海豚雕塑,晚上會亮起燈飾非常靚。



來到名古屋港已經成兩點鐘,都係先吃點東西才入館吧!就在水族館旁就有個大商場Jetty,唔諗咁多就在商場入面個food court吃午餐吧!



這商場可能因為偏離市中心區,人流也不是太多,而且food court食店的選擇也不少,完全唔駛愁搵位醫肚的問題,而且價錢都唔算貴,¥1000以下已經有set lunch。



由於整個下午都係諗住在水族館參觀,為免行行下又肚餓都係在Lawson便利店買定多個¥105麵包準備晏少少在館內有得食。



名古屋港水族館的門票比較貴,要成¥2000,最笨係來到才知原來東山動植物園和水族館有套票優惠,如果一齊買可以慳返百幾蚊港紙。



入到去水族館主場館入面,立即已被這個藍色大魚缸吸引了,不少人都在這裏躊足,唔知睇乜呢?



原來係睇殺人鯨,除了細個時去海馬公園睇過殺人鯨之外,基爾就未睇過這種海洋巨無霸了,現場近距離睇真係比大象還要大隻,當牠游過面前時真係好壯觀。



聽館內的訓練員講解,原來名古屋港水族館是全日本規模第三大的海洋館(最大的是在沖澠,第二位忘了是否在橫濱)。上圖是殺人鯨旁的海豚和海豹水族箱。



當巨鯨游過面前時感覺都幾震撼!訓練員說殺人鯨和海豚海豹都是比較聰明的海洋哺乳類動物,訓練員將超聲波發聲器緊貼魚缸玻璃面上,就可以吸引到好奇的殺人鯨游過來,還可按訓練員的不同手勢做出各式水底動作,都幾有趣!



另外還看到比較少見的白鯨,牠的體型僅較一般海豚大少少,屬於體型較小的鯨類,主要棲息在北極海洋一帶。基爾第一次聽到牠那種尖刺的叫聲幾特別,看來經常帶笑的面容也挺可愛。



睇完海洋巨無霸之後再去行下其他海洋生物展廳,來到黑漆漆的珊瑚廳時立即被各種色彩繽紛不同形狀的軟體硬體珊瑚深深吸引。上圖還可見到小鮑魚和海膽。



值得一讚是日本人在設計這類大型水族箱時也很花心思,除了打燈方面營造出淺海和深海感覺之外,遊人拍照時也很方便,玻璃缸面很少會反光。上圖是幾種有趣的珊瑚魚和色彩奪目的珊瑚蝦,之前行旺角金魚街時才知這類蝦仔售價不菲。



當然這裏的遊人也很守規矩,絕對遵從館內禁用閃光燈的規定。其實基爾也覺得只要遊人肯嚴守規矩,讓遊人在館內拍照也問題不大,只可惜大部份到香港博物館參觀的人都不守規矩所以館方也索性一律嚴禁拍照。



除了有最具代表性的小丑魚外,還有各式瑚珊魚群可看,見到一大群珊瑚魚群一湧而上的壯觀景象,真有點置身大堡礁的感覺!



上圖喱種一粒粒形狀的軟珊瑚都幾可愛,似一大堆蠶蛹堆疊起來一樣,成日形住隨時會有alien破蛹而出……



活生生會蠕動的海參和尾巴勾在珊蝴上隨水流飄蕩的海馬群,平時看電視播的海洋生物紀錄片就看過,真實的海參和海馬就不多機會見到。



說來有點失禮,基爾還沒去過海馬公園的水母館,來到名古屋才第一次有機會參觀這類水母館。近距離欣賞水母在水中的泳姿,才發現原來是這麼優美的。



最後還參觀了部份棲息於深海的海洋生物,由於深海水壓較強,陽光也不能照射到,所以經常會有很多外貌奇特的魚類和吃浮游生物的蝦蟹棲息。上圖是體型恍如巨的海鰻,外貌看來非常兇猛。



上圖是另一種可以用魚鰭「站」在海床砂礫上的深海魚;右圖則是棲息在北海道深海的長腳蟹。這類深海魚缸除了有較強的水壓外,燈光也會盡量調暗模擬出深海的棲息環境。

53 則留言:

  1. 今次個close up係咪想俾人知你打咗botox??
    係時候剪指甲喇!

    回覆刪除
    回覆
    1. 你唔講我都冇留意添!嘿!隻眼鏡遮住d魚尾紋咋!

      刪除
    2. 留指甲可能要搣生果俾人食喇!kaka..

      刪除
    3. 咁難得唔係鼻C咁大 jj 都留意唔到!!
      搣生果人哋一啖,自己一啖. Sweet!!

      刪除
    4. 王子:一場去到日本仲打乜鬼Botox,索性大裝修整返個都教授look啦傻佬kakakakakaka
      去咗旅行成八九日又無帶指甲鉗,去之前又唔記得剪咪變成咁囉,好正常啫!

      刪除
    5. 王子&JJ:我最憎搣生果,咁鬼煩~~~~切咪得囉!

      刪除
    6. JJ:用黑超遮住d魚尾紋喱一招你都識,咁你一定係好有經驗kakakakakaka

      刪除
    7. 我太out, 要google先知都教授係乜水.

      刪除
    8. 好奇怪喎!魚尾紋我冇o架!魚頭紋就有呢!kakaka................

      刪除
    9. 王子:你如果想整要先漂白咗先kakakaka

      刪除
  2. 那些軟珊瑚影得好靚...螢光藍好耀眼~~
    條殺人鯨真係好大!!佢游過來的時候, 你有冇怯一怯呢??
    仲有gael兄...你想留風水甲咩??!!

    回覆刪除
    回覆
    1. 森B:唔靚就唔敢post出來驚畀森兄笑丫嘛:P
      都有少少,因為真係好大條的,比大象還要大得多!
      咩係風水甲?純粹係去咗八九日旅行,所以長咗好多,其實下次真係要帶定指甲鉗方便D

      刪除
    2. 你講得就講…幾時笑過你先??
      最大的哺乳類動物係鯨類, 一定大過象啦!!
      有些人驚尾指唔夠長, 要留指甲補長些…稱之為風水甲!!謎信嘢~~感覺又怪又污糟啫…從911之後好似唔可以帶指甲鉗上機…唔知此例而家有冇改呢??!!

      刪除
    3. 森B:驚定先丫嘛XXXD
      對,好難想像藍鯨有幾大條@@
      原來如此~~~我有時都見有啲男士係會留指甲,原來係關風水事!
      係呀依家都唔可以handcarry指甲鉗上機,一定要寄艙!

      刪除
  3. 佢話第三大,我估係講入場人數?
    第一沖縄、第二大阪海遊館、第三名古屋。

    回覆刪除
    回覆
    1. Koosan:原來如此,好彩有你解開喱個謎團,thx^^

      刪除
  4. 海洋世界很美呀,比多百幾蚊我都唔捨得,不過自己無做功夫,抵比啦。

    回覆刪除
    回覆
    1. Samwei:係啦唔知點解動物園果邊又唔提人地,如果唔係就可以慳幾百円都好丫嘛!
      同埋無時間上去睇南極船都有少少浪費咗

      刪除
  5. 犀利!殺人鯨都有得展出。至於水母館,海馬公園那個實在係好精采架!

    回覆刪除
    回覆
    1. Wan:有殺人鯨呀,都幾大條!
      未去過呀,我諗應該係咪都幾大間吧?!!

      刪除
  6. 回覆
    1. 蜻蜓:鯨豚類其實真係幾聰明的,佢聽到訓練員貼在玻璃缸上的超高頻發聲器就會自自動動游過來,好盞鬼!

      刪除
  7. 喺咪架:-P
    從來無去過海水公園??

    回覆刪除
    回覆
    1. 路霸:唔係未去過,只係好細個時去過一兩次啫^^

      刪除
  8. 嚮往海底世界,可惜我不會游泳!

    回覆刪除
    回覆
    1. 摩:咁襯暑假向肥魚拜下師叫佢教你囉^^

      刪除
  9. 上次去過大阪海洋館都覺得好過海馬公園……
    其實日本人大多數都得守規矩,有時自己都覺得汗顏……
    你部相機都唔錯,唔用閃燈都影得咁正!

    回覆刪除
    回覆
    1. 小妹:大阪果個係咪都係近海邊?我都未去過呢
      係呀我覺得日本人一般都好有公德,可能係國民教育做得好
      只係用傻瓜DC而已,不過佢地博物館啲打燈係設計做得好好,顧及到參觀者的影相角度,可以做到盡量減少了玻璃的反光程度,這方面好有學問,香港啲博物館其實都好應該去取下經啦

      刪除
    2. 係大阪海旁邊……你睇睇我揀得出嚟見人嘅相就知難道高啦!http://xiaoxiaomei2013.blogspot.hk/2013/12/day-7.html

      刪除
    3. 小妹:都唔係丫,影得都OK,如果叉足電更佳^^

      刪除
    4. 小妹:見你放假去旅行和行山應該都有好多練習機會啦^^

      刪除
  10. 我都有去過水族館,就係海馬公園個個囉,不過而家海馬公園新個個水族館感覺上冇舊個個咁好睇....
    殺人鯨真係好大條好正 XD

    回覆刪除
    回覆
    1. Matthew:點解,唔係新果個大啲架咩?
      非常巨型,好少有機會咁近見到^^

      刪除
  11. 其實水族館真係貴得有道理,要用好多能源去保持水溫,水壓,又要成日換水,又要洗魚缸,又要餵魚。。。
    見到咁大條殺人鯨,我只係諗個玻璃會唔會爆。。。。。。。。。!

    回覆刪除
    回覆
    1. Lucamom:照咁計又係喎,水費都要貴好多!
      應該都安全嘅,我諗個玻璃缸最少有一米厚吧

      刪除
  12. 好多嘢睇 , 我都情願行水族館 , 觀賞下水底世界 , 雖然係人做但都好真實吖 .

    回覆刪除
    回覆
    1. ak:係呀去旅行時如果時間許可我都盡量去行下當地啲博物館,可以認識更多當地嘢^^

      刪除
  13. 水族館都好多野睇,特別係粒粒形狀既軟珊瑚夠特別.

    回覆刪除
    回覆
    1. Andy:係呀喱種珊瑚未見過,個樣幾得意的

      刪除
  14. 海洋館唔錯,愛美麗的珊瑚哦!

    回覆刪除
    回覆
    1. Choa:好難得可以一次過睇咁多唔同珊瑚^^

      刪除
  15. 幾多嘢睇囉!
    我試過在韓國商場地牢看水族館,交通是方便,費用也較平,但少很多嘢睇!

    回覆刪除
    回覆
    1. 說:商場都有水族館又幾方便喎,係咪唔駛入場券?

      刪除
  16. 我也喜歡殺人鯨及白鯨, 期待有一天, 我可以在大自然中遇見牠們...

    回覆刪除
    回覆
    1. 魚:白鯨個樣都係好鬼Q,殺人鯨個身有黑白流線紋,我成日覺得佢似穿了泳衣XXXD
      野生的我諗真係好少,我諗要去到好偏遠的海岸先有可能見到吧

      刪除
  17. 係呀, 仲要係凍水域先有機會.
    白鯨很罕有, 要好好珍惜佢地, 不過我知國內某水族館買了幾條, 希望佢地有心去管理啦.

    回覆刪除
    回覆
    1. 魚:內地會請好多海洋專家照顧佢地,都應該安全嘅^^

      刪除
  18. 一粒粒形狀的軟珊瑚&水母好靚!
    咦!仲有海馬添!^^

    回覆刪除
    回覆
    1. Ka:係呀幾有趣,未見過喱種珊瑚
      水母都靚呀,游水姿態好悠閒
      海馬條尾勾在海草上好過癮

      刪除