2014年5月23日 星期五

城市印象古董九巴展@中環城展館

記得去年9月九巴曾經將古老的丹拿A型雙層巴士運到尖沙嘴歷史博物館前展覽,吸引唔少愛懷舊的巴士迷去參觀,可惜當時基爾事忙而錯過了;幸好最近這輛古董九巴又來到中環展出,今次真係唔可以再走雞,就趁喱日紅字假可以早收工特登出去睇!



假期出到中環除了多外傭之外,最特別莫過於可以在遮打道打橫行,即使企定定在路中心影相都唔怕畀車撞。從這個角度看中環好似又別有一番景象喎!(注意:假期限定!



大鄉里基爾平時絕少出中環,今次也是第一次去城展館,它就在大會堂底座隔籬,途中必須經過大會堂的後花園,除了唔少外傭載歌載舞開大食會外,基爾還留意到原來花園大鐵閘上仍保留了上圖這個殖民地徽號,今時今日可說是碩果僅存吧!當然仲不忘要同60年代建成的大會堂影張靚相留念,因為聽聞港府有意將它拆掉重建……



大會堂低座外面以前已經係皇后碼頭海旁,現在已經填海填出大片土地,這次的「城市印象@連繫:從點到點」展覽就是在這裏展出丹拿A型古董九巴,上圖是圍欄掛著的海報。



這輛經典的丹拿A型紅巴士原來已經有逾半世紀的歷史,早在1949年它是首部由英國引進來港的雙層巴士,應該比好多blog友都年紀大吧!



它原來仲有個很長的原名,叫做Daimler Commercial Victory Gardner 5-cylinder,因選配了吉拿Gardner5氣缸引擎而得名,採前置引擎半駕駛艙設計,外貌有點似「烏嘴狗」,這也是它的匿稱。



看展覽資料介紹才知,原來丹拿A型巴士由40年代一直服務到1983年才退役,基爾細細個跟住基爾媽和基爾爸去街街時應該都有搭過。



一場來到當然唔剩只睇古董巴士,順便再行埋旁邊的展城館吧,因為地下一層還有個九巴歷史和巴士模型的展覽!



展期原本係到5月19日止,不過聽聞由於反應唔錯,所以展期延長到5月26日,有興趣不妨去睇下。上圖是其中一個模型展品,基爾印象中未見過這座舊尖沙咀火車站大樓(現時只餘下鐘樓),其實如果當時保留下來就可以活化為藝術館也不錯!



除了有各式各樣類似Tomica盒仔巴士模型車之外,仲有好多黑白老照片,上圖右就是昔日尖沙嘴火車站外的天星碼頭巴士站,總覺得鐘樓外貌襯舊火車站多過登摩流線型的文化中心。



展覽中比較矚目的仲有上圖喱8架仿真度極高的1:13手造巨型巴士模型,當中部份不只路線牌可以轉動,車門及車窗還可開啟,模型內配置上下層車廂燈、煞車燈,後車燈燈組更附有後車警示聲響,手工極其細緻,聞說每輛模型巴士造價就要逾萬元!



單看模型巴士可能未必很有趣味,如果配合埋佈景效果更佳。除了舊尖沙嘴火車站外,還有上圖的70-80年代徙置區及唐樓造景,連外面曬晾的衣物和樓下的雜貨店也一應俱備,重現了當年舊巴士年代的社會民生面貌。



上圖左是唐樓造景,右面則是80-90年代公屋造景,樓下車水馬龍的盛況似重現了粵語長片中的真實畫面,班馬線、街燈和路人全部都做得很精緻,巧奪天工。



另外上圖喱個就是90年代油尖旺舊城老區的模型,馬路上已見到不少熟悉的新型冷氣巴士,與舊區城景構成有趣的對比。



有冇人玩過喱類陳年遊樂場的鞦韆、滑梯和氹氹轉,基爾記得細個時行上去那座足足有兩層樓高的滑梯都有D腳仔軟,完全無任何安全設施,奇就奇在以前好似唔怕會跌死D細路,若是依家就一定會畀人投訴了。



全場最壯觀係喱個蒐集了45部1:76經典巴士模型(包括全球首部空調雙層巴士及三門巴士)的大飾櫃。除了喜歡看古老獨特的單層巴士外,基爾還留意到以前返學時會搭的三門「丹尼士巨龍」原來已經靜悄悄消失了,這種巨無霸於80年代由英國引進,車長達12米,採3門設計(包括車頭上車門和中後兩處落車門),載客量達150人。可能今時今日鐵路越起越多,跟本唔駛再有咁大架巴士而被淘汰了吧!



睇完巴士再行埋上面幾層的城展館,不過其實都無乜特別野好睇,上圖是往二樓的扶手電梯旁的仿舊區霓虹燈招牌;圖左是一幅約有十平方米大的維港兩岸城市模型,最搞笑係聽到有遊人問在場的工作人員喱個大而無當的模型到底有乜特別意思!



說城展館是基爾去過咁多間博物館中最無聊的也不誇張,基本上所有展品對香港本地人來說完全係「零吸引力」,嚴格來說只是用了各種動態展板介紹香港城市發展的歷史,手法老土又沉悶。上圖喱幅20世紀初的尖沙嘴地圖算是比較吸引基爾的展品,原來尖沙嘴以前真的有個小沙灘。



再上多一層就係所謂的「資源中心」,基爾很喜歡這裏的閣樓式迷你圖書館,設計感覺上幾in,可惜展出的中英文書刊實在少得可憐!聞說港府有意拆卸大會堂重建,其實大可索性將整間城展館變身為新大會堂圖書館還來得實用。



點解基爾咁鍾意喱間城展館?單看上圖喱個相信價值逾億的無敵維港view已可見一斑,其實整間城展館的「硬件配套」肯定是世界一流的,相信也耗費了不少納稅人血汗錢而建成。其中基爾最愛3樓喱個無敵向海大露台,如果擺放幾張藤椅坐在這裏看書,也可舒舒服服地度過一個悠閒的下午,你話幾正!



奈何裏面的「軟件配套」常設展覽實在太無聊和弱雞,上圖是其中一處仿地鐵車廂的設計,基爾都無乜心機仔細睇佢究竟係在介紹什麼,大致也是一些香港城市鐵路網絡的發展吧!



簡單逛了幾層展廳一圈見無乜特別野睇,再去個廁所就走人了,離開時也替城展館拍一張外貌靚仔相。真的很期待將來它索性變身為新大會堂圖書館,到時就不會只淪為「厚多士」自由行們嘆冷氣和歇腳的地方咁浪費!



中環大填海之後,基爾都未來過這裏,一於由城展館行過去天星碼頭吧!原來依家行過去都唔係好遠,由這裏還可一直行到灣仔會展海旁,等第時起好條港島海濱公園長廊都真係會幾正喎!聽說9月還即將有個巨型Central Eye摩天輪開幕,到時一定又會好墟陷!



假日搭天星過尖沙嘴原來都幾多人,基爾坐下層都全船爆滿要企位,同以往拍烏蠅的景象有天壤之別,不過番鬼遊客不算太多,佔七八成都是高聲傾偈擾攘爭霸位的「厚多士」,令人有點頭痛。上岸後又是成街人,見D遊客大熱天時仲要排長龍賣雪糕其實都真係幾神心又幾可憐;順手又影張星光行,因為聽聞又係即將拆卸云云,如果時光倒流仲有舊火車站,相信更吸引基爾去影相!



雖然人多,但一場來到點都要行埋過去海港城門口睇蜘蛛俠,當然又係人多到無朋友,費事同人逼(也真係有D驚會無端畀人鬧厚多士),唯有離遠望下影下就算了。順便又行過去1881睇下有乜展覽,上圖喱隻LostDog巨型黃狗最多人圍住影。



依家假日除了旺角西洋菜街多人唱歌和街頭表演外,尖沙嘴碼頭巴士站邊都有幾群年輕人在夾band,上圖喱pair結他女郎記憶中好似係唱《後來》,都唱得唔錯架!



橫掂都係行埋去藝術館,今期館外有「刻畫人間」的戶外雕塑展品,唔少人走埋去玩排隊影相幾過癮,可惜基爾得一個人就無謂喇,純粹去感受下人地D歡樂氣氛已心滿意足!



近科學館這邊仲有好多擔遮銅像雕塑,很配合最近經常落雨的季節,為平凡的大廣場加多些點綴和熱鬧其實也不錯,即使唔入藝術館也可感覺到藝術氣息。



位處花園中心的這個平滑亮麗大青蘋果,換另一角度看又有少少似鳥籠,說像大臼齒也無不可,你又覺得似咩呢?!藝術,有時就是這麼有趣吧……

51 則留言:

  1. 基仔近排咁得閒周圍去呀!

    回覆刪除
    回覆
    1. 打尖呀!打圓呀!打鼓呀!打嗝呀!打喱打o魯呀!

      刪除
    2. JJ:你……沒大礙吧?!!

      刪除
    3. JJ:咁係時候去多次斯洛伐克邊境望吓樹林減吓壓XXD

      刪除
  2. 基爾見識廣博,那會是大鄉里!現在的模型巴士好貴!

    回覆刪除
    回覆
    1. 說:非常大鄉里,好多野都未見過呢^^

      刪除
    2. 那麼,我就是超級無敵大鄉里了!哈哈哈

      刪除
    3. 說:咪謙啦你^^通常見識廣博又多生活歷煉先寫到小說做到說書人嘅!!!!

      刪除
  3. 回覆
    1. JJ:你同王子應該都有坐過啦,所以咁有緣做到blog友XXD

      刪除
    2. 咁我哋三位老人家去老人中心慢慢頃

      刪除
    3. 王子:都好喎!不過你果邊生活費咁貴,驚到時好快用晒啲MPF,就要靠你接濟我喎!!!XXD

      刪除
    4. 睇尼基仔有排儍呀!等你儍完先講喇!

      刪除
  4. 閱讀你的網誌,讓我看到許多沒機會去看的展覽。

    回覆刪除
    回覆
    1. 摩:我一也樣,看你的blog可以看到好多沒看過的舞台劇和演唱會^^

      刪除
  5. "城展館無乜特別野好睇"...仲諗住得閒去行吓添!
    你有冇上去架"丹拿A型紅巴士"度扮司機呀?

    回覆刪除
    回覆
    1. 卡:無乜野睇,如果想去嘆下冷氣也可以kakakaka
      無得上去架,只可遠觀,有點嘥料><

      刪除
  6. 嘩!果隻巴士我細個都坐過!

    回覆刪除
  7. 英國這個月都有巴士展,不過我無留意細節,有可能分散在倫敦不同地方。

    回覆刪除
    回覆
    1. Samwei:咁如果行街見到影D來看看^^

      刪除
  8. 呢啲巴士模型做得好仔細~~而且整個展覽好憶舊, 是很多港人的集體回憶,肯定好多人去睇去影相~~

    回覆刪除
    回覆
    1. 森B:我去果日都幾多架,不過城展館入面啲展品唔算好多,唔算好吸引

      刪除
  9. 好鍾意睇啲巴士模型,可惜冇地方擺!

    回覆刪除
    回覆
    1. Wan:咁如果有時間就去睇下個展覽囉,仲有幾日架咋

      刪除
  10. 巴士+ifc 個感覺又幾得意,一新一舊配合 XD

    回覆刪除
    回覆
    1. Matthew:要攞喱個角度都唔容易架,好難先就到XXD

      刪除
  11. 那「青蘋果」...... 不是皇冠嗎?另外,什麼是厚多士?

    回覆刪除
    回覆
    1. Desa:綠色的皇冠??!!!!我諗唔會有好多皇帝想戴吧kakakakakaka
      你上YT再search「厚多士」就有片睇架啦

      刪除
  12. 唔知有呢展添, 不過到5月26日, 無機會去影喇!!

    回覆刪除
    回覆
    1. 蜻蜓:展完了~~~~不過可能遲下都會再拎出來展嘅,反正架古董巴仲係度

      刪除
  13. Gael,這兩個展覽出發去西葡時也看過了.

    回覆刪除
    回覆
    1. Andrew:咁遲下我又睇你啲相啦,你一定影得靚過我好多^^

      刪除
  14. 唔睇你個blog都唔知有咁正的展覽

    回覆刪除
    回覆
    1. King:古董巴士始終依家已經唔係成日可以見到,事實上因為牌照問題喱架巴士依家都唔可以真正在馬路上行駛的,雖然佢保護得好仲可以行!

      刪除
  15. 花園大鐵閘上殖民地徽號~好珍貴呀!~我有時間都去影下先得!

    回覆刪除
    回覆
    1. Andy:係呀仲有個龍獅徽號,我諗依家唔常見到,下次如果行開過去大會堂不妨去後花園睇下^^

      刪除
  16. 噢巴士展期已過……睇唔到添!下次如果有展覽可否麻煩你預告我一聲?!好耐都唔該你吖! ^O^

    回覆刪除
    回覆
    1. 小妹:係呀剛剛過咗,咁唯有等下次囉!
      唔知第時歷史博物館仲會唔會再展呢?

      刪除
    2. Gael:不一定要巴士展,就好像K11嘅青年藝術展咁……都可以麻煩你預告我一聲,今個星期六我都會去K11睇下,好似仲有隻六呎高的熊貓响室外呢!?

      刪除
    3. 小妹:係呀花園出面仲有隻大熊貓,唔只6呎喎,係6米高喎,不過果日我約咗人趕住走所以無行出去睇,睇網上人地影出來係好高的

      刪除
  17. 個日行過, 只係影左巴士, 冇入去睇模型.
    反而刻畫人間我想睇下.

    回覆刪除
    回覆
    1. 魚:最衰架巴士唔可以上去睇下囉,如果可以上去就更好了!
      城展館入面其實主要係睇巴士模型同埋啲造景,都幾得意嘅
      刻畫人間之前我都睇過一次,不過今次好似又換咗另一批展品,如果周三有空都想去睇多次^^

      刪除
  18. 還以為是個大青椒。。。。

    回覆刪除