2014年6月20日 星期五

2Q13秋見信州@白川公園

「小心翼翼地摸索著大約是通向前面的小路。樹木越來越威武挺拔,周圍的空氣密度越來越濃。頭上樹枝縱橫交錯,幾乎看不見天空。剛才還洋溢在四周的夏日氣息早已消失,這裡似乎原本就不存在什麼季節……蝴蝶從樹後飛出,款款地在空間移動,重新消失在樹後。」



每次外遊特別容易感受到何為「快樂不知時日過」!話咁快就寫到喱次日本信州之行的最後一篇網誌,在名古屋最後的大半天又有乜野做好呢?



本來諗住搭地鐵再去行一趟名古屋城,不過最後也是作罷,一來唔想太趕來去匆匆(計算過來回車程連參觀城堡只有約2小時),二來慳返D入場費和車費可以lunch食得豐富少少吧!索性就在酒店附近行陣街,部份友人去了百貨公司最後「血拼」,當然分頭行事之前必須先去酒店隔籬買定機場巴士車票。



酒店喱一區其實除了多百貨公司外(包括之前去過的高島屋,還有以前香港都有的松坂屋和三越等),原來仲有幾多公園,例如上圖喱個大型噴水池就位於久屋大通公園的愛之廣場裏,這裏還可望到遠處聳立的名古屋電視塔。



這個久屋大通公園本身確實也內有乾坤,它的地底其實是個多層停車場,大大方便了附近金融商業區上班族解決泊車煩惱。上圖這個貌似紙船的雕塑就建在其中一個停車場出入口上。



由此可見日本人設計公園也別具心思,事實上日本的大城市其實同香港一樣都係寸金尺土,若要在市中心黃金地段起個咁大的公園唔畀人鬧爆浪費土地資源才怪,若內裏原來是停車場就更實用。看來香港政府也應好好去取經……



由於基爾無打算跟友人去血拚(帶來的旅費已用得八八九九),所以穿過久屋大通公園後就分道揚鑣,基爾反而幾有興趣繼續行入去附近D橫街窄巷,睇下會唔會有意外收穫……果然行過幾個街口就見到間古老寺廟。



看門口豎立的告示牌介紹,這間木建的古寺名為勝鬘寺,始建於1573年(約中國明朝萬曆年間),屬淨土真宗大谷派的佛寺,原建於古代信州的清須城,後來藩主將屬地獻歸德川幕府後,於1632年(約中國明朝崇禎年間)獲賜名古屋現今領地重建勝鬘寺,現時寺廟的山門及太鼓樓仍保留300多年前江戶初年的原貌,已列為名古屋市的文化遺產。



睇完古寺之後,繼續睇住地圖行過去白川公園,不過原來個地圖的scale唔係好合比例,結果問了幾個嬸嬸和大叔先找到公園所在地。其實公園的環境也頗清幽,仲有幾棵正在轉紅的楓樹呢!



來到白川公園其實主要係想睇睇兩間博物館,先去看看上圖這間名古屋市科學館吧!單看建築物外貌似個凌空的大圓球就夠晒特別了(至少比尖沙嘴科學館特別吧)。翻看資料介紹原來這間新科學館是2011年才開幕,大圓球是目前全球最大的巨蛋天文館Brother Earth,直徑達35米。聞說館內還有模擬極光和9米高的人造龍捲風讓遊人親身體驗大自然的震撼力。



科學館門票才¥800,其實也不貴(可以睇人造極光和感受龍捲風喎),可惜基爾時間唔太夠,只好在門外看看其他展品吧!上圖喱兩架古董電車和蒸汽火車頭對向來愛看懷舊野的基爾來說就相當吸引。



上面喱架是1936年製的名古屋市電1400型電車,基爾其實都幾鍾意搭喱類古董單層電車,上次去北海道函館時仲見到古董有軌電車穿梭市內;至於名古屋就早已淘汰了,只留下這卡擺在博物館前作古物展覽。



至於喱架B6型2412號蒸汽火車頭也很型,原來這卡火車頭來頭不少,可追溯至1904年明治時代的日俄戰爭,當年主要負責運送軍事物資往前線;二次大戰後轉為民用,主要行走中央線、武豊線和高山線,直至1968年昭和四十三年才退役。



除了睇火車和電車之外,科學館外仲有一支很巨型的H-II型衛星發射運載火箭,是日本首支自主研發的液態燃料火箭,於1994至99年間共發射了7次。



科學館對面這間美術館相對上就比較失色,館外不見有什麼特別的擺設,如果擺一些戶外雕塑相信會加添不少藝術氣息,若單看外觀,可能還會誤以為是間體育館。由於不夠時間無奈放棄參觀美術館,繼續在白川公園四圍逛多陣吧!



公園裏最矚目的就是這個「虹之舞‧白川」大噴水池,是1991年為紀念中部日本放送啟播40周年而建。白川公園於1945年名古屋大空襲時被夷為平地,戰後由美軍駐紮,至50年代後期才歸還日本,由名古屋市政府改建為公園。



見時間差不多,都係時候回程返酒店拎行李,不過路經橫街時發現喱間「自助式」食店,見價錢好平就入去食埋lunch先。食店入面有一整列長長的食物櫃,睇中想食乜就自己拎,湯飯冷盤沙律隨意,擺滿托盤就去畀錢就可以了。上圖右基爾吃的這碗章魚飯才¥280,平過食大記。



食飽之後施施然返酒店,先去reception拎返朝早寄存在這裏的行李吧,去血拚的友人邊可能會咁準時返到,幸好只遲了半個鐘左右,幫手閃電pack好戰利品後要拿拿林推篋去機場巴士站,雖然有點依依不捨,但都要同名古屋講聲sayonara了!



不坐機場鐵路改坐巴士主要原因係巴士站較近酒店,唔駛拎住重篋上上落落地鐵站咁煩,加上價錢又差不多,還是搭巴士較方便。由名古屋市中心到中部國際機場全程幾乎都走高速公路,約45分鐘就到了。



名古屋機場其實都幾多食店,不過之前食了章魚飯仲幾飽,所以都係只睇不吃了。由於買的package是平價CX票,回程要短暫停留台北,合指一算都有好幾年無去過台灣,可惜只是短停兩個鐘當然就不會出外面逛了,不過基爾傻傻下逛shop時竟然蕩出了轉機區域範圍,最後又要重新安檢先可以入返候機室,好彩唔駛空姐嗌咪咁醜……



看到上圖喱個大篋安抵家門,又象徵了一次旅程畫上圓滿句號!不過其實返抵香港機場時還有段小插曲,事源於行李輸送帶拎返個篋時,發現其中一個手抽環被掟至鬆脫,連行李帶也失蹤,友人話可以去CX counter claim維修。果然服務非常周到,幾日後就有師傅登門拎篋去修理,3日後搞掂送返上門,仲附送了CX行李帶一條,要畀個讚!

54 則留言:

  1. 我覺得您的旅遊方式和態度都好好,輕輕鬆鬆去玩,真開心。

    回覆刪除
    回覆
    1. 說:無乜budget所以都係齋行居多無乜點去買野:P
      但都幾開心架^^

      刪除
    2. 現在國際貿易方便,令買手信這樣事都沒有大意。

      刪除
    3. 說:我依家都少買好多,寫網誌已經係最重要的紀念品^^

      刪除
  2. 有次搭SQ去埃及,響新加坡機場stopover取行李時發現新買的TSA approved 行李鎖爛了,好擔心有人打開過行李放入毒品!於是馬上向保安報告,最好無事鬆一口氣,也沒有想過索取賠償。

    回覆刪除
    回覆
    1. Desa:咁你都好醒目喎,第一時間唔係驚人偷野而係驚畀人插贜,喱方面唔講得笑,真係要即時報警以示清白安全啲~~~~

      刪除
  3. 一個結束,幾時開始新旅程﹖

    回覆刪除
  4. 你意思係CX派人上黎收喼去維修,咁好服務?

    回覆刪除
    回覆
    1. Koosan:依家佢地D維修服務都外判晒出去其他公司做架啦^^

      刪除
  5. 以為你唔去名古屋城係為咗睇裸女像添.

    回覆刪除
    回覆
    1. 唔洗審一定係咁喇!kaka.......

      刪除
    2. 係都唔好咁大聲篤穿佢啦!!

      刪除
    3. 王子:都係你睇真人果D精彩好多~~~~XXXD

      刪除
    4. 都叫左你戴返個眼鏡架喇!有個唔字架!

      刪除
    5. JJ:咁仲衰你連陪審團都慳返,自己一槌定音XXD

      刪除
    6. 唓!在JJ國度裡就梗係我判決啦!你唔移民過尼就唔駛驚有事,留返你自家個度歎你嘅世界囉!

      刪除
  6. 人造極光和感受龍捲風...值得一睇!
    趁人唔發覺...乘機遊賣台灣嗎!xd

    回覆刪除
    回覆
    1. Ka:我都覺得如果夠時間行,畀800円入場都值嘅
      唔駛襯人唔發覺架喎~~~因為個package係平價野所以依家好多都要有一程係停台北或者首爾架!

      刪除
  7. 藍馬騮捨得歸家呶!伯友至開心啦!

    回覆刪除
    回覆
    1. JJ:咁我又無本事學王子咁去移民,去旅行日數有限一定有歸期嘅

      刪除
    2. 你大把本事啦!你孝順先唔去移民之嘛!

      刪除
    3. JJ:嘩~~~你咁講會得罪好多人架喎!因住王子唔睬你XXD

      刪除
    4. 唓!你孝順你床下底個d野咋!即係你唔捨得,孤寒之謂也。kaka..........
      每個人嘅移民故事都唔同囉!你咪惟恐天下不亂o下!

      刪除
    5. JJ:拿拿拿~~~~係咪呢成日亂嗡野!
      仲唔快D同王子請罪,從輕發落~~~~

      刪除
    6. 佢唔睬你呢個blog嘅留言咋!你咪去請罪請到夠囉!

      刪除
    7. JJ:費事學你咁講多錯多啦~~~~~

      刪除
  8. 我都試過在香港機場 claim, 不過不是CX, 是機場的怡和,同樣上門交收。個喼用到依家呀。

    回覆刪除
    回覆
    1. Samwei:係呀我覺得喱個維修服務唔錯,如果係掟凹或者掟穿咗仲索性有回水,唔駛整

      刪除
  9. 科學館和香港的那個甚似!

    回覆刪除
    回覆
    1. Wan:都係圓球形,不過香港係坐地半圓球,名古屋喱個就係半天吊整個圓球!

      刪除
  10. 我唔知行李喼被掟壞有得claim維修添 , 謝謝你的分享 !

    回覆刪除
  11. 好在你友人及時提醒...咁你有冇請佢食嘢答謝人呢??

    回覆刪除
    回覆
    1. 森:話明係友人都唔駛計較喱D野嘅^^

      刪除
  12. 戰利品係每個旅行嘅high point, hahhaaa

    回覆刪除
  13. 回覆
    1. Andrew:咁買旅保時要睇清楚包唔包先得^^

      刪除
  14. 很有歐洲味道. 日本的願景是脫亞入歐, 這裡看得出來.

    回覆刪除
    回覆
    1. Peter:我諗佢地未必想做真正歐洲人,佢地只係想做「亞洲人中的歐洲人」而已~~~~

      刪除
  15. ¥800就有得睇極光同感受龍捲風,真係超值丫,兩樣野香港都冇(好彩冇龍捲風咋)
    一個旅程完結就係另一個旅程開始,基爾大大又係時候準備下一個旅程啦 XD

    回覆刪除
    回覆
    1. Matthew:係啦,依家講返我都有D後悔無入去睇,寧願唔去食晏啦!
      咁~~~韓星Matthew哥有乜好提議先^^

      刪除
    2. 基爾大大 XD 不如去九洲or北海道啦 :D

      刪除
    3. Matthew:仲去日本?!!!!!你唔怕睇blog睇到厭咩XXXD

      刪除
    4. 日本咁多靚景,睇幾多次都唔悶啦 :D

      刪除
    5. Matthew:都啱嘅,如果唔係發生福島核事故我諗會去多D都未定

      刪除
  16. 蒸汽火車頭~有啲似(銀河鐵路999)呀!

    回覆刪除
  17. 名古屋未玩過, 不過我都有興趣想睇下人造極光!!

    回覆刪除
    回覆
    1. 蜻蜓:你留意下尖沙嘴太空館天象廳有冇?!!佢有時間中會播極光的影片

      刪除