2014年7月11日 星期五

海馬公園廿載重遊:中@黃竹坑

睇完海洋館和熊貓館當然無咁快就走人,基爾山長水遠來到海馬公園真係仲有好多「新鮮」地方未去過,一於繼續四圍遊下。



由於近年多了大批內地遊客來訪海馬公園,連接山腳山頂的吊車經常大排長龍,早就不孚應用,所以年前就新開通了這列「海洋列車」令遊客上落山的運載量大幅提升。上圖是山腳的海洋列車總站。



既然咁多年無來海馬公園,基爾自然也想試試搭海洋列車的滋味,不過除了比較方便唔駛排長龍等車之外,搭列車其實都幾無聊,因為全程車窗外都係漆黑一片無景可睇,似搭地鐵一樣,只有車頂的LED畫面播出虛擬深海影像片段,幸好車程也不長,大約數分鐘就到了山頂。



從山頂的高峰站一出來真有點海闊天空豁然開朗的感覺,車站外就是一個大觀景台,可以遠眺整個香港仔鴨利洲的南區無敵靚海景。喱日雖然有點熱但幸好煙霞不多視野也較清晰,連南丫島和南海的擔杆列島(上圖左下)都可看見,非常正!



去過海馬公園都知大部份機動遊戲都集中在山頂區,不過由於基爾這次是與基爾媽同行就無謂玩得咁激,而且為免在三十幾度烈日當空下排隊輪候成個鐘會中暑,還是快快走入去「冰極天地」睇下企鵝為妙!



一入到去冰極館果然很有點冰天雪地感覺,除了因為有座南極冰山海岸佈景之外,場內溫度計顯示只有攝氏十度左右!大批遊人都圍在企鵝廳屏幕前影相……



基爾行近睇,見假山上都企了不少企鵝,部份企在岸邊,也有些在水中暢泳,不過基爾始終覺得名古屋海洋館的企鵝廳比較靚,佈景更立體可觀,香港始終地方較淺窄。



「冰極天地」除了有企鵝睇之外,仲有海豹睇,此外還有隻北極熊做「迎賓」,當然那只是假的,館內也沒有北極熊,如果要北極熊住在炎夏的香港也未免太虛待了吧!



雖然沒有北極熊,卻有平時比較少見的海象,見飼養員不斷將魚仔餵給牠吃,間中又會轉過身來玩噴水捉弄圍觀的遊人,又真係幾精靈可愛。



冰極館除了可在岸上眺望海豹海象之外,仲有一條「海底隧道」畀遊人從水底角觀賞牠們的泳姿。在岸上時由於牠們體型龐大行動比較遲鈍,但一落到水裏就非常生猛而且流線的身型令牠們顯得份外敏捷。另一樣要佩服的是海馬公園的「生意眼」,幾乎每個館出口都連接著紀念品店。



睇完冰極館已差不多兩點,都係先去食個飯再行。雖然餐廳條龍唔太長(相對機動遊戲而言)但都排了3-4個字,set lunch選擇也算幾多,不過價錢當然幾貴,焗豬扒飯連汽水就要$90,辣雞肉脆pizza連汽水也要$60,另外還加了個細杯HD雪糕和芒果布甸,幸好有八折券計埋約$140左右。



食飽飽繼續在山頂四圍遊多一陣,行行下又來到「熱帶雨林天地」。喱度同剛才的冰極館又有很大分別,因為大部份地方都係開放式,仲有個機動遊戲「熱帶激流」穿梭其間,即使唔玩都可以向途人射水槍玩濕身。上圖是雨林館裏飼養的絨猴。



狨猴(Marmoset)是現存世上體型最細小的靈長猿猴類動物,成年狨猴身長只有10-12厘米,體重約100克,霎眼睇還以為是老鼠。原產於南美洲亞馬遜原始森林,由於性情溫馴,自古代起已成為印第安人的寵物。除了比較特別的狨猴外,當然不能少了亞馬遜河棲息的食人鯧和電鰻。



除了魚和馬騮仔之外,仲有常見的巴西龜和蜥蜴。另外比較吸引基爾的是另一種中南美洲「原住民」毒箭蛙,牠們每隻恍似都穿了花轆轆緊身舞衣一樣,色彩異常繽紛。毒箭蛙其實正式名稱是「箭毒蛙」(Dendrobatidae),迷你的體型只有1-6厘米長,與狨猴一樣若不留心看幾乎都察覺不到牠存在。



由於毒箭蛙的皮膚會分泌出高濃度神經毒素,只需微量已足致命。雖然牠們有劇毒但由於擁有美麗的外表,所以都幾吸引遊人參觀,上圖喱兩隻就好似鑲嵌在青苔上的藍寶石一樣咁靚。



雨林館裏仲有好多亞馬遜河流域特有的奇異生物物種,例如上圖的海象魚、福鱷和南美紅尾鯰魚基爾都未見過。海象魚擁有尖長的魚頭但龐大身軀有點似龍吐珠;福鱷更有趣,牠似長了個鱷魚頭的大魚,張開血盆大口吃魚時個樣真有點似鱷魚……不過基爾唯一不太滿意的是館裏的燈光效果比較遜色,好應該派人去日本取經,學習人地先進得多的技術,讓遊人參觀時更有趣味!

52 則留言:

  1. 海洋列車對我就好有用,帶BB車撘吊車好麻煩,上海洋列車,最頭/尾一架,全平地BB車直入,方便都不得了。

    企鵝館開張時去過,十度無衫借,好快要走出來。

    回覆刪除
    回覆
    1. Koosan:咁如果係推BB車就真係搭海洋列車方便D,又唔駛等咁耐呢!
      係呀真係好凍,所以都唔敢留太耐驚會冷親!!

      刪除
  2. 有一段時間沒有去過,原來多好多新節目。

    回覆刪除
    回覆
    1. 說:多咗好多唔同巧立名目的館,所以即使無興趣玩機動遊戲的老人家都可以去逛逛吧XXD

      刪除
    2. 可惜我高不成低不就,哈哈哈!要遲些喇!

      刪除
    3. 說:你太謙了~~~!!!好多讀者拜讀你的大作呢^^

      刪除
  3. 你同海馬公園撰文就啱喇!講得咁鬼詳細,不過我就水過鴨背囉!呵呵!

    回覆刪除
  4. 我都幾年無去海馬公園啦, 對上一次排纜車條隊非常長, 最後係坐巴士去另一邊

    回覆刪除
    回覆
    1. Mo:係呀依家入場人數好勁,基本上纜車連接山頂山腳已不孚應用,齋排隊上山落山已經浪費好多時間,一定要增設其他交通工具幫助疏導人潮先得啦!!!!

      刪除
  5. 加左新野後銀仔都未去過⋯ 不過冰極館都幾有興趣,可能早前成日去埋D冰天雪地既地方

    回覆刪除
    回覆
    1. 銀:依家加加下都加咗唔少新館,咁唔駛剩係得機動遊戲咁齋囉,老人家去都可以參觀吓D館~~~~你去過睇真正大自然果D,未必有興趣人工飼養吧??!!^^

      刪除
    2. 都唔係既,近近地去止吓喝都好既~

      刪除
    3. 銀:咁都係,勝在可以近近地,同家人去一日遊其實也不錯,不過都係等天氣無咁熱先比較好

      刪除
  6. 多謝基爾哥帶我神遊 Ocean Park :) Have a nice weekend !!!

    回覆刪除
    回覆
    1. Hamby:第時返來咪去行個圈睇下囉^^
      Nice Weekend~~!!

      刪除
  7. 海洋公園好玩過DISNEYLAND,不過大家都係做生意,當然四處都有賣紀念品的地方啦。

    回覆刪除
    回覆
    1. Samwei:迪士尼比較啱小朋友去嘅,多D卡通人物佢地會開心D!
      紀念品店都係佢地主要收入來源吧~~~賺下遊客錢無可厚非嘅^^

      刪除
  8. 海洋列車真係麻麻地,和想像中差好遠...

    回覆刪除
    回覆
    1. Wan:都幾悶,無乜野睇,黑漆漆一片,有點兒浪費咗~~~但也勝在快,唔駛等

      刪除
  9. 係呀,我都覺得海洋烈車好無聊,勝在快到山頂,慳了許多時間!

    回覆刪除
    回覆
    1. 愚:無錯呀最大好處係夠快,又唔駛排長龍丫嘛!
      不過如果時間夠的話我仍寧願搭吊車,又或者將來再起返條登山扶手自動電梯更佳,至少沿途上山可以望望風景,唔好浪費咗南區咁靚的藍天海岸啦

      刪除
  10. 好詳盡的報導吖~資料又好堅吓喎!!
    正^^

    回覆刪除
  11. 不說也不知道香港有這麼一個好去處. 要去看一看了.

    回覆刪除
    回覆
    1. Peter:同家人朋友去玩返個weekend也不錯呢!!

      刪除
  12. 可能你已經知,不過一見到就諗起集郵的朋友:
    https://app1.hongkongpost.hk/SSL/survey/c_survey_201406.jsp
    「我最喜愛的香港地質景點」網上選舉,每位投票人可獲贈已蓋銷首日封乙個。 :P

    回覆刪除
    回覆
    1. Bugs:多謝你提醒,早知唔駛訂喱套啦原來有得送^0^
      有幾度我都鍾意喎,橋嘴東平洲和大浪灣也很特別很靚呢!!!
      你好耐無新blog啦喎,做乜偷懶?!!!XXXD

      刪除
    2. 好多地方都好有特色,不過最鍾意係鬼手岩。哈哈,好明顯我唔係偷懶,係擺~明~懶! XD

      刪除
    3. Bugs:鬼手岩個造型真係似到十足,離遠睇好嚇得下人XXD
      肥豬石某些角度也相當似!!
      唔好收收埋埋,要勤力D寫畀人睇下先得呢^0^

      刪除
  13. 雨林館不是我杯茶,冰極館啱睇!

    回覆刪除
    回覆
    1. 摩:原來阿摩鍾意凍地方多過熱地方^^

      刪除
  14. 回覆
    1. MD:去全日都唔多夠時間行呢

      刪除
    2. 我睇都覺得腳有啲累,哈哈哈

      刪除
    3. MD:都係架,尤其如果想玩機動遊戲,仲要排長龍,夏天烈日下咪搞~~~~都係秋冬天去比較好一點!

      刪除
  15. 上回去香港没到海洋公园去... 只是从赤柱有经过望几眼:p
    最想玩过山车:p

    回覆刪除
    回覆
    1. Siaw:下次來就入去玩下,不過最好早少少入場,無咁多人,玩機動遊戲就不用排長龍^^

      刪除
  16. Gael:花轆轆嘅毒箭蛙幾吸引人!

    回覆刪除
    回覆
    1. Ka:對,我覺得雨林館入面的毒箭娃最值得一看,佢地D彩色好colourful好靚好特別,而且真係好細隻,差不多只有一隻甲蟲咁上下大,要留心先睇到佢地^^

      刪除
  17. Gael 晚上好,
    海馬公園開幕時, 在下剛踏足社會,
    現今已屆退休之年,實感唏嚧,

    回覆刪除
    回覆
    1. Wahwa:咁真係好值得去參觀下喎,我諗應該同幾十年前有很大分別了!!!其實唔駛唏噓,你體魄咁健壯,一定可以過豐盛的退休生活,慢慢周遊列國嘆下世界先啦^^

      刪除
  18. N 年沒有到這公園 , 現在多咗好多嘢睇喎 , 箭毒蛙顏色好搶眼好靚 , 呢度食嘢真係幾貴喎 , 但這裡地方咁大 , 半天行不完逼住都要幫襯佢 .

    回覆刪除
    回覆
    1. ak:新加咗D館,所以即使怕玩機動遊戲,都有其他野睇下嘅^^
      箭毒蛙很迷你很特別,唔知屯門爬蟲館會唔會有得睇呢?
      一定貴了,因為始終是賺遊客生意吧!不過大陸自由行有的是錢跟本都不會太計較這些花費了XXXD
      山頂和山腳園區都非常大,如果想排隊玩埋機動遊戲更加無可能有時間四圍行下:P

      刪除
    2. 屯門爬蟲館去年去睇過 , 但沒有見到箭毒蛙 , 現在天氣熱怕蚊多 , 等秋涼再去看看 .

      刪除
    3. ak:之前睇報紙都有講屯門公園天水園公園都有蚊患,你都係暫時不要去了,入秋後才去可能會好一點!

      刪除
  19. 熱帶雨林天地,我哋有玩過~濕就濕架喇!~但真係幾好玩!

    回覆刪除
    回覆
    1. andy:係呀如果玩喱個最好要帶定多套衫褲,一定濕身!!

      刪除