2014年7月22日 星期二

茶木台式休閒餐廳@銅鑼灣

喱日收工後拿拿林出銅鑼灣因為約了友人食飯,平時絕少放工rush hour出旺區,幸好又唔算太塞車,不過由於唔熟路結果兜了幾個圈先搵到喱間人氣食店。



話明係人氣食店果然一上到去已經見到成堆人堆在大門口場面異常墟陷,友人由於day-off已早到先拎飛輪位,不過結果都要輪成個鐘真係人都癲!



由於在店門前齋罰企實在太無聊,見部份人拎飛後已率先離場到附近大型商場逛陣街再算,其餘也有人問侍應拎定menu研究下一陣食乜!基爾八卦又去睇睇menu果然價錢多數around$50-$80又唔算貴喎,唔怪得咁鬼死多人啦!



再加上依家旺區peak hour好多餐廳都限時限刻趕人走,但喱間又無喎,這樣有好有唔好,食客固然可以唔駛咁趕,但相對輪候就要耐D!終於嗌到飛入去,餓到死即order了蚵仔湯飯,另外仲叫了黑糖薑母油嫩鴨($56)和上圖右的五香燉肉排($54)。



友人今日係主角佢自己就叫多味噹噹辣子雞($56),基爾雖然唔太食得辣但都食了兩三舊,確實係幾惹味,不過同時也辣度十足,試了小小即掛免戰牌。



至於其餘3味都ok,平時比較少食薑和鴨的基爾都覺得喱味黑糖鴨不錯;五香燉肉排甜甜地似鎮江骨,肉質鬆軟不會鞋烚烚。在menu上見佢個酥炸蚵嗲($62)比較乾身不似傳統台式一pad杰醬那種煎蠔餅,但侍應妹妹又話賣晒,下次如再來真要試下!



來喱間店除了食台菜之外,重點係要食佢地個雪糕厚多士,嬲爆的是佢最正最多人叫果個芒果厚多士又係售罄,咁唯有揀次選的藍莓香草蜜糖磚塊($68)吧!



樓高3層的「厚多士山」切起來又真係幾有切生日蛋糕氣氛,食完成餐飯再食三大塊厚多士本來都驚太飽食唔落,不過原來中間和底層多士係空心的,才不至於太飽。另外原本還想叫個香草大蝦沙律($58)同樣又係話賣晒,咁鬼好生意如果返兜再來幫襯喱間「百冇食店」一定要揀頭輪先得了……



食飽飽再過去隔籬希慎行陣幫助消化,因為世界盃期間喱度有個高橋陽一《足球小將》手稿展覽,之前想過特登來睇但又嫌山長水遠太費事,喱晚行過點都要上去睇睇。幾喜歡上圖右的盧比度叔叔,足球小將粉絲好多對佢都有情意結!



商場外仲有個成3-4米高的小志強塑像,又真係幾型架喎!立即勾起返細個時日日追睇430的日子,每集《足球小將》上半part基本都係重溫上一集劇情,一場波分分鐘踢成個禮拜,難得當年又咁天真無邪日日去捧場喎!



商場另一邊其實仲有戴志偉、麥泰來和林源三巨像,全部都拎足姿勢分。兒時除了喱套經典的足球小將外,基爾最鍾意的還有千年女王、He-Man、叮噹、藍精靈、忌廉、IQ博士、未來警察、高立、美少女……等等,細個睇卡通片又特別入腦(讀書又唔見咁叻),到依家仲記得D主題曲。最後要提提兩齣「神級」冷門卡通,唔知仲有冇人記得笑到人肚孿的天界小神仙和娛樂金魚眼呢?有興趣不妨重溫N年前基爾寫的「追憶卡通年華」老人院系列網誌,一齊回味下兒時的集體回憶!

茶木台式休閒餐廳 TeaWood Taiwanese Cafe & Restaurant
銅鑼灣軒尼詩道489號銅鑼灣廣場一期6樓A舖

56 則留言:

  1. 足球小將食正世盃熱潮,又可以懐念一下,正!

    回覆刪除
    回覆
    1. Wan:係呀佢都係襯住世盃熱潮所以搞喱個展覽啦^^

      刪除
  2. What a coincidence! I have written an article on Dazzling Cafe. I think the service of Teawood is disappointing.

    回覆刪除
  3. 哈哈, 足球小將, 埋門一腳個shot做足一集... >:)

    回覆刪除
    回覆
    1. 蜻蜓:直情係啦,又成日回憶陳年舊事,真係等到人頸長晒XXXXD

      刪除
  4. 回覆
    1. 摩:我更愛你那一餐XXD
      當地天氣好嗎?熱不熱?

      刪除
  5. 我當年都有追足球小將架

    回覆刪除
    回覆
    1. Mo:初初第一輯係幾好睇,但後來的就有點陳套:P

      刪除
  6. 排咁長時間我諗都係唔知會等 XD

    回覆刪除
    回覆
    1. MD:攞咗籌然後出去行街一個鐘返來食剛剛好XXXD

      刪除
  7. 有人請你食飯呀!原來以前你係卡通餸飯嘅!

    回覆刪除
    回覆
    1. JJ:唔係呀,係我請人先啱!
      不會啦,足球小將係5點做,邊有咁早食飯!!!!

      刪除
    2. 睇完卡通就係你個腦度啦!餸晚飯又餸埋早餐喇!

      刪除
    3. JJ:我邊有你咁好記性丫:P

      刪除
    4. 呵!你講大話伸脷嘅!

      刪除
  8. 食物唔貴喎 , 雪糕厚多士幾得意 , 不過要罸企咁耐 , 真係要諗諗先 lu .

    回覆刪除
    回覆
    1. ak:我諗最好都係等佢熱潮過咗先去,到時一定唔駛等咁耐位啦

      刪除
  9. 輪成個鐘真係唔會幫趁啦!

    回覆刪除
    回覆
    1. Stella:所以有D人拎完籌索性先去行陣街^^~~~不過先決條件係唔怕捱餓,因為要等到八九點先有得食!

      刪除
  10. 回覆
    1. mandu:雲呢拿已經無乜顏色架啦喎:P

      刪除
  11. 基爾哥, 今次食完, 咁你覺得值唔值得花上個多鍾頭去排隊 !!

    回覆刪除
    回覆
    1. hamby:同人慶生無乜所謂囉~~~~~如果自己去就無謂啦:P
      其實喱類食肆都係比較啱一大班美少女又或者一相一對拖友去撐台腳的,我喱類中年大叔似乎係有點格格不入,無謂同D後生仔女逼啦 XXXD

      刪除
  12. 在香港每逢開餐時間預佐要等(所以我唔會餓住個肚等...),亦都好佩服香港人甘有耐性 :D

    回覆刪除
    回覆
    1. joice:始終香港真係人太多無辦法,一到食飯時段真係乜茶餐廳乜茶樓酒家都逼滿人排晒隊(即使其實唔太好食的都一樣有人排先奇怪),所以我依家其實絕少出街食晚飯,如果去都盡量揀6點食頭圍,或者揀可以訂位的,比較方便!

      刪除
  13. 3層厚多士睇見都飽一半.

    回覆刪除
    回覆
    1. 王子:其實佢底層和中間果層多士係空心嘅,所以如果share食都唔算太飽!喱個其實好易整,不妨加入去王子私房菜menu,整來tum下賓賓friends^^

      刪除
  14. 就算你請我食我都唔會食,要等咁耐。 不過飯後節目我鍾意,足球小將是我喜歡的卡通片之一。其他你個 list 我都勁愛,真是那些年囉!

    回覆刪除
    回覆
    1. samwei:喱類「人氣食肆」都係試過就算架啦,要等咁鬼耐又無得訂位真係怕怕,而且整體感覺唔係我會幫襯果類,都係啱年輕人情侶多點XXXD
      喱D卡通片都係那些年的集體回憶吧~~~反而今時今日好似已經再無乜經典卡通出現,好多都係打鬥式無乜情節可言,又或者依家小朋友跟本都好少睇電視了,都係打機多吧!!!!

      刪除
  15. wow ... 雪糕厚多士好吸引女生^^

    展览的漫画画得很棒!

    回覆刪除
    回覆
    1. siaw:對,所以顧客也以女生主打!!!
      足球小將可說是八九十年代的經典

      刪除
  16. 芒果厚多士應該好味D!
    around$50-$80又唔算貴...可以一試!

    回覆刪除
    回覆
    1. Ka:應該係,所以一早畀人叫晒XXXD
      價錢唔算貴,加上不設時限,所以也是超多人排長龍的主要原因吧

      刪除
  17. 拎咗飛離開去行商場, 好似過時不入座會cancel, 是嗎?
    黑糖薑母油嫩鴨和芒果厚多士是我的favorite! Yummy!

    回覆刪除
    回覆
    1. Peter:其實過咗八點半打後情況已經好好多,可能因為六點輪入場果D食飽走人~~~~所以即使過咗我諗佢都會畀你入嘅唔駛重新拎飛,同埋我諗D人出咗去行街都未必咁準時返來啦!又或者在外面行街見到心水食肆會食咗先,又未必會返來吧!
      咁你不妨去試下啦,如果去我諗五點幾入場應不會太多人吧!

      刪除
  18. 呢間野真係超多人, 完全冇動力去等位.
    "娛樂金魚眼", 我都係佢 FANS, 好笑又好睇 ! 金比, 華美子, 千歲, 仲有壞旦牛 !

    回覆刪除
    回覆
    1. 魚:其實都仲有好多選擇嘅唔駛同人跟風逼餐飽啦^^
      超鍾意華美子和千歲~~~~XXXD好睇過小丸子好多

      刪除
  19. 人多真係幾頭痕⋯
    足球小將都係我童年回憶,但都後來講到世青杯已無睇lu,覺得太跨張,戰無不勝咁既⋯

    回覆刪除
    回覆
    1. 銀:所以少出街食,怕煩><
      後期果D無乜新突破和新意,所以無乜再追了!!!!

      刪除
  20. 黑糖薑母油嫩鴨和五香燉肉排,都少有。

    回覆刪除
    回覆
    1. 說:黑糖薑母第一次食,但麻麻地;五香燉肉似鎮江骨,有點甜甜地,肉質鬆,唔錯的

      刪除
  21. 真係幾多人吓喎!~噹噹辣子雞睇落幾野味,幾辣吓!
    (雪糕厚多士)覺得幾新奇,味道應該唔錯!

    回覆刪除
    回覆
    1. andy:喱個我覺得幾辣,只試了一舊半舊就投降!
      雪糕厚多士其實可以在家自己整,喱個價錢可以買一罐大Dreyers慢慢食啦XXXD

      刪除
  22. 野食好似幾OK bor,又唔太貴,但最怕就係多人>.<
    而家出去食飯四圍都好多人>.<

    回覆刪除
    回覆
    1. matthew:喱個亦係問題所在,人氣太勁所以都係等佢過咗熱潮先好去比較好!!
      香港跟本就係太多人啦~~~~唔係好想出去D旺區,周街人好煩><

      刪除
    2. 係bor...過一排就ok,之前排長龍既一蘭而家都靜左好多,哈哈~

      刪除
    3. Matthew:絕對係,喱類人氣店都係旺一排架啫,遲啲去就精啲XXD

      刪除
  23. 銅鑼灣一定人多,
    尤幸食物可以!
    可能人老咗太固執
    我至唔like食飯等位,
    所以一定唔會去哩度,
    我亦唔會幫襯新開人氣食店,
    香港人羊群心態嚴重,乜都一鍋風!

    回覆刪除
    回覆
    1. 路:所以我一年都去唔到一兩次,怕人多XXD
      我都唔鍾意,寧願揀有訂座的無咁煩,可能青春已經唔多無謂再咁樣浪費啦XXXXD
      事實上好多想食嘅野都無,所以都幾無癮,反正食肆選擇多,無謂同人逼!!!

      刪除
  24. 「厚多士山」又真的好吸引吖^^

    回覆刪除