2015年2月2日 星期一

2014古都瀟瀟@白鷺之城

沿住一條直線的大手前通由街頭行到街尾,終於來到聞名已久的姬路城。其實離遠已經清楚見到宏偉的大天守閣聳立在姬山的小山丘上,氣勢十足不愧為全日本第一名城。



姬路今時今日在日本雖然不算是什麼大城市,但古時肯定是繁盛富庶的古城吧!單看華麗的城廓已可見一斑,就連古城的外圍大馬路也是4-5線行車,很有點北京故宮城外長安大街的氣派(但當然無咁車水馬龍人多熱鬧)。上圖還可見到原置於姬路城大天守閣屋簷頂的金鯱,鯱是會噴水的龍首魚身瑞獸,古人相信將它擺放在木建築的簷脊兩側(一雌一雄),有禦防火災及辟邪作用。



由護城河外遠眺姬路城大天守閣。其實姬路城外圍的大片公園都係屬於不收費區,相信4月來看櫻花的遊人不少。基爾去時已是12月下旬當然不可能見到櫻花,但見古城外圍就有種了唔少光禿禿的大樹,這些應該全都是櫻花樹了,單單看這些寒冬枯枝,就可以幻想出4月初春櫻花盛放時這裏風景會有幾靚!



入選得做世界文化遺產,點到要講少少歷史吧(唔好嗌悶)!姬路城的歷史可追溯至14-16世紀日本的室町、鎌倉幕府時期。早在昭和三年(1928年)已獲列入日本國家歷史遺蹟,由文部省管理;至平成五年(1993年)獲UNESCO列為世界文化遺產,是日本首個登錄世遺名冊的古蹟。上圖是城外的世遺石碑和保存完好的護城河。



上圖是連接姬路城正門入口的櫻門橋,這座外貌古色古香的木橋橫跨在寬闊的護城河上,但原來它是2007年才重修過,回復江戶時代的木建築舊貌;至於橋後的三重大木門就是大手門。



穿過大手門就來到非常廣闊的三之丸廣場,雖然基爾來時已是12月中但仍幸運地看到殘餘紅葉靚景。三之丸也是3-4月來姬路城賞櫻的聖地,廣場四周都種滿櫻花樹,盛放季節襯托住古樸的姬路城影相最正。此外,據說明治至昭和初年姬路城都有日軍連隊在廣場駐紮,二戰後期也成為美軍轟炸目標,幸而城堡建築奇蹟地絲毫無損。



日本著名的城堡如大阪城、名古屋城以至東京的江戶城(現今皇宮)等在二戰時都經歷大轟炸而損毀嚴重,現時所見的其實都是戰後50-60年代大規模重建而成的「仿古董」;反觀姬路城則是有500多年歷史的真古董,難怪能位居「日本三大古城」之首(另外兩處分別是熊本城和松本城)。上圖左就是位於三之丸廣場兩旁的市立動物園和千姬牡丹園,由於時間不多所以都沒入去參觀。



上圖可以見到大天守閣外的腹切丸(又稱「帶曲輪櫓」)豎立了巨型吊臂正進行維修工程,整個大維修會於今年3月底才竣工,聽聞到時姬路城內會舉行大型慶祝匯演。由於這類大維修每半個世紀才會進行一次,所以基爾這幅吊臂相日後有可能會成為珍貴歷史圖片吧!這時在本丸外還巧遇黑白灰「三色貓」在大快朵頤,點都要同佢地影張合照。



姬路城有「白鷺之城」美譽,除了因為層疊飛簷式建築設計外,最主要還在於其雪白的外牆。其實城堡不論外觀還是內裏都塗滿這種獨特的「白漆喰」白灰漿,據說有防火耐火防彈的實際防禦作用。上圖這裏就是姬山西南山麓下的official至靚影相位,不少海報和postcard都是由這裏取景。據稱目前日本全國只僅存12座天守閣城堡,當中採用姬路城這類宏偉的「連立式平山城」建築設計的更是碩果緊存(另外兩處分別是和歌山城及松山城),所以說若要看日本城堡又怎能不來姬路。

66 則留言:

  1. Gael 哥講歷史喎...點敢嗌悶呀!XD
    高聳的「白鷺之城」好有氣派啊!

    回覆刪除
    回覆
    1. Kaka:你咁講依家即係complain緊我啦~~~!!XXD

      刪除
    2. Hahahaha...complain? 點會啫!! 咪咁疑心重先得架!
      有免費相睇、又有歷史聽、兼有靚仔網上導遊,去邊處搵喎??^^

      刪除
    3. Kaka:嘩~~嘩~~嘩!!!你咁講應該仲多人complain喎!!
      尤其係「第三項」相信會特別多人complain貨不對辦和違反商品說明條例XXXXD

      刪除
    4. 點會仲多人complain喎!!!況且"靚"既定義喺無準則嘅!
      肥仔恩都大把人話佢"靚仔"喇!(尤其是北韓人添!)
      "貨不對板"??唓!唔駛錢嘅嘢,D質素喺咁上吓架嗱! kakakaka..(相信你啲blog 友都喺深明大義嘅!)
      "違反商品說明條例"???...乜你sale緊你自己咩??
      你有乜嘢可以sale呢吓??!!hahahaha.....

      刪除
    5. Kaka:估唔到你鍾意肥仔恩喱類型咁重口味喎XXXXD

      刪除
    6. Hahahaha....我差D笑到噴飯!:))
      肥仔恩....有潛質呀!一國之首,有權有勢....

      刪除
    7. Kaka:咁你仲唔快D嫁過去做貴妃XXD

      刪除
    8. 咪傻喇! 韓文都唔識多句!:P

      刪除
    9. Kaka:駛咩驚呀~~~咁多宮女服侍唔識韓文都無問題啦!!!

      刪除
    10. 擺到明,除咗肥仔恩,仲有個「好明顯」嘅選擇~~ 哈哈~~

      刪除
    11. 米:iC~~~係咪林盛斌BobXXD

      刪除
  2. 建築壯嚴宏偉,周邊環境恬靜風景怡人,真不錯的旅遊景觀!

    回覆刪除
    回覆
    1. Stella:喱度都幾有代表性,值得一去呢

      刪除
  3. 櫻花、紅葉……四時風光各不同!都很美!

    回覆刪除
    回覆
    1. 摩:相信賞櫻季節更美,但一定會勁多人!

      刪除
  4. 點解人地嘅會咁古雅, 鄰近地區個D會俗不可耐呢?

    回覆刪除
    回覆
    1. Ahmo:可能關乎國民質素問題kakakakaka~~~~喱啲唔係單憑GDP可以計算得到吧

      刪除
  5. 城堡好大....另我諗起以前套卞通片,叫甜甜小公主^^

    回覆刪除
    回覆
    1. Yans:甜甜小公主好熟喎,我上網search下先^0^

      刪除
  6. 回覆
    1. Samwei:大天守閣未開得住,3月底先全面開返

      刪除
  7. 回覆
    1. MD:可惜見唔到有白鷺飛來,可能凍得滯XXD

      刪除
  8. 古城古貌保存得好完整!犀利!

    回覆刪除
    回覆
    1. Wan:同你那些經典漫畫一樣保存得好好^^

      刪除
  9. 金鯱又幾特別喎!姬路城還有櫻花看,到時一定好靚!

    回覆刪除
    回覆
    1. 說:係瑞獸一種,通常擺在古時屋脊的兩端,我見大阪城都有的呢!!
      係呀好鬼靚,我上網search過人地D相,超正呀~~~~但勁多人:P

      刪除
  10. 基太郎咁多粉絲,邊敢話悶吖!不過睇唔到一半就瞓著左之嘛..zzzzzz......
    鄉下嘅歷史好熟喎!回鄉省妻做開籠雀喇!kaka............

    回覆刪除
    回覆
    1. JJ:D後生梗係晚晚夜蒲搞到無精神成日烏眉瞌睡zzzzzzzzzzzz....

      刪除
    2. 咁你又後生過我嘅!你唔係成日烏眉瞌睡呀o卦!

      刪除
    3. JJ:有你喺度check住點敢烏眉瞌睡喎~~~~XXD

      刪除
    4. 烏眉瞌睡完,你又典幾十日八日啫!kaka....

      刪除
  11. 姬路城保存得好好喎! 果然係日本!
    點會話悶喎! 咁樣先有得著嘛~ 好似我上一篇講點飲taquila,返黎搵資料先知咋! 即時恥笑港女以為加D檸檬汁落Corona啤酒好飲D,呢D係一般港人飲法,哈哈~ 不過寫遊記我依家通常係維基copy落黎

    回覆刪除
    回覆
    1. 銀:係呀我都係見你寫才知道taquila杯口邊搽鹽和檸檬原來為了驅烏蠅,我覺得睇返少少喱類資料都幾有趣味,勝過齋睇相啦^^

      刪除
    2. 基爾:係呀! 以前我無呢種尋求答案/真理既動力,不過依家係旅途前後樂此不疲呢!
      今日大事大非既香港,見D港人睇黎就無乜尋求真相諗法了,不論正與反,人鬧乜就share乜鬧左先,其實事實完全不符既!

      刪除
    3. 銀:無錯,旅行印象就會深刻D,唔會似過眼雲煙囉^^

      刪除
  12. 姬路城喺幾靚,
    原來白色喺有咁嘅原因...
    唔講唔知,又識多啲...

    回覆刪除
    回覆
    1. 霸:白色油漆原來係防火物料,對以前古時的木建築很有實際作用唔係齋為裝飾呢

      刪除
  13. 今年我真係好想再去日本呀 ~~~
    呢 D 古城, 係要知下歷史資料, 先可以明白其珍貴之處!

    回覆刪除
    回覆
    1. 魚:咁就快D去啦,因為再遲下佢地物價應該會升返,到時就無咁抵食抵買,唯一係驚關東又流傳會有大地震和富士山爆啫!!
      如果唔睇返少少資料,只係齋行一圈走馬看花就好似無乜意思囉^^

      刪除
  14. 全白外牆的確令人眼前一亮,非常特出!如果在藍天之下更妙…...

    回覆刪除
    回覆
    1. Desa:藍天白雲若再加上櫻花真的靚到不得了~~~

      刪除
  15. 我記得我有去睇喇~~~wakakkaa~仲要坐完夜間巴士由東京去到大阪第一日睇架...我仲記得成晚無沖涼洗頭成個人超臭咁去參觀...
    哈哈~~~罪過罪過~~~

    回覆刪除
    回覆
    1. Tiffany:睇返D相終於勾返起你D回憶kakakakaka
      唔驚啦~~~咁樣先至特別夠女人味丫嘛XXXXD

      刪除
    2. 真係好多謝你~見到你d相我先記得我自己有去過~~~~wakakakaka~
      野~~~~好衰架~~~笑人既~~

      刪除
    3. Tiffany:不斷增加新的美好回憶都係好事^^~~~期待睇你今年的三大旅程hahaha

      刪除
  16. 三色貓一齊吃東西沒有互相排斥 , 畫面好和諧 .

    回覆刪除
    回覆
    1. Ak:我諗佢地係好好朋友啦,那位伯伯朝朝都來餵佢地吧^^

      刪除
  17. 而家都咁正,櫻花時咪不得了 :D
    搵到少少紅葉點綴一下都好過冇啦,哈哈~
    雖然我未去過姬路城,不過去過熊本城 :D
    講歷史唔悶丫,我全部睇晒^^(第日偷偷地copy你啲字來我道介紹熊本城都岩用bor,哈哈~講笑咋)

    回覆刪除
    回覆
    1. Matthew:網上search過人地D相,真係好靚架^^
      好辛苦先搵到棵,如果早多半個月去應該更靚吧!
      熊本城聽聞都幾靚架,希望有機會去一次九州
      見係你咋~~!!啱用就即管拎去啦kakakaka

      刪除
  18. 人少少咪好囉,好似北京咁多人就無咗D寕靜嘅感覺!

    回覆刪除
    回覆
    1. Momomom:可能香港本身一出街就四圍係人超逼,所以去旅行都盡量想揀D少人少少嘅地方^^

      刪除
  19. "寒冬枯枝"好有現場感覺呀, 神奇地一棵棵像枯了的大樹過幾個月又長滿美麗燦爛的櫻花.

    回覆刪除
    回覆
    1. Rity:櫻花就係神奇在這裏,兩個月後又閃电綻放!!!

      刪除
  20. 姬路城真的很靚,特別外牆是白色,比熊本城更靚

    回覆刪除
    回覆
    1. King:我都未去過九州,都好想去睇下熊本城呢^^

      刪除
    2. 咁你要留意等睇我的Update :)

      刪除
    3. King:已經密切留意當中^^

      刪除
  21. 雖然話白鷺城,但冇乜白鷺?!!…
    反而沙田的城門河有好多, 一年四季都見到…

    回覆刪除
    回覆
    1. 森:係呀,城門河和山背河都勁多㗎!!!

      刪除
  22. 貓咪遠睇好似三隻小豬!

    回覆刪除
  23. 唔悶呀唔悶呀!好informative! 好想去呀!夏天去會勁熱呀,是嗎?

    回覆刪除
    回覆
    1. Lucamom:多謝你^^
      夏天去間中都有30度,但一定無香港咁濕和熱,所以我覺得無乜問題

      刪除