2015年3月9日 星期一

2014古都瀟瀟@神戶燈祭

傍晚離開姬路後,當然不會立即就返去京都食飯訓覺咁浪費千金一刻的旅途時光,長夜漫漫有乜搞作好呢?



既然買了Kansai 1-day pass點都要用盡佢,之前已經諗定會在祌戶先落一落車,因為喱度有個一年一度的冬日燈飾祭想去趁下熱鬧。去旅行前翻查網上資料才知關西地區每年12月都有三大著名的賞燈盛典:大阪光之饗宴、京都花燈路和神戶光之祭典。老實說香港其實也有很美的聖誕燈飾,但近幾年基爾都怕人多提不起勁去看(事實若是一支公去看也實在更覺寂寞了吧),反而老遠跑去人家地頭看燈飾好了!

搭火車來到神戶的三宮驛下車,在車站大堂早已見到「夢與光祭典」的宣傳海報,最初不知是哪個出口,與閘口大叔雞同鴨講後隱約聽到好似話搭多一個站去元町站會近燈飾祭場地少少喎!盤算過如果又返入去月台搭車雖然係唔駛錢但實在嫌煩,反正看leaflet的地圖由三宮驛行過去也不太遠不難找,就博一鋪照行出去搵搵吧!



事實證明擔心搵唔到賞燈祭場地的方向都係多餘,因為基爾一出火車站不遠已經有好明顯的路牌指示,而且街上還有很多警察作人潮管制疏導,基本跟住大隊人行我行就無問題了。

不過喱日來到原來正好是燈祭的最後一天,人潮看來也特別勁,由車站行到去燈祭場地全程20多分鐘,幾乎都跟住一條人龍繞過幾條大街而行,幸好大馬路一早就封了作行人專區,基本上也不算太逼太侷促。由於途經的是神戶「舊外國人居留地」,街道兩邊有好多西式舊宅本身已經幾靚,一路行一路欣賞街景其實都唔會太悶。



來到舊外國人居住地這條約270米的大馬路上,據資料介紹整條街共架設了24座拱門,亮起了約20萬個燈泡,走在這中感覺也幾震撼甚至有點兒眼花,當然也勁多人在街上互拍和自拍。沿大街一直走到街尾就見到個小公園「東遊園地」,這裏搭建了一座像大教堂般宏偉的燈飾佈景,外圍則有不少賣小食的攤檔,但由於實在太多人所以基爾也只是短暫停留影幾張相就走了,因為要趕住去下一場……

p.s.看燈飾的大街上見有唔少年輕人在募捐,後來才知這個光之祭典是為了悼念1995年1月的神戶大地震,翌年當地政府為重建工程籌募經費和振興當地經濟,於是每年都舉辦大型燈飾節吸引遊客重來神戶,至今已經舉辦了20屆。

66 則留言:

  1. 回覆
    1. 係呀我都覺得幾靚,好似有點歐洲風味,同香港的聖誕燈飾風格不同呢

      刪除
  2. 冬日燈飾祭好靚喎,不過可能是舊外國人居住地,設計的宗教感很強!

    回覆刪除
    回覆
    1. 其實襯返附近不少的歐洲風格古老建築物,真係有少少歐洲小鎮味道㗎^^

      刪除
  3. 回覆
    1. 我都係第一次去睇,真係幾靚㗎!!
      第時如果聖誕節有空,你哋都不妨去睇下啦^^

      刪除
  4. 回覆
    1. 比較可惜係我只係用傻瓜機,影出來效果就一般啦
      我見人哋拎大機去影果啲就真係影得好靚喇

      刪除
  5. 「一支公去看也實在更覺寂寞了吧」––––同我以前響歐洲行聖誕市場心情一樣,哈!不過日本這個地方,尤其是熱鬧時節,都是找個一兩個朋友一起hea比較好玩。

    回覆刪除
    回覆
    1. 係呀有時熱鬧的地方反而更顯得寂寞
      Desa咁多friend,約朋友過節應該都唔係難事嚟嘅^^

      刪除
  6. 香港D燈飾而家已經唔好睇, 好hea

    回覆刪除
    回覆
    1. 我都好多年無出去睇聖誕燈飾,香港總覺得太多人太擠逼,無乜心機影:P

      刪除
  7. 好野~好開心番黎就有新blog睇~~~~~
    真係好靚呀d燈飾~~~

    回覆刪除
    回覆
    1. 咁快嘅?有冇咩新發現和收穫先?!!

      刪除
  8. 好靚呀~~有人流管制就行得c服好多

    回覆刪除
    回覆
    1. 人雖然多,不過可能條街都好闊,人也很守秩序,所以其實一點也不覺擠逼,雖然要繞路行幾條街,但沿路都行得幾C服,至少不會覺得好侷促和污煙瘴氣想即刻走人XXD

      刪除
  9. 燈飾比起香港靚好多bor :D
    而且人在異地我相信感覺一定更浪漫 XD

    回覆刪除
    回覆
    1. 風格唔同囉,香港多數走卡娃兒路線,喱度就感覺莊嚴好多呢!
      kakakakaka....一個人的浪漫?

      刪除
  10. 回覆
    1. 係呀通常聖誕前後都會有,所以特登去感受下外地的氣氛同香港有乜唔同^^

      刪除
  11. 睇呢個燈祭要唔要戴黑超呢?

    回覆刪除
    回覆
    1. 如果亞裔王子去到就肯定要戴㗎~~~~我喱D平民百姓就一定唔駛XXXD

      刪除
  12. 香港也有很美的聖誕燈飾,但年年變化不大,我也很多年冇睇啦!
    往外國旅行自然不容錯過!

    回覆刪除
    回覆
    1. 係呀香港唔知係咪啲商場近年要減省成本,好多時聖誕燈飾都係年年如是無乜驚喜和大突破,可能遊客會去睇但我就好多年無去kakaka....
      係呀反正會路過神戶,所以都去襯下熱鬧囉

      刪除
  13. 眼前的燈飾咁靚...是否一支公睇都冇咩所謂啦!都營造到一種浪漫的氣氛嘛...
    gael兄去旅行都幾忙喎?!!趕完一場又一場...

    回覆刪除
    回覆
    1. 咁森兄會唔會帶埋啲朋友仔去睇hehehe..
      其實都唔係算好趕嘅,反正係順路啫^^
      正所謂旅途時間一刻千金,都要好好善用下嘅,始終我好少出門㗎嘛XXD

      刪除
    2. 森伯出門外遊更加少啦!!! 行港九新界隨時都可能盪失路...遲些少可能要掛個牌先可以外出...麻煩啲朋友仔就唔好啦!!!!哈哈哈哈
      若然外遊,可能要請gael兄做我地嘅響導...

      刪除
    3. 講到自己咁易蕩失路,唔怕我賣你豬仔咩XXD

      刪除
  14. 燈祭真係一個光之盛宴!!

    回覆刪除
  15. 已經舉辦了20屆>>咁第一二屆係唔係用Led燈呢?20萬個燈泡用幾多電呢?

    回覆刪除
    回覆
    1. JJ真係好環保喎!!!@@我真係唔知廿年前係用咩燈膽,不過我估當時未有led燈泡吧?!!!
      佢地每晚好似係有幾個鐘亮燈時段,唔係開通宵架!!!
      如果善用電力其實都ok嘅,至緊要唔係浪費咗!!

      刪除
    2. 你都好環保吖!五、六日先至上網一次,kaka..........

      刪除
    3. 唔好意思等到你頸長咗XXD

      刪除
  16. 燈飾祭好靚, 成座牌樓咁.

    回覆刪除
    回覆
    1. 又真係有啲似喎,令人想起中式那種大花牌kakakaka....

      刪除
  17. 回覆
    1. 主要集中在一條大街和一個大公園裏,其實都幾大架
      今年聖誕你會唔會去睇下呢

      刪除
  18. 好特別.....日本都少見咁嘅燈祭,
    原先是祭禮喺善舉

    回覆刪除
    回覆
    1. 每年十二月,關西都會有三個大型燈祭,分別在大阪京都和神戶,大阪果個在大阪城,我見人哋影出來都幾靚架喎,有好多投射燈
      至於京都果個我今次都有去,遲下再post啦^^

      刪除
  19. 燈飾很美,與別不同。日本是很多人喜歡去遊覽的地方,
    看來基兄很喜歡遊覽日本。

    回覆刪除
    回覆
    1. 咁啱朋友去我咪搭單啫,期待去探索更多未去過的地方^^
      去日本看燈飾也是第一次,12月去真係幾多特色節日好去處呢

      刪除
  20. 咁呢個(燈飾祭)又真係好靚喎!
    香港個啲年年都係一樣咁!~無物新意囉!

    回覆刪除
    回覆
    1. 香港D商場近年越來越唔願意花錢在節目燈飾佈置上了....
      其實又係嘅,反正D燈飾靚唔靚,都一定有大堆自由行來買野,又何必要花燈飾佈置費喱D無謂錢呢:P

      刪除
  21. 你講開係香港特登走去睇聖誕燈飾,我都好似有廿年無做過了⋯
    神戶燈飾好靚呀!

    回覆刪除
    回覆
    1. 年年如是無乜新意,又費事同人逼啦^^
      除非係D龍友想去影D靚相吧,一般人就應該唔會咁神心特登去睇燈飾了!!畢竟人太多了....

      刪除
  22. 燈祭場面熱鬧,反觀香港燈飾、每年都在縮水中...........

    回覆刪除
    回覆
    1. 神戶燈祭雖然都係人多但完全無擠逼侷促感,我覺得幾正!!!
      香港啲燈飾近年少了一點驚喜

      刪除
  23. 好有節日氣氛啊!
    睇相都幾靚!我諗現場睇應該仲靚啲!

    回覆刪除
    回覆
    1. 現場睇真係幾金光燦爛架,所以咁多人去影相囉
      我去果日好似係最後一日所以都幾多人

      刪除
  24. 從那一小小堆積出來的彩光圖案,真叫人嘆為觀止!

    回覆刪除
    回覆
    1. 我都係第一次外地睇燈飾,感覺唔錯呢^^

      刪除
  25. 光之祭典 - 我有印象見過介紹, 因為去年我都係咁上下去神戶 !

    回覆刪除
    回覆
    1. 通常都係12月上旬左右,我覺得都幾值得一睇喎

      刪除
  26. 回覆
    1. 同香港果種有少少唔同,好以莊嚴一D^^

      刪除
  27. 以前好鍾意去尖沙咀睇燈飾,而家怕人多已經好耐無去,不過神戶呢個真係好靚呀!

    回覆刪除
    回覆
    1. 神戶喱個感覺上莊嚴啲,都幾靚呢

      刪除
  28. 你唔講係日本,我以為是歐洲TIM

    回覆刪除