2015年4月4日 星期六

2014古都瀟瀟@豪牛夜宴

急急腳行完個「夢與光」燈飾祭之後,基爾又要急急腳趕去下一場精彩節目。到底係咩咁吸引?



當然又係離不開食大餐,因為之前已book了台去食神戶牛。這間Kobe Plaisir是位處一間不起眼的小型酒店樓下地舖,由燈祭場地行返三宮驛,再要穿過行人天橋和幾條橫街,問了幾個警察叔叔和路人,幾經轉折才終於找到,果然不負有心人。



餐廳入面其實都幾「骨子」,圍住鐵板燒餐台只有十個八個座位而已,去到時剛好有一對男女吃完離開。



Menu上的選擇不太多,基本上就是ABCD餐,價錢由11000至23000円不等,有但馬牛和神戶牛兩款選擇,唔知有咩唔同呢?



基爾預訂的是13000円的B餐,上網仔細睇返到底食了乜先:上面應該是一開場食的一小碟很有粟米味的餐湯(但碟子相當大);上圖右是美肌酢和食前のお愉しみ3種,3款餐前小食包括有豆腐和魚生之類,賣相都好精緻吧!



幾乎忘了說餐前侍應會貼心地為客人逐一戴上餐巾圍裙,全程一路食一路睇住廚師在面前的鐵板熟練地烹調各種食材,本身已是一種視覺+嗅覺+味覺三重享受!上圖是甚美味的烤鵝肝和海鮮料理,連蝦腳也煎到脆卜卜。當然還少不了main course裏的神戶牛……



神戶牛可以自選煮熟程度(廚師會向客人逐一細問),向來不太吃牛的基爾都覺得味道是無可挑剔的了。不過如果剩食啖啖牛肉似乎又有點寡,襯上新鮮烤雜菜沙律就是完美絕配!



咪流口水住!基爾食完牛柳和沙律之後已差不多七成飽了,就在這時師傅將一大碗飯倒在鐵板上快手地炒呀炒,真係好似去飲咁,食埋喱個炒飯真係飽足九成,即使大胃王來到都唔驚會complain食唔飽!



食飽飽飲埋杯果醋後(特登留返小半杯餐後飲),侍應就來替客人「寬衣解帶」(解除餐巾圍裙),當然唔係似香港某D放題食肆咁衰限坐個半鐘就要趕人埋單走人……原來跟住個step係侍應會有禮地請客人移玉步過隔籬的華麗偏廳繼續品嘗dessert而已。值得一提係在等候「過廳」期間,同場仲會加映廚師即席表演清洗鐵板的神乎奇技,真想問問佢地D清洗用品係咩牌子和在哪裏買,看著廚師乾淨利落的手法轉瞬間已令眼前的鐵板光潔如新非常神奇呢!



甜品其實不太特別,有布甸和雪糕,還有一小杯甚香濃的咖啡,不過可以坐在這間有水晶大吊燈裝飾的華麗偏廳hea住作餐後小休傾陣閒偈就是亮點之一。另一邊無影到的是一整列的書櫃,霎下眼真係有點似都教授家中那個私人書房咁有古典味呢!



在「都教授書房」hea夠兼埋單之後就起程返京都了,好彩搭到特急車所以都算幾快,幾乎忘了在經常出入的車站和酒店留影,大堂的聖誕樹雖然不太大棵但都幾靚吧!

56 則留言:

  1. 神戶牛就聽得多,馬牛真係未聽過,唔知當中有乜分別?

    回覆刪除
    回覆
    1. 和牛其實都有好多種架,不過但馬牛我都係第一次見識:P
      其實我牛趙牡丹唔係咁識分架咋,我諗神戶牛肉味係稍濃一點

      刪除
  2. 神戶牛、烤鵝肝和海鮮料理...正!(流緊口水添!) :))

    回覆刪除
    回覆
    1. 快啲戴返條口水肩先啦kakakakaka....

      刪除
  3. 啲服務及食物質素都一流,埋單八百蚊
    相比香港……咁嘅價錢無可能食到,
    超值*^O^*

    回覆刪除
    回覆
    1. 依家円平就更覺得抵啦,如果香港食我諗唔只喱個價錢吧!!!
      其實睇住佢一路煮,本身也是一件藝術表演^^

      刪除
  4. 美味的神戶牛...........正呀!
    復活節長假玩得開心.

    回覆刪除
    回覆
    1. 雖然我唔太識食牛,但都覺得幾唔錯:P
      有冇同大小姐大佬出去行下水禮?今年天氣熱得好快喎!!!

      刪除
  5. 何祇賣相精緻,是正才對!

    回覆刪除
    回覆
    1. 同你的小說作品一樣^0^

      刪除
    2. 嘩嘩嘩,被您講到要再講多謝添!
      哈哈哈 ......

      刪除
    3. 呵呵呵~~~^^唔駛客氣!!

      刪除
  6. 基太郎大戰牛魔王。。。

    回覆刪除
    回覆
    1. 咁你做桃太郎定鐵扇公主?XXXD

      刪除
    2. 又要做孫悟空又要做導演,係咪想挑戰星爺XXD

      刪除
    3. 係你諗起佢啫!就算學都揾王家衛啦!

      刪除
    4. 佢一套戲拍十年架喎,你有冇咁好耐性先:p

      刪除
  7. 前年我在九州試過馬肉串燒,心諗試過就以後不再試,因為吃馬肉始終不習慣,睇見你食的氣氛很好,真是享受人生!

    回覆刪除
    回覆
    1. 之前我也試過一次馬肉刺身但覺得感覺一般沒太特別,所以就無謂再食馬肉了,實在有太多替代品,多菜少肉為上!!!
      貯了好耐錢,間中豪一次當見識下而已:P

      刪除
  8. 好多時食鐵板燒, 都好似睇表演咁呢 ^^

    回覆刪除
    回覆
    1. 係呀,睇佢表演真係幾好的娛樂,有專人服侍^^

      刪除
  9. 未試過神戶牛,咁高級食唔起>.<

    回覆刪除
    回覆
    1. 我都覺當見識一次半次:P
      我唔係太識食,反而鍾意食壽司或拉面多一點kakakaka....

      刪除
  10. 好正,攪到我即刻想去試下

    回覆刪除
  11. 色香味俱全,身心都飽足!

    回覆刪除
  12. 回覆
    1. 搵次又同DD一齊去行一轉拍下拖享受下二人世界囉^^

      刪除
  13. 服務和食物都好吸引呀 !

    回覆刪除
    回覆
    1. 如果在香港會唔捨得食,反而旅行在外會比較捨得kakakaka.....

      刪除
  14. 嘩,你這餐有我的松露餐那麼富貴!單看餐廳名字和室內佈置,還以為是法國餐廳。貴格餐廳,似乎很多都是只有套餐沒有 à la carte。

    回覆刪除
    回覆
    1. 可能我對牛肉本來就只係一般而已,所以覺得你個松露餐正啲,而且你係誠意十足要專程去的呢^^
      其實我都唔係太識叫,如果係à la carte一定會好頭痕XXXD

      刪除
  15. 呢間好旺場, 我去年經網路2個前訂午餐, 我揀的日子都回復我 FULLY BOOKED!! (我窮遊, 午餐平一半).
    最後揀了另一間吃. (我不吃BEEF和羊的, 怕"SO"!! )
    但一場來到都神戶無論如何都TRY 下, 結果那BEEF又O.K. 播。

    回覆刪除
    回覆
    1. 原來喱間咁旺場,朋友好似係差不多買了機票不久就去book的!!
      係呀我見佢lunch係抵食D,反正有時份量太多反而太飽.
      唔知係咪因為我叫了七成熟所以感覺有點韌,友人的medium rare就話好掂!!

      刪除
  16. 基爾哥,我係大鄉里,從未聽過馬牛!我相信呢餐,一定係美味無窮,齒頰留香。

    回覆刪除
    回覆
    1. 但馬牛話係日本國產黑毛和牛的一個品種喎,我都係上網check下先知.......
      你地如果出省城會唔會多一點日本料理食肆呢?

      刪除
    2. 冇得食。。所以好多謝你 post 咁多靚相,可以慰藉吓我。。。。。哈哈

      刪除
    3. 自己整啲畀白頭sir試下囉^^

      刪除
  17. 啖啖牛肉似乎又有點寡.....佢唔會落調味??
    餐牌係日文, 如果唔識怎樣點菜?!!

    回覆刪除
    回覆
    1. 牛肉之外仲有蝦或其實蔬菜炒飯之類,但主食當然係牛啦^^
      menu上好似係有英文,不過其實都睇唔明,基本上都係跟住個set去食吧

      刪除
  18. 真係引C人!!!!!!!!

    回覆刪除
    回覆
    1. 個排場確係幾正幾吸引架,睇表演咁^^

      刪除
  19. 兩種牛我都聽過, 但真係唔識分 !
    我終於買左機票去日本, 見你呢餐食得咁滋味, 搞到我都想 book 黎食添 ~

    回覆刪除
    回覆
    1. 我都唔識,網上search話但馬牛係和牛的母品種,其他果啲乜乜宮崎牛和神戶牛都係源自喱個品種演化出來,用不同的飼養方式云云.....
      至於味道方面,我由於不太好牛肉,所以都無乜研究唔係好食得出:P
      如果真係想去一試,咁要先book定喎,因為好似係無得walk-in的呢

      刪除
    2. 我知呀 ,舊年我地去神戶都忘了 book, 好多好評餐廳都冇 walk in ~~

      刪除
    3. 可能因為大部份都係小店,唔可能一次過serve太大量的客吧

      刪除
  20. 神戶牛、烤鵝肝和海鮮料理都好吸引呢!

    回覆刪除
  21. 牛係我最鍾意食嘅嘢...點可以唔流口水住...XDDD

    回覆刪除
    回覆
    1. 咁下次如果去開滑雪不妨去幫襯喱間啦^^

      刪除