2015年4月22日 星期三

花墟+八幡屋:下@旺角

去花墟睇完活化的戰前唐樓Good Point之後,再在花墟附近行多一陣賞花,就準備行落去兆萬那邊赴會了。



之前睇過幾位blog友去幫襯喱間八幡屋食日式放題幾抵,所以一早已bookmark定想去試下。其實基爾都已經有好幾年無幫襯過喱類日式放題食肆,主要原因係不太喜歡限時太短,好多時滾水淥腳地食完就要走,少了慢慢撐台腳傾偈的樂趣……



二來日式放題經常慣性漏單,也是件頗令人煩厭的事;三來基爾向來細食所以盡量少參與放題和buffet活動。說來真有點大鄉里,基爾還是第一次飲上圖這款康師傅番石榴汁飲品,都幾唔錯喎!



感覺上這間八幡屋提供的點菜紙種類頗豐富,前菜冷盤沙律之類都有好幾種,而且平心而論都幾好味道,算是水準之上吧!最重要是入單後沒有嚴重漏單消聲匿蹟石沉大海的無奈感!



至於時限方面有2個鐘,比一般的1.5小時稍長,感覺上明顯無咁趕頭趕命,至少食野途中係有傾偈空檔時間……上圖可見壽司款式的選擇也頗多。



當日基爾是食比較便宜的「頭圍」5:30-7:30pm,人均$158(未計加一),以今時今日的日式放題料理算是抵食吧!上圖是天婦羅和甜品,灰色那碗不是芝麻糊而是磨菇湯。



另外還order了日式炒蜆、溫泉蛋、千舌大根煮之類的小食,燒物則叫了幾round甚好味的鹽燒牛舌、多春魚、汁燒帆立貝等(但帆立貝味道太淡)。此外還有好多唔同款式的手卷軍艦、鍋物和簡單的甜品……



雖然只有兩個鐘但絕對夠時間食得飽,仲有就係食「頭圍」有個好處︰食飽仲有大把時間四圍逛逛。最後逛到返上去新世紀,覺得個商場大裝修完之後真係闊偌好多好行好多;行了一陣Prologue書店,其中有一part相展專門拍攝星軌,又真係影得幾靚喎!

八幡屋 Yahataya Japanese Restaurant
旺角西洋菜南街兆萬中心9樓

66 則留言:

  1. 基爾三大原因竟然與我雷同,哈哈哈!實屬巧合!

    回覆刪除
  2. 唔好話你大鄉里,森伯都未飲過...康師傅來自台灣定香港??!!
    既然都要劃點心, 寧願嘆一盅兩件, 又可以慢慢傾...

    回覆刪除
    回覆
    1. 森兄今日蛇王來留言真好XXXD
      好似係台資,但應該是在大陸的廠生產....
      點心都鍾意,不過有時食得多又心思思想試下新野啫:P

      刪除
  3. Gael,值得去試試這間日式放題.

    回覆刪除
    回覆
    1. 係呀,兩個鐘都幾夠時間order
      同埋唔係太覺佢漏單

      刪除
  4. 有好嘢食,要等是好慘 ......

    回覆刪除
  5. 頭圍又真係幾抵食喎~~~~~~~~~~~~~
    $158依家真係無....我諗澳門最平都過200
    而且澳門d日式放題都好難食

    回覆刪除
    回覆
    1. 係呀我睇你寫啲blog,都覺得澳門物價比十幾年前貴好多呢@@

      刪除
    2. 小店野食真係貴左超多!最抵食可能係走入酒店...同一般cafe價錢差不多

      刪除
    3. 所以依家在澳門生活難過香港囉:P
      酒店食肆有賭場收入補貼吸客吧

      刪除
    4. 係呀......依家出街依餐飯點都過200....真係..真心貴
      無錯!!!!!所以跑入賭場食就最好架喇~有服務有水準~

      刪除
    5. 除非剩係食碗雲吞面水餃面囉^^
      好懷念以前寶石常記果個大花樽佛跳牆kakakaka...

      刪除
  6. 原來基爾向來細食.......我都係~~~嘿嘿^^

    回覆刪除
    回覆
    1. 你都好丫有大爺幫手食啲,我就一係要夾硬食埋又或者浪費了,所以叫餸時都要提醒自己不要眼闊肚窄:P

      刪除
  7. 五點半開始, 我會食唔落呢 ^^

    回覆刪除
    回覆
    1. 網上聽人成日話6點後唔好食嘢先夠健康喎XXXD

      刪除
  8. 能吃「頭圍」5:30-7:30pm !? 咁^^ 你都放好早啫 ~!

    回覆刪除
    回覆
    1. 喱日記憶中好似係放假,平時無咁早收工啦:P

      刪除
  9. 我怕食日式放題,食物質素無保證,時好時壞。我情願食碗雲吞麵,或篤串魚蛋仲好。

    回覆刪除
    回覆
    1. 所以通常我都係睇到人地話ok,咁我先會去試下,費事浪費了quota啦XXXD
      以前收工收得夜,都會同同事去食旺角十蚊雲吞面,真係好鬼抵,非常懷念^^

      刪除
  10. 要撐台腳嘅去食燭光晚餐嘛!!!!

    回覆刪除
  11. 幾正喎……百幾蚊又幾抵,
    我同你一樣,細食一族,
    所以放題無乜大興趣,
    但同朋友去玩下\(^o^)/

    回覆刪除
    回覆
    1. 係呀好多時聯誼居多,食反而係其次^^

      刪除
  12. 日式放題好耐好耐冇食(10年都有lu),諗諗吓個班朋友都各散東西咯!

    回覆刪除
    回覆
    1. 咁JJ要做Re-U發起人囉^^

      刪除
    2. 我唔會架!唔駛應酬就宅o係屋企整東整西,味覺享受排尾架!

      刪除
    3. 絕情谷谷主kakakaka.....

      刪除
    4. 相對於多情谷谷主基太郎喎!呵呵!

      刪除
    5. Objection~~~何以見得?!!!

      刪除
    6. 嫌人絕情皆因多情自作,頓情又被誤會為絕情囉!呵呵!

      刪除
    7. 咁要交畀金庸先生去研究研究一下了~~~!!

      刪除
  13. 我真係大鄉里,從未食過日式放題!睇落都好多野食咁喎!

    回覆刪除
    回覆
    1. 至少夠飽,但好唔好食就一間間啦:P

      刪除
  14. 又唔算貴喎!最緊要無乜漏單!

    回覆刪除
    回覆
    1. 算抵食!!!!
      係啦漏單最令人煩厭:P

      刪除
  15. 日式放題,吃過幾次,都是一大班人聚會……
    食物與環境,不是我杯茶!

    回覆刪除
    回覆
    1. 係呀一大班人gathering去喱類好D因為實有啱食得東西吧
      阿摩應該也是細食一族hahaha...

      刪除
    2. 咁第時要向阿摩偷下師keep fit先得:P

      刪除
  16. 我都好耐冇食過放題lu...
    同你一樣因為放題限時太短,自己又食得少,對放題興趣不大
    而且我唔食海鮮更加冇咩好食呢
    不過有時候朋友話去唯有跟大隊啦>.<

    回覆刪除
    回覆
    1. 吉蒂餐廳應該更合你意吧hahaha....
      唔食海鮮係咪怕會敏感?

      刪除
  17. 我未食過日式放題 , 原因係我唔多食生的食物0既 , 今次睇見你的食物好多都係熟的 , 都幾吸引喎 .

    回覆刪除
    回覆
    1. 喱間都幾多熟食嘅,味道就一般啦,但勝在平平地,即使食得少也不太覺得蝕咗XXD

      刪除
  18. 我都喜歡食日式放題的!

    回覆刪除
    回覆
    1. 如果係一大班朋友gathering都幾啱㗎

      刪除
  19. 天婦羅…正!
    蘑菇湯…好難飲!

    回覆刪除
    回覆
    1. 不過熱氣喎XXD
      唔會丫,都幾好味,但飲完都幾飽.....

      刪除
  20. 日本野呢, 我係特別喜歡d前菜 ^^
    原來新世紀裝修完喇, 都好一段日子冇去行喇

    回覆刪除
    回覆
    1. 單單睇個樣已經好精緻,似幅畫咁^^
      係呀,叫做好似大致上裝修完啩~~~~

      刪除
  21. 我同你一樣, 唔係好鍾意日式放題, 不過有時一大班人咁食又幾開心 ~

    回覆刪除
    回覆
    1. 係呀,如果一大班人gathering確實唔錯,至少梗有幾樣啱食吧,如果時段可以延長到2-2.5小時就可以食得輕鬆一點點呢

      刪除
  22. 咦! 無食刺身既? 元朗有一間咁上下價錢,我瘋狂點刺身,又無漏單都係一讚!

    回覆刪除
    回覆
    1. 有食呀,不過好似忘了影:P
      事實上喱間若論菜式選擇係算幾多的了,我覺得完全合乎要求!當然味道就各人口味不同,但基本上係唔錯嘅.....
      元朗真係幾多隱世好食店要好好發掘下,可惜係比較遠(對我而言)!!!
      無漏單係好值得一讚,因為有時漏單漏到已經唔係好知自己點過乜,有點混亂!!!

      刪除
  23. $158都算抵呀, 食物都ok咁, 蘑菇湯睇嚟就麻麻地喇.

    回覆刪除
  24. 日式放題料理越開越多,唔平邊有人嚟食喎!~$158叫平架喇!

    回覆刪除
    回覆
    1. 喱間我覺得價錢合理都值得推介...

      刪除