2015年4月8日 星期三

Jamie's Italian@銅鑼灣

復活節長假期基爾有幾日要照常返工,假期不多所以也沒外遊去,反而留在香港可以享受多一點難得的寧靜,搭車返工放工也不用逼非常愜意,某日提早收工還可蛇出銅鑼灣開餐。



特登問定友人係邊度會合(好讓基爾取捨坐巴士定地鐵出去方便D),點知出到Hyson又話已經過了去Time Square,咁順便睇埋喱個「Avengers復仇者聯盟2」宣傳攤檔先啦!但其實感覺有點求其,而且巨型模型公仔實在太少了一點……



Time Square那邊相信應該一年365日都多人吧!在人海中穿梭尋覓最後會合後再hea行過去登龍街。以前返夜時,間中會與同事來打邊爐,依家原來隔籬開多間日本料理小店格局的人氣食肆,門口排了長長人龍(店裏座位不多),下次有空也可來試試……一直行到街尾就見到Jamie's Italian招牌高高掛在商場外。



好彩提友人先book台比較穩陣,始終紅字假期walk-in未必有位;另一樣係限食2個鐘比較無奈,以為日式放題才會這樣。Anyway,坐低之後欣賞下餐廳四周環境其實都幾靚,有bar台位、有卡位、普通2至4人餐桌等,地方都頗大喎!



諗住用「拖」字訣啦!想坐耐一點傾下偈,所以一於散叫,而且要逐樣叫,一來可以慢食,唔驚掛住傾變晒冷盤;二來斷估佢唔會夠兩個鍾即烹人走。



三來其實睇佢個Easter Set Dinner又真係唔吸引也唔太合胃口,散叫也未嘗不可,不過比較搞笑係友人竟然仲慢條斯理做功課,上網睇人地「開飯」D食評,仲要每樣核對研究menu上邊樣好食邊樣唔好食,搞到waitress姐姐走幾轉來問落單(在此要畀讚佢,不僅全程零黑面,仲有誠意推介部份菜式,畀著基爾一早殺了喱D煩客人)。



看網上介紹話Jamie Oliver在英國開的餐廳數目頗多,但海外分店全球則只有9間,聽聞銅鑼灣之外仲會在尖沙嘴開分店。基爾入座時才6點幾,坐的corner位人客不多(7點後開始滿座),可以趁機四圍影下廳餐裏的陳設……上圖左兩罐意大利罐頭蕃茄醬係waitress隨意擺低的,笑問她係咪送給客人的紀念品?!



先來的是這個炸意大利飯丸子小食配蕃茄醬Mozzarella芝士$70,外脆內軟的口感頗特別,同食一般多汁黏口的意大利飯感覺有很大分別,喱味係見「開飯」有人激讚才會叫。



另一味十個有七八個都叫的就係上面喱味Cured Meats,姑且叫佢做意大利傳統醃肉併盤吧!這裏是2人份量$168,特色係用了一塊又厚又長的大砧板上台,上面精緻地擺滿了橄欖串、開心果意式肉腸、茴香莎樂美腸、火腿及辣肉腸,仲有幾片三角羊奶芝士(嗒落有一點點臭)配甜辣醬、水牛芝士同其他幾種醃小黃瓜醃菜、紅蘿蔔絲和紅菜頭沙律等,份量其實都幾勁!至於果兩罐蕃茄醬就係用來托起喱塊併盤大砧板而設的。



聽waitress姐姐介紹話佢地個廚整海鮮特別拿手,尤其係魷魚和蜆的菜式,咁就叫埋喱味酥炸魷魚,食落感覺有點似意式的椒鹽鮮魷,特別喜歡那個酸忌廉醬和蒜片配菜,非常香口!



另外仲想試多幾味main dish,包括上面喱個肉醬闊麵Tagliatelle Bolognse,不過驚太飽只叫了mini size,share來食每人基本上只有兩三啖,但少食反而多滋味,而且幾好玩!



另外當然仲有叫waitress推介的蜆類,所以叫多樣蜆肉意大利粉,友人話咸了一點,基爾覺得頗具海洋味道……雖然只係樣樣食少少,但最後其實都幾飽,埋單計人均200幾唔算太貴吧!比較有趣係tips可以按個人喜好而付,所以不一定是慣常的加一服務費!

p.s.最後也可講少少餐廳的裝修陳設,天花板帶點raw的味道,至於個半開放式kitchen和懷舊bar台都幾有特色,睇返網上介紹文章話係取材自God Father電影中的意大利傳統菜館設計,基爾坐的corner位又擺設了不少廚具和Jamie Oliver的烹飪書作裝飾;最後必須提提廁所有個古董式的抽水水箱和復古水龍頭真係好靚,可惜基爾去廁所時沒帶手機,否則一定影來留念!

Jamie's Italian
銅鑼灣登龍街金朝陽中心2期Midtown2樓

84 則留言:

  1. Jamie's Italian, 我平日去開那間 gym 隔離就有一間,也是我和小馬經常撐檯腳(練法文)之地,上次有香港朋友來我也帶她幫襯。初開張排長龍,幾日前都book不到檯,現在幾乎隨時去都有位。全球肯定不只9間,在袋鼠國已經有6間啦!此外還有其他13個國家(包括印度)都有。

    回覆刪除
    回覆
    1. 格局陳設係咪同香港喱間差不多?
      你同小馬果然係好老友鬼鬼....
      可能我睇果篇報道唔係咁update,定還是佢近年開好多間越做越旺呢?
      名氣果然有利做生意吧

      刪除
    2. 格局的確好似,最大分別就是菜單沒有中文!又再上網查過,原來印度德里分店依然在籌備,不過另一個出奇是俄羅斯都已有兩間!

      刪除
    3. 遲下可能會有,因為有大陸遊客來掃貨hahahaha...對時你要練好煲冬瓜方便佢地問路XXD
      俄羅斯都有好多有錢人,還有富可敵國的石油大亨,不愁沒客路吧

      刪除
    4. 煲冬瓜邊使練呀,由十幾歲講到而家啦,我中學有選修中文,考會話時考官聽見我的發音還以為我在內地出生!現在我的京片子不再,不過溝通絕對無問題。

      刪除
    5. 犀利喎,我諗你自細應該都係好有語言天份果一類^^
      京片子我也不常聽得懂,尤其說得快的時候
      講方面當然是零XXXD

      刪除
  2. 我喜歡辣肉腸、酥炸魷魚,希望有機會去試吓!

    回覆刪除
  3. 無去過喎!上次去樓上開茶會,經過
    睇你post唔錯,我等海港城分店先去試下。

    無聊一提下,果日聽Do Do姐商台個節目.....訪問啲幫餐廳做假食評啲人,
    原來一個做假嘅食評或喺"開飯"做假post,全部由Agent安排!可以收幾百蚊一次,但要帶埋朋友去食免費餐...!因為似真啲飯聚...無咁假喎!

    回覆刪除
    回覆
    1. 以上只喺分享下....無乜特別意思架!
      費事俾人誤會,近派我是非多!!

      刪除
    2. 有人教路, 寫呢D最緊要二八開, 千祈唔好一味唱好 XD

      刪除
    3. 路霸:咦,原來樓上有旅行社?係咪翠字頭果間?地方係咪都好大?
      係啦唔駛急,我覺得依家啲人係想試新鮮野啫,遲多一年半載我覺得一定唔會咁旺場,唔駛book都可以隨時walk-in有位....
      睇人地食評其實都係參考居多,唔駛太在意,正如下面王子咁話人人口味都唔同,好多時人地話好食自己也未必啱食嘅!!!
      收錢寫膳稿嘅其實大有人在,不過唔知點解從來無人畀錢我寫kakakakakakaka.....幫補下都好喎XXXXD
      帶埋朋友去食免費餐=====>very good^0^筍呀!!!!

      刪除
    4. Ahmo:我可能習慣上容易忘記啲唔好嘢,只係留返美好的回憶吧!!!!kakakakakakakaka.....同埋我可能比較錫住啲blog友,啲唔好嘢盡量唔寫以免影響大家胃口啦XXXD

      刪除
    5. K字喱間印象中我好似無參加過,C字頭因為以前工作關係就有接觸過^^

      刪除
  4. 哈哈。。。多謝基爾哥,又可以隔空慰藉吓我有得睇冇得食嘅慾望。

    回覆刪除
    回覆
    1. 唔知遲下會唔會去埋打冷鎮開分店呢又^0^

      刪除
  5. 回覆
    1. 應該比半年前剛開時好好多,其實香港人都係鍾意貪新鮮而已,過了熱潮後應該好好多,反正香港食肆選擇多的是......

      刪除
  6. 回覆
    1. 我覺得菜式野食方面就唔算太特別出色囉(也可能係我地唔識叫),無乜特別令人留下「勁好味」之類的深刻印象,幸好價錢也不算是貴價高檔類,所以一試也無妨吧!!!!

      刪除
  7. 我就唔係好信啲乜乜食評,口味好個人,你覺好食有可能我唔多like.

    回覆刪除
    回覆
    1. 絕對係!!!!!!!!!(好少咁同意王子的發言XXXXD)
      口味真係好按個人喜好而定,就正如那個炸意大利飯團球,食評上好多人話好食,我就覺得算是特別啦,不過如果再畀我揀就一定揀返傳統果隻意大利飯啱我胃口好多,可能我向來唔太偏好吉列類或脆炸漿類菜式食品,even天婦羅也是一件起兩件止.....

      刪除
    2. d 人排佐甘耐隊,餓到頭暈暈個時入到口嘅咩都好食d嘅;
      另外,俾佐甘多錢,唔讚番两句,會唔會覺得自己憨居呢?:P

      刪除
    3. 應該唔會餓到頭暈暈XXXD如果真係好想食咪預早book位囉,想walk-in但怕等,一於改去隔籬啦,銅鑼灣大把食肆,駛乜咁虐待自己呀kakakakaka....
      咁我又唔會喎,向來實話實說嘅~~~~唔好食都無理由夾硬要話好食,不過口味人人唔同係真嘅,自己唔試過都唔會知啱唔啱心水!!!

      刪除
  8. 間餐廳又好似幾大...
    係呢?!!咩叫木板佐食?!!用木板上檯...

    回覆刪除
    回覆
    1. 係呀二樓全層,我覺得今時今日多數食肆舖位細細間,喱間就算係間隔幾大,不過如果係二人枱我就覺得太細了,似茶餐廳枱仔咁唔太夠位擺餐具和野食,甚至覺得有點論盡!!!!
      係呀,就係果塊上菜用的長長的厚木砧板

      刪除
  9. 佢在這裡也開了一間,但係聽說麻麻,冇去過@@

    回覆刪除
    回覆
    1. 我就覺得MD果間「花園餐廳」正好多囉^0^

      刪除
    2. 哎呀,你都未試過,有空來探我地同試下才講啦,哈哈哈!

      刪除
    3. Kakakaka...好喎,多謝晒你先XXD

      刪除
  10. 淨睇賣相啲菜式味道應該唔錯了...

    回覆刪除
    回覆
    1. 可以一試嘅~~~~但不要抱太大期望啦^^

      刪除
  11. 意大利餐…我都鍾憃食架!

    回覆刪除
    回覆
    1. 咁快啲搵個意大利型男陪你去XXD

      刪除
    2. 咁…要去意大利走一轉喇!kakaka

      刪除
    3. Ka Ka:駛乜去到意大利咁遠,搵香港型男Gael兄陪你去咪一樣,橫點佢熟路……XXD

      刪除
    4. 森兄咁講一定會畀人告硬「貨不對辦」架喎kakakakakaka.....

      刪除
    5. Gael: 貨不對辧??…乜版面相中人不是你嚟架???
      定喺N 年前嘅你呢??kakaka…

      刪除
    6. 森兄:Hahaha…邊有人會貢直接啩!
      Gael 兄blog友衆多,我驚佢會應接不下喎!
      況且Gael 兄好似鍾意同D會爬樹嘅…靚模去多D喎!
      仲有Gael 兄成日都鍾意講歷史,我邊識回應呀!:P
      我諗反而同你去可能好啲喎!
      一來你又識畫畫,可以順便叫你幫我晝下素描,
      二來平日睇你寫blog嘅風格既風趣又幽默!
      三來講型嘅話…相信森兄也不比Gael兄差 !kakaka…

      刪除
    7. 睇來人哋請到出面咁森兄都要同kaka去一去XXXXXXD

      刪除
    8. 你地三人行啦……(^_-)

      刪除
    9. 一定係個九唔撘八的組合XXXXD

      刪除
    10. 哈哈哈哈…
      Ka Ka:
      會爬樹的靚模?!!...相信只有人面廣的gael兄先至請到隨行…
      gael兄同女仔出街就唔會講歷史架啦!!上至天聞,下至地理…樣樣皆能~~
      你睇blog以為我風趣幽默…真實森伯個人好鬼悶唔多講嘢…
      相信森兄也不差 !kakaka…>>>>>呢幾句kakaka的笑聲好可圈可點?!
      ………………………………………………………………………
      Gael:
      仲有Gael講的九唔搭八組合~~~好似有啲貶義咁喎?!!!.......

      刪除
    11. 唔係喎,我平時都係唔多講嘢嘅^^
      森兄識畫畫,有藝術家才華已經夠殺晒唔駛多講kakakakaka....
      完全無任可貶義呢,只係覺得有一點無厘頭和摸不著頭腦而已XXD

      刪除
    12. 每個人都係獨一無二架啦…… 九唔搭到八,咪搭個十囉。

      你地出來一定互有裨益,至少也有個機會改善自己的溝通……

      十卜十卜!!!

      刪除
    13. 我仲以為係十下十下kakakaka...

      刪除
  12. 假期上班是好慘,我從前都試過不少。
    那裡的服務都算好喎,食物賣相都唔錯!

    回覆刪除
    回覆
    1. 可能自從畢業以來我都係要假期返工,所以習慣咗又唔係覺得好慘嘅:P
      而且有時也頗享受公司附近跟平時不一樣的寧靜kakakaka....

      刪除
  13. Jamie我只懷念N年前的the naked chef, 依家佢已經好生意人呢。
    我覺得在香港開餐廳真係講marketing多過食物本身。

    回覆刪除
    回覆
    1. 依家都間中仲見有播佢啲節目架,同埋Gordon Ramsay果啲...
      咁都正常嘅,出得鏡多自然有名氣,要靠下名氣搵快錢丫嘛^^
      香港人都係較催捧名牌,食名氣居多,不過熱潮一過就真係要靠真功夫才能留得住啲客囉

      刪除
  14. 我聽過有人話麻麻~咁好彩你食哥時好食je~
    我淨係去過英國哥間...我都覺得d野幾好食而且幾抵~

    回覆刪除
    回覆
    1. 咦,回來了?玩得開心嗎?^^人多夠熱鬧一定開心吧...
      我覺得菜式味道ok,不算有太大驚喜,主要係添新鮮,環境和服務水平也不錯!!
      價錢我都覺得係合理沒有太開天殺價,走中價路線,我覺得值得一試!!!
      英國我也很期待去一趟,還未去過呢

      刪除
  15. 我都未去過, 聽講要排好耐.
    碟蜆肉意粉好似蜆多過意粉好正.
    最終有無過兩小時~ 有無催你埋單呀?

    回覆刪除
    回覆
    1. 我覺得都唔駛急嘅,過多一年半載一定唔駛book位啦^^尤其係閒日,始終銅鑼灣食肆多選擇.....
      我地想試多幾味所以只係叫細size份量,意粉真係只有五六啖架咋kakakakaka...
      有呀坐了兩個幾鐘,因為差不多半個鐘才叫一樣,一路食住一路再揭下menu再加order,咁樣佢都唔會要你走嘅!!!!
      我諗最大問題係剛開業時好多人都係食完仲慢慢hea住傾偈唔走hea足成晚,搞到佢地做唔到第二輪客,影響了生意也令其他等食的客人大排長龍,所以才「非強制」地實行限食兩粒鐘喱個政策吧:P

      刪除
  16. Have not yet tried this restaurant. Not sure if it is crowded during the holiday. Appears not very expensive.

    回覆刪除
    回覆
    1. 如果唔心急嘅話大可過多一年半載先去囉,一定無咁多人咁墟陷^^
      價錢ok,是可值得一試之選!!

      刪除
  17. 全篇文蝦我唔識!捧蛋。都係企埋長頸鹿隔離喇!kaka.......

    回覆刪除
    回覆
    1. 食都唔識?!!!@@
      咩係長頸鹿?

      刪除
    2. 你的記性都放左床不底,來你blog嘅都變長頸鹿喇!

      刪除
    3. 我已經好勤力寫得好密果隻架啦喎:P

      刪除
  18. 一直想去試試,不過仍未有機會!

    回覆刪除
  19. Gael大大又去食好野 :D
    餐餐都咁豐富睇到人泡晒口水 :(

    回覆刪除
  20. 唔知你在港九區有邊d好食/ 有特色又無咩駛排隊嘅食肆 (茶餐廳/ 大排檔/ Cafe...) 推薦呢?

    回覆刪除
    回覆
    1. 我食過果D通常都寫晒出來架啦,同埋好多時都係睇人地blog寫所以才發掘到!!!
      其實我都好少出街食飯嘅:P

      刪除
  21. 上次去英國, 一次試左 2 間, 番而 HK 間仲未試添, 搵日去試試 !

    回覆刪除
    回覆
    1. 其實我諗間間Jamie應該都差唔多吧,既然你英國都食過兩間,香港喱間其實係咪可以唔駛再試呢?kakakaka....
      個人覺得唔太特別精緻好食,可能始終香港食肆選擇多吧!!

      刪除
  22. 間餐廳氣氛同格局都幾好喎!!

    回覆刪除
  23. Gael,睇到食指大動,揾日去試吓.

    回覆刪除
  24. 香港舖租貴,食餐飯都限時限刻,大家都知歐洲食一餐隨時最低消費兩粒鐘,香港反而兩粒鐘要食完趕你走,慳返D錢去外國食好過!

    回覆刪除
    回覆
    1. Good idea~~~~!!!!
      我諗多數係油尖旺銅灣等旺區會比較多限時食肆,一來因為舖租貴所以要盡可能做夠三四輪客先賺得夠吧!!

      刪除
    2. 我剛去完西班牙,尋晚係長沙灣食西班牙野,價錢貴過西班牙一陪,又唔好食,講堅真係再無係香港食呢D野既理由! 尤其是自從最底工資後,香港已經貴過晒歐洲了,多謝李x仁啦!

      刪除
    3. 絕對係啦,你周遊列國索性去食更地道的更好,香港的外國菜好多時都已經或多或少本土化了,因為了迎合本地人口味吧!
      在西班牙食的西班牙海鮮飯一般比較「生米」.....
      其實人工成本之外,我諗更大影響係舖租升幅吧,好多旺區食肆的舖租依家都係天價,動輒幾十萬甚至過百萬!!!!

      刪除
  25. ~醃肉併盤~
    (橄欖串~各款唔同肉腸~羊奶芝士),睇落真係好吸引呀!~我都好鍾意食架!~~

    回覆刪除
    回覆
    1. 喱味最特別,所以我見幾乎大部份客都叫的呢

      刪除
  26. 呢間都有興趣去試,不過之前真係太多人,而家睇基爾介紹似乎好d啦喎,得閒都要去試吓先~

    回覆刪除
    回覆
    1. 我諗再過多一頭半個月應該唔駛再排長龍咁墟陷了吧XXD

      刪除