2015年8月12日 星期三

荔園復刻版@中環

夏日炎炎日日都30幾度勁濕熱,真係冇咩特別事都唔想出城,不過喱日破例有個特別任務,就係陪基爾媽去拎visa……



早排有颱風吹襲台灣,外圍環流令香港連日都36-37度,熱風吹來恍如置身火海。喱日出到中環甫出地鐵站已經陣陣熱風昏昏吹,一路斜上山走10分鐘已化水。大半個鐘搞掂後,因為唔想再曝曬落山,一定要慎選樹蔭小徑走,見路旁就是林蔭清幽鳥語處處的St.John's Cathedral,唔駛考慮一於轉入去行一陣降溫。



St.John's Cathedral其實都入過去幾次參觀,早年剛有數碼相機時也來影過相兼寫過blog,教堂裏雖然沒有冷氣,但單靠天花的吊扇已經令人很有清涼感,可能教堂裏特別有種令人心靈平靜舒泰的感覺,果然係「心靜自然涼」吧!Cathedral對面就是French Mission Building,聽聞終審法院幾年後會搬返遮打花園那邊,這座古老的傳道院希望可以活化做博物館之類,到時一定要來參觀下。



Cathedral出面其實仲有個細細花園仔,喱度D古樹就比堅道那邊幸福得多,除了有足夠生長空間之外,仲唔怕會立亂畀人斬。其實如果唔係因為天氣實在熱到high high,都可以在這小花園裏蹓蹥多一陣,感受一下沙漠鬧市中的小綠洲風情……



一路沿樹蔭山坡往下走,原來有條冷氣行人天橋連接渣打總行,唔駛考慮就行喱度。中環咁多西裝人,炎炎夏日要盡量利用喱類冷氣天橋商場過商場,完全唔駛落路面就最正,同外面的火燄山簡直係兩個世界。結果基爾沿天橋穿過Prince Building(第一次去佢個商場廁所,幾靚),再穿過Mandarin,一直出到去碼頭行人天橋,遙遙已望到座巨型摩天輪,不過正午時份好似無乜人去玩。



咁神心行咁遠,咪就係想順道去睇一睇復刻版荔園,搵返D兒時集體回憶,門面的城堡都有少少神緒咁啦!比較搞笑係好多後生仔女抱住去Ocean Park或Disneyland的心情去喱個復刻荔園,結果失望而回兼鬧爆,其實係完全錯晒……簡單一句這只是一座「懷舊遊樂場博物館」,純粹畀人緬懷下架咋!唔好太認真咁諗住去玩咩大型刺激喪嗌機動遊戲和鬼屋,如果你認真咪輸囉!



一入門口已經見到翻生機動大象Tino,如果60-80's去過荔園一定識Tino,就好似去OP一定識海威小姐和去DL一定識米老鼠一樣!另外荔園裏若要選最iconic玩意,基爾諗上圖喱3樣一定位列三甲:旋轉木馬、噹噹船同埋掟階磚送香口膠。



另一邊仲有個類似大生日蛋糕的雕塑,行近睇原來係一排排小露寶砌出來的(喱個時候好多blog友一定又會短暫性失憶咁問:咦咩來架D紅卜卜機械人咁得意?)Anyway,原來荔園大大話話都有成66年咁耐歷史,當然係要計埋已經執笠果十幾年啦!



跟住不能不提仲有喱座咖啡杯機動遊戲,今時今日喱套復刻版咖啡杯靚過以前好多,仲好有西洋味(以前舊荔園果套記憶中係經典茶餐廳特厚果隻咖啡杯造型)。不過唔知點解,杯面和茶壺上面都大大隻字印了著名上市茶記舖頭個名,唔知係咪收了廣告費呢?如果以前荔園識咁樣搵錢,應該唔會咁快執笠吧!



好了終於行到來最具爭議的復刻鬼屋「魔靈小學」,可能細個時基爾媽驚基爾會嚇親,所以從來都無帶過基爾入去舊荔園的鬼屋,記憶中10歲打後亦都再無去過荔園玩直到佢執笠,所以童年陰影就只有鬼屋門口果隻青面長舌女鬼以及傳出來的遊客哇鬼叫聲。依家新荔園鬼屋只係由一個簡陋貨櫃改建而成,千其咪期望會有哈嘮喂級數的驚嚇搞笑指數,評語都係果句:如果你認真咪輸囉!



戶外攤位實在太過無遮無掩,沙漠式烈日當空實在唔講得笑,雖然部份有噴灑降溫霧氣的裝置,但都係形同虛設無乜作用,快快趣去D有瓦遮頭地方抖抖以免中暑。如果唔想排隊玩遊戲都可以揀中午來,因為跟本無乜人,但先決條件係唔怕熱和中暑。上圖右的黑白老照片就係舊荔園的城堡門口,比依家果個吹氣城堡型好多。



由幾個大貨櫃組裝而成的紀念展覽館都好值得一睇,最重要係有冷氣開放,入去之後真係唔捨得咁快走。到底入面有乜睇呢?主要係60-80''s年代舊荔園的老照片,同埋D歷史簡介之類。上圖右仲有隻舊旋轉木馬機拆下來留念的彩色木馬。



睇睇D舊入場券先,原來以前入場費只係$1-$5咋喎!咁平真係好抵玩,以前基爾媽做乜唔帶多D基爾去玩下呢?以前去遊樂場玩真係件大事,幾年先會去一次唔會成日有得去!



展覽館裏的展品都是以老照片為主,唔知係咩人捐出來呢?如果唔識Tino係咩,都可以在老照片中找到。以前香港無乜大型動物園(以前深圳珠海都無動物園),唯一只有在荔園才可看到大象喱類大型動物,Tino會伸長鼻子問遊人拎香蕉。



最特別就係陳慧嫻當年果隻《變變變》的唱片封面,原來就係在荔園的旋轉木馬機拍攝的,基爾細細個時都有在這座旋轉木馬機留影,有空要上網睇返個MV,唔知會唔會仲有其他舊荔園的場景片段呢?



恐龍屋又真係幾盞鬼,不過唔知係咪喱日實在太少遊客,所以好似都冇開門靜蠅蠅咁,無謂花錢入去都係門口睇下算數。結果全程只係匆匆行了大半個鐘,已經熱到唔想再行拿拿聲走人……返屋企順手摷返D新舊對照出來懷緬下,記憶中舊荔園個旋轉木馬靚好多又夠grand,至於坐石獅子果張唔知係咪隔籬宋城影架呢?



速遊完復刻版荔園,近近地就搭天星過尖沙嘴。真係好耐無搭船過海,覺得維港窄了很多,船程只係10分鐘左右。早前聽聞有人提議建造行人海底隧道+shopping mall,基爾覺得都work,希望將來可以試下踩單車過海。



在尖沙嘴碼頭上岸後,順腳又過去Ocean Terminal行多一陣,喱期剛好係Feuerman的游泳主題雕塑作品,大熱天時看到這個仿真度極高的水著游池,係咪特別令人有種不一樣的清涼感覺?!

83 則留言:

  1. 荔園的童年回憶 @ Sky 來說 : 絕對是開心和愉快架^^

    回覆刪除
  2. 認真便輸了,網上D人吵到媽媽聲,哈哈~
    咦! 陪阿媽攪Visa,即又出發噃~

    回覆刪除
    回覆
    1. 如果係諗住純粹懷舊陳年攤位遊戲都ok嘅:P
      我冇份呀,要做超齡留守兒童XXXD

      刪除
    2. 伯友去金山,基太郎返鄉下就真。kaka..

      刪除
    3. JJ你個blog紐咁耐幾時有下集睇㗎?

      刪除
    4. 你咪做問題兒童,我就整個blog快d架喇!

      刪除
    5. 你兩條友唔好講咁多,兩個都咁慢!
      我最快! 仲唔比我認叻返一次! 呵呵~~~

      刪除
    6. JJ:你咪理咁多啦仲唔快快手寫,連銀哥都催你快啲kakakakaka...

      刪除
    7. 銀:係咪開始寫南法啦?我等住睇@@

      刪除
    8. 寫緊啦! 會出好快怕你追唔徹呢~ 哈哈~

      刪除
    9. 唔駛驚,我睇一定快過你寫kakakaka...

      刪除
  3. 甸奴都好慘架, 全靠遊客買野俾佢食
    荔園呢, 我最有印象係噹噹船個D污糟水, 因我老媽每次都叫我玩時唔好擘大口 XD

    回覆刪除
    回覆
    1. 大型動物一日都要食好多好多嘢㗎......
      Kakakakaka.....咁我都信,啲水可能成個月先會換一次,一定勁污糟XXXD

      刪除
  4. 其實一出門落到樓下已經變水人,所以仲未去荔園
    睇你d相當去左喇,當日好似無乜人,真係太熱喇

    回覆刪除
    回覆
    1. 佢仲有排開,等涼少少先去好啲,同埋揀傍晚時份,中午實在熱到無朋友,而且果度係無遮無掩曝曬....

      刪除
  5. 你係獨子?一個人一張相咁好呀,我細個嘅相通通都係幾兄弟姊妹o架。
    細個時阿爸年年都帶我地去荔園,有時叔叔都會帶我地去荔園,咁每年唔只一次啦!嘻!而家老喇冇興趣去囉!

    回覆刪除
    回覆
    1. 咁你以前一定係個好孩子啦,阿爸阿叔都爭住帶你去荔園玩咁開心^^

      刪除
    2. 嘿!咁樣我鍾意去旅行都係遺傳自阿爸呀嘛!

      刪除
    3. 阿叔又好錫我地嘅!我第一個洋娃娃和手錶,係佢送嘅。

      刪除
    4. 勁喎~~~~@@JJ爸當年去過啲咩地方,得閒問佢拎啲相來擺上blog睇下^0^
      咁個公仔同手表仲係唔係度先?!!

      刪除
    5. 阿爸要擔成頭家邊有得旅行,晚年去過北京,上海,計埋廣州三個地方,但佢係行路個隻,量地官咁o架!
      幾廿年嘅公仔同手錶,搬幾次屋仲有咩!留係個腦度。

      刪除
    6. JJ:犀利喎,咁有空要share來睇下佢啲靚相...

      刪除
    7. 佢唔影相,我都冇得睇。

      刪除
  6. 中環復刻版荔園同以前嘅感覺同味道都唔同晒,差別好大.....

    回覆刪除
    回覆
    1. 始終依家喱個復刻版係臨時性質,好多設施只係for幾個月使用,規模一定無以前舊荔園咁大咁多機動遊戲啦

      刪除
    2. 我未到過依家喱個復刻版,你,真的!很同意同以前嘅感覺同味道都唔同晒,差別好大.....有時過去了!真的追不番!

      刪除
    3. 係呀,始終係時代不同了,間中懷舊下係好,不過長期我諗就無乜market囉

      刪除
  7. 我細時成日去荔園玩架,最鍾意見大象,玩過山車, throwing 香口膠。

    回覆刪除
    回覆
    1. 以前無乜地方有得睇大象獅子老虎,都係只有去荔園先睇到@@
      係喎復刻喱個無過山車玩,以前荔園架過山車似一個盒仔咁大兩座位,行時仲有咔咔聲好得人驚XXXD

      刪除
  8. 荔園印象動物嗰邊好鬼臭。

    回覆刪除
  9. 都想去架?!係長期開定有限期呢??
    荔園的印象好模糊, 相信大象最深刻~~
    gael兄細個幾得意,可惜相片太細張!!!!

    回覆刪除
    回覆
    1. 上網check返好似話開到九月初,唔知會唔會再續期呢?
      雖然話唔收入場費,但$10一個代幣似乎太貴,始終D遊戲唔吸引只係純懷舊,可能啲人去一次就算!!!
      我其實好少去,無乜印象XXD
      都係森兄啲童年照cutie好多:P

      刪除
  10. 荔園 -- 我細個時亞嫲帶我去玩坐小船㗎,行入艇時好驚㗎,哈哈哈!

    回覆刪除
  11. 我細個去啟得多,荔園只去過幾次!

    回覆刪除
    回覆
    1. 啟德好似都有去過,不過我諗喱類遊樂場依家好難再搞得好,始終啲人玩慣咗OP和DL,未必會對懷舊樂園有興趣吧

      刪除
  12. 好耐冇來探你, 可好吧? 幾時來都是有耳目一新的感覺, 拍得好正呀!
    謝謝分享! 週四愉快!

    回覆刪除
    回覆
    1. 咁得閒就多啲來坐下啦^^
      隨時歡迎光臨~~~

      刪除
  13. 教堂好靚~
    基爾媽去邊度wet呀~~~~~
    我其實真係一次荔園都無去過....

    回覆刪除
    回覆
    1. 我覺得你果邊啲教堂仲靚@@
      佢去果啲要搭好遠飛機,我麻麻....:P
      唔出奇丫你咁後生,佢好耐以前已經執咗笠啦

      刪除
    2. 澳門哥d...我又反而好少入去參觀喎~我真係唔岩~
      華~基爾媽好勁!!!!!!!!!!佢鐘意去遠地方!!!讚!!!
      點會呀~~~我身邊都有朋友仔去過~~我去過珍珠樂園咋~~(內地的~)

      刪除
    3. 珍珠樂園我未去過,但有去過一次珠海果個唔記得叫乜名,有個好大嘅湖可以踩水上單車,有得玩Rodlbahn超驚,個山崖都幾高㗎!!
      珠海長隆個新海洋館聽聞都好大但未去過:P

      刪除
    4. 我以前細個都鐘意去好似係中山d公園呢有個好大既湖!!!又係踩水上單車~~仲要係天鵝形狀的~~~好有童年回憶0我~~~~~
      我都未去過呀~我都聽人講好大~~但入場好似唔平~所以一直都無去~

      刪除
    5. 有空可以去啲friend去回味下童年囉XXD不過唔知喱啲樂園執晒笠味?
      係咪橫琴果邊關口過去?好耐好耐以前去過一次果邊,以前果度乜都無空地多....

      刪除
  14. 荔園都無乜去過,但宋城都有去過下。

    回覆刪除
    回覆
    1. 宋城聽聞以前亞視拍啲古裝劇多數在那裏取景

      刪除
  15. 荔園,小時候去過兩、三次。印象最深的玩意是「掟香口膠」及「咖啡杯」。

    回覆刪除
    回覆
    1. 喱兩樣都係最經典,今次喱個復刻版都有,可以去回味下!!
      以前有冇試過掟中階磚?^^

      刪除
    2. 有沒有掟中階磚﹖忘了……不過,應用沒有的多!

      刪除
    3. 都是那些年的回憶了~~~~^^

      刪除
  16. 網上見到好多人 share 荔園嘅相,都有d冲動想去,但無奈夏季係我冬眠嘅日子,惟有睇相當去佐喇~

    回覆刪除
    回覆
    1. 細個時有冇去過舊荔園?
      喱個復刻版半新不舊其實都好一般架咋,唔去其實都冇損失嘅^^

      刪除
    2. 無去過,所以懷緬唔到港人對荔園嘅情懷 :P

      刪除
    3. 去過其實都唔係好懷緬到啦kakakaka...人面全非!!!

      刪除
  17. 荔園係我嘅童年回憶,但新荔園我就冇興趣去lu,我女友去完send過D相畀我睇,好呃錢feel!

    回覆刪除
    回覆
    1. $10一個代幣又貴咗啲囉,始終唔係咩特別遊戲

      刪除
  18. St.John's Cathedral和French Mission Building都未入過去添。
    復刻荔園就經過好多次都未入過去。
    搭天星過海是好正!

    回覆刪除
    回覆
    1. 連中三元,三度你都未去過,即係話其實你好耐無去過中環kakakakaka....
      天星依家仲算方便但船程太短,椅未坐暖已經到岸XXD

      刪除
    2. 也不是,不過去中環一定是來去匆匆的,沒有機會細致地欣賞。
      對,真的是椅也未坐暖呢!哈哈哈

      刪除
    3. 有空去逛逛囉,不過星期日好多人:P

      刪除
  19. 荔園+宋城+百麗殿舞台,這三個地方都是邱生的,小時候爸爸帶我地去荔園比較多,大D時,亞媽同亞姨打邱生工,所以有機會遊走荔園+宋城。到HKCEE就到百麗殿舞台上英文補習班,細個對荔園最有印象反而係『吊吊Fing』的摩天輪同碰碰車

    回覆刪除
    回覆
    1. 嘩~~~~諗個簡直係好多人的兒時夢想,父母如果一個做OP一個做荔園仲唔開心到癲kakakakakakaka....
      百麗殿舞台上英文補習班?@@我仲以為果度剩係做大戲.....
      荔園個摩天輪無安全帶,只得一條鐵棍欄住腰,我覺得仲驚過坐過山車XXXXD

      刪除
    2. 百麗殿上英文補習班是因為個D係雞精班,個補習學校唔夠位,不過上完無幾耐百麗殿就執左

      刪除
    3. 百麗殿個大禮堂咁大,咪好有考試feel^^

      刪除
  20. 36-37度,去荔園玩,勁呀!
    啲舊入場券幾真貴下.

    回覆刪除
    回覆
    1. 如果係水上樂園應該會比較吸引kakakakaka....
      係呀,你當年有冇留啲做紀念

      刪除
  21. St.John's Cathedral幾靚喎,我都未去過,得閒去影下相先,可以隨便入去任影唔嬲?

    回覆刪除
    回覆
    1. 我諗唔好太擾攘囉因為始終係宗教地方,有教徒在祈禱嘅
      同埋有時係有彌撒進行中......

      刪除
  22. 天氣咁熱到茘園 , 太辛苦了 !

    回覆刪除
  23. 早排我都去行過一轉
    不過完全冇吸引力,拎相機出來影相都冇
    同我印象中既荔園差太遠啦...

    回覆刪除
    回覆
    1. 後生嘅我諗唔會有興趣去啦,懷舊遊戲對佢地零吸引,加上大熱天時,我覺得搞水上樂園會多人幫襯D囉kakakaka....

      刪除
  24. Gael,我本想去影荔園找尋兒時的回憶,但最後都是怕熱沒有去.

    回覆刪除