2015年9月19日 星期六

2014古都瀟瀟@函館壽司

黃昏前,在別具特色的護王神社逛了一圈後,時間真的不早了,初冬季節京都的天色特別快開始入黑,都係快步走幾個街口,去返堀川通那邊搭巴士回到京都驛。



搵巴士站途中也有意外收穫,就係無意間走過唔少京都的舊街小巷,基爾如果有多一天假期,大可慢慢閒蕩感受當地民居小區裏的古樸風貌。上圖是路經的St. Agnes' Episcopal Church(聖亞革尼斯座堂),這幢聳立在一處十字路口旁的教堂原來也有逾百年歷史(建於1898年),是聖公會京都教區的主教座堂。



沿途穿過的小街兩旁都是兩三層高的小屋平房(外貌就似叮噹大雄所住的那類型平房),傍晚還有附近居民悠閒地遛狗,完全感覺不到大城市的喧鬧。現在香港樓價高,唔少人都心郁郁來日本買樓,京都這類平房若與香港的八百幾九百呎「豪宅」比較唔知邊個貴呢?!



坐巴士返京都驛總站後,記得之前見旁邊有間郵局,一於過去睇睇有冇心頭好。本來睇中上圖右喱套「京都‧嵐山花燈路」,係新式的貼紙郵票,價錢也不貴,但最後都無買,因為counter排隊條人龍勁長,影了相當買了!心裏雖有點依依不捨,但因為想趕在放工rush hour前搭火車返大阪所以點都要撇了。去到月台時接近5:00pm,開始見人潮(再慢吞吞可能真的會勁逼),坐新快速返到大阪驛唔算太晏,但天色已入黑了。



返到酒店房才發現竟然係空無一人,團友一定係忘情血拼到天昏地暗咩時間都唔記得……Anyway,咁基爾唯有一個人靜靜執下篋準備聽日返歸先啦!結果等了大半個鐘才集齊人再次出發去搵食。由於已經成7點唔想再出去四圍搵(個肚打晒鼓),近近地就在酒店下面Grand Front Osaka個商場食算了。GFO喱個商場其實都好大,分為南北兩翼,睇水牌見北翼樓上有幾層食肆,一於上去視察下。



唔睇由自可,上到去才發現原來好多間都排晒長龍,仲旺過旺角D商場樓上食肆舖頭。最後見上面喱間函太郎條人龍唔太長,而且條龍似乎去得幾快,反正好似咁耐都未試過在日本食迴轉壽司,見佢價錢又真係幾抵食喎(平過香港元字頭坂字頭果D連鎖店好多呢),結果基爾打住鼓咁又堅持等了大半個鐘……



等咁耐證明都值得,翻查資料才發現原來喱間函太郎係函館人氣迴轉壽司店,聞說佢的老店就在函館朝市,年前基爾有去過但無留意喎,走了寶!函館由於近海,朝市的食店都以新鮮魚生食材作招徠。大阪喱間函太郎分店都唔失禮,menu上大大隻字寫住食材係每日由北海道和青森直送保證新鮮云云。價錢方面係按碟計算,唔同花紋係唔同價錢,記憶中最平只售¥150(係咪傻了,平成咁)!



佢有兩款食法,除了可以在迴轉軌道上自己拎之外,仲可以剔紙落order,由於玉子燒喱類要熱辣辣先好味(見佢條迴轉軌道幾乎兜勻全場乜都攤凍晒),所以一定係剔紙叫啦!結果基爾食了成幢碟,埋單計都只係¥2540,畀錢時基乎以為自己食得飽得滯聽錯,HKD$170左右咋喎?!若是在香港元字頭果D食,唔放低四五百蚊都唔駛旨意出到門口!



食到飽一飽返出去Grand Front Osaka外面逛逛散步。之前基爾來回火車站和酒店之間經常路過喱度幾次,但都係來去匆匆無乜仔細行過,商場外面這個廣場係有個Christmas market(當時係19號,距離聖誕只剩幾日),旁邊仲有個真雪蹓冰場,唔少情侶相相對對拖住手咁蹓冰,襯埋個Christmas market背景感覺真係幾浪漫。



至於Christmas market那邊規模唔算太大,賣的都是常見的聖誕卡聖誕飾物精品和食品之類,基爾只係齋睇無幫襯,同聖誕老人公仔影下相算啦!不過行了一陣後已經感覺到大阪D冰冷西北風真係幾勁,越來越掛住酒店的高床暖枕,都係時間結束這個大阪最後的浪漫一夜,反去沖涼睡覺準備明早出發往關西機場。



臨返上酒店房前路經Grand Front Osaka入面大堂棵聖誕樹又影張相,香港D商場一旦少了一點點自由行就嗌晒救命,人地日本商場人流也不多但都做得住,而且行得好輕鬆舒適添(行新城市果D直情會令人精神緊張精緒不安)。最後返到房點算一下手頭餘下的日円,就剩下這些了,留待下次用吧!翌朝要5點幾6點起身,因為7點要出機場搭9點幾機返港,好彩預早D因為途中發生了點甩轆趕車事件……幸好有驚無險見到左上圖就知已安抵機場巴士返家途中,那時才不過下午1點幾,真係唔係好慣咁早返屋企,下次都係唔搭ANA了。

80 則留言:

  1. 乜你唔係唔食生冷o野咩?唔好話我知你淨係食玉子燒喎.

    回覆刪除
    回覆
    1. 去旅行果陣都食啲啦,否則驚無野食丫嘛:P

      刪除
  2. 我跟團去北海道,日元價低,自費吃海鮮都很貴,吃一餐要近千港元。

    回覆刪除
  3. 我有個小問題呢....唔見你見藥妝店嘅? 我識人之中, 近來都甚愛買龍角散, 不過我唔知有咩好 XD

    回覆刪除
    回覆
    1. 有呀之前去錦市場同在大阪那天已經行過了,男人老狗都唔駛成日去行藥妝店嘅kakakakaka....
      龍角散醫喉嚨痛丫嘛,好多人會買,依家hk都有

      刪除
  4. 去日本食正宗迴轉壽司又平又靚,我去就唔只食一次!

    回覆刪除
    回覆
    1. 可能因為實在有太多其他好嘢食,咁迴轉反而唔算太特別吸引囉:P

      刪除
  5. 我只喺見到 $170,無敵價.....食壽司
    大阪食得好正,又平.....。

    回覆刪除
    回覆
    1. 喱間算幾抵食呀,所以都多人排隊呢

      刪除
    2. 人龍店好少輸,不過人多啲會仲好,可試食物種類多啲,
      香港人龍店好多假,香港電台主持話景隆街個間人氣拉麵,生意日走下坡,就出哩招,明明十幾個位,只用五個位咋,真喺差!

      刪除
    3. 日本啲食肆我諗競爭比香港還要大,如果唔好食一定無人幫襯了....
      HK果啲我就無咁好心機排啦,如果要排幾粒鐘真係幾好食都係假啦XXD

      刪除
  6. 唔係上歷史堂都好d,買唔到郵票呀!條人龍長成點呀?

    回覆刪除
    回覆
    1. 我諗至少要排半粒鐘左右啦

      刪除
  7. 去日本一定要食迴轉壽司 :D
    户外真雪蹓冰場好正吖!無落場轉番幾圈?

    回覆刪除
    回覆
    1. 日本都好多好嘢食^^
      無呀,一支公費事阻住人地啲情侶啦wakakakakaka....

      刪除
  8. 早D返屋企,唔使搭的士一樣啫。 睇到有靚郵票唔買就有D可惜了。

    回覆刪除
    回覆
    1. 咁又唔係喎,我鍾意早機去晚機返玩盡D丫嘛,冇幾可有得去旅行呢XXXD
      最衰條人龍咁長啦,唔係實買!!!!

      刪除
  9. 行新城市果D直情會令人精神緊張精緒不安》》》哈哈哈!超有共鳴呀!我都係咁架!

    回覆刪除
    回覆
    1. 所以都唔知點解咁多人去,可能啲人真係放假無乜地方好去吧XXXXD

      刪除
  10. 您有沒有在日本買「豪宅」呢?
    看相片,函太郎的壽司正喎~~~

    回覆刪除
    回覆
    1. 梗係冇啦我又唔係成日去:P

      刪除
    2. 感覺上似,因為您懂得生活享受,又有文化素質,應該有一間方便落腳。
      中秋節快樂!

      刪除
    3. 我覺得你似啲喎XXD
      中秋節快樂~~~~^^

      刪除
  11. 海膽壽司好足料!正呀!

    回覆刪除
  12. 間壽司又真係幾正喎~~~
    聖誕節都好好氣氛喎~~搞到我都想聖誕去日本~~~
    ANA咁早機番黎既??我次次都係下午6點機先係日本番香港喎~

    回覆刪除
    回覆
    1. 几正架,不過要等位囉:p
      大阪站出面有个聖誕market仔同埋聖誕樹,其他地方就唔太多節日气氛!
      佢主要係就D日本人早机來HK丫嘛

      刪除
    2. 唉~度度都要等~不過等完食到好野就ok啦~~~~
      聖誕market好有氣氛呀~~~~我其實都好想聖誕節去德國d christmas market度感受下聖誕氣氛~~~
      但係我係搭ANA喎~~~唔通有兩班機?

      刪除
    3. 日本同hk一樣,通常啲人氣食店都要排....
      聖誕去歐洲其實都幾正架,不過機票會貴少少同埋日照短啲囉:P
      咁我又唔知喎,我只知佢係晨早機由大阪來hk,然後下午3點幾返大阪!!!

      刪除
    4. 無錯~其實我個人好驚等位的....如果真係要食..我會超早去食~~
      都係呀...所以我講左好耐一直都仲未去...一黎怕貴..二黎其實我聖誕節好難搶到假~
      0我~~~我搞錯~~~~我記錯呀..因為我成日搭ANA係東京番香港~~~你係大阪番香港~~~sorry~~

      刪除
    5. 我同你一樣,依家出街食都盡量食頭輪^^
      咁一於讓畀人放啦,我都係鍾意淡季去抵啲:P
      原來如此,不過飛東京都好似係多航班啲嘅

      刪除
    6. 係呀~一係就搵d唔使排架囉~
      哈哈~所以我好少加入聖誕假呢個戰團~
      應該都係啦~我覺得東京航班ana d時間唔錯~
      預祝你中秋節快樂~團團圓圓~

      刪除
    7. 出發未呀?玩得開心啲影多啲靚相.....^^

      刪除
  13. 京都是我最愛的日本地方,喜歡她那份古意與悠閒。

    回覆刪除
  14. "有個真雪蹓冰場,唔少情侶相相對對拖住手咁蹓冰" -- 令我立刻諗起我同DD以前在美國嘅情境,多謝你!

    回覆刪除
  15. 班團友去血拼, 咁你唔去血拼??

    回覆刪除
    回覆
    1. 之前一日已經跟咗佢地shop一day架啦

      刪除
    2. shop足一day...睇嚟收獲唔少喎!!!
      下一站又去邊呀?其實依家要外遊話咁易啦!!爭在公司假期有幾多...你咁快就話冇嘢寫?!!

      刪除
    3. 無乜咋,我好有節制嘅~~~~:P
      未有planning,其實去旅行都幾花錢,要貯下錢架嘛,你估真係唔駛撈咩XXXD
      生活靜靜似是湖水~~~~無乜特別嘢寫,索性休一陣blog啦kakakakakaka....

      刪除
  16. 話說幾年前尖沙咀被攻陷我都中意去下新城市哩個甘泉,點知好快連新城市都變到尖咀咁 sosad

    回覆刪除
    回覆
    1. 一式一樣其實都無乜特別好行啦:P

      刪除
  17. 戶外真雪蹓冰場~未試過~正呀!

    回覆刪除
    回覆
    1. 其實就似又一城/megabox果種,不過就是戶外而已...

      刪除
  18. 我都好想有機會咁嘅節日戶外溜冰..爽死..!
    食到又平又新鮮嘅..大胃Gael應該同幢碟影番張留念..

    回覆刪除
    回覆
    1. 爽死===>係咪指有人拖住你溜先XXXD
      咁我又唔會喎,驚嚇親啲blog友就唔好啦wakakakaka.....

      刪除
  19. 嘁日本食嘢真係抵過香港多多聲!

    回覆刪除
    回覆
    1. hk食肆多數係食舖租丫嘛XXD

      刪除
  20. 真係好抵喎, 又多個選擇 !
    呵呵, 終於到我了, 明天到我出發了 !

    回覆刪除
    回覆
    1. 好羨慕~~~~!!
      今次會去邊度潛水影海兔?

      刪除
    2. 我係去左日本四國哦, 超靚的風景 !!

      刪除
  21. Gael,
    祝中秋佳節*•ღ團圓¨♥`❤甜蜜♡*快樂滿瀉Ѽº
    Ϡ₡۩۞۩ഐ۩۞۩ഐ۩۞۩ഐ۩۞۩Ϡ₡

    回覆刪除
  22. 回覆
    1. 睇完會唔會去食壽司過中秋?^^

      刪除
    2. 前幾年有人送壽司雪糕過中秋....正

      刪除
    3. 用雪糕同生果 整成壽司模樣...

      刪除
    4. 哦~~~~嚇得我XXXD
      雪糕生果又幾吸引喎

      刪除
    5. "哦~~~~嚇得我"??
      難道你以為喺...殭屍雪糕咩!!!!!kakakaka...

      刪除
    6. halloween應節食品,你發明㗎?XXD

      刪除
    7. 哈哈哈...halloween應節食品,等我去申辦番個專利權...先!

      刪除
    8. Gogogo~~~~~記住搵埋夏蕙姨姨幫你賣廣告XXXD

      刪除
    9. 夏蕙姨姨魚網背心、熱褲嘅造型...勁 like!
      未入場已經嚇暈咗....wakakakaka.....

      刪除
    10. 估唔到你有特殊僻好喎XXXXD

      刪除
    11. 唔...好...話...俾...人...知...呀....!
      我會殺人滅口....架!wakakakaka.....

      刪除
  23. 行新城市果D直情會令人精神緊張精緒不安==>我日日都經過=.="

    回覆刪除