2016年4月8日 星期五

中大荷花之湖@馬料水

復活長假期連續4日都甚好天氣,睇新聞話幾萬人排長龍搭船湧入長洲郊遊,搞到逼人過旺角。基爾向來有「人多恐懼症」,最終決定靜靜地又近近地去大學校園輕鬆走一轉。



好耐無來CU,原來依家都幾犀利喎,在火車站出口已有這個「樂步行」地圖,證明除了學生之外,都好歡迎基爾喱類無聊外人來閒逛hea蕩……



之前都唔太覺得喱個擺在校門前的女神像咁搶眼,今日點解一來到就見到佢?哦……可能因為佢下身披了幅非常colourful的彩虹旗吧!探完女神後,先去走走崇基湖邊,橫亙湖上的九曲橋是必然的「到此一遊」景點。



真係唔知原來喱度湖畔一帶都有唔少水鳥棲息,突然覺得好似去了米埔睇雀一樣,勝在全天然沒有鳥籠阻隔,當然睇唔睇到就要靠少少運氣了。



果然有人專程來set晒腳架影雀,依家其實好多人多擠逼地方已經唔畀人set腳架和用自拍棍了。上圖右是花園外的石碑,令人想起了心經簡林。



恬靜的湖邊特別有悠閒的放假feel,如果年頭來這裏可能會比較墟陷,因為是賞楓香樹和落羽松紅葉的旺季,CU這裏的落羽松比青衣公園的更多更壯觀。



玩開有癮,又來做個全景照質素小測試,圖上是相機本身的全景mode,基爾有點失手看來是偏光了,下次嘗試將曝光值調校到負多一點。圖下是PS merge的接駁效果,同相機全景mode一樣無縫連接而且色調更靚,科技真係犀利。



再看另一張湖邊靚景全景照,無瑕連接確實係鬼斧神工天衣無縫,基本上光暗和色調都很一致,中央的接合點也找不到破綻。



來到湖中心的獅子亭,紅色樑柱和綠瓦圓形蓋頂是典型的中國風,與九曲橋和拱橋相映成趣,遠看很有點「小天壇」味道(給多一點想像力)。



獅子亭顧名思義就是由獅子會捐錢建造的,亭邊還有個養德池,聽聞以前真係有在這裏養duck,不過後來因為禽流感盛行就沒再養了,現時湖裏仍見養了不少鯉魚。



中大的荷花池向來很有名,1997年大裝修後改了個很有詩意的名字Lake Ad Excellentiam(未圓湖),廣闊的湖面最適合用來測試panorama。



喱日假日都有唔少一家大細帶埋露營帳幕來picnic,真有點誇張呢!另外仲有好多著晒袍帶晒四方帽與父母一起來影紀念相的畢業生,場面夠晒溫馨……

40 則留言:

  1. 對上一次來聽講座,從高處往下望,景色真的不錯!但上次來去有點匆忙,未有到未圓湖一遊!

    回覆刪除
  2. 我有朋友係度影婚紗相呀!

    回覆刪除
  3. 回覆
    1. 唔多清楚呀,就係想睇下有冇blog友解答到.....

      刪除
    2. 原來女神也關注這議題

      刪除
  4. 真係明智,依家離島真係好恐怖
    哩個地方好寧靜C服(我未去過架)

    回覆刪除
    回覆
    1. 係呀長洲係超多人,可能坪洲南丫會好少少
      依家周末去大澳都超多人,搭車成日要排長龍
      應該都啱你同大爺去靜靜地拍下拖影返啲sweetsweet相^^

      刪除
  5. 回覆
    1. 係馬料水果個大學站喎,唔好去錯HKU果個:P

      刪除
  6. 復活長假期你都可以放咁好吖?

    回覆刪除
  7. 這裏好呀!寬闊恬靜,無論攝影寫生散步都適合!

    回覆刪除
  8. 回覆
    1. 果日去已經有幾朵,依家應該仲多

      刪除
  9. 我無去過中大呢
    光天化日, 你應該見唔到辮子姑娘 XD

    回覆刪除
    回覆
    1. 果日人來人往又有好多畢業生一家大細來影相,其他就無乜留意喎:P

      刪除
  10. 很多年沒去參觀,變得很靚,但直覺上他們將錢用在教育上會好些,哈哈哈

    回覆刪除
    回覆
    1. 咁如果個校園靚啲都ok嘅,反正起乜橋乜鐵乜跑都嘥咗唔知幾多千億,起公園喱啲一千幾百萬跌都跌咗啦kakakakakaka....

      刪除
  11. 中大係好適合郊遊同影相,啲相色調好靚 :)

    回覆刪除
    回覆
    1. 唔錯呀個環境,至少空曠啲,很有空間感,唔駛咁有壓逼感

      刪除
  12. 中大最靚嘅建設就係呢個湖同埋公園!

    回覆刪除
  13. 呢間係咪gael兄的母校大學呢?!!
    假期嗰幾日真係好好天氣,有人去picnic都唔奇~~
    都市裡的湖光山色都盡入眼簾!!!!

    回覆刪除
    回覆
    1. 唔係呀:P
      復活假果幾日天氣真不錯,近喱幾星期就成日落雨又潮濕
      是自成一角的小天地

      刪除
  14. 我見新聞過長洲咁多人去我都驚驚...
    其實連過香港我都驚...因為澳門已經好多人....
    再由一個好多人既地方去另一個好多人既地方.....會好攰~~~~~

    回覆刪除
    回覆
    1. 絕對同意呀....
      所以去旅行都揀啲可以靜靜地hea的地方^^

      刪除
  15. 「人多恐懼症」我都有呢個病
    香港人對攝影嘅瘋狂,係第二個國家或地方暫時未見到。早年有日本朋友來香港,問我係日本或香港攞大機狂拍嘅係咪香港人,我話佢地係big6人,應該我攪錯了⋯

    回覆刪除
    回覆
    1. 你應該唔算好嚴重,因為我見你在非洲同人逼小巴都好enjoy丫XXXD
      其實影相本身都係一個唔錯嘅嗜好,不過就最好唔好影響到人地囉,同埋有啲好多人排隊影嘅招牌式景點地方,最好就影兩三張就算啦,顧己及人丫嘛.....

      刪除
  16. 哈哈~ 非洲體驗又點同呢~
    不過咁講,都可用來體驗香港嘅一窩風文化嘅,wakaka~

    回覆刪除
    回覆
    1. kakakaka....你歧視本地人XXXD
      真的很怕一窩,要排長龍的人氣食店一定唔會去襯熱鬧,試過一次已經怕晒

      刪除
  17. 我都好耐無去中大了。聽講上面有個“天人合一”景,唔知在哪裡?

    回覆刪除
    回覆
    1. 就在山頂位的新亞校園裏,望出去吐露港景觀真的很美呢

      刪除