2016年4月12日 星期二

中大天空之鏡@馬料水

沿湖行完一圈之後,當然未有咁快就走人,這次來不是要找天空之鏡嗎?快快趣趣行返去校巴站等車,因為都幾多人在等車上山。



如果唔想等校巴其實也可以沿那條行山徑上山,當是行山也未嘗不可。若計車程也不過10分鐘左右,就可來到山頂的新亞。



基爾鏡頭下的這個CU天空之鏡也不太差吧!幸好復活節這幾日長假的天色不錯,才拍出了點點神韻,不枉此行了!這裏與山下湖邊同樣有很多畢業生來拍照,要耐心輪住排隊影相。



這裏其實也有個別具詩意的名字,叫做「天人合一」。由懸崖邊望出去仲可以盡覽山下科學園一帶的豪宅級靚景,吐露港無敵270度靚景也一覽無遺,遠處藍天白雲下的八仙嶺和船灣大壩都清晰可賞。



照完鏡之後就行返入去知行樓那邊,看到上圖喱幾棵有白色小圍欄圍住的樹仔,有冇發現有乜特別呢?唔講可能無人會認得出,這幾株幼幼的小樹苗就係CU很有名氣的櫻花樹。



平時去開日本賞櫻的人,很多時都係只觀其花不見其葉,因為要待花瓣落盡之後才會慢慢重新長出嫩葉迎接夏天到來。基爾都係第一次留意到櫻花樹的葉原來都幾大片幾綠悠悠的。



大約農曆新年前後,本來基爾都有意來這裏賞櫻,可惜一直無法抽空來看,遲成個幾月才來當然乜野櫻花碎都不會看到,卻發現樹旁圍封了一圈紅白膠帶,可能係因為之前來賞櫻影櫻的人潮實在太多又太肉緊,校方恐怕傷害了脆弱的櫻花樹和草地所以就用膠帶圍封了。



若連同CU新亞這裏的櫻花園計,基爾總算也去過3處HK的賞櫻熱點(另外兩處是較多人熟悉的長洲關公亭和大帽山扶輪公園),只餘下嘉道理未去過,明年真要好好計劃一下賞櫻路線圖了。上圖不用多介紹也知是中大很有名的百萬大道。



可能因為長假期關係,大部份學生都返晒屋企,百萬大道上都變得冷冷清清無乜人,間中只見幾個來拍照的畢業生家庭,像基爾這類專程來hea蕩的無聊人也不多見。



沿山路隨意往下山方向走,又路經了上圖這個中草藥園。翻查資料才知原來CU總共有3個中藥園,分別在崇基、新亞和聯合。



中藥園佔地約2萬平方呎,由中醫學院管理,園裏原來種了多達500幾種中草藥作科研和教學用途,有好多都係熟悉的名字,例如上圖的紅葉鐵樹、車前草和龍利葉。



一直行到2:30pm見有點餓,本來諗住快快落山搭火車返沙田醫肚,不過行行下又見到喱間茶樓,在大門口問過侍應假日可招待外賓(weekdays只招待教職員及學生),唔駛諗一於試下啦!非會員只係$8一位茶,大中小點分別係$19、$16和$14,以假日來說不算貴,結果叫了珍珠雞、粉果、叉燒包、蘿蔔糕和蜆蚧鯪魚球,每樣都熱辣辣真不錯,很有點驚喜!加上侍應阿姐招呼也好好,基爾覺得水準比外面的連鎖式茶樓好得多,有空可以再來encore。



為免唔記得這間樂雅軒在CU半山什麼地方,特別拍下茶樓對面這間教堂作記認。唔來真係唔知原來中大校園範圍裏竟然還有間咁大的教堂,沿路落山時還不斷聽到教堂傳來的鐘聲,難道有人在行婚禮?



來到這條築有紅色欄杆的「順利橋」,即表示又重新回到山腳的崇基了。橋邊仲有一處清幽雅緻的小瀑布,增添了不少點郊遊味道。突然記起以前HKU也有座「勁過門」,與CU這座「順利橋」也可以說是絕配吧!

84 則留言:

  1. 在農曆新年前後開的,可能是桃花。櫻花在暖和的春天才開花架。

    回覆刪除
    回覆
    1. 香港唔同㗎,長洲果啲通常一月尾二月初已經開晒花
      CU喱度聽聞係日本品種,同長洲的台灣種山櫻又有啲分別,明年去睇睇....

      刪除
  2. CU天空之鏡有波紋,唔夠perfect

    回覆刪除
    回覆
    1. 始終山頂位都係會有啲風,同埋人多排隊影,都唔可以等太耐啦:P

      刪除
  3. 去年在天人合一遇上一班年輕人也拍照,我也偷拍下了很精采的「天人合一」,這張照片現在作畫稿,在練習中!

    回覆刪除
    回覆
    1. 喱度都係CU地標之一,所以都幾多人來影畢業照
      畫好之後記得貼上blog畀我地欣賞下喎^^

      刪除
  4. 咁快就有新一篇blog@@
    棵櫻花樹好似比較弱小,相信長花後會很美...
    香港可以搵到天空之鏡都唔錯,對我來講都好特別~~

    回覆刪除
    回覆
    1. 森兄嫌太快,咁我就立即減速啦kakakakaka....
      我諗種咗唔係好多年,過多幾年會大棵啲
      西環碼頭果個森兄有冇去影過?

      刪除
    2. 點敢嫌gael兄太快丫…XXD,最好就一日一篇或二篇仲好啦~XXXD
      平時影室內場景比較多,呢類天人合一的景色,相信誰有相機在手的都會影影影…

      刪除
    3. 仲諗住有森兄一句話,可以借勢偷下懶hea耐一點先kakakakaka....
      我成日覺得懂畫畫的人,影相都一定有返咁上下,至少構圖角度色彩美學方面不會差吧^^

      刪除
  5. 睇上一篇時,我仲以為你懶得上去合一亭,原來冇miss到 😄
    教堂可以俾舊生book嚟行禮,都真係有人book架,喺中大啲刊物度見到

    回覆刪除
    回覆
    1. 都唔會miss嘅,一場去到都上埋去睇下囉^^
      原來如此,果然係有人會租場行婚禮,又幾特別喎!唔知會唔會多數係舊生又或者教職員呢?

      刪除
    2. 識得有master嘅同學喺度行禮, 但唔算熟, 所以冇出席, 我諗人數上一定係舊生多喇。聽聞唔會俾公眾借用, 一定要係舊生、教職員或校董會啲人先借得

      刪除
    3. 原來如此.......
      下次如果再去,都想入去參觀睇下係乜野樣

      刪除
  6. 回覆
    1. 望出去個吐露港無敵海景其實真係幾靚㗎

      刪除
  7. 「天人合一」果然好有C意
    咁你之前有去過嘗櫻嗎?

    回覆刪除
    回覆
    1. 文化人地方都係要起個有詩意嘅名^^
      無呀,剩係見人地有去影,盛開果個禮拜都幾多人去影

      刪除
  8. 我都去過呀,就在櫻花樹旁邊.

    回覆刪除
  9. 順利橋。。。突然有啲怕怕嘅感覺 , hmmm

    回覆刪除
  10. 回覆
    1. 之前回來有冇同專員去影張sweet sweet照?

      刪除
    2. 無啦, 而家我都唔敢自拍 XD

      刪除
    3. 點解?
      買返支selfie stick丫嘛,HK買平好多

      刪除
  11. 天空之鏡出來效好吾錯,我喜歡第一張﹗

    回覆刪除
  12. 「天人合一」效果很好。
    櫻花樹,又多個潮拜點。

    回覆刪除
    回覆
    1. 果度影出來意境效果真不錯
      但當然不可與玻利維亞鹽湖果種比較......
      可能HK人愛賞櫻,近年好似多咗幾個喱類熱點

      刪除
    2. 聽人說這兩天有新郵票出,有沒有入貨呢。

      刪除
    3. 好似有訂喎,但唔記得係乜:P

      刪除
    4. 日本地震破壞了很多古蹟,您的blog上相片更真貴。

      刪除
    5. 熊本我冇去過呀.....不過聽聞熊本城有損毀!!
      網上check過原來5月會出大運河郵票

      刪除
    6. 好佩服您對集郵的熱愛。

      刪除
    7. 都唔係好熱愛㗎咋XXXD
      熱愛同啲blog友chitchat多啲kakakakaka....

      刪除
  13. 原來山上都咁多野睇,真係好介紹

    回覆刪除
  14. 哩個天空之鏡有創意!!XD

    回覆刪除
  15. 舊年去過,好多人,有旅行團去添!

    回覆刪除
  16. 只有有水面...那裏也是天空之鏡呢~~~~~~
    華...如果間酒樓係澳門...只可以超級抵黎形容!!!!!$19係澳門應該係小點.......我都好鐘意食蜆蚧鯪魚球...因為蜆蚧真係好香~

    回覆刪除
    回覆
    1. 你去果個大好多靚好多^^
      咁澳門飲茶都幾貴喎....蜆蚧鯪魚球真係幾唔錯,平時飲茶好似比較少有喱味食

      刪除
    2. 唯有講...同埋可以企係上面囉....wakakaka~不過其實有一個好靜既水面都做到既~
      係呀....我都唔明點解依家經濟咁差....d野食仲係咁貴既

      刪除
    3. 好期待睇下你影得有幾靚^^
      咁希望你地今年再派多啲錢幫補一下D生活費

      刪除
  17. 淺淺的池水與遠處藍天碧海景致的“天人合一”,令人想起錢穆先生
    及其所著的〈天人合一論〉。

    回覆刪除
    回覆
    1. 都話kaka博學多才啦連錢穆都識^^

      刪除
    2. 基爾兄: 哈哈哈...乜咁大巴掌"摑"過嚟呀!
      論博學多才邊及基爾兄呀!:P

      刪除
    3. 豈敢豈敢,純粹充心一讚XXXD

      刪除
    4. 那間是崇基教會,向下走有個未圓湖.

      刪除
    5. 係呀,那天也有去湖邊逛了一圈

      刪除
  18. 下次去打雀前可以順便飲埋茶!

    回覆刪除
    回覆
    1. 不妨去逛逛,不過雀就唔算多,可能依家季節比較少

      刪除
    2. 要在日落黃昏前去到未圓湖,就會見到好多歸巢的雀

      刪除
    3. 都啱喎,黃昏睇雀機會大啲

      刪除
  19. 用紅白膠帶圍對櫻花樹 @ 有点大殺風景喎 >.<

    回覆刪除
    回覆
    1. 可能早前實在太多人去影櫻花,管理人員驚啲遊人會推塌棵樹仔又或者踩爛草地XXD

      刪除
  20. 呢處好介紹, 下次我又去行下.

    回覆刪除
    回覆
    1. 純粹近近地一遊,不要抱太大期望.....
      鏡頭下的風景不錯呀

      刪除
  21. 「背」!不會天空之鏡!

    回覆刪除
    回覆
    1. 如果唔怕高山反應都不妨去一遊!
      當然如果有阿摩那類的悠長假期更佳^^

      刪除
  22. 個天空之鏡係人工水池? 都ok喎!

    回覆刪除
  23. 我真係未行過中大喎, 仲有得飲茶咁好?!

    回覆刪除
    回覆
    1. 有得飲茶呀,而且假日唔會好多人,唔駛等位添

      刪除
  24. 呢個地方好多人都去影過,好有天空之鏡感覺!

    回覆刪除
    回覆
    1. 影出來個效果唔錯
      實景其實望出去吐露港都幾靚嘅^^

      刪除
  25. 天人合一是影友的聖地,每年可以在這裡影櫻花.

    回覆刪除
    回覆
    1. 係呀都幾多人上去影相
      影櫻花就要1月尾2月頭啦

      刪除
  26. “天人合一”這個景在很高的山上嗎?上次去教堂觀禮,之後天色陰暗,沒有再去找了。

    回覆刪除
    回覆
    1. 對呀,就在山頂位....
      由教堂要再往山上走一段路㗎,所以還是在山腳乘校巴一直到山頂的新亞,要比較省腳骨力囉^^

      刪除
  27. 基爾你好彩啦,去到間好食嘅餐廳,中大幾乎間間餐廳都難食到c,你去呢間算你好唔錯架啦!

    回覆刪除
    回覆
    1. kakakaka...你有冇食過喱間?其實也可能我要求低,一般唔係太難食嘅我都覺得好食㗎啦:P

      刪除
    2. 當然有啦,不過唔係成日有得去,我好遠架,有同事揸車先有得去,唔係行上行落都夠鐘,唔洗食囉,我喺你張百萬大道相中嘅建築物返工~

      刪除
    3. Really~~~~~正喎在那裏返工^0^
      我果日都係搭校巴上山頂然後行返落山,當係一日遊行山,原本都諗住出返沙田先食,行過見喱間都招呼外人,見價錢唔貴又試下囉,都幾好食喎!唔知平時係咪都幾多教職員幫趁呢?

      刪除
    4. Lunch唔book位一定無得食,呢度lunch時間係一位難求啦,雖然好多都難食到C,我今日返9-7,就係入面同你傾緊囉...XDDD

      刪除
    5. Hahaha^^咁又真係几橋喎!!!
      今日weekend應該不難揾位吧!

      刪除