2016年4月20日 星期三

同心泰國菜館@九龍城

已忘記上次來九龍城是什麼時候了,印象較深刻依然係:細個時隨基爾媽來逛成衣出口店又或者去街市買菜;每分鐘會見到巨型鐵鳥從唐樓頂夾縫快速掠過的奇景,還傳來震耳的尖刺嘈音……



今時今日九龍城當然不可能再有鐵鳥低飛掠過,甚至成衣店好像也消失了,只剩老唐樓依舊靜靜佇立行人不多的街上(咩事突然咁文藝)……間唔中有一兩幢新式的摩天豪宅在唐樓夾縫間拔地而起,新舊對比顯得有點突兀,難度是時空錯配了的「飛來峰」?



在唐樓老街中穿梭有點迷惘,幸好有手機地圖幫助終於找對了方向,不能不承認先進科技始終帶來了方便,時代巨輪新舊交替似乎是不可能逆轉的規律吧!原來預約好聚腳的泰菜館就在原先行人隧道出口附近,足足繞了一整個大圈,真是眾裏尋它千百度……



其實如果早知係賣潮洲禮餅老店隔籬(這是一個非常關鍵又具地標性的hint),就唔駛浪費了一刻鐘有多的腳骨力去兜兜轉轉到處亂晃。Anyway,喱日主角唔係基爾,點餐重任全交主角主理,睇menu大部份係$40-80都幾抵食喎!比較特別係點河粉可向侍應要個調味架,裏面有辣椒粉、辣椒油和炸蒜茸等幾樣味料,重口味者可自行酌量加料!



由於人數唔多只點了數樣,基爾第一次來幫襯都唔知有乜特色菜,不過見附近食客唔少都有點湯河檬粉之類。上圖喱兩個係泰式鴨肉湯河和泰式海南雞飯,味道都算唔差,份量也很足。



另外上面喱個泰式滷豬手都幾有特色幾入味,肉質比較林和嫩,有點入口即溶的感覺,同中式燒味檔的豬手燻蹄不一樣。不過基爾對肥東西始終有點戒心,都係淺嘗即可……



食飽飽立即出去附近行多一陣消耗一下,反正很久沒來過九龍城,發現老街一帶依然仲有唔少老牌食店和麵包店,間中還見到一些很新派的蛋糕店,反而九龍城廣場看來沒什麼特別店舖好行。



結果亂蕩一遍又蕩到來寨城公園,記得初初開幕時基爾都曾經來逛過數次,這次舊地重遊感覺依然閒適,大樹林蔭中式亭園佈局清幽雅緻。雖然這日來到時天氣仍未算太熱,但已見不少街坊來乘涼散步,大都市裏有這樣一片綠洲確實不錯!

同心泰國菜館 Ruamjai Thai Restaurant
九龍城打鼓嶺道5號

79 則留言:

  1. 我極懷念有鐵鳥時的九龍城。今年返香港都無時間去九龍城搵食呢

    回覆刪除
    回覆
    1. 以前出入機場方便好多唔駛搭咁遠車XXD
      依家好多舊樓都續步重建中,第時啲老店可能買少見少

      刪除
  2. 那些年,我住在港島區,和朋友到九龍城逛街,我也經歷過鐵鳥在頭頂擦過的經驗,很特別的感覺,那巨大的噪音,上一代香港人的包容,我瀝瀝在目。

    回覆刪除
    回覆
    1. 我剩係記得好嘈,每隔幾分鐘就要塞住耳仔XXXD

      刪除
  3. 同心泰國菜館都曾聽朋友講過,唔錯架!

    回覆刪除
  4. 你講起九龍城我都係聯想細個聽到飛機聲…
    可能我哋同一個年代…唔係!!唔係!!gael兄00後架嘛…XXXD
    尾二張相咁多人圍埋睇咩?!!阿伯捉棋定榕樹頭講故?!!

    回覆刪除
    回覆
    1. 如果係00後都聽過九龍城D吵耳飛機聲都幾驚喎,莫非係靈童轉世前生記憶?!!@@XXXXXD
      城寨公園好似係有喱一類古蹟導賞團,定時帶住班有興趣聽古仔的遊人介紹一下古時城寨各處的古蹟,例如衙門、大砲和古橋遺址之類,有興趣都可以跟住一齊聽都無問題....

      刪除
    2. 一睇到...XXXD都知係講笑嘞~~笑吓唔駛太認真!!
      憑目測,我諗gael兄頂多90後!!!哈哈哈
      不過高膽固醇的食物我真係唔敢食太多~~淺嘗就算

      刪除
    3. XXXD已經成為爆笑的暗號......
      你係咪講緊1890年果隻先XXXD
      對呀,森兄深諳養生之道,三高食品都係間唔中淺嘗就好了

      刪除
  5. 基爾兄終於發文喇 \(^0^)/
    文藝嗰句係幾靚, 我欣賞咗兩次 ^.*
    九龍城..好陌生, 唔知有座咁靚嘅建築, 有時諗諗, 有時間就飛去外地玩, 好似都唔係咁熟悉香港, 都係慣性去嚟去去都係嗰幾個地方

    回覆刪除
    回覆
    1. 係呀驚太密,都係隔疏D好....
      文咩藝丫扮果隻而已,講笑咪認真XXD
      九龍城我都有一排無去,對我而言交通唔算方便,日常好少路經
      感覺上都多好多一幢幢高樓,以前就多數5-6層唐樓多

      刪除
    2. 唔好太疏喎 >.<
      感覺係舊區, 已經數唔到幾多年冇去

      刪除
    3. 遲下都驚無乜特別嘢寫,但仍會巡blog^^
      如果鍾意尋訪啲老店食肆喱區都有好多選擇,當然仲有啲新潮餅店

      刪除
  6. 泰國菜, 我記得黃珍珍, 因為有位朋友成日話個度有人妖 @@

    回覆刪除
    回覆
    1. 佢個招牌最大,唔知係咪好多人幫襯?
      有冇人妖我又唔知,只記得以前聽商台成日有黃珍珍廣告XXD

      刪除
  7. 九龍城真的有好多正嘢食!

    回覆刪除
    回覆
    1. 我想問您就真。
      以前吃泰國嘢,朋友會提議去九龍城。現在少叫泰國菜,便好少特別去。

      刪除
    2. 我好少去果區:P
      好似之前個禮拜仲有潑水節,都幾熱鬧

      刪除
    3. 九龍城有潑水節?出年一定要去,哈哈哈

      刪除
    4. 有呀通常4月上旬囉,不妨上網search下^^

      刪除
    5. 一定要!另一個是大坑火龍,常常錯過了日子。

      刪除
    6. 大坑舞火龍好似係近中秋吧

      刪除
  8. 回覆
    1. 食完如果係陪大爺去打網球應該問題不大XXD
      否則都係盡量留返啲quota去旅行先開戒就會好少少啦^^

      刪除
  9. 我反而有啲怕去九龍城,因為細個已經知道當時嘅香港機場係全世界最危險嘅機場之一,見到隻巨型鐵鳥我淨係覺得危險

    回覆刪除
    回覆
    1. 其實依家諗返都真係幾危險㗎,幸好咁多年都無乜大件事發生......

      刪除
    2. I grew up in that area and was very amazing the planes's landing. Now, I live closed to Sydney's airport, it is the same. the planes go pass my buildings just like the old days in Kowloon city .

      刪除
    3. 咦,咁似乎你同機場都好有緣喎^^
      去遊埠咪好方便?!!
      但會唔會有噪音?

      刪除
    4. 細個Kowloon city 的飛機好高pitch ,耳朵受不了,而家飛機嘈可以忍受。冬天飛機近我的家,而家短短十分鐘就有四班機。我可以見到airplane logo and know where come from. All from Asian cos all come from North side.

      刪除
    5. 九龍城果D直情成幢樓震震地兼刺耳!
      咁會唔会好多型人機師空姐住你果边^^

      刪除
    6. Of course not. My area is 以前Greece ,而家越南人.但而家變化太大,而家變成Trendy area. 我同事的partner is a flight attendance .佢地住在blue mountain . 個半鐘車但air crew拍車有special.

      刪除
    7. 越南區咁係咪成日可以食到濛粉+珍多冰囉,正喎^^
      Trendy area係好多潮嘢賣定係文創園果隻?
      藍山正呀,環境一流好多人周末去露營行山,有車都唔怕遠嘅...

      刪除
  10. 碟泰式滷豬手,睇落幾得下~正呀!

    回覆刪除
    回覆
    1. 我其實唔係好識欣賞,不過如果愛吃豬手的應該會愛上,很有點入口即溶感覺

      刪除
    2. Sky 就几欣賞碟泰式滷豬手喎^^吃少少 OK ~
      我唔怕肥的 !!

      刪除
    3. 如果畀我揀都係揀喱種,反而個人覺得德國豬手好似偏咸,可能我唔係飲啤酒送啩......
      你好fit唔駛驚^^

      刪除
  11. 最近也到過九龍城幾次,都是為吃!

    回覆刪除
  12. 以前肥人會成日去九龍城, 因為係太子 & 九龍城中間位讀書~
    街市頂樓D 大排檔又平又抵食呢~

    回覆刪除
    回覆
    1. 原來你係出自名牌學府喎,失敬失敬^^
      熟食街市之前聽人講都有唔少好食之選

      刪除
    2. Kowloon city market is CHOI LAN's favour place.

      刪除
    3. 係呀成日聽佢講經常去果度買餸

      刪除
    4. 梗係唔係啦....仲有其他不知名既學校仔架...hahaha~

      刪除
  13. 唔食肥野好乖呀!~~~我就.......我都唔鐘意肥肉...但極度喜歡豬手~~~~~~~~~~~~~
    不過真係幾抵食喎~~~~~~~如果好食又咁平我應該會成日食~
    我以前細個都有係啟德搭過飛機~又係兒時回憶~

    回覆刪除
    回覆
    1. 你就唔駛驚啦後生女新陳代謝快D,仲有大把quota!!XXXD
      喱間好似生意唔錯,我諗都算係抵食之選...
      好彩我都搭過一千零一次,第一次去旅行去北京,搭火車上搭飛機返

      刪除
    2. 點會...我都年老啦.........我都戒緊架喇..努力中..
      係好鬼抵食啦!!澳門唔會有呢個價架喇~~~
      所以成日覺得無線既佈景都幾真架喎XD

      刪除
    3. 養成良好飲食作息習慣都啱嘅.....就留返啲quota去旅行時用囉^^
      好懷念昔日澳門,好多平嘢抵嘢食.....珠海果邊食嘢係咪平好多?
      以前佈景製作都幾認真㗎

      刪除
    4. 我都係咁諗~~~依家盡少食甜野..生果除外~
      依家無呢支歌仔唱lu~所以成日去到出面旅行都會覺得d野好平就係咁解...我又好少出大陸~(對內地食品無信心~)
      哈哈~~~

      刪除
    5. 生果多食無妨啦....
      我都覺得係:P而且自從人仔升過咗1:1之後我好似都無再去過大陸玩(except那次上京做野)

      刪除
  14. 都好多朋友同我講九龍城出名泰國餐... 但至今我都未唸過去試 :P

    回覆刪除
    回覆
    1. 咁如果同大馬比又可能大馬會好食啲係咪?至少都近啲kakakaka....

      刪除
  15. 突然咁文藝,你不嬲都係一個偽文青啦,wakakaka~~~
    早前成日見有張照片,係大鐵鳥係沙灘低飛降落嘅加勒比海島國,點都唔及以前嘅九龍城啦!
    記得細路仔時跟爸爸入城寨,D巷仔好多老鼠架! 寨城公園未去過,依家住咁近,搵日一定要去吓!

    回覆刪除
    回覆
    1. 咪玩啦銀哥,可能連偽都未必有資格喎我~~~~XXXD
      係咪你去過果個粉紅沙灘?如果係都幾特別喎...
      我記得花蓮個海濱又係好近機場,經常會見到飛機升降,聽到久遺了的噪音!
      我真係未試過親身入過舊城寨,只從照片中看過
      住得近不妨去走走,不錯的公園

      刪除
    2. 我覺得我地喜歡寫作記下D野,已經有偽嘅潛質啦,哈哈~
      唔係,係附近嘅荷蘭屬地聖馬丁島。
      我細時住慈雲山,老豆又去城寨睇無牌老友牙醫,先去過咋

      刪除
    3. 咁大家都努力偽落去kakakaka....
      你果然係去過好多聞所未聞的地方,勁!!!
      oic~~~係喎聽聞以前果度係好多無牌醫師

      刪除
  16. 好想到九龍城寨公園走走看看...

    回覆刪除
    回覆
    1. 好適合Kaka去冥想思考人生的好地方^^

      刪除
  17. 可能成日去九龍城,都唔覺有乜特別嘢睇,
    潮流食店多咗,搶高哂啲租金,
    我去好多九龍城泰菜店,但同心我就無去過,
    咁遠嚟到,都揾到哩間小店食,你真勁。

    回覆刪除
    回覆
    1. 都可能係,通常住家附近或經常去的地方,會覺得無乜特別嘢睇^^
      我見都有好多新的豪宅落成,新商場的租金一定不便宜吧...
      之前都有食過一啲,不過以前無寫blog所以就無記錄下來了!
      朋友介紹而已,食店太多真不懂選:P

      刪除
  18. 講起寨城公園,今個月我終於成世人第一次去到寨城公園,哈哈~

    回覆刪除
  19. 九龍城係我地頭, 下次來搵我做導遊啦,校啱時間可以安排你同周潤發影張相添.

    回覆刪除
    回覆
    1. 先多謝peter哥,係喎發哥都常在九龍城出沒,你係咪曾經捕獲過?

      刪除
  20. 眾裏尋它千百度 -- love that <3 , hehehee

    回覆刪除
  21. 剛過去的星期三到九龍城的上品火鍋食晚飯,也到了九龍城小泰國轉了一圈.

    回覆刪除
    回覆
    1. 如果喜歡食泰菜,九龍城也是不錯選擇吧^^

      刪除
  22. 以前只去過啟德機場接機和送機。乘機則從赤鱲角開始。
    曾經在九龍城一間公司工作,這地方不會陌生。

    回覆刪除
    回覆
    1. 對呀,以前出國不論係旅行、留學還是移民都是大事件,好多時都會去送機接機,而且啟德就在市區裏,來回交通都好方便,不似現在赤鱲角咁遠呢!!
      曾在九龍城返工,咁你算半個地膽啦!!!一定食過好多心水食店^^

      刪除
    2. 天天不是酒樓就是餐館,不外如是。反而當時那間茶居的午市飯最實際。

      刪除
    3. 都可能係,長期食慣咗就會厭了

      刪除
  23. 我成日都去九龍城搵食, 但最常做就係買打邊爐的料 !
    我開親飯局, 好多時都會去呢度買.

    如果想試泰菜, 我反而近排愛去 "Lemon", 佢個柚子沙律同冬蔭公幾好, 其他小菜就穩定.

    回覆刪除
    回覆
    1. 係咪通常去市政街市果度買?好似聽聞蔡瀾都經常去果度買餸....
      咦,咁等我去search一下先^^thx!!!!

      刪除
    2. 原來好近咋喎就在隔籬街,咁下一次都可以去試試,謝謝你的推介.....

      刪除