2016年5月25日 星期三

後現代阿伯生活之睇早場

自從上了游水班之後,似乎已養成了晨運伯伯的作息時間,即使唔駛上堂和返工的假期日子都變得早醒過雞啼。既然咁早起身,當然不會浪費了清新開朗的晨早空氣……除了真係去晨運跑步之外,去戲院睇場早場都係另一種不錯的「長者節目」吧!



之前舊同事送了兩張換票證過基爾,連平時早場特別平的幾十塊錢都慳埋,不過由於是較冷門的西片,唔係太多戲院有得做,上網check過最近的都要去到比較隔涉的圓方先有,無計啦反正係免費飛都一於去。



印象中好似無試過朝早8點幾已來到柯士甸站,平時相信喱個站都唔會多人(麵包店便利店都唔多間),周末清晨無乜人返工搭車就更加冷冷清清,基爾在圓方出口企了成分鐘影相都好似無乜人在身邊經過……



行出天橋外望依然係一整幅「大爛地」,高鐵西九總站工程正如火如荼,好似見到少少大樓站頂的波浪型設計。話時話將來西九這裏約直徑500米範圍內,已經分別有西鐵線柯士甸站、東涌機場線九龍站和高鐵總站共3個火車站,即使以國際大都會計,唔知係咪都已算是個「世界紀錄」呢?



可能由於要遷就高鐵站工程,由柯士甸站行去圓方果條臨時天橋依家又好似仲遠了,感覺像兜了個大弧圈。等到高鐵站起好後,希望條天橋由柯士甸站穿過高鐵站再接駁圓方會拉直返,唔駛浪費時間兜大圈。



幸好基爾預早出門,雖然行遠了路都仲有充裕時間,來到圓方才8:30am左右而已,當然商場裏大部份店舖都未開門。圓方出名通道設計像迷宮,轉來轉去好易蕩失路,都係先問問info counter已上班的那位美少女,找清方向不會再浪費時間亂搵。最後來到溜冰場就知道無行錯路,原來8點幾已經有成班學生在練ice hockey,真犀利!



戲院就在溜冰場樓上,今次來係睇《Race》和《The Dressmaker》,前者是講述美國跑手奧雲斯由窮小子到1936年柏林奧運奪金的傳記式電影;後者主要是想睇今年初問鼎過奧斯卡最佳女配角的琦溫絲莉(最後敗於丹麥女孩的Alicia Vikander),近年佢好似比較少演這類黑色輕喜劇。



兩套電影之中,基爾個人比較喜歡《華麗轉身》。可能由於《美國飛人》始終係比較平鋪直敘式的傳記電影,驚喜度始終較少,或許美國人看到奧雲斯在希特拉面前摘金的經典歷史場面重現會比較興奮吧!反觀《華麗轉身》中演時裝設計師的琦溫絲莉,困惑沉鬱得來有時又不期然有點笑料,令人很有驚喜,功不可沒的當然仲有那班澳洲村姑,穿上一身華麗晚裝catwalk去逛郵局和爬上屋頂換燈膽那一幕實在笑到人標眼淚……



另外值得一讚係兩套戲的場景設計,不論是《美國飛人》中的30年代美國紐約Time Square和俄亥俄小城老街,又或是《華麗轉身》中的50年代澳洲內陸小鎮風情,彷彿讓觀眾坐上了時光機回到過去一樣,荷李活的製作感覺上一點不會馬虎。突然想起昔日三色台吳昊甘國亮王天林製作的那些儂本多情、山水有相逢和香江花月夜,依家大台除了拍古裝和時裝劇之外,好似已經完全放棄了拍這類老香港背景的舊劇了,實在可惜……



講完套戲再講返上網check場次時其實都要左量右度,由於唔想長途跋涉去兩次圓方咁煩,要揀一日內同時有這兩套戲上映的日子之餘,兩套戲之間又唔可以相隔太遠以免呆等太無聊,終於揀到喱朝早分別有9:00am和11:30am場次,實在太perfect了(剛好中間有15分鐘break,足夠時間去個廁所仲可以去埋戲院對面間HMV打個白鴿轉)。不過成朝都身處暗室裏睇戲足足4個幾鐘頭,幾乎忘了外面世界的時間,差不多1:30pm完場後個肚都打晒鼓,就拿拿林搭車返家鄉因為約了基爾媽食個late lunch。



返到去商場喱間「大自然素食」其實都開張了成大半年,卻一直都無幫趁過,依家基爾要食清D都不妨一試。去到仲有個開心大發現,原來3:00pm之後大部份菜式都有半價優惠,即時覺得好抵食。除了上面喱個有成個足球咁大的咖喱羊腩雜菜農夫包之外,仲order了吉列田園素豬扒和原隻木瓜蟹籽沙律,吉豬咬落質感像真度極高,個醬汁尤其一流;木瓜沙律亦頗清新,作為甜品又不太甜,夠健康!



食農夫包都要講究技巧:最好沿住包邊一路轉圈剪下去,一路點咖喱汁食又唔駛怕D汁漏晒出來咁核突。個包其實都焗得幾香脆,有點似澳門豬扒包那種質感,咖喱汁料帶點椰香,另外包裏仲有青椒、椰菜、露筍、冬菇磨菇和素肉麵筋等幾種材料,總體而言算是相當豐富了,食完其實已飽了七成,埋單計連茶芥加一沒記錯約$110左右,下午茶時段果然有著數。



至於夜場方面仲有節目,之前聽聞舊同事與友合資開了間酒bar,基爾獲邀去參觀兼八卦一下,反正很久沒見就順道去傾下偈,幾個舊同事幾年間已先後離巢舊公司,彼此都有各自發展,閒來都好少再見面,聚舊其實都係update一下大家的近況吧!酒方面基爾向來唔太飲得(亦唔識飲),無謂牛趙牡丹浪費人地枝whisky,不過舊同事極力推介一種以中國二十四節氣命名的台灣啤酒,試了「夏至」和「穀雨」味道都頗特別,前者酒花香氣很清新,幾乎不帶甘苦味,還以為不是喝啤酒;後者飲落則帶有一點點烏龍茶的回甘,完全顛覆了以往飲啤酒的概念,連平時極少飲啤酒的基爾都破戒飲了幾啖!

69 則留言:

  1. 一日內睇兩套戲,中間15分鐘break.幾似我開工睇戲咁.

    回覆刪除
  2. 晨早連睇兩套戲,要好大精神。最近大自然素食在網上很熱推!

    回覆刪除
    回覆
    1. 都要一點毅力㗎XXD
      味道都唔錯,不過如果係正價就稍貴啦我覺得....

      刪除
  3. 朝早空氣好, 我回港時, 每朝都去樹林的地方, 好似道友吸毒咁, 猛咁吸D清新空氣, 正呀.

    回覆刪除
    回覆
    1. 係呀晨早空氣清新開朗丫嘛,有歌仔唱埋添^^
      不過夏天多蚊蟲,為免餵蚊餵蠓都係先搽晒蚊怕水蚊膏之類打定底安全啲:P

      刪除
  4. 乜gael兄諗住提早退休?!!駛唔駛咁快諗定...哈哈

    回覆刪除
  5. 阿伯的後現代生活...好悠閒啊!kakakaka.....
    原隻木瓜蟹籽沙律....唔錯!(無相嘅?)

    回覆刪除
    回覆
    1. 向你學習,慢活丫嘛hahahahaha....
      因為掛住食無影到囉:P

      刪除
  6. Gael,我好多年沒有入劇院看電影,現在大部份電影都是在飛機上看.我上星期和朋友到銅鑼灣大自然素食食三點下午茶,坐足兩個半小時埋單兩人六十幾元,超値.

    回覆刪除
    回覆
    1. 飛機上睇其實都唔錯,尤其坐長途機可以打發時間^^
      下午茶半價真係幾抵嘅,可能生意難撈

      刪除
  7. 早場好好呀又冇人爭位,我今早先睇完X-MAN

    回覆刪除
    回覆
    1. 真係幾好㗎,全場十個人都無,可以清清靜靜睇^^

      刪除
  8. 肥人絕對係起唔到身架...哈哈!!!!
    返工可以準時起身但一到假期, 想11點前見到肥人都幾難呀..~

    回覆刪除
    回覆
    1. 真係要有少少毅力先起到身:P
      不過好彩依家夏天都瞓唔到太晏,如果冬天一定戀住個棉胎,打消念頭XXXD

      刪除
  9. 睇好戲, 又食好西, 都幾寫意呀

    回覆刪除
    回覆
    1. 似唔似退休生活hahahahaha....

      刪除
  10. 大自然素食馬鞍山都有,上次去食lunch,5個人食咗6百幾蚊,都無乜嘢食咁,之後就Black list咗佢,原本下午茶抵咁多!

    回覆刪除
    回覆
    1. 原價真係有啲貴,係下午茶50%off之後先敢入去食XXXD
      不過要等到3點就餓D,事前要打返個底先得kakakaka...

      刪除
  11. 早醒過雞啼咁利害? 要keep住阿伯生活呀, 健康呀!
    圓方係我蒲點之一, 行到熟晒

    回覆刪除
    回覆
    1. 暫時仲keep到,不過上完晒堂之後就唔肯定:P
      咁有冇上過去上面個平台花園行下^^

      刪除
    2. 有行過, 不過少上去, 熱嘛 ^^

      刪除
    3. 咁又係,依排日日成三十幾度,真係熱到爆標:P

      刪除
  12. Abba(經典),早睡早起身體好!何況還有免費早與場。

    回覆刪除
  13. 啲戲咁有探度既@@
    美國飛人未必岩我,美國隊長岩我多啲@@

    回覆刪除
    回覆
    1. 都算係冷門戲,唔係太多戲院有得做,比較麻煩:P
      咁x-men呢?XXD

      刪除
    2. x-men都OK架,不過唔會入埸睇@@

      刪除
    3. 喱類大片要在大銀幕睇先好睇喎^^

      刪除
  14. 長者生活,啱架啦,我同你都唔細,未退休就好似退休生活咁,到時就唔會唔慣啦,哈哈~

    回覆刪除
    回覆
    1. 銀哥又有金句^^
      退休果然係要實習嘅XXD

      刪除
    2. 呢期興返黎明嘛,咪講多兩句囉,wakaka

      刪除
  15. 遲啲會唔會係:後現代阿伯生活之飲早茶㗎?

    回覆刪除
    回覆
    1. Good idea!!!!^^
      你果邊有冇地方可以飲早茶?

      刪除
    2. 無,飲茶呢啲咁高級嘅中餐,無我哋份啦

      刪除
    3. 咁有冇試過自己整蝦餃燒賣叉燒包?

      刪除
  16. 大自然素食. I have tried the one in Causeway Bay. The food is good.
    Be prepared to adapt the life of elders!!

    回覆刪除
    回覆
    1. 原來都幾多分店喎,銅鑼灣店未去過呢!
      你唔駛咁快,仲有大把時間,plan定遊世界大計先啦^^

      刪除
  17. 我都耐唔耐會去睇早場啦!~平好多架.
    個咖喱羊腩包'睇落好正下!

    回覆刪除
    回覆
    1. 係呀原來都平了一截㗎,話時話依家正場啲戲飛都幾貴,多數七八十,有些還過百蚊@@
      味道都ok喎,當然這是素羊腩,與真的羊腩總有少少分別,但因為無肉就無咁肥膩

      刪除
  18. 雖然早睡早起身體好, 但係我逢放假一定會瞓到十一二點!!

    回覆刪除
    回覆
    1. 咁喱個都係人之常情嘅
      不過夏天其實我瞓唔得太晏,所以索性早起少少囉^^

      刪除
  19. 一朝睇兩套戲真係好有挑戰性~~~一來驚唔好睇~~~二來真係驚放假咁早起身~不過好彩你話好睇ja~~~
    間素食好抵喎~~~~~我係台灣都有飲過哥個烏龍茶啤酒~

    回覆刪除
    回覆
    1. 平時我都好少嘅,費事咁辛苦自己對眼啦XXXD
      可能依家慣咗去練水,變咗朝朝早自然早醒,其實習慣咗都唔太辛苦,仲好似多咗啲時間用咁,不過夜晚會好早就開始眼瞓:P
      素食果間如果係正價時段去都幾貴㗎!!
      Really~~~~!!原來果隻廿四節氣啤酒一早已咁出名......@@

      刪除
  20. 勁呀~~~養成咁早起身真係好難得

    回覆刪除
    回覆
    1. 你會唔會同大爺去跑返兩轉先^^

      刪除
  21. 下次睇早場,搵埋我呢個阿伯!
    《華麗轉身》我都想睇,但一直找不到合適時間!介紹你看《小花的味噌湯》,一齣感人的日本小品!
    素食,不錯的選擇!

    回覆刪除
    回覆
    1. 台灣啤酒是否該酒吧獨家代理?外邊買不到﹖

      刪除
    2. 都好喎兩個阿伯去睇戲wakakakaka.....不過我通常起雙飛睇兩場,驚阿摩會頂唔順XXXXD
      等我又上網睇下味噌湯個trailer先^^
      剛看了嫲煩家族也不錯,有點輕鬆笑料,除了爺爺外,阿哥家姐和新抱也做得很有趣,反而妻夫木聰和蒼井優就平凡了一點:P
      我見你間中也有食素呢!
      一般超市好像不覺眼有賣,不過有blog友話在台灣也喝過的

      刪除
  22. 農夫包很吸引,記得14年前到星馬,導遊帶去消夜,當年的麵包雞就是這模樣,但勁貴,我沒有品嚐,晚餐已經吃得很飽。

    回覆刪除
    回覆
    1. 農夫包咁大個,真係食一個已經足夠當一餐飯了.....
      我沒去過星馬,將來有機會去到夜市會留意下^^

      刪除
  23. 我都鍾意去圓方睇戲,不過早場都70-90元一張,現在少睇好多了

    回覆刪除
    回覆
    1. 對呀King sir,依家去戲院睇戲如果套戲長啲都要加錢,動輒要成舊水,我都覺得貴,你如果兩個人連埋食飯要三四百蚊啦,是高消費了^^

      刪除
  24. 我成日都去圓方睇戲, 上回我係 The Dressmaker 同 Eddie the Eagle 之間, 選左 Eddie the Eagle.
    有時間補番你介紹呢套先

    回覆刪除
    回覆
    1. Eddie the Eagle係咪應該都幾搞笑?反而我沒有睇....
      Dressmaker唔知落咗未?如果落咗咪等電影台囉,依家都好快有!!

      刪除
  25. 早起真係好健康嘅生活 , clap clap clap !

    回覆刪除
  26. 我以為大自然素食冇肉0既 , 食材有肉之餘賣相都好得喎 .

    回覆刪除
    回覆
    1. 果啲全部係素肉而已,只係整得似肉罷了:P

      刪除
  27. 我都好懷念呢種一日走兩場既日子,但可惜近年忙於工作和進修,實在沒時間。

    回覆刪除
    回覆
    1. 當然是工作和進修緊要,睇戲畢竟只是娛樂吧,有時間才去看^^

      刪除
  28. 原來基哥都鍾意睇“儂本多情”“山水有相逢”和“香江花月夜”的懷舊片,真係幾好睇架。

    回覆刪除
    回覆
    1. 對呀,我鍾意睇D古老場景,可惜依家唔多拍喱類劇了

      刪除