2016年9月3日 星期六

遺忘的唱盤時光@盧巧音

近年好似興返好多90年代女歌手復出唱發燒碟,例如蔡立兒和之前都有講過的趙學而,都係基爾讀書年代覺得幾唔錯的女歌手,另一位就係今次要翻聽的盧巧音。



唔知點解近年出道的女歌手似乎都好一式一樣,無乜個人風格可言,同一首歌交畀阿A唱和阿B唱基本上都無乜太大分別,唱片公司也不會投資太多落歌手身上幫她們建立獨特鮮明形象,所以到頭來即使紅歌也不會紅人,這彷彿也解釋到點解依家香港樂壇「無星」。

講咁多無謂野其實基爾都係為盧巧音作個引子。如果以90年代女歌手計,論靚聲靚樣排名前10位可能都未必數得到Candy Lo吧!但事實又畀佢跑出喎(至少基爾都肯畀錢買佢隻碟),這當然不是靠幸運,獨特的型像和歌路相信是她最大本錢在樂壇爭到一席位。

點解D人總係懷念以前香港樂壇,最主要係因為以前確實夠晒五花八門總類多又夠熱鬧,基本上一扭開收音機唔駛等DJ介紹已經知喱首係楊千嬅新歌,果首一聽就知係陳慧琳,如果搞錯蔡立兒把聲以為係王馨平又或者李蕙敏甚至黎瑞恩、周慧敏或湯寶如,肯定是件「不可思議」的奇聞。Candy Lo其實也一樣,即使10年無聽她的歌,只要收音機一播,立即就知:這就是盧巧音了!



為免囉囉唆唆太長篇大論,都係先講返喱張盧巧音《喜歡戀愛Mega Collection》CD先!看看盒底才驚覺這張已是2001年底推出的「文物」了(為何在遊蕩裏在遊玩裏突然便老去……時光這個壞人偏卻冷漠如許,離場慢些也不許),尤其驚就係床下底果堆CD幾乎無聲無息咁全部已經有成廿幾三十年歷史以上。不過撇開時光飛逝唔講,即使16年後依家再拎返喱張盧巧音精選碟出來聽,幾乎也一點不覺得out,老實說比好多依家的新歌更加前衛更加潮更加爆呢!

講到明聽Candy Lo肯定就不是聽靚聲聽字正腔圓果類標準女歌星模式,要聽就係喜歡佢夠rock夠潮夠另類。這碟中除了有當年大hit的垃圾和深藍不用多介紹之外,仲有較大路的喜歡戀愛和風鈴,都係比較多人熟悉的盧巧音代表作;不過若是識貨之人就一定更愛她的偏門歌,例如迷幻味十足的快感飛行、夠pure夠清新跳脫的代你發夢,還有瀟灑型格的色與情都是基爾杯茶。

當然band友出身的Candy似乎hard rock才是她的「原形」,基爾本身就勁鍾意碟中的愛將我們撕開和吶喊,夠晒搖滾夠晒heavy metal味(一時間亦諗唔到近年仲有邊D女歌手可以rock得起,如果計power來講二汶應該ok,其餘大部份陰聲細氣果D應該不太可能翻唱到吧)。總括而言整張碟由track 1聽到track 16一定不會聽到令人瞌眼瞓,花樣多多絕不沉悶(基爾最驚就係果D唔知點解唱首首歌都一式一樣千篇一律如倒模的歌手),所以這張《喜歡戀愛Mega Collection》都算係基爾心頭愛之一,時不時會拎返出來fung下部機!

100 則留言:

  1. Sky好耐無試過第一次留言給你了^^
    她的歌曲 @ 只有 { 好心分手 } 是我熟識咋 ~

    回覆刪除
    回覆
    1. 係喎,今次你咁醒嘅?!XXD
      好心分手應該係喱碟之後才出吧,所以就無收錄了

      刪除
  2. 原來她也出道了十多年!

    回覆刪除
    回覆
    1. 係呀真係眨下眼,時間過得快呢~~~~!!

      刪除
  3. 以前啲歌星都有自己風格

    回覆刪除
    回覆
    1. 冇風格果啲可以一兩張碟就被叮走啦

      刪除
  4. 回覆
    1. 能夠十幾廿年留傳得下來的舊歌,都係歷久常新和襟聽的歌吧

      刪除
  5. 最記得...好心一早放開我, 當年OT時必唱 XD

    回覆刪除
    回覆
    1. wakakakakaka~~~~~咁依家會唔會間中唱畀狗哥聽

      刪除
  6. 即刻喺yt搵番佢啲歌聽。

    回覆刪除
  7. 我印象最深嘅係三角誌

    回覆刪除
    回覆
    1. 三角誌都係佢嘅hit歌之一呀,應該是這張精選碟之後出吧

      刪除
  8. 聽歌,我真係老歌擁護者。

    回覆刪除
  9. 盧巧音最鍾意係佢"垃圾"嗰隻碟!

    回覆刪除
  10. 講香港流行曲(或者任何流行曲),我最難搭爹…...

    回覆刪除
    回覆
    1. 下次再搵下啲旅行舊嘢寫下^^

      刪除
    2. 尋日學你咁摷返d封塵舊歌來聽,有好大驚喜!記得張國榮既「阿飛正傳」嗎?前奏果段外語收音,多年來我一直當係日本機場廣播。呢首歌我大概已10年無聽,尋日聽返果段外文,竟然聽得明––––因為原來係...... 法文!而且唔係機場,而係火車站!

      刪除
    3. 我完全無印象喎,原來有段法文intro....

      刪除
  11. 港人喜歡90年代懷舊歌, 主要是因為自2005年開始, 香港所有媒體創作, 都要北望, 創作上受到北面審查的限制, 港人聽落看落, 甚覺不是味道.

    回覆刪除
    回覆
    1. 少咗共鳴感係事實,長期去了搵人仔果啲基本上已經唔當佢係HK歌手㗎啦:P

      刪除
    2. 最慘, 這些人D歌D戲, 當係港產咖嘛, 所以香港人現在看戲聽歌, 越來越無癮.

      刪除
    3. 都唔會無癮嘅,仲有得揀咪揀自己鍾意果啲囉,娛樂嘅嘢都唔一定要同人地同一口徑嘅^^

      刪除
  12. 我喜歡她的喜歡戀愛,好心分手同三角誌.

    回覆刪除
    回覆
    1. 這三首都係好經典,其實佢好多hit出的歌都係慢歌,反而唔係咁多人留意佢啲rock歌喎,我覺得都好正㗎

      刪除
  13. 佢唱功麻麻,太單調,平平無奇。可能是首歌夠hit。

    回覆刪除
    回覆
    1. 唔算係好典型的靚聲女歌星,我覺得HK樂壇可以容納多啲唔同種類嘅singer都幾好,至少唔會好似依家咁悶數來數去都係得果三四個比較識嘅啦

      刪除
  14. 記得香港熱賣CD都係90’S初期…未有30年以上?!!.....
    聽人講盧巧音唱現場麻麻,最喜歡應該只有垃圾及好心分手…呢兩首~
    雖然話新人不及舊人,近年都欣賞欣宜同糖妹…唱功都幾好~

    回覆刪除
    回覆
    1. 80/90年代都多人買碟㗎,依家我諗就好少啦~~~~時代不同了吧!
      我都聽聞係,有時聽佢上勁歌果啲都係一般.....
      喱兩個都ok,但如果可以出多啲歌更佳,依家好似好多時都係出一兩首hit嘅就無以為繼,唔似以前80年代一線果啲當紅歌星幾乎個個月都有出hit歌,可以由年頭hit到年尾:P

      刪除
  15. 我都鐘意Candy , 因為好心分手太好聽呢~!!

    回覆刪除
    回覆
    1. 喱首真係好hit喎,唔記得當年有冇拎到金曲獎

      刪除
  16. 舊歌真係好聽好多架...就算我係Kelly Fans 都係咁話, Kelly 新歌d 詞怪怪!

    回覆刪除
    回覆
    1. Kelly我最鍾意誰願放手,星夢同花花都幾like^^

      刪除
  17. 哈哈哈,因為以前多選擇。

    回覆刪除
    回覆
    1. 我好怕果啲唱首首歌都一模一樣的XXD

      刪除
    2. 連D眼耳口鼻都一模一樣!

      刪除
    3. 以前的歌星明星,都有他/她們獨特的氣質和味道,無論我們是否喜歡,他們都是獨立個體。
      現在的,祇是品牌,Just another also runner。

      刪除
    4. 上勁歌果班我真係唔識邊個打邊個,也好耐無睇大台啲歌唱節目了,可能由於全部都深宵時段先播吧

      刪除
  18. 呢個絕對唔啱feel, 我都係鍾意聲靚兼乖乖女形象嗰種,見到呢位女歌手我直情會立刻轉台。今次俾面基爾,我睇晒呀,幾捧你場 :)

    回覆刪除
    回覆
    1. Wakakakaka......好感動,先多謝Venus你的一票XXXXD

      刪除
  19. 有品味呀~盧巧音唔錯呀~~~
    我最鐘意佢哥首歌叫自戀影院~~~

    回覆刪除
    回覆
    1. 咦,係喎仲有自戀影院.....咁計埋計埋佢其實都幾多歌流行㗎喎,唔算係太偏門的歌手

      刪除
    2. 我以前同我表姐係佢屋企唱k成日都唱呢首架!!
      勁鐘意~~
      仲有趙學而哥首自欺欺人都好正~

      刪除
    3. 依家有支新咪更加要唱多啲練多啲歌XXD

      刪除
    4. 無錯~~
      你鐘意出去唱k時唱咩歌添?

      刪除
    5. 嘩~~~~~~我諗我有6-7年無唱過K啦!!!:P

      刪除
  20. 我都係鍾意舊歌,以前D歌詞真係有意景,詞又有意思好多,而家D詞無內容架!

    回覆刪除
    回覆
    1. 可能仲因為滲雜咗昔日聽歌時代的青春歲月回憶吧!!
      有冇啲以前同毛爸拍拖時常聽的情歌?XXD

      刪除
  21. 唔知係咪年紀大左,都係鐘意以前既歌手.

    回覆刪除
    回覆
    1. 咁都正常嘅,返工做嘢始終無以前讀書年代咁多時間去留意啲新歌啦^^

      刪除
  22. 香港樂壇已死⋯
    自從TBB攪完果壇野後,香港樂壇即時散晒。
    我依家電話裡D mp3,全是舊歌。

    回覆刪除
    回覆
    1. 依家搞果啲咩勁歌優秀選或者年尾果啲總選簡直係笑話,唔睇好過睇XXXD

      刪除
  23. 我反而喜歡她的命犯桃花和逆插玫瑰呢

    回覆刪除
  24. 回覆
    1. 錯!
      係...喜歡聽李家仁D歌多啲kakakaka...
      尤其果首"小明做特首"
      https://www.youtube.com/watch?v=9RA5zrc8dxA

      刪除
    2. 下次小明不如邀請埋阿15郭生合唱一曲,你一定全力支持wakakakaka....

      刪除
    3. Ka Ka 永遠都是很獨特的,哈哈哈

      刪除
    4. 你依家先知呀?!@@XXXXD

      刪除
    5. 其實每個人都有獨特的一面嘅!:D
      能寫出奇幻情節小説的説書人,我猜你的腦袋應該非常獨特!:P

      刪除
    6. Kaka和說書人也是很獨特的blog友,一個擅長講哲理,一個擅長講故仔^^

      刪除
  25. 哈哈, 我都間唔中會聽番 D 舊歌架 !

    回覆刪除
  26. 從前分不清她和何韻詩! 兩個都短髮、走型格路線 ...
    現在她留長髮好像嫁人去了!

    回覆刪除
    回覆
    1. 好易分咋喎,何C真正大熱的歌其實也不多:P

      刪除
  27. 最近發現有啲留言,無故被移至垃圾留言箱,
    通常喺較長的留言,所以有blog友留言失蹤之故。
    有時去睇下留言箱設定。

    回覆刪除
    回覆
    1. 有呀,我間唔中有去check下垃圾筒^^

      刪除
  28. 我冇聽歌好耐亦唔八卦啲娛樂新聞,但一聽到“好心分手”自然就想到是她…同時唔知有冇記錯,她好似曾經同霆鋒拍過拖呀?

    回覆刪除
    回覆
    1. 咁都證明佢都有幾首Hit歌流傳後世^^
      我又唔係好記得喱段鋒音戀喎wakakakaka.....

      刪除
  29. 八、九十年代K唱興盛時期,實在令好多人好懷念!

    回覆刪除
    回覆
    1. 想像到你當年都應該係K后XXXXXD

      刪除
    2. 我當年係90年代尾了~~同同學去唱K~~唉~~真懷念~~

      刪除
    3. 畢業後各有各生活圈子,好難得會再聚頭

      刪除
    4. 各散東西了…… 而且人人都變……

      刪除
    5. 唔緊要啦,也會識到好多新朋友吧^^

      刪除
  30. CD還可以,佢唱現場可以用好很恐怖嚟形容!(^_-)……

    回覆刪除
    回覆
    1. 聽人講會走音,多啲唱live會有幫助
      可惜現在不常見她演出

      刪除
  31. 而家80、90年代歌手…… 咸鱼翻生。希望我都有日翻生…… :P

    回覆刪除
  32. 回覆
    1. 佢都有唔少經典歌㗎,至少到依家都會令人想起....

      刪除
  33. 原來基哥喜歡盧巧音,真係夠晒優皮士了。難得,難得。

    回覆刪除
    回覆
    1. 也不算是特別喜歡,但間中會拎返張碟出來播下囉^^

      刪除