2016年10月27日 星期四

淡淡然的愛情味道

很久沒去看戲,翻查網上電影場次發現依家好多戲的映期都唔太長,很多時轉眼已落畫,每次收到免費飛都要拿拿林趕去睇以免浪費掉。



某周末先趕去圓方看了上面這齣《Equals》,才上映兩星期就只剩一院公映,而且每日只有一場,應不是什麼熱門電影吧!去看之前基爾也沒看過什麼影評,對故事大概也不清楚……戲名港譯為《熱血新世紀》,驟耳聽直覺會以為個故事同吸血新世紀有什麼關聯?



基爾覺得影片中那對未來世界面無血色和表情的男女主角,可能同吸血殭屍有點異曲同工,此外最主要原因是女主角Kristen Stewart演過Twilight系列。翻查台灣版的中譯名是《禁愛世界》以乎更貼切內容。不太清楚電影劇本是否改編自小說,估計小說會多點未來世界冷漠人倫關係的描寫,電影則肯定是失敗之作。或許有人會期望多看一點有趣的未來世界生活面貌和先進科技,可惜戲中一概欠奉,男女主角上班的所謂「未來科技」真係不說也罷(連荷李活B級片也不如)。



很久沒試過電影還沒放映到三分一,已經有觀眾起身離場走人,事實上即使看到中後段男女主角拉拉鋸鋸之間終於「撻著」,也依然是悶得發慌連場(床戲也豪不精彩只是粵語長片式的輕輕帶過),結局的逃亡過程也不緊張,貫徹全片淡然無味的沉悶調子,絕對是繼《鯊海22小時》後,基爾看過的另一「割凳級」悶片,唔怪得要快快落畫。



領過一次野之後,隔幾日再去睇埋上面喱套《The Purge》(港譯:國定殺戮日)。喱套同樣係上左個幾星期亦都係一日只有一場,可能因為正值美國大選前夕,至少都有少少「話題之作」feel,而且一定係血腥暴力官能刺激十足,不會像之前果套咁悶蛋……



戲中確有唔少茄汁搽滿面同埋開槍嘈到拆天的場面,可惜故事本身實在太薄弱,獨沽一味塔倫天奴cult片式噴血外,似乎再沒什麼吸引的花臣辦斧了!女總統候選人和保鑣被追殺的場面也不太緊張,幾個撻野飛女來襲也是搞笑居多,連死法都有點Final Destination味道。只有其中一幕失驚無神有個恐怖小丑撲出來攤在車窗上(加埋聲效),有點嚇了基爾一跳。



影片中曾說這個虛構的殺戮日(暗諷美國的槍械暴力氾濫?)是血腥版的Halloween,原先以為至少可以上映到萬聖節檔期應節,又或者去到美國總統大選日,不過睇情況應該都不會捱到月尾,相信好快會落畫了吧!



睇完套戲都唔係太開胃,不過既然有個小小的lunch break咁都去食返少少野先。apm的食肆選擇不算多,去了戲院下面的吉野家,見佢有個「期間限定」深海魚柳餐有湯有野菜有魚柳睇落幾豐富,$45算抵食了!基爾原先叫的蟹籽三文魚飯卻變了豚肉飯(落錯單?)無奈!



好又一餐唔好又一餐,快快手搞掂填飽肚子就搭地鐵出油麻地BC,因為要睇埋下半場的《Cafe Society》,始終對Woody Allen個招牌有少少信心,雖然通常都預左係口水多過茶、對白長氣夾冗氣果類。



基爾記得年前睇過《Midnight in Paris》(有興趣翻看網誌可click入:情迷午夜巴黎),穿梭時空的夜巴黎確令人著迷(而且幾有趣)!今次時代背景則回到1920-30年代美國的紐約和荷李活(Woody Allen近年似乎偏愛這個年代的懷舊味),故事男主角不知為何也很有點Woody Allen味,諧趣中帶一點點對愛情的無奈!



戲橋中依然係寫愛情要講timing的老生常談,一旦決擇了就無法走回頭路,重遇也只有唏歔,得不到的通常是最有fantasy的愛情吧!今次故事鋪排來得較平實,沒有上次穿梭時空的驚喜和神采。男女主角的重遇也不特別令人討好,反而會覺得替男主角太太唔抵!Anyway,不知為何Woody Allen電影近年的港譯片名經常要用情迷乜乜物物,實在太沒新意了,下次可否諗個好少少的譯名?

p.s. Kristen Stewart依家係咪算好紅?竟然無意間一連看了兩套她的新片,雖說不上是大美人但感覺上幾有style。之前除了睇過幾套Twilight系列之外,對她就沒有太深刻印象了,她在Equals和Cafe Society中的演出也只屬一般,希望佢將來有機會演多D有發揮的角色吧!

139 則留言:

  1. The Purge, 我睇左 1 & 2, 作為娛樂片, 都算唔錯, 氣氛緊張
    最近大讚的 Don't breath, 你睇左未呀?

    回覆刪除
    回覆
    1. 反而我1&2都無睇過,其實對喱類血腥暴力戲不太偏好,如果要畀錢就多數唔揀喱啲囉:P
      係咪即係盲佬果套?我有睇過trailer,驚嚇到賴尿所以一般我好怕睇驚慄片,好驚果啲突然彭一聲彈出來嚇人果隻XXXXD

      刪除
  2. 我已經很久很久沒入戲院了,現在的電影不大合口味。

    回覆刪除
    回覆
    1. 柏鳥小姐果類科幻特技啱唔啱你口味?^^

      刪除
  3. 唔主流又無特技既話,我都好少去睇戲
    最近一套係C剎列車囉^^

    回覆刪除
    回覆
    1. 有特技係咪感覺上抵睇D?XXD
      C殺我有睇谷阿莫精華版,我覺得已經夠晒,唔駛去戲院睇wakakaka...

      刪除
  4. 回覆
    1. 我都以為係,仲等我仆入嚟睇添。

      刪除
    2. wakakakakakakaka.....你地如果有記得分享下,等我仆入來睇XXXD

      刪除
    3. 最鍾意睇MD同DD的sweet-sweet愛情故事XXXD

      刪除
  5. 幾套我都覺得唔啱睇喎

    回覆刪除
    回覆
    1. Woody Alan作品我都ok嘅,尤其舊果D我有些以前都有買碟,不過今次喱套我覺得一般,好似平淡得滯無乜亮點

      刪除
  6. 一連看了兩套,我會很攰,所以未試過。
    睇電影又的確有吸引之處,我也曾喜歡過。

    回覆刪除
    回覆
    1. 因為好多時都要去D比較遠的戲院先睇到喱類偏門少少的戲,咁一場出到去就一次過睇晒佢囉,唔駛搭車搭來搭去浪費左時間嘛(最主要原因係我好怕搭車塞車):P

      刪除
  7. 其實歐美也有不少B級C級製作嘅爛片!

    回覆刪除
    回覆
    1. 其實B,C級片製作得好或者題材夠特別,有些都有觀賞價值,以前塔倫天奴果D都係拍B,C級片起家,有啲劇本故事夠觸動人心,即使唔用大明星一樣吸引,其實有好多歐洲演員我都唔係好識但有好多都做得好好^^

      刪除
  8. 逐套戲慢慢講啦,咁淡淡然係你心境呀?

    回覆刪除
    回覆
    1. 咁麻煩費事啦,遲啲學你剩係貼幾張相就收工XXXXD

      刪除
    2. 本性難移啦基伯,kaka...

      刪除
    3. 噢!呢度有雀仔,唏,淡出來的!

      刪除
    4. 東本願寺出面白色果隻呀?!XXD

      刪除
    5. 汁..滿瀉喇!大懶虫懶到丫...

      刪除
    6. 最衰啲人post咁多沙洲靚景相出來,掛住睇仲邊得閒寫喎XXXXD

      刪除
  9. 嘩,免費戲,又可以輕輕鬆鬆過一天,一個字~~~~~「正」~~~~
    哈哈哈

    回覆刪除
    回覆
    1. 其實唔係咁正㗎咋,有啲本來都無諗住會睇嘅:P

      刪除
    2. 輕鬆一下嗎,哈哈哈
      見到你的 blog post 少了,估到你好忙啦!

      刪除
    3. 也不太忙,還經常有去巡blog....XXXD

      刪除
    4. 好似巡舖一樣,哈哈哈

      刪除
    5. 對,真係乜舖頭都有,好精彩wakakakakaka....

      刪除
    6. 我鍾意睇人地果啲多過自己寫kakakaka.....:P

      刪除
    7. 我蛇過來探您,原來還沒有 update,哈哈哈

      刪除
    8. 這個真是好有理由的理由囉!哈哈哈

      刪除
  10. 看標題以為基爾要分享自家愛情故事.
    原來是電影影評!!! ^^

    回覆刪除
    回覆
    1. 暫時我就好似未見過有blog友分享喱方面話題喎,如果有我都好想睇睇wakakakakakaka.....

      刪除
  11. 三齣電影都吸引不到我!

    回覆刪除
    回覆
    1. 我都估到係唔啱你杯茶:P
      咁近排阿摩有冇啲咩好的早場推介?^^
      有冇睇Julieta?

      刪除
    2. 最近只看了《七月與安生》!

      刪除
  12. 基絲丁最出名是吸血新世紀和美貎 ... 演技信會進步的!
    我睇到離場的是一齣鏡頭搖得勁厲害的, 不過忘了戲名 ...
    上錯菜太離譜拿回去換嘛 ...

    回覆刪除
    回覆
    1. 喱兩套戲中又唔算係好美咋喎,而且無乜演技發揮:P
      好怕睇Handheld果啲戲,真係頭都暈,想噁XXXD
      太多人,場面混亂,都係食完即走人

      刪除
  13. APM吉野家我好熟啲姐姐,落錯單佢地可以重新做過,若你唔介意等下,無入戲院郡成兩三年,消費唔計...遇上難片先至大煲😕😕

    回覆刪除
    回覆
    1. 搞錯😂😂
      原來你喺去咗圓方睇...

      刪除
    2. 當天太多人,場面混亂,坐位也不舒服,食完快快走人好啲.....喱間分店應該不會再幫襯佢!
      通常真係自己好有興趣先會去買飛,我都好少入場!通常都會揀啲人少的戲院或靜少少的場次,好怕受隔籬左右滋擾:P
      第一齣果套係去圓方,第二果套去apm,第三就去BC...wakakaka!

      刪除
    3. 我亦好明白!太多人唔喺問題,管理做得差先衰,依家食肆做服務啲人都唔知搞乜,無禮貌預咗,態度仲極差,之前喺isquare夢見屋食嘢,嘩!經理十問九唔應,侍應生呀崩叫狗,買蛋糕唔准揀,仲惡形相向,我都唔會再去喇!

      刪除
    4. 請到垃圾留言檢視
      我的留言!

      刪除
    5. 可能留言寫得長咗啲,被送到你垃圾留言箱,google系統真喺唔掂,唔識分辨。
      上次亦喺咁...😧

      刪除
    6. 我都試過個留言可能長,被掉進垃圾留言中,好多謝你提返我,已經重新救了出來^^
      從事服務行業首要條件是EQ要好高,條氣幾唔順都不能向顧客黑面,如果做唔到我諗都要轉行了.....
      不過做客人有時都要體諒一下,人客太多時啲staff有時真的兼顧不來,最緊要互相尊重^^
      總括而言,為免有hard feeling,都真係避免光顧啲旺場地方,反正HK選擇仍多

      刪除
    7. 當然喇,侍應生好辛苦,我盡量都包容,將心比己,喺好重要。
      你有無訂購香港孫中山紀念郵票?

      刪除
    8. 對,服務行業真係唔係人人做得來^^
      同埋出街食嘢買嘢都係想開心,唔係要搵交嗌wakakaka...
      當然有,說是150周年紀念,所以在年頭的訂單一早就有預訂這個了

      刪除
  14. 你就好啦有免費飛睇戲~~我勁鐘意睇戲~~
    好彩無去睇國定殺6日~~~~之前諗住睇的~~~
    頂!!!!!!!!!!你都有睇鯊海22小時!!!!!!!!!!!!!!!!!!又係我人生中第一割凳級之作!!!!!!!!!!!!!!!!!!!!!!!好開心有人同我有共鳴...呢套爛得不能再爛..睇完仲有暈船浪之感

    回覆刪除
    回覆
    1. 我就唔多機會去睇,一般都係好有興趣先會的起心肝買飛入場:P
      只係唔係我杯茶,如果鍾意睇暴力血腥類型片可能會覺得過癮,至於我就覺得有點悶,因為通常喱類戲都無乜劇情可言,又或者一早估到結局係乜!
      鯊海我記到依家,證明佢係幾經典垃圾片...wakakakaka!
      前幾日電視重播有機會睇返Conjuring第一集,我都覺得比想像中差,但唔知點解咁多人覺得恐怖和好好睇?我覺得氣氛上比Exorcist差好遠,有D場面甚至兒戲得搞笑,有點破壞了恐怖氣氛XXD
      另外J2仲有重播殭屍,睇咗一半太眼瞓就無睇落去,之前聽聞特技做得唔錯,不過前半部節奏有點過慢,而且人物似乎也太多,好多時間花了在交代人物關係上,間接減損了恐怖氣氛,恐怖驚慄片始終都係故事主線佈局越簡單,越多突如其來的驚嚇位就越發揮到恐怖效果,係咪?

      刪除
    2. 你有飛睇喎~咁先威威~不過依家睇戲越黎越貴...所以我都要揀黎揀去先睇~
      我有諗過去睇架~因為之前睇哥套小丑女好好睇好過癮~
      我同毛寶對鯊海亦是不能忘懷...記到家陣~
      我唔睇恐怖片架~~驚驚~~~~
      我查實有去戲院睇殭屍架...不過成套戲我都係食熱浪同埋me埋眼~~~但都有俾佢嚇親~~俾d音樂嚇親~~~~~嚇屎我喇~

      刪除
    3. 通常都是一些不太熱門的戲,間中有啲都啱睇.....
      Suicide Squad我又無睇喎
      鯊海完全係超低成本製作XXXD
      通常睇恐怖片都係畀佢突然而來的聲效嚇親,多過畀鬼嚇親:P

      刪除
    4. 黎緊有幾套戲我都好想睇~~~
      Suicide Squad唔錯~小丑女太可愛~
      又唔係架~~~~人地要特技整鯊魚架嘛~~~
      其實兩樣都會嚇親我~~~wakakaka我好無用~

      刪除
    5. 咦,回來了?^^一定玩得好happy!!
      果隻鯊魚都睇唔清,唔知係乜XXD

      刪除
    6. 即係條鯊魚可能係紙皮做架XD

      刪除
    7. 紙皮落水我諗會溶喎.....我見佢膠膠地應該係膠做嘅XXXD

      刪除
    8. 痴線架我地真係~~~~~~~~~~~~係喎...我忘了套戲條鯊魚有無現真身架~~
      喂~你懶左好耐喇喎!!差唔多成個月!!

      刪除
    9. 我只記得個鏡頭係咁fing來fing去,都無一個鏡係睇清楚條鯊魚,只見好多水花同爭扎XXXD
      嘩~~~~~係喎你唔講我都忘記,咁快又過一個月了

      刪除
  15. wowowow, 鎮定鎮定。。。 XD XD

    回覆刪除
  16. 電影情節十分影嚮人的心情和胃口, 我很久沒有看電影了

    回覆刪除
    回覆
    1. 對呀,所以要揀自己喜歡的題材....
      加國依家睇戲一般係幾錢左右?

      刪除
    2. 星期二特價7元加仔, 平時加5元, 3D再加3元, UltraAVX 3D再加5元.

      刪除
    3. 7蚊加紙都算平喎,幾抵睇

      刪除
  17. "淡淡然的愛情味道"??
    乜Gael厭啲劇情淡而無味咩?
    咁...下次咪叫人畀啲重口味/鹽花多啲...嘅果類戲才畀飛乜你睇囉!:P

    回覆刪除
    回覆
    1. 唔通Kaka偏愛重鹽花果啲?!!XXXXD

      刪除
    2. "淡淡然的愛情味道"....好似係你寫出嚟架喎!XXXXD

      刪除
    3. 等我以為你話鈡意鹽花XXD

      刪除
    4. Ka Ka like lemon & 法國大餐~「多嚿魚」!!

      刪除
    5. Ka Ka go in ~ Ka Ka 高見
      Ka Ka sharp ~ Ka Ka 索
      Ka Ka sing ~ Ka Ka 醒
      Ka Ka king ~ Ka Ka 勁
      Ka Ka moody dink ~ Ka Ka 無得頂

      大夫is great friends of Ka Ka
      Ka Ka 仲成日请我食lemon &
      法国大餐Ka Ka話多乜舊魚wor !

      刪除
    6. 大夫:下次再揾到啱你口味的....再請你食吓....XXXXD
      Gael:駛唔駛預埋你一份呢又?wakakakaka...........

      刪除
    7. 由東涌走到大澳,在深屈村探我,
      在海湾边食本地沙葛,沙白,我請 !

      刪除
    8. 唔駛啦你地慢慢食啦~~~~~:P

      刪除
  18. KStew 梗係紅啦,D八婆新聞成日都有佢份,Twilight系列之前佢係童星,響Panic Room裏面做Jodie Foster個女,較近期又有做過「俠女」白雪公主(唔記得戲名)。不過最出名既係佢個resting bitch face,以前細個成日都有人咁話我,而家發現原來好多人都係咁,哈哈!

    回覆刪除
    回覆
    1. 咦~~~~~咁計落佢原來都拍過唔少戲喎!!!不過都係拍完Twilight升做女一才較受注意吧!白雪公主我都無睇:P
      kakakakaka....不過我諗你依家應該改善咗好多,至少朝聖路上大部份人都覺得你好nice同你傾偈

      刪除
    2. 11月9日之後哀悼3日,今日終於提起精神重出江湖。「改善」?哈哈,應該都係,出來做事要識撈嘛。提起Woody Allen,我都幾欣賞Midnight in Paris,另外最近借左To Rome With Love來睇,最大驚喜反而係扮Woody老婆果位演員,好有喜劇感。

      刪除
    3. 有時要識撈都係啱嘅,唔係要好圓滑好世界,但適度的待人接物態度都係要學懂,這樣做人做事都會順利好多煩少好多^^
      巴黎果套拍得幾靚,加上啲懷舊味同個景好夾,穿梭時空手法也很特別,羅馬反而我沒看,有機會才在電視看吧!

      刪除
    4. 話時話,呢套Equals,之前聽都無聽過,懷疑響澳洲無上過,直接出DVD,好似Nicole Kidman果套劣作 Grace of Monaco 咁。Café Society我都有興趣,遲下響 iTunes 租。講開 iTunes,上個禮拜租 The Danish Girl,點知原來 data唔夠,睇唔到結局,慘!

      刪除
    5. 卡士弱少少,有點低成本製作feel,我諗應該即使上都不會有太多戲院會上吧!!!:P
      話時話Nicole Kidman好似近排都無乜矚目新作....
      如果有睇開Woody,喱套都可以一看,但不要抱太大期望,因為不算出色之作....
      嘩~~~~~~咁真係好慘,DG我都係只睇了網上濃縮版,個結局記憶中男主角變性手術失敗死了,佢老婆有陪佢離世

      刪除
  19. 回覆
    1. 這些應該不會有人有興趣看吧XXXD

      刪除
  20. 最怕睇嚇人戲 , 明知係假但都被嚇到0既 .

    回覆刪除
    回覆
    1. 成日突然間彈出來的最驚嚇XXXD

      刪除
  21. 嘩'我真係唔識欣賞呢啲戲,感覺上有啲悶!

    回覆刪除
    回覆
    1. 三套都唔算拍得特別出色,不看也沒大損失

      刪除
  22. Kristen Stewart種1號表情式演技真係經典!

    回覆刪除
    回覆
    1. 同意,佢好啱做果啲無乜表情要求的戲,Equals果套其實都好啱佢演XXXD

      刪除
  23. 咦!基爾好耐無寫過影評噃!
    我出發去中東前都睇過很少有戲院上畫,由湯漢斯主演叫“沙地阿拉發”,我都係因為湯漢斯才姑且一看,可惜睇完後,才明白無戲院上畫的原因了。

    回覆刪除
    回覆
    1. 依家無乜嘢寫咁又寫返撐下場囉XXXD
      喱套我都無睇喎,係咪好藝術好思考性果隻wakakakaka...

      刪除
    2. 乜都唔係,都唔知想講表達D乜

      刪除
    3. XXXD咁又奇,佢近年好少再拍爛片:P

      刪除
  24. 往日喜歡買影碟看西片,因為懶出街。真係好好奇才會出去看一場。
    曾在TVB的明珠台,看「賓虛」,睇到半夜 3 點。誰知睡著了,看不到結尾。
    有時看到的電影好無意思,真係浪費時間。

    回覆刪除
    回覆
    1. 我也是,而且戲飛依家都幾貴,真係好想睇先會去睇,同埋會揀平啲嘅早場:P
      嘩,要睇到3點我都無咁好精神,一定會瞓著XXD

      刪除
  25. 淡淡然的愛情味道…… 比濃情蜜意更好?

    回覆刪除
    回覆
    1. 最理想當然係兩者兼備囉wakakakaka.....

      刪除
    2. 理想同現實會有距離吧XXD

      刪除
    3. 或者有時係觀點角度問題。好似一對公公婆婆,每天手牽手散步,他們感覺到的好可能是濃情,但外人看卻感到平淡…… 要在平淡細節中滲出濃情,並說服到外人,好考演技同導演的表達和處理…… 有些人的性格會容易handle ,但有些人是難的,所以選角,不是單看外表,還要看個性、潛能…… 倒是一門學問。

      刪除
    4. 對,所以說演員也是藝術家,即使沒有對白依然能感覺觀眾的,確實不是人人能做得到,也是專業和業餘、有天份與沒有天份的分野^^

      刪除
    5. 唔知点解會自然諗起梁朝偉……

      刪除
    6. 近年好少睇佢啲戲,可能佢要幾年先拍一套戲XXXD

      刪除
    7. 咁D演技會唔會…… 漸漸生疏?或者佢其實已經退咗休……

      刪除
    8. 應該唔會,拍王導啲戲一拍就拍幾年,好好鍛煉就真hahahaha...

      刪除
  26. EQUALS 如果連床戲都悶到乏味,除了要櫈外,一些助語詞是免不了。
    Purge 有時睇戲好矛盾,如果劇情唔掂都希望有些觀能刺激去滿足下自己,去相信套戲都有可取處。
    Cafe Society 好buy你講的一句,得不到的可能最有fantasy.

    回覆刪除
    回覆
    1. Wakakakakakaka......一向覺得你係好斯文唔會立亂講助語詞㗎喎:P
      對,至少覺得好似抵睇啲同埋唔會瞌眼瞓囉XXXXXD
      一向都係㗎喎,冇果啲會恨有,有又會不懂珍惜吧

      刪除
    2. 有時睇情況都會爆粗,舒緩一下都健康啲。有次睇完戲都爭啲都要櫈可惜係木櫈。
      三套當中似乎CS稍能觸動基爾情感。

      刪除
    3. 乜仲有木櫈咁有懷舊味^^
      相比起另外兩套而言吧,似是有多一點發人深省

      刪除
  27. 一日睇三場戲你真好精神 .

    回覆刪除
  28. 太悶肥人都絕對會訓著左....哈哈!
    但我愛睇愛情戲...HAHAAAAAA
    太驚嚇反而唔OK...
    近年入親戲院都係睇卡通, 陪班小朋友睇..哈哈!

    回覆刪除
    回覆
    1. 如果太累就避免睇戲囉,黑暗環境特別容易睡著XXXD
      愛情片你多數同老公仔去睇啦一定^^
      太驚嚇我都唔得太like
      間中我都睇卡通片喎,你有冇睇你的名字?近排好hit....

      刪除