2016年12月6日 星期二

文物探知館@九龍公園

眨下眼2016年又來到12月,雖然老土但真心覺得「光陰似箭」,睇返全年原來只寫了30幾篇blog(無外遊+行山影相也少),係時候要寫返多D無謂野撐下場!



講返之前某日請假,因為要去一趟花旗領事館,發現原來好旺場(勁多強國人),結果要輪成個幾兩粒鐘先搞掂,擺低passport即閃。



反正之後無野做就閒蕩返去天星碼頭,當天剛好舉行完Formula-E,碼頭外的觀眾席仲未拆,因為唔知仲會唔會搞第2屆所以都順手影張相留念。



之前原本都諗住順道去逛逛碼頭旁這間海事博物館,但唔知點解次次都忘記了,今次都唔例外又係上了船才醒起,咁唯有再等下次。



基爾係個好憎塞車的人,如時間許可都盡量揀搭船過海,實際花的時間其實也差不多,但就真係舒服好多,享受多點海闊天空!



過到尖沙嘴咁又去行行九龍公園的文物探知館,依家去博物館完全唔駛錢(專題展覽除外),而且閒日去真係超級少人,幾乎係包場睇展覽!



基爾應該唔係第一次來這間探知館,但對館裏的陳設和展覽差不多是零印象……由於是古蹟活化,展廳入面的間隔都比較細,要遷就保留原建築舊貌,收藏的展品也不多。



老實說文物探知館有很多文物藏品與歷史博物館或文化博物館大同小異,欠缺了特色和新鮮感,有點浪費了這座珍貴保育下來的古建築。



由於館內藏品實在無乜好影(其實無乜人又可以任影唔嬲),反而建築物本身很值得仔細欣賞,間中仲可以玩D平時好少用的攝影技巧。



各展廳中基爾覺得挺特別的就是上圖這個復刻版電車車廂,車窗外有段模擬播放的百年前舊中環街景,坐在車廂內真有點時光倒流一百年feel。



真係好想問叮噹借時光機去返昔日中環玩下穿越Somewhere In Time,恍如置身歐洲老城區一定會好過癮,可惜舊建築大部份都已在70-80年代拆卸,實在可惜!Anyway,這段「電車越空之旅」可說是全館的亮點。



除了中環之外,山頂同樣有好多歐陸大宅星羅棋佈,正如影片的caption咁講:「恍如置身外國一樣」。



至於上面喱間房仔望落有D詭秘,其實係玩遊戲的,用圖中圓柱那個操控桿將畫面上一幢幢舊建築配對返去地圖的正確位置,比較適合小朋友玩。



行返出走廊位有處地方擺放了一個展示鋪砌傳統中式瓦頂的模型,防漏雨的設計顯示出古人的智慧。



基爾覺得全間館最靚就係這個小庭園,每次來都要逛一陣坐一陣先捨得走,這天weekday遊人也只小貓兩三隻,想感受下在富豪大宅花園裏hea坐看看書有幾悠閒,不妨來這裏。



博物館昔日是英軍兵房,庭園裏這些老榕樹想必也有逾百年歷史吧!看它的老樹盤根已覺得充滿歷史滄桑味道。



庭園旁邊一處小角落展示了正進行重修工程的藝術館,開返之後唔知會有D咩新鮮野睇下呢?



臨走前仲去參觀埋佢個洗手間,裝修陳設同樣好有懷舊味,好耐沒見過這種傳統旋轉式開關的水龍頭。



原本來這裏係想八下仲有冇景賢里的開放日門票,答案當然係一早派晒!之後出返九龍公園,再行埋過去擺放動漫人物那邊……



印象中之前都有路經這裏,卻是第一次為這些卡通人物雕像拍照片,牛仔這pair夠經典又溫馨。



上面喱個「壽星仔」都好熟口熟面喎!仲有好可愛的麥兜,都幾受小朋友歡迎,係咪好多人已同佢合照過?



一支公有時靜靜地無無聊聊咁四圍閒蕩遊公園,同小天使確實也有點相似……樂得逍遙!

65 則留言:

  1. 難得的悠閒,以後多點出blog啦 。

    回覆刪除
  2. 乜仲有咁多人要去投靠外國勢力? XD

    回覆刪除
  3. 呢排去博物館好呀,全部免費 ;-)

    回覆刪除
    回覆
    1. 吸引多啲人去參觀都係好事,反正啲燈油火蠟人工都係要畀XXD

      刪除
  4. 悠閒遊,真係要多的享受吓!

    回覆刪除
  5. 我係咪發夢呀!!!咁快又有一篇新blog~~~~~
    係喎~遲d去美國旅行呀??我都想用本特區護照簽美國簽證~但成日都好懶唔想閒日請假過黎~

    回覆刪除
    回覆
    1. 寫埋晒啲無聊嘢希望無令你發惡夢wakakakakaka....
      準備隨時走佬丫嘛XXXD
      係喎如果用你本葡國passport去駛唔駛簽㗎呢?慳返千幾蚊抵喎如果得....

      刪除
  6. 我今年都寫少咗.
    九龍公園去過幾次, 就無入文物探知館, 下次去先. 多謝介紹.
    我都未去景賢里

    回覆刪除
    回覆
    1. 其實都正常嘅,畢竟依家寫blog人都少咗,好多blog友都陸陸續續宣布唔寫光榮引退wakakakaka.....
      無去過咁要搵次去行下啦,展品雖然無乜好睇,但齋參觀間古建築物都係好值得一遊嘅!
      景賢里一年開得果一兩次,有點浪費公帑

      刪除
  7. 當年為左郵票展去過文物探知館,都係好耐之前既事...
    70-80年代中環堅靚,留到而家申請入世遺一定冇問題~
    Gael大大準備去花旗國?

    回覆刪除
    回覆
    1. Really~~~原來仲搞過郵票展,我竟然錯喎了....@@
      靚呀,睇返啲舊片段好有歐洲味道,靚過上海外灘
      襯得閒攞定先啫

      刪除
  8. 今日都好忙碌喎。 攞左visa 就會有個美加行?

    回覆刪除
  9. 我好中意九龍公園,因為有雀仔睇,又有花睇,仲有公仔睇,哈哈!

    回覆刪除
  10. 我日日都係尖咀都無行過呢D 地方添, 真失敗!

    回覆刪除
    回覆
    1. 地方其實都幾清幽,有空不妨去走走^^

      刪除
  11. 九龍公園都成日行,香港漫畫家同埋主角都攞咗好耐,啲主角好殘舊,
    最近終於換咗新,但無去過探知館...
    至like坐小輪天呈or新渡。

    回覆刪除
    回覆
    1. 美國...依家極不歡迎中國遊客的地方,簽証費要千幾蚊...貴到唔合理。當年老豆去美加探親加埋旅行,記得只喺幾蚊美金,批唔批都要相金先謂,但大使館話今日唔批可以第二即刻再去過,又或者會批喎,個証可以3個月或者10年有效,仲奇怪...簽咗証唔代表你一定可入境。

      刪除
    2. 掂喎路霸哥,你咁樣分開兩段留意,一定唔會「被消失」^^
      係呀原來果啲公仔雕塑係會定期替換.....@@我都無留意,只記得步驚雲同麥兜係長駐!!
      支持下D渡輪啦,驚佢會被淘汰:P
      吓~~~~乜原來簽咗證都唔一定可以入境?!!@@

      刪除
    3. 喺喎...你之前去過美國架...
      可否入境最後決定權在美國本土入境人員手上,簽證唔代表乜嘢😕😕

      刪除
    4. 口水多多為有分幾段...😂😂

      刪除
    5. 沒去過呢....所以唔知原來是這樣:P
      對~~~~這樣留言就不怕無端被消失!!!

      刪除
    6. 唔係架! 可以全部消失!

      刪除
    7. 喺呀...
      我去過美國門口...關島,由於免簽證,仲煩...
      啲關員以為自己喺上帝,但其實個個都喺痴肥,兼無禮貌,
      佢話乜你都要照做,一定要俾銀包佢睇,裡面多錢又問你點解帶咁多錢,想非法逗留,少又話你帶咁少,想喺度搵食,總知好似當你非法入境美國本土,但對日本人、韓國人就nice到爆,以後亦不會再去。

      刪除
    8. 聽聞話留言短啲,被消失的機會係細啲嘅^^

      刪除
    9. 我最近一则留言1!!! 消失了😅

      刪除
    10. 我去摷過垃圾桶,又唔見有你留言喎.....

      刪除
  12. 有段模擬播放的百年前舊中環街景,咁要去睇下囉!老太婆懷舊o既。

    回覆刪除
    回覆
    1. 建議你著晒成套古著兼梳埋個古裝髻扮成JaneJaneSeymour去自拍一下,定必搶鏡XXXD

      刪除
    2. 你想扮既就唔好搵個唔想扮o既喇!

      刪除
    3. 諗住佢同你同名三分親丫嘛.....

      刪除
  13. 我覺得呢個博物館同歷史博物館主題重複咗.

    回覆刪除
    回覆
    1. 感覺上好似歷史博物館擺唔晒,就揀啲擺來喱道咁囉!!!!
      其實可以做啲更專門的展覽,例如紅酒博物館,電影博物館之類,又可以定期搞啲專題藝術展,感覺上無咁浪費咗個場.....

      刪除
  14. 居然有壽星仔同牛仔,上次去九龍公園都睇唔到!

    回覆刪除
    回覆
    1. 上面有blog友話原來係會定期更新啲公仔喎,你快啲去同壽星仔合照返張啦XXD

      刪除
  15. 我去花旗國可以用ESTA登記,唔使攞簽證,不過Dumb Trump一日在位,我都唔會踏足呢個地方。另外,悉尼Strand Arcade購物中心頂樓個廁所以前都係咁有懷舊味道,不過經常好侷促一陣臭味,後來裝修過現代化嗮。

    回覆刪除
    回覆
    1. 你地係緊密戰略盟國,簽唔簽證好易話圍嘅wakakakaka....
      有冇去行過Rocky Mountain?
      我只去過QVB,但忘了去它的廁所參觀,只看過那古董升降機

      刪除
  16. 寫30幾篇blog !? 對比你高峯時期 @ 又真的少咗一点 >.<
    幸好 Sky 此你寫多少少 @ 現時有 49 篇blog ^^

    回覆刪除
    回覆
    1. 係呀無去旅行咪自然無咁多嘢要寫:P
      你勤力好多,寫多啲分享下^^

      刪除
  17. 一個人去邊都得........真係幾寫意呢~!!

    回覆刪除
    回覆
    1. 都驚個人變得太獨家村,間中都要搵個伴嘅wakakakaka....

      刪除
  18. 行程唔錯呀 , 我很久沒有到這裡睇嘢了 .

    回覆刪除
    回覆
    1. 依家唔駛入場費,入去行下坐下都ok丫^^

      刪除
  19. 搭船過海,我都鍾意呀!
    咦! 你提醒我都要快D打blog先得,我花旗國油雞未打呀!

    回覆刪除
    回覆
    1. 係呀你真係要加加油快手啲,我等到頸都長晒,想睇@@

      刪除
  20. 入到來又知道好多嘢。美國這幾年來都在關卡查很嚴謹,早十年前的免費遊都不去,以後也沒有什麼與趣去了。

    回覆刪除
    回覆
    1. 係呀我最怕,好鬼煩,所以盡量都不去了

      刪除